MEKƐ mɔɔ Nrelenza ɛsɔfo William Bedell hɔle Ireland wɔ 1627 la, ɔyiale tɛnlabelɛ mɔɔ kye adwenle ekyii la. Irelandma mɔɔ Protestantma mɔɔ wɔ Britain a sie bɛ la anu dɔɔnwo le Katelekema. Ɛnee Protestantma mɔɔ fa nzenzaleɛ ba la ɛlimoa ɛhile Baebolo ne abo ɛhɔ aneɛ dɔɔnwo mɔɔ bɛka ye wɔ Europe la anu. Noko ɛnee ɔzɔho kɛ awie biala ɛngulo kɛ ɔbahile Baebolo ne abo yeahɔ Ireland aneɛ nu.

Ɛnee Bedell te nganeɛ kɛ ‘ɔnle kɛ bɛbu bɛ nye bɛgua Irelandma anwo zo kɔkpula kɛ bɛkɛzukoa Nrelenza aneɛ ne la.’ Ɔvale ɔziele ɔ nye zo kɛ ɔkile Baebolo ne abo yeahɔ Ireland aneɛ nu. Noko Protestantma dwazole tiale ye ɛsesebɛ. Duzu ati ɔ?

Bedell bɔle kpɔkɛ kɛ ɔbazukoa Irelandma aneɛ ne. Mekɛ mɔɔ ɔrayɛle kpanyinli wɔ Trinity College mɔɔ wɔ Dublin nee Kilmore ɛsɔfo kpanyinli la, ɔmaanle ye sukoavoma ne anwosesebɛ kɛ bɛha Ireland aneɛ ne. Nɔhalɛ nu, mekɛ mɔɔ Ɔbahyema Elizabeth I wɔ England dele Trinity College ne la, ɛnee ye bodane a le kɛ ɔbanyia azonvolɛ mɔɔ bɛbahola bɛahilehile menli ne Baebolo nu edwɛkɛ wɔ bɛ aneɛ nu la. Bedell bɔle mɔdenle yɛle ye zɔ.

Wɔ Kilmore maanzinli ne anu, ɛnee menli dɔɔnwo ka Ireland aneɛ. Yemɔti Bedell zile zolɛ kɛ ɔkpondɛ azonvolɛ mɔɔ kola ka Ireland aneɛ ne la. Ɔhanle edwɛkɛ ɛhye mɔɔ ɛzoanvolɛ Pɔɔlo hanle ye wɔ 1 Kɔlentema 14:19 la bie kɛ: “Saa yɛyia nuhua kɛ yɛsonle a, menwɔhulo kɛ menwɔha edwɛkɛ agbɔkɛ nnu mɔɔ menli te ɔ bo la, amaa meava meahilehile awie mɔ, tɛla kɛ menwɔha edwɛkɛ agbɔkɛ apenle ngoko bulu wɔ aneɛ ngakyile nu mɔɔ awie ɛnrɛde ɔ bo la,” kile kɛ, wɔ aneɛ mɔɔ bɛnde ɔ bo kpalɛ la anu.

Noko mgbanyima bie mɔ bɔle mɔdenle biala kɛ bɛmaa yeagyakyi. Tetedwɛkɛ kɛlɛvoma bie kile kɛ, bie mɔ hanle kɛ Ireland aneɛ ne “bayɛ esiane amaa Maanle ne” na bie mɔ noko zuzule kɛ “ɔtia Arane ne boɛyɛlɛ.” Bie mɔ dele nganeɛ kɛ Englandma kulo kɛ bɛbu bɛ nye bɛgua Irelandma anwo zo. Nɔhalɛ nu, bɛlile mɛla kɛ ɔwɔ kɛ Irelandma kpo bɛ aneɛ ne nee bɛ amaamuo amaa bɛazukoa Nrelenza na bɛabɔ bɛ ɛbɛla kɛ Nrelenzama la.

Mɛla ɛhye mɔ anzi Bedell adenle. Wɔ 1630 mɔlebɛbo, ɔbɔle ɔ bo kɛ ɔkile Nrelenza aneɛ Baebolo fofolɛ mɔɔ bɛye (King James Version of 1611) la abo yeahɔ Ireland aneɛ nu. Ɛnee ɔkulo kɛ ɔyɛ Baebolo mɔɔ menli dɔɔnwo ne ala te ɔ bo la. Ɔdele nganeɛ kɛ saa bɛkeda Baebolo ne azo a ɔbayɛ se kɛ ehyiavolɛma bahola anleɛnlea Ngɛlɛlera ne anu anwu dahuu ngoane adenle ne.—Dwɔn 17:3.

 Tɛ Bedell a limoale nwunle ɛhye a. Ɛvolɛ kɛyɛ 30 mɔɔ ɛze la, William Daniel mɔɔ ɔdaye noko ɔle ɛsɔfo kpanyinli la, nwunle kɛzi ɔyɛ se kɛ awie bɛazukoa mɔɔ Baebolo ne kilehile wɔ mekɛ mɔɔ “ɔwɔ aneɛ mɔɔ bɛnde ɔ bo la anu la.” Ɛnee Daniel ɛhile Kilisienema Giliki Ngɛlɛlera ne abo ɛhɔ Ireland aneɛ nu. Akee Bedell vale ziele ɔ nye zo kɛ ɔkile Hibulu Ngɛlɛlera ne abo. Bedell gyima ɛdeɛ ne nee William Daniel gyima ne mɔɔ ɔlimoale ɔyɛle la a ɛnɛ bɛfɛlɛ ye Bedell Baebolo ne la. Mekɛ hɔle bie la, Bedell Baebolo ne—Baebolo mɔɔ bɛlimoale bɛyɛle wɔ Ireland la—a le Baebolo kokye mɔɔ bɛhilele ɔ bo wɔ Ireland aneɛ nu mɔɔ bɛva bɛli gyima wɔ ɛvolɛ 300 anu a.

Bedell mɔɔ le Hibulu nwomanli la vale menli nwiɔ mɔɔ ka Ireland aneɛ ne la amaa bɛaboa bɛamaa bɛahile Nrelenza bo bɛahɔ Ireland aneɛ nu. Mekɛ mɔɔ bɛgua zo bɛlɛyɛ bɛ gyima ne la, Bedell maanle sonla ko anzɛɛ menli nwiɔ mɔɔ ɔdie bɛ ɔdi la boale ye na bɛnleɛnleanle ngyɛnu biala anu bɛyɛle ye boɛ. Bɛyɛle neɛnleanu wɔ Italy edwɛbohilelɛ mɔɔ Switzerlandnli Giovanni Diodati mɔɔ sukoa asɔne nwo debie yɛle, nee Giliki Septuagint yɛɛ Hibulu Baebolo bɛsanloangɛlɛlera dɛba bie anu.

Ekpunli ne lile King James Version edwɛbohilelɛma (ɔbayɛ kɛ Bedell ze bɛ nuhua dɔɔnwo) anzi na bɛvale Nyamenle duma ne bɛwulale ɛleka dɔɔnwo ne ala wɔ bɛ Baebolo ne anu. Kɛ neazo la, wɔ Adendulɛ 6:3, bɛhɛlɛle Nyamenle duma ne “lehovah.” Bɛva Bedell mɔlebɛbo bɛsanloangɛlɛlera ne bɛzie Marsh Library, wɔ Dublin, Ireland.—Nea ɛlɛka “Bɛliele Bedell Bɛdole Nu Na Bɛhakyele Ye.”

Bedell wiele ye gyima ne kɛyɛ 1640. Noko yeangola yeanye ye ɛkɛ ne ala. Kɛmɔti ɛ? Ɔyiale dwazotia mɔɔ anu yɛ se. Tendɛtiama dendɛle tiale Bedell mɔɔ le edwɛbohilelɛ kpanyinli la na bɛambu ye gyima ne bie. Bɛhyele ye atisesebɛ nu na bɛdole ye efiade. Yeanga ye zɔ, menli mɔɔ te Nrelenzama anwo atua na bɛ ti yɛ se la dwazole wɔ 1641. Irelandma bɔle Bedell anwo bane ɔnva nwo kɛ ɔka Nrelenza la ɔboalekɛ bɛnwunle kɛ ɔdwenle bɛ nwo kpalɛ. Noko, awieleɛ ne, sogyama mɔɔ te atua la dole ye efiade wɔ tɛnlabelɛ mɔɔ ɛnle kpalɛ fee la anu. Ɛhye maanle ɔwule ndɛ wɔ 1642. Yeannwu kɛzi ye gyima ne yɛle la.

Ɔhale kyɛkyɛ na ye gyima ne aminli wɔ mekɛ mɔɔ bɛzɛkyele ye sua nu ninyɛne la. Ɔ gɔnwo bie bɔle mɔdenle vale ye mbuluku mɔɔ ɔhilele ɔ bo la ziele. Nzinlii, Narcissus Marsh mɔɔ rayɛle Armagh ɛsɔfo kpanyinli nee Ireland Asɔne ɛsɔfo kpanyinli ne asa hanle ye. Abɔdeɛ nwo nrɛlɛbɛvolɛ Robert Boyle vale ezukoa boale ye na ɔnyianle akɛnrasesebɛ ɔyele Bedell Baebolo ne wɔ 1685.

Bɛanye Bedell ayɛlɛ wɔ ye Baebolo ne anwo wɔ ewiade amuala. Noko, ɔle debie mɔɔ anwo hyia mɔɔ maanle bɛdele Baebolo ne abo kpalɛ, titili menli mɔɔ ka Ireland aneɛ—tɛ Irelandma angome emomu Scotlandma nee ɛleka dɔɔnwo. Kɛkala bɛkola bɛbikye Nyamenle ɔlua Nyamenle Edwɛkɛ ne mɔɔ bɛkenga wɔ bɛ aneɛ nu la.—Mateyu 5:3, 6.

Bedell Baebolo ne ɛhɔ zo ɛboa menli mɔɔ kulo nɔhalɛ ne la ɛmaa bɛyɛ zɔ badwu yɛ mekɛ ye azo. Ireland tendɛvolɛ ko mɔɔ kenlensa ye ala ɛzukoa mɔɔ Baebolo ne kilehile amgba la ka kɛ: “Saa yɛkenga Bedell Baebolo ne a, yɛte edwɛkɛ ne wɔ yɛ aneɛ nu. Ɛhye le debie titili mɔɔ ɛbuke adenle ɛmaa me nee me abusua ne ɛzukoa nɔhalɛ edwɛkɛ ne mɔɔ yɛ nwanwane mɔɔ wɔ Ngɛlɛlera ne anu la.”