SAA ɛkenga edwɛkɛ nwiɔ ɛhye a, boni a ɛdie ɛto nu a? Menli dɔɔnwo ɛnwu kɛ Sɔɔlo mɔɔ vi Taasɛse mɔɔ eza bɛfɛlɛ ye ɛzoanvolɛ Pɔɔlo la edwɛkɛ ne le arɛlekyekyelɛ nee anyelielɛ. (Gyima ne 17:26, 27) Arɛlekyekyelɛ edwɛkɛ mɔɔ le kɛ ɛhye la noko wɔ Baebolo ne anu. Kɛ neazo la, Gyisɛse yɛle nzɛlɛlɛ kɛ ye ɛdoavolɛma ne bahola anwu Nyamenle na banyia nyilalɛ.—Dwɔn 17:3.

Noko akee, nwomama mɔɔ bie a le Philo la nyianle adwenle ngakyile. Bɛkile kɛ yɛnrɛhola yɛnrɛnwu Nyamenle ɛlɛ ɔluakɛ ɔ nwo edwɛkɛ bo yɛ ndelebɛbo zo. Boni a le nɔhalɛ a?

Baebolo ne ka kɛ ninyɛne bie mɔ wɔ ɛkɛ mɔɔ fale Nyamenle anwo mɔɔ ɔyɛ se kɛ alesama bade ɔ bo a. Kɛ neazo la, mekɛ tendenle mɔɔ Bɔvolɛ ne ɛva ɛdɛnla aze, ye adwenle kpole ne yɛɛ ye nrɛlɛbɛ ne mɔɔ anu pi la, bɛnrɛhola bɛnrɛnwu ye, bɛnrɛzuzu, anzɛɛ bɛnrɛde ɔ bo. Ye sikalɛ a le kɛ bɛbo sonla ndelebɛbo zo. Noko, Nyamenle anwo ninyɛne ɛhye mɔ ɛnzi yɛ adenle kɛ yɛbanwu ye. Nɔhalɛ nu, saa yɛdwenledwenle ninyɛne ɛhye mɔ anwo a ɔbaboa yɛ yeamaa ‘yɛabikye Nyamenle.’ (Gyemise 4:8) Bɛmaa yɛzuzu ninyɛne ɛhye mɔ mɔɔ bo yɛ ndelebɛbo zo la anwo neazo ekyi anwo. Akee yɛbanlea ninyɛne bie mɔ mɔɔ fale Nyamenle anwo mɔɔ yɛbahola yɛade ɔ bo la.

NYAMENLE DE AZE DAHUU: Baebolo ne kilehile kɛ Nyamenle wɔ ɛkɛ “ɔvi tete, mɔɔ kɔdwu mekɛ mɔɔ ɛnlɛ awieleɛ.” (Edwɛndolɛ 90:2) Ɛhye kile kɛ, Nyamenle ɛnlɛ ye mɔlebɛbo nee ye awieleɛ. Wɔ sonla nye zo, “ye ɛvolɛ dodo, bɛnrɛnwu ye ɛlɛ.”—Dwobu 36:26.

Kɛzi ɔboa wɔ la: Nyamenle ɛbɔ wɔ ɛwɔkɛ kɛ saa ɛnwu ye a, ɔbamaa wɔ dahuu ngoane. (Dwɔn 17:3) Saa Nyamenle mumua ne ɛnde aze dahuu a, kɛzi ɛwɔkɛ ɛhye bara nu ɛ? “Tete Belemgbunli ne” ala a bahola amaa ɛwɔkɛ ɛhye ara nu a.—1 Temɔte 1:17.

NYAMENLE ADWENLE: Baebolo ne kilehile kɛ Nyamenle “ndelebɛbo ɛnlɛ nvedenvedenu” ɔluakɛ ye adwenle le kpole tɛla yɛ ɛdeɛ ne. (Ayezaya 40:28; 55:9) Ɔfɛta kɛ Baebolo ne biza kpuya ɛhye a: “Nwane a ze Nyamenle ati anu a? Nwane a kola tu ye folɛ a?”—1 Kɔlentema 2:16.

Kɛzi ɔboa wɔ la: Nyamenle kola tie menli dɔɔnwo nzɛlɛlɛ wɔ mekɛ ko ne ala anu. (Edwɛndolɛ 65:2) Ɔnwu kɔtɔkpɔle biala bɔbɔ mɔɔ kɛdɔ aze la. Asoo Nyamenle adwenle bahola ayi mɔɔ ɔnrɛnwu wɔ na yeadie wɔ nzɛlɛlɛ ɔ? Kyɛkyɛ, ɔluakɛ ye adwenle le kpole. Mɔɔ tɛla ɛhye la ‘yɛsonle bolɛ kpole yɛtɛla kɔtɔkpɔle dɔɔnwo’ yɛmaa ye.—Mateyu 10:29, 31.

NYAMENLE NDENLE: Baebolo ne kilehile kɛ sonla ɛnrɛnwu “mɔɔ Nyamenle ɛyɛ, ɔvi mɔlebɛbo mɔɔ kɔ awieleɛ.” (Nolobɔvo ne 3:11) Ɛhye ati, yɛnrɛhola yɛnrɛnwu debie biala mɔɔ fale Nyamenle anwo la. ‘Nwane a kɛhola kɛde’ nrɛlɛbɛ mɔɔ wɔ Nyamenle ndenle ne mɔ anzi la abo a. (Wulomuma 11:33) Noko akee, Nyamenle lɛ ɛhulolɛ kɛ ɔbala ye ndenle ne mɔ ali yeahile bɛdabɛ mɔɔ bɛkulo kɛ bɛyɛ mɔɔ sɔ ɔ nye la.—Emɔso 3:7.

Kɛzi ɔboa wɔ la: Saa ɛkenga Baebolo ne na ɛsukoa a, ɛbahɔ zo wɔanwu ninyɛne fofolɛ wɔavale Nyamenle nee ye ndenle ne mɔ anwo. Ɛhye kile kɛ yɛbahola yɛabikye yɛ anwuma Selɛ ne dahuu.

Kɛ mɔɔ yɛngola yɛnde ninyɛne bie mɔ mɔɔ fale Nyamenle anwo abo bɔkɔɔ la ɛngile kɛ yɛnrɛhola yɛnrɛnwu ye fee. Edwɛkɛ dɔɔnwo wɔ Baebolo ne anu mɔɔ boa yɛ maa yɛnwu Nyamenle kpalɛ a. Maa yɛzuzu nuhua ekyi bie mɔ anwo:

NYAMENLE DUMA NE: Baebolo ne kilehile yɛ kɛ Nyamenle ɛmaa ɔ nwo duma. Ɔka kɛ: “Medame a mele [“Gyihova,” NW] a. Me duma ɛne!” Nyamenle duma ne finde fane kɛyɛ 7,000 tɛla duma gyɛne biala wɔ Baebolo ne anu.—Ayezaya 42:8.

Kɛzi ɔboa wɔ la: Gyisɛse hanle wɔ ye nzɛlɛlɛ ne mɔɔ ɔhilele yɛ la anu kɛ: “Yɛ Ze mɔɔ wɔ anwuma: Wɔ duma nwo ɛde.” (Mateyu 6:9) Asoo ɛbahola wɔabɔ Nyamenle duma wɔ wɔ nzɛlɛlɛ nu ɔ? Gyihova kulo kɛ ɔdie awie biala mɔɔ kile ɛbulɛ kpalɛ maa ye duma ne la ngoane.—Wulomuma 10:13.

NYAMENLE TƐNLABELƐ: Baebolo ne kilehile kɛ ɛleka nwiɔ a wɔ ɛkɛ a, sunsum nu ɛleka mɔɔ sunsum nu abɔdeɛ a wɔ ɛkɛ ne la yɛɛ azɛlɛ ne mɔɔ yɛde zo la. (Dwɔn 8:23; 1 Kɔlentema 15:44) Wɔ Baebolo ne anu, edwɛkɛkpɔkɛ “anwuma” ta kile sunsum nu ɛleka. “Anwuma” ɛhye a le “ɛleka” mɔɔ Bɔvolɛ ne de la.—1 Arelemgbunli 8:43.

Kɛzi ɔboa wɔ la: Ɔmaa yɛnwu kɛzi Nyamenle de la  kpalɛ. Bɔvolɛ ne ɛnle feabo tumi bie mɔɔ wɔ ɛleka biala nee debie biala anu a. Gyihova le Sonla kpalɛ mɔɔ lɛ ɛleka mɔɔ ɔde a. Noko akee, “debie biala ɛnvea” ye.—Hibuluma 4:13.

NYAMENLE SUBANE: Baebolo ne kilehile kɛ Gyihova lɛ subane ngɛnlɛma. “Nyamenle le ɛhulolɛ.” (1 Dwɔn 4:8) Ɔmbɔ adalɛ ɛlɛ. (Taetɛse 1:2) Ɔnyɛ nyeyenu, ɔse anwunvɔne, ɔ ti akunlu le kɛnlɛma, yɛɛ ɔnva ɛya mgbane mgbane. (Adendulɛ 34:6; Gyima ne 10:34) Ɛhulolɛ mɔɔ Bɔvolɛ ne lɛ kɛ ɔbava bɛdabɛ mɔɔ bɛlɛ ɛbulɛ bɛmaa ye la “agɔnwolɛ” la bahola azi menli dɔɔnwo anwo.—Edwɛndolɛ 25:14.

Kɛzi ɔboa wɔ la: Ɛbahola wɔayɛ Gyihova agɔnwo. (Gyemise 2:23) Mekɛ mɔɔ ɛlɛnwu Gyihova subane ne mɔ la, ɔbamaa wɔade Baebolo ne anu edwɛkɛ ne abo kpalɛ.

Baebolo ne maa yɛnwu kɛzi Gyihova Nyamenle de la. Ɔ nwo edwɛkɛ ɛmbo yɛ ndelebɛbo zo. Nɔhalɛ nu, Bɔvolɛ ne kpondɛ kɛ ɛnwu ye. Ye Edwɛkɛ Baebolo ne bɔ ɛwɔkɛ kɛ: “Saa ɛkɔ ye ɛkɛ ne a, ɔbalie wɔ.” (1 Edwɛkɛsisilɛ 28:9) Duzu ati a ɛnlua Baebolo ne ɛgengalɛ nee nwolɛ ɛdwenlenlɛ zo ɛnnwu Nyamenle ɛ? Baebolo ne bɔ ɛwɔkɛ kɛ, saa ɛyɛ ye zɔ a, Nyamenle ‘babikye wɔ.’—Gyemise 4:8.

Bie a ɛbabiza kɛ, ‘Saa mende debie biala mɔɔ fale Bɔvolɛ ne anwo la abo a, kɛzi mebahola meayɛ ɔ gɔnwo ɛ?’ Suzu ɛhye anwo: Asoo ɔhyia kɛ awie mɔɔ ɔle dɔketa la agɔnwo kpalɛ nyia amodinli kɛlata wɔ ayileyɛlɛ nu ɔ? Kyɛkyɛ! Ɔbahola yeara ye kɛ dɔketa ne agɔnwo ne yɛ gyima gyɛne. Noko akee, bɛbahola bɛava bɛ nwo agɔnwolɛ. Mɔɔ hyia la a le kɛ dɔketa ne agɔnwo ne banwu dɔketa ne subane, mɔɔ ɔkulo nee mɔɔ ɔngulo la. Zɔhane ala a, ɛkola ɛsukoa Baebolo ne ɛnwu sonla holɛ ko mɔɔ Gyihova de—ɛhye a ɔhyia kɛ ɛnwu ye amaa wɔayɛ ɔ gɔnwo a.

Kɛ anrɛɛ yɛbanyia Bɔvolɛ ne anwo adwenle mɔɔ ɛndenrɛ la, ɔhyia kɛ yɛnwu edwɛkɛ mɔɔ wɔ Baebolo ne anu la amaa yɛanwu Nyamenle. Ɛkulo kɛ ɛsukoa Gyihova Nyamenle anwo edwɛkɛ dɔɔnwo ɔ? Gyihova Alasevolɛ lɛ Baebolo ɛzukoalɛ nwo ngyehyɛleɛ mɔɔ bɛnlie ɛhwee a. Nwu Alasevolɛ mɔɔ bɛwɔ ɛleka mɔɔ ɛwɔ la anzɛɛ kɔ yɛ wɛbsaete, www.dan124.com/nzi azo.