Ɛzukoalɛdeɛ 10

Nyɛleɛ Mɔɔ Nyamenle Kyi

Kɛzi ɔwɔ kɛ ɛte nganeɛ wɔ ninyɛne mɔɔ Nyamenle se ɔle ɛtane la anwo ɛ? (1)

Nla nwo nyɛleɛ boni a le nvonleɛ a? (2)

Kɛzi ɔwɔ kɛ Kiliseɛnema bu adalɛbɔlɛ ɛ? (3) kyakya ɛdolɛ ɛ? (3) awuleyɛlɛ ɛ? (3) basabasayɛlɛ ɛ? (4) sunsumsɛm anzi elile ɛ? (5) nzabolɛ ɛ? (6)

Adenle boni a awie bahola ava zo ahwe ɔ nwo avi nyɛleɛ ɛtane ɛtane nwo a? (7)

1. Nyamenle sonvolɛma kulo mɔɔ le kpalɛ. Noko eza ɔwɔ kɛ bɛsukoa kɛ bɛkɛhyi mɔɔ le ɛtane la. (Edwɛndolɛ 97:10) Zɔhane kile kɛ bɛbakpo nyɛleɛ bie mɔ mɔɔ Nyamenle kyi la. Zɔhane nyɛleɛ ne bie a le boni?

2. Adwɔmanebɔlɛ: Nla mɔɔ li agyalɛ nyunlu, agyalɛzɛkyelɛ, nane mɔɔ bɛ nee ye da, mogyafonla, nee mrenya mɔɔ nee mrenya da anzɛɛ mraalɛ mɔɔ nee mraalɛ da la amuala le ɛtane mɔɔ anyebolo wɔ nu mɔɔ tia Nyamenle a. (Leviticus 18:6; Romema 1:26, 27; 1 Corinthma 6:9, 10) Saa menli nwiɔ ɛtɛgyale bɛ nwo noko bɛbɔ nu bɛde a, ɔwɔ kɛ bɛtete nu, anzɛɛ bɛgya bɛ nwo wɔ mɛla adenle zo.—Hebrewma 13:4.

3. Adalɛbɔlɛ, Kyakyadolɛ, Awuleyɛlɛ: Jehovah Nyamenle ɛngola ɛmbɔ adalɛ! (Titus 1:2) Menli mɔɔ kpondɛ kɛ bɛnyia ɔ nyunlu ɛlolɛ la ɔwɔ kɛ koati adalɛbɔlɛ. (Mrɛlɛbulɛ 6:16-19; Kolosaema 3:9, 10) Anyebolo wɔ kyakya ɛdolɛ biala anu. Yemɔti Kiliseɛnema ɛnva bɛ nwo ɛnwula kyakya ɛdolɛ biala, mɔɔ le kɛ loto, ɛkpɔnwɔ ɛnriandilɛ—ɛzulɛ nee bingo  nu. (Ephesusma 5:3-5) Eza Kiliseɛnema ɛnwua. Bɛndɔ debie mɔɔ bɛze kɛ ɔle awule debie la anzɛɛ bɛnva ninyɛne mɔɔ bɛtɛsɛlɛle nwolɛ adenle la.—Exodus 20:15; Ephesusma 4:28.

4. Ɛyavalɛ, Basabasayɛlɛ: Ɛya mɔɔ awie ɛngola ɛngomo zo la kɔwie basabasa ɛyɛlɛ nu. (Genesis 4:5-8) Awie mɔɔ yɛ basabasa la ɛngola ɛnyɛ Nyamenle agɔnwo. (Edwɛndolɛ 11:5; Mrɛlɛbulɛ 22:24, 25) Ɔle nvonleɛ kɛ yɛkɛli nzenralɛ anzɛɛ yɛkɛva ɛtane yɛkɛdua ɛtane mɔɔ awie bahola ayɛ yɛ la kakɛ.—Mrɛlɛbulɛ 24:29; Romema 12:17-21.

5. Ayiledolɛ, Sunsumsɛm nzi ɛlilɛ: Menli bie mɔ kpondɛ sunsum nu tumi fa bɔ mɔdenle kɛ bɛtondo ewule. Bie mɔ noko to bɛ agbɔvolɛ ayile bɛmaa bɛ nwo to bɛ anzɛɛ bɛku bɛ bɔbɔ. Tumi mɔɔ zua zɛhae nyɛleɛ ye kɔsɔɔti anzi la a le Satan. Yemɔti ɔnle kɛ Kiliseɛnema fa bɛ nwo wula nuhua biala anu. (Deuteronomy 18:9-13) Jehovah mɔɔ yɛbabikye ye la a le anwobanebɔlɛ kpalɛ kpalɛ mɔɔ yɛbanyia ye wɔ nyile mɔɔ bie a awie mɔ bado yɛ la anwo a.—Mrɛlɛbulɛ 18:10.

6. Nzabolɛ: Ɔnle ɛtane kɛ yɛbanlo wine, beer anzɛɛ nza gyɛne biala ekyii. (Edwɛndolɛ 104:15; 1 Timothy 5:23) Noko nza dɔɔnwo ɛnlolɛ nee nzabolɛ le ɛtane wɔ Nyamenle anye zo. (1 Corinthma 5:11-13; 1 Timothy 3:8) Nza dɔɔnwo ɛnlolɛ bahola azɛkye wɔ kpɔkɛdelɛ nee wɔ abusua ne. Eza ɔbahola yeamaa wɔadɔ sɔnea ngakyile nu ndɛndɛ.—Mrɛlɛbulɛ 23:20, 21, 29-35.

7. Menli mɔɔ yɛ ninyɛne mɔɔ Nyamenle se ɔle ɛtane la “ɛnrɛnyia Nyamenle Belemgbunlililɛ ne.” (Galatiama 5:19-21) Saa amgba ɛkulo Nyamenle na ɛkpondɛ kɛ ɛsɔ ɔ nye a, ɛbahola wɔahwe ɛ nwo wɔavi nyɛleɛ ɛhye mɔ anwo. (1 John 5:3) Sukoa kɛ ɛbahyi mɔɔ Nyamenle se ɔle ɛtane la. (Romema 12:9) Ɛ nee menli mɔɔ lɛ subane kpalɛ la ɛdu. (Mrɛlɛbulɛ 13:20) Kiliseɛnema mɔɔ anwo ɛkokoa mɔɔ ɛ nee bɛ badu la bahola aboa wɔ. (James 5:14) Mɔɔ tɛla ɔmuala la, dua asɔneyɛlɛ zo fa ɛ nwo to Nyamenle moalɛ zo.—Philippima 4:6, 7, 13.

[Nvoninli wɔ mukelɛ 20]

Nyamenle kyi nzabolɛ, awuleyɛlɛ, kyakya ɛdolɛ, nee basabasayɛlɛ