Ɛzukoalɛdeɛ 2

Nyamenle A Le Nwane?

Nɔhalɛ Nyamenle ne a le nwane, na ye duma a le boni? (1, 2)

Duzu sonlabaka a ɔlɛ a? (3)

Ye subane titile ne mɔ a le boni? (4)

Asoo ɔwɔ kɛ yɛdua aboduaba nee ninyɛne ɛsaso zo yɛsonle ye ɔ? (5)

Ndenle nwiɔ boni a yɛkola yɛfa zo yɛsukoa Nyamenle anwo debie a? (6)

1. Menli sonle ninyɛne dɔɔnwo. Noko Bible ne ka kile yɛ kɛ NƆHALƐ Nyamenle ko kye a wɔ ɛkɛ a. Ɔdaye a ɔbɔle debie biala mɔɔ wɔ anwuma nee azɛlɛ ye azo la a. Ɔluakɛ ɔdaye a ɔmanle yɛ ngoane la ati, ɔ ngome kye ala a ɔwɔ kɛ yɛsonle ye a.—1 Corinthma 8:5, 6; Yekile 4:11.

2. Nyamenle lɛ amodinli dɔɔnwo noko ɔlɛ duma ko kye. Zɔhane duma ne a le JEHOVAH. Bɛye Nyamenle duma ne bɛvi Bible dɔɔnwo ne ala anu, na bɛva amodinli AWULAE anzɛɛ NYAMENLE bɛzie ɔ gyakɛ anu. Noko mekɛ mɔɔ bɛhɛlɛle Bible ne la, duma Jehovah ne vindele nuhua fane kɛyɛ 7,000!—Exodus 3:15; Edwɛndolɛ 83:18.

3. Jehovah lɛ sonlabaka noko ɔnle kɛ yɛ ɛdeɛ ne la. Bible ne se, “Nyamenle le sunsum.” (John 4:24) Sunsum le ngoane  gyinlabelɛ mɔɔ kpogya kpalɛ tɛla yɛ ɛdeɛ ne. Dasanli biala ɛtɛnwunle Nyamenle ɛlɛ. Jehovah de anwuma noko ɔkola ɔnwu ninyɛne muala. (Edwɛndolɛ 11:4, 5; John 1:18) Na, sunsum nwuanzanwuanza ne noko a le duzu? Ɔnle sonla kɛ Nyamenle la. Emomu, ɔle Nyamenle gyimalilɛ tumi.—Edwɛndolɛ 104:30.

4. Bible ne da Jehovah ye sonla-holɛ-ko ali ɔkile yɛ. Ɔkile kɛ, ye subane titile a le ɛlɔlɛ, pɛlepɛlelilɛ, nrɛlɛbɛ nee tumi. (Deuteronomy 32:4; Job 12:13; Isaiah 40:26; 1 John 4:8) Bible ne ka kile yɛ kɛ, eza ɔlɛ anwunvɔnezelɛ, atiakunlukɛnlɛma, ɛtanefakyɛ, ɛlolɛ nee abotane. Ɔwɔ kɛ yɛbɔ mɔdenle yɛsukoazukoa ye kɛ mralɛ anzomɛlɛkɛma—Ephesusma 5:1, 2.

5. Asoo ɔwɔ kɛ yɛbɔ yɛ ti aze anzɛɛ yɛmaa yɛ nzɛlɛlɛ dwu aboduaba, nvoninli anzɛɛ ninyɛne ɛsaso ɛkɛ wɔ yɛ ɛzonlelɛ nu ɔ? Kyɛkyɛ! (Exodus 20:4, 5) Jehovah se yɛzonle ɔ ngome kye. Ɔ nee awie anzɛɛ debie biala ɛnrɛhyɛ ye anyunlunyia. Aboduaba ɛnlɛ tumi biala ɛmboa yɛ.—Edwɛndolɛ 115:4-8; Isaiah 42:8.

6. Kɛzi yɛkɛyɛ na yɛahola yɛanwu Nyamenle kpalɛ ɛ? Adenle ko a le kɛ yɛbagua yɛ nye aze yɛanleɛnlea ninyɛne mɔɔ yebɔ la na yɛadwenle mɔɔ bɛka bɛkile yɛ la anwo kpalɛ. Nyamenle abɔdeɛ kile yɛ kɛ ɔlɛ tumi nee nrɛlɛbɛ kpole. Yɛnwu ye ɛlɔlɛ wɔ ninyɛne mɔɔ yebɔ la amuala anu. (Edwɛndolɛ 19:1-6; Romema 1:20) Adenle bieko mɔɔ yɛkola yɛfa zo yɛsukoa Nyamenle anwo debie la a le kɛ yɛbazukoa Bible ne. Ɔka Nyamenle holɛ ko mɔɔ ɔle la anwo edwɛkɛ ɔkile yɛ wɔ nuhua. Eza noko ɔka ye atiakunlukpɔkɛ nee mɔɔ ɔkpondɛ kɛ yɛyɛ la anwo edwɛkɛ ɔkile yɛ.—Amos 3:7; 2 Timothy 3:16, 17.

[Nvoninli wɔ mukelɛ 5]

Yɛdua abɔdeɛ nee Bible ne azo yɛsukoa Nyamenle anwo debie