1, 2. (a) Awie ɛlɛyɛ kpanyinli a nzenzaleɛ boni a ba a? (b) Kɛzi menli mɔɔ zonlenle Nyamenle wɔ Baebolo mekɛ nu la nyianle ahunlundwolɛ wɔ bɛ mgbanyinli nu ɛ?

NZENZALEƐ dɔɔnwo ba wɔ mekɛ mɔɔ yɛlɛnyi la. Yɛ agbɔkɛ nu mɔɔ tuto la maa yɛ anwosesebɛ wie. Yɛnea neanleɛ nu a yɛnwu kɛ yɛ nyunlu nee yɛ enrinli ɛlɛkakyi​—bie a yɛ ti zo bɔbɔ ɛlɛtu. Yɛ rɛle bahola avi debie ndɛndɛ. Saa ngakula ne mɔ gya na bɛnyia bɛ nlɔnra a, bɛnyia agɔnwolɛma fofolɛ. Bie mɔ fi gyima nu ba sua nu a bɛyɛ gyima fofolɛ.

² Nɔhalɛ nu, sonla ɛlɛnyi a ɔyɛ ɛvɛlɛ. (Nolobɔvo ne 12:1-8) Noko, suzu Nyamenle azonvolɛ mɔɔ dɛnlanle aze wɔ Baebolo mekɛ zo la anwo nea. Ɔwɔ nuhua kɛ awieleɛ bɔkɔɔ ne bɛwule ɛdeɛ, noko akee bɛnwunle nrɛlɛbɛ na bɛnyianle ndelebɛbo mɔɔ manle bɛ kunlu dwole bɛ nwo wɔ bɛ mgbanyinli mekɛ nu la. (Mɔlebɛbo 25:8; 35:29; Dwobu 12:12; 42:17) Duzu a boale bɛ manle bɛnyinle anyelielɛ nu a? Nɔhalɛ nu, ngyinlazo mɔɔ yɛnwu ye wɔ Baebolo ne anu ɛnɛ mɔɔ bɛvale bɛbɔle bɛ ɛbɛla la a boale bɛ a.​—Edwɛndolɛ 119:105; 2 Temɔte 3:16, 17.

3. Folɛ boni a Pɔɔlo dule mrenya nee mraalɛ mɔɔ bɛyɛ mgbanyinli la ɛ?

³ Wɔ ɛzoanvolɛ Pɔɔlo kɛlata mɔɔ ɔhɛlɛle ɔhɔmanle Taetɛse la anu, ɔvale folɛdulɛ kpalɛ ɔmanle menli mɔɔ ɛlɛyɛ mgbanyinli la. Ɔhɛlɛle kɛ: “Kilehile mrenya mgbanyinli ne mɔ maa bɛyɛ bɛ nye gyɛlɛmgbɛɛnye, bɛdwenle, bɛzie bɛ nwo diinyi, bɛmaa bɛ diedi ɛyɛ nla, na bɛnyia ɛhulolɛ nee abotane. Zɔhane ala noko yɛɛ maa mraalɛ mgbanyinli ne mɔ ɛnwu ye na bɛbɔ ɛbɛla mɔɔ  kile kɛ bɛze Nyamenle la a. Bɛmmayɛ ngunzi anzɛɛ bɛmmayɛ bɛ nwo akɛlɛ bɛmaa nza. Ɔwɔ kɛ bɛkilehile mɔɔ le kpalɛ la.” (Taetɛse 2:2, 3) Saa ɛdi edwɛkɛ ɛhye azo a ɔbaboa wɔ yeamaa wɔagyinla kpanyinliyɛlɛ nwo ngyegyelɛ nloa.

4, 5. Saa ngakula fi sua nu a kɛzi awovolɛ bie mɔ yɛ ɛ, na kɛzi bie mɔ gyinla tɛnlabelɛ fofolɛ ne anloa ɛ?

⁴ Gyinlabelɛ biala mɔɔ kɛra la ɔwɔ kɛ bɛyɛ nwolɛ debie. Nea kɛzi ɛhye le nɔhalɛ wɔ mekɛ mɔɔ ngakula mɔɔ ɛnyi kɛvi sua nu na bɛkɛgya la! Ɛhye a kakye awovolɛ dɔɔnwo kɛ bɛlɛyɛ mgbanyinli a. Ɔyɛ awovolɛ fɛ kɛ bɛ mra ne mɔ ɛyɛ mgbanyinli ɛdeɛ, noko ɔyɛ a ɔgyegye bɛ kɛ saa bɛyɛle mɔɔ bɛkɛhola biala la bɛvale bɛzieziele bɛ mra ne mɔ bɛmanle fanwodi ɛhye a. Bie a bɛ nwo balɔ bɛ kɛ bɛnle sua nu la.

⁵ Ndelebɛbo wɔ nu kɛ, awovolɛ kɔ zo dwenle bɛ mra boɛyɛlɛ nwo bɔbɔ wɔ mekɛ mɔɔ ngakula ne mɔ kɛvi sua nu la. Ɛrɛladane ko hanle kɛ, “Saa meta mete kɛ bɛte kpɔkɛ a​—anrɛɛ ɔbamaa me nye alie.” Selɛ bie hanle kɛ: “Mekɛ mɔɔ yɛ ra raalɛ ne vile sua nu la, ɛnee ɔyɛ se kpalɛ. Ɔmanle tokule kpole lale abusua ne anu ɔluakɛ ɛnee dahuu yɛyɛ ninyɛne yɛbɔ nu.” Kɛzi awovolɛ ɛhye mɔ ɛgyinla bɛ mra mɔɔ ɛvi sua nu la anloa ɛ? Fane dɔɔnwo ne ala, awie mɔ mɔɔ bɛdwenle bɛ nwo na bɛboa bɛ la a maa bɛkola bɛyɛ zɔ a.

6. Duzu a boa maa abusua ne anu amra nwu mɔɔ ɔwɔ kɛ bɛyɛ la ɛ?

⁶ Saa ngakula gya a, gyima mɔɔ awovolɛ ne mɔ yɛ la kakyi. Mɔlebɛbo 2:24 ka kɛ: “Nrenya fi ɔ ze nee ɔ nli anwo na ɔfa ɔ nwo ɔbɔ ɔ ye anwo kyengye, na bɛ mu nwiɔ bɛbɔ nu bɛyɛ nwonane ko.” Awovolɛ die tileyɛlɛ nwo ngyinlazo kpalɛ nee ngyehyɛleɛ kpalɛ to nu  a ɔbaboa yeamaa bɛanyia ninyɛne nwo adwenle kpalɛ.​—1 Kɔlentema 11:3; 14:33, 40.

7. Subane kɛnlɛma boni a selɛ ko nyianle wɔ mekɛ mɔɔ ɔ mra mraalɛ ne mɔ vile sua nu la ɛ?

⁷ Mekɛ mɔɔ agyalɛma bie amra mraalɛ hɔle agyalɛ na bɛvile sua nu la, bɛdele nganeɛ kɛ debie ɛvi bɛ sa. Mɔlebɛbo ne, kunli ne vale ye ase mɔ anwo ɛya. Noko mekɛ mɔɔ ɔdwenlenle tileyɛlɛ nwo ngyinlazo ne anwo la, ɔnwunle kɛ mrenya ne mɔ mɔɔ ɛgya ɔ mra mraalɛ ne mɔ la ɛlɛdi bɛ abusua nu ɛzonlelilɛ nwo gyima. Yemɔti, mekɛ mɔɔ ɔ mra mraalɛ ne mɔ kɛha kɛ ɔmaa bɛ nzuzulɛ la, ɔbiza bɛ adwenle mɔɔ bɛ hu mɔ lɛ wɔ edwɛkɛ ne anwo la na ɔboa bɛ wɔ adenle biala mɔɔ ɔkɛhola la azo. Kɛkala ye ase mɔ bu ye kɛ ɔle bɛ gɔnwo na bɛdie ye folɛdulɛ bɛto nu.

8, 9. Kɛzi awovolɛ bie mɔ ɛlie bɛ mra mɔɔ bɛnyi la fanwodi ne ɛdo nu ɛ?

⁸ Na saa menli mɔɔ bɛgya fofolɛ la anyɛ debie mɔɔ tia Ngɛlɛlera ne, noko bɛangola bɛanyɛ mɔɔ bɛ awovolɛ suzu kɛ ɔle kpalɛ la ɛ? Agyalɛma bie mɔɔ bɛ mra noko ɛgya la hanle kɛ, “Yɛboa bɛ dahuu yɛmaa bɛnwu adwenle mɔɔ Gyihova lɛ la, noko saa yɛ nee bɛ adwenle anyɛ ko wɔ bɛ kpɔkɛzilɛ bie anwo a, yɛdie bɛ ɛdeɛ ne yɛto nu na yɛboa bɛ.”

⁹ Wɔ Asia maanle bie mɔ anu, ɔyɛ se ɔmaa mrɛladane bie mɔ kɛ bɛkɛlie bɛ mra mrenya fanwodi bɛkɛdo nu. Noko akee, saa bɛdie Keleseɛne ngyehyɛleɛ nee tileyɛlɛ bɛto nu a, bɛnwu kɛ ɔmaa bɛ nee bɛ ase mraalɛ ne mɔ avinli ngyegyelɛ ka aze. Keleseɛne raalɛ ko nwunle kɛ ɔ mra mrenya mɔɔ bɛvi sua nu la “le debie mɔɔ dahuu ɔ nye die nwolɛ a.” Ɔ nye die kɛ bɛkola bɛnea bɛ abusua fofolɛ ne la. Ɛhye ɛmaa ninyɛne mɔɔ anrɛɛ bɛbava bɛagyegye bɛ nwo nee bɛ adwenle la azo ɛde wɔ mekɛ mɔɔ bɛlɛyɛ mgbanyinli la.

10, 11. Ngɛlɛlera ne anu folɛdulɛ boni a baboa menli yeamaa bɛahoati sɔnea bie mɔ wɔ mekɛ mɔɔ bɛlɛnyi la ɛ?

¹⁰ Saa menli ɛlɛyɛ mgbanyinli a bɛyɛ ninyɛne ngakyile wɔ nwolɛ. Mrenya bie mɔ siezie bɛ nwo wɔ adenle ngakyile zo amaa yeayɛ kɛ asɛɛ bɛle mgbavolɛ. Mraalɛ dɔɔnwo maa nzenzaleɛ mɔɔ bɛgyakyi amozihɔlɛ a ɔbava yeara la gyegye bɛ. Mɔɔ yɛ alɔbɔlɛ la, mgbanyima bie mɔ kulo mgbavolɛ anzɛɛ mbɛlɛra na bɛfa bɛka bɛ bokavolɛ ne ɛya. Noko akee, mrenya mgbanyinli mɔɔ sulo Nyamenle la ‘sɔ bɛ nwo’ kpalɛ na bɛdi atiakunluwɔzo ɛtane zo. (1 Pita 4:7) Mraalɛ mɔɔ ɛnyi la noko bɔ mɔdenle maa anzondwolɛ tɛnla bɛ agyalɛ nu, ɔluakɛ bɛlɛ bɛ hu mɔ anwo ɛlɔlɛ yɛɛ bɛkulo kɛ bɛsɔ Gyihova anye la ati.

¹¹ Sunsum ne hanle Belemgbunli Lɛmuwɛle manle ɔyele “yelɛ kpalɛ” mɔɔ yɛ ɔhu boɛ na “ɔngyegye ye wɔ mekɛ tendenle muala mɔɔ ɔde ngoane nu la” ayɛlɛ.  Ɔwɔ kɛ Keleseɛne kunli anye sɔ kɛzi ɔ ye bɔ mɔdenle gyinla nganeɛdelɛ ɛtane biala anloa wɔ ye mgbanyinli mekɛ nu la. Ɛlɔlɛ mɔɔ ɔlɛ ɔmaa ɔ ye la baha ye yeamaa ‘yeaye ye ayɛlɛ.’​—Mrɛlɛbulɛ 31:10, 12, 28.

12. Kɛzi agyalɛma bahola anyi abɔ nu wɔ mekɛ mɔɔ bɛ ɛvolɛ ɛlɛkɔ ɔ nyunlu la ɛ?

¹² Wɔ mekɛ mɔɔ ɛnee bɛlɛtete bɛ mra na bɛnlɛ alagye la anu, bie a bɛ mu nwiɔ bɛvale ninyɛne bie mɔɔ bɛ nye die nwolɛ la bɛziele ahane amaa bɛali bɛ mra ne mɔ ngyianlɛ nwo gyima. Mekɛ mɔɔ bɛvi sua nu ɛkɛ la ɔwɔ kɛ bɛfa mekɛ ne bɛsia bɛsuzu bɛ agyalɛ ne anwo. Kunli ko hanle kɛ, “Mekɛ mɔɔ me mra mraalɛ ne mɔ vile sua nu la, me nee me ye bɔle ɔ bo kɛ yɛkulo yɛ nwo bieko.” Kunli fofolɛ hanle kɛ: “Yɛdwenle yɛ nuhua ko biala kpɔkɛdelɛ nwo na yɛkakye yɛ nwo kɛ ɔwɔ kɛ yɛkpundikpundi yɛ agbɔkɛ nu.” Amaa bɛ nwo anyɛ bɛ koonwu la, ɔ nee ɔ ye bɔ nu sonle menli mɔɔ wɔ asafo ne anu la ɛyɛvolɛ. Ɛhɛe, yɛkile awie mɔ anwo anyelielɛ a ɔfa nyilalɛ dɔɔnwo ɔba. Eza, ɔsɔ Gyihova anye.​—Felepaema 2:4; Hibuluma 13:2, 16.

13. Kɛzi nɔhalɛlilɛ mɔɔ bɛfa bɛyɛ ninyɛne la boa agyalɛma wɔ mekɛ mɔɔ bɛlɛnyi la ɛ?

¹³ Mmagyakyi kɛ ɛ nee wɔ bokavolɛ kɛli adwelie. Bɛvi ahonle nu bɛli adwelie. (Mrɛlɛbulɛ 17:27) Kunli ko hanle kɛ: “Yɛdwenle yɛ nuhua ko biala anwo na yɛsuzu ɔ nwo amaa yɛade ko biala abo kpalɛ.” Ɔ ye nee ye yɛ adwenle na ɔka kɛ: “Kɛkala mɔɔ yɛyɛ mgbanyinli la, yɛbɔ nu yɛdi debie, yɛdi adwelie, na yɛboa yɛ nwo.” Saa bɛfi ahonle nu bɛdi adwelie a ɔbamaa bɛ agyalɛ ne anu amia na yeazɔ kpalɛ amaa yeagyinla Seetan mɔɔ sɛkye agyalɛ la ngyegyelɛ ne anloa.

14. Duzu a Temɔte nana yɛle boale wɔ mekɛ mɔɔ bɛlɛtete ye bɛamaa yeayɛ Keleseɛnenli la ɛ?

¹⁴ “Mgbanyinli anyelielɛ a le bɛ nlɔnra.” (Mrɛlɛbulɛ  17:6) Nlɔnra agɔnwolɛvalɛ kola yɛ anyelielɛ amgba​—ɔle kɛnlɛma yɛɛ ɔyɛ ahomeka. Baebolo ne ka Temɔte nana Loyese mɔɔ boale ɔ ra raalɛ Yunaesi na ɔvale ye diedi ne ɔhilehilele ye anlɔnra ne la anwo edwɛkɛ kpalɛ. Kakula ɛhye nyinli na ɔnwunle kɛ ye mame nee ye nana anye die Baebolo ne anu nɔhalɛ ne anwo.​—2 Temɔte 1:5; 3:14, 15.

15. Moalɛ kpalɛ boni a nana nee nenya mɔ bahola ayɛ amaa bɛ nlɔnra a, noko duzu a ɔwɔ kɛ bɛkoati a?

¹⁵ Yemɔti, ɛke a le ɛleka titile mɔɔ nana nee nenya mɔ bahola aboa kpalɛ a. Nana nee nenya mɔ, bɛlumua bɛva Gyihova bodane nwo nrɛlɛbɛ bɛhilehile bɛ mra bɛwie. Kɛkala, bɛbahola bɛayɛ ye zɔ bɛamaa awolɛndoazo fofolɛ noko! Saa ngakula dɔɔnwo te kɛ bɛ nana nee bɛ nenya mɔ ɛlɛka Baebolo nu edwɛkɛ a bɛ nye die. Nɔhalɛ nu, bɛnlie selɛ ne ɛzonlelilɛ mɔɔ la ɔ nwo zo kɛ ɔkɛva Baebolo nu nɔhalɛ ɔkɛhilehile ɔ mra la bɛnvi ɔ sa nu. (Mɛla ne 6:7) Emomu, bɛboa ye bɛmaa ɔyɛ ɛhye. Ɔrɛla ye kɛ bɛ asɔneyɛlɛ bayɛ kɛ edwɛndolɛnli ne ɛdeɛ ne la: “Saa menyi, na me ti zo ɛyɛ nwohyee a, O Nyamenle, mmakpo me, kɔkpula kɛ menwɔbɔ wɔ tumi kpole ne nolo menwɔmaa awolɛndoazo mɔɔ bara la kɛde bie.”​—Edwɛndolɛ 71:18; 78:5, 6.

16. Kɛ ɔkɛyɛ na nana nee nenya mɔ akpo kɛ bɛkɛmaa ngyegyelɛ kɛra bɛ abusua nu ɛ?

¹⁶ Ɔyɛ alɔbɔlɛ kɛ, nana nee nenya bie mɔ dielie bɛ nlɔnra zo somaa na ɔmaa edwɛkɛ ba bɛ nee bɛ mra mɔɔ bɛnyi la avinli. Noko akee, wɔ atiakunlukɛnlɛmayɛlɛ ne bahola amaa wɔ nlɔnra ne mɔ anyia wɔ nu anwodozo na bɛaha edwɛkɛ mɔɔ bie a bɛnrɛha bɛnrɛhile bɛ awovolɛ la bɛahile wɔ. Ɔdwu mekɛ ne bie a ngakula ne mɔ anye bahola ala kɛ bɛ nana nee bɛ nenya mɔ bɛagyinla bɛ nzi na bɛalie bɛ wɔ mekɛ mɔɔ bɛ nee bɛ awovolɛ kɛnyia edwɛkɛ la. Yemɔti kɛ ɛbayɛ ye ɛ?  Da nrɛlɛbɛ ali na boa wɔ nlɔnra maa bɛha bɛ edwɛkɛ bɛhile bɛ awovolɛ. Ɛbahola wɔamaa bɛanwu kɛ ɛhye sɔ Gyihova anye. (Ɛfɛsɛsema 6:1-3) Saa nwolɛ hyia a, bie a ɛbahola wɔali ngakula ne mɔ anyunlu na wɔaha edwɛkɛ ne wɔahile bɛ awovolɛ. Fi ahonle nu ka mɔɔ wɔva ɛvolɛ dɔɔnwo wɔzukoa la anwo edwɛkɛ kile wɔ nlɔnra. Wɔ nɔhalɛlilɛ ne baboa bɛ.

17. Edwɛndolɛnli ne kpɔkɛbɔlɛ boni a ɔwɔ kɛ Keleseɛnema mɔɔ ɛlɛyɛ mgbanyinli la sukoa a?

¹⁷ Ɛvolɛ ne ɛlɛkɔ ɔ nyunlu la, ɛbanwu kɛ ɛngola ɛnyɛ ninyɛne mɔɔ ɛnee ɛyɛ anzɛɛ ɛkulo kɛ ɛyɛ la. Kɛzi awie gyinla kpanyinliyɛlɛ nloa ɛ? Wɔ adwenle nu a, bie a ɛbade nganeɛ kɛ wɔli ɛvolɛ 30, noko ɛnea neanleɛ nu a ɔle ngakyile. Mmadi nwolɛ nyane. Edwɛndolɛnli ne bodole Gyihova kɛ: “Mmakpo me wɔ me mrelera nu; saa me anwosesebɛ wie a, mmakpo me.” Fa sie ɛ nye zo kɛ ɛbazukoa kɛzi edwɛndolɛnli ne sikale ɔ bo la. Ɔhanle kɛ: “Me anyelazo wɔ wɔ nu dahuu, yɛɛ mebaye wɔ ayɛlɛ kpole kpalɛ dahuu.”​—Edwɛndolɛ 71:9, 14.

18. Kɛzi Keleseɛnenli mɔɔ ɛnyi la bahola ava gyima nu mɔɔ yevi la ali gyima kpalɛ ɛ?

¹⁸ Menli dɔɔnwo ɛlumua ɛziezie bɛ nwo kɛ bɛbaye Gyihova ayɛlɛ kpole wɔ mekɛ mɔɔ bɛvi gyima nu bɛra sua nu la. Selɛ ko mɔɔ ɛvi gyima nu la hanle kɛ, “Menyɛle mɔɔ yɛ ra raalɛ ne wie sukulu a mebayɛ la anwo ngyehyɛleɛ mendole ɛkɛ. Menzile kpɔkɛ kɛ mebabɔ dahuu ɛzonlenlɛ gyima ne abo, yemɔti mendɔnenle me gyima ne amaa me nwo adɔ me na meazonle Gyihova bɔkɔɔ. Menzɛlɛle Nyamenle ɛkɛ ne adehilelɛ.” Saa ɔka ekyii ɛfi gyima nu ɛba sua nu a, nyia arɛlekyekyelɛ fi yɛ Bɔvolɛ Kpole ne edwɛkɛ ne anu: “Kɛkala bɔbɔ mɔɔ bɛwie nyi la, medame ala yɛɛ mebazɔ bɛ toonwo bɛabɔ egyɛne a.”​—Ayezaya 46:4.

19. Folɛ boni a bɛdu menli mɔɔ bɛlɛnyi la ɛ?

 ¹⁹ Bie a nzenzaleɛ mɔɔ ɔwɔ kɛ bɛyɛ wɔ mekɛ mɔɔ bɛvi gyima nu bɛra sua nu la bayɛ se. Ɛzoanvolɛ Pɔɔlo dule mrenya mgbanyinli folɛ kɛ “bɛyɛ bɛ nye gyɛlɛmgbɛɛnye.” Ɛhye kile kɛ ɔwɔ kɛ bɛkomo bɛ nwo zo, na ɔnle kɛ bɛnyia adwenle kɛ bɛbabɔ ɛbɛla mɔɔ bamaa bɛ nwo adɔ bɛ la. Bie a ɔhyia kɛ bɛkɔ zo bɛyɛ ninyɛne bie mɔɔ bɛyɛ ye dɛba la na bɛnea bɛ nwo boɛ kpalɛ wɔ mekɛ mɔɔ bɛvi gyima nu la. Yemɔti, bɛmia bɛ nwo na “bɛmaa bɛ nye ɛbolo Awulae gyima ne ɛyɛlɛ nwo, na bɛnwu ye kɛ Awulae ati bɛ ɛvɛlɛ ɛnrɛyɛ gyɛne.” (1 Kɔlentema 15:58) Bɛbuke bɛ munli nu bɛyɛ gyima dɔɔnwo bɛboa awie mɔ. (2 Kɔlentema 6:13) Keleseɛnema dɔɔnwo yɛ ɛhye na bɛbɔ mɔdenle bɛbɔ edwɛkpa ne nolo kɛmɔ bɛkɛhola la. Mekɛ mɔɔ bɛlɛnyi la, “bɛmaa bɛ diedi ɛyɛ nla, na bɛnyia ɛhulolɛ nee abotane.”​—Taetɛse 2:2.

20, 21. (a) Wɔ ewiade ɛhye anu, duzu a awieleɛ kolaa tete agyalɛma avinli a? (b) Kɛzi Ana neazo ne le kɛnlɛma maa awie mɔɔ ye bokavolɛ kɛwu la ɛ?

²⁰ Ɔle nɔhalɛ edwɛkɛ mɔɔ yɛ alɔbɔlɛ kɛ ewiade ɛtane ɛhye anu ewule tete agyalɛma avinli la. Keleseɛne agyalɛma mɔɔ bɛ bokavolɛ ɛwu la ze kɛ kɛkala bɛ kulovolɛma ɛlɛda, na bɛlɛ anwodozo kɛ bɛbanwu bɛ bieko. (Dwɔn 11:11, 25) Noko mɔɔ ɛvi bɛ sa la maa bɛdi alɔbɔlɛ. Kɛ ɔkɛyɛ na mɔɔ de aze la agyinla ɔ nloa ɛ? *

²¹ Saa ɛkakye mɔɔ Baebolo ne anu sonla bie yɛle la a ɔbaboa wɔ. Ana hɔle agyalɛ la ye ɛvolɛ nsuu ne azo yɛɛ ɔ hu wule a, na yɛkenga ɔ nwo edwɛkɛ kɛ ɛnee yeli ɛvolɛ 84. Yɛbahola yɛalie yɛali kɛ ɔlile alɔbɔlɛ wɔ mekɛ mɔɔ ɔ hu wule la. Kɛzi ɔgyinlanle ɔ nloa ɛ? Ɔ gyakɛ  amkpa ɛzonlenlɛ sua ne anu ɛlɛ, ɔzonlenle Gyihova Nyamenle nɔɔzo nee ewiazo. (Luku 2:36-38) Ɔda ali kɛ asɔneyɛlɛ mɔɔ Ana angyakyi wɔ ɛzonlenlɛ sua ne anu la boale ye kpole manle ɔgyinlanle alɔbɔlɛlilɛ nee anwokoonwuyɛlɛ nganeɛ mɔɔ ɔdele la anloa.

22. Kɛzi ahunlanvolɛ mrenya nee mraalɛ bie mɔ ɛgyinla anwokoonwuyɛlɛ nloa ɛ?

²² Raalɛ bie mɔɔ ɛli ɛvolɛ 72 mɔɔ yɛle kunlavolɛ wɔ ɛvolɛ bulu mɔɔ ɛze ɛhɔ anu la hanle kɛ, “Ngyegyelɛ kpole mɔɔ melɛyia la a le kɛ menlɛ bokavolɛ mɔɔ me nee ye di adwelie a. Ɛnee me hu le tievolɛ kpalɛ. Ɛnee yɛdi asafo ne nee ɛzonlenlɛ gyima ne mɔɔ yɛyɛ la anwo adwelie.” Kunlavolɛ fofolɛ noko hanle kɛ: “Ɔwɔ nuhua kɛ saa ɔkyɛ a ɛ rɛle fi ɛdeɛ, noko mebahola meaha ye wienyi kɛ debie mɔɔ awie fa ye mekɛ yɛ la a boa ye maa ɔ rɛle fi a. Ɛbahola wɔaboa awie mɔ kpalɛ.” Nrenya kunlavolɛ ko mɔɔ ɛli ɛvolɛ 67 la nee ye yɛ adwenle na ɔka kɛ: “Adenle kpalɛ ko mɔɔ bɛdua zo bɛgyinla alɔbɔlɛlilɛ nloa la a le kɛ ɛkɛva ɛ nwo ɛkɛmaa na ɛkɛkyekye awie mɔ arɛle.”

23, 24. Arɛlekyekyelɛ boni a Baebolo ne fa maa mgbanyima a, titile menli mɔɔ bɛle ahunlanvolɛ la ɛ?

²³ Bokavolɛ mɔɔ ɛkulo ye la kola wu ɛdeɛ, noko Gyihova di nɔhalɛ mekɛ biala. Belemgbunli Devidi mɔɔ dɛnlanle aze wɔ tete ne la dole edwɛne kɛ: “Debie ko yɛɛ mebiza ye [Gyihova] ɛkɛ a, na yemɔ yɛ mebakpo ɔ bo zo a; kɛ menwɔdɛnla [Gyihova] sua nu dahuu, wɔ mekɛ mɔɔ mede ngoane nu, kɛ menwɔnwu kɛ [Gyihova] kɛnlɛma si de, na meabiza moalɛ wɔ ye Ɛzonlenlɛ Sua ne anu.”—Edwɛndolɛ 27:4.

²⁴ Ɛzoanvolɛ Pɔɔlo dule folɛ kɛ: “Di ahunlanvolɛ mɔɔ ɛnlɛ neavolɛ la eni.” (1 Temɔte 5:3) Folɛdulɛ mɔɔ doa adehilelɛ ɛhye azo la kile kɛ bie a ɛnee ɔwɔ kɛ asafo ne boa ahunlanvolɛ mɔɔ bɛfɛta mɔɔ bɛnlɛ bɛ nwo  amra mɔɔ bikye bɛ la. Noko akee, mɔɔ boka adwenle mɔɔ wɔ edwɛkɛkpɔkɛ ‘enililɛ’ anwo la a le kɛ ɔwɔ kɛ bɛbu bɛ kɛ bɛsonle bolɛ. Nea kɛzi ɔyɛ arɛlekyekyelɛ kɛ ahunlanvolɛ mraalɛ nee mrenya kɛnwu kɛ Gyihova bu bɛ kɛ bɛsonle bolɛ na ɔbaboa bɛ a!​—Gyemise 1:27.

25. Bodane boni a tɛbɔ ɛkɛ maa mgbanyima a?

²⁵ Nyamenle Edwɛkɛ ne ka kɛ: “Mrenya mgbanyinli anwofɛlɛko a le bɛ egyɛne.” Ɔle “anyunlunyia abɔtile [ɔmaa] mɔɔ lɛ ye la; ɛbɛla kpalɛ ɛbɔlɛ a maa bɛnyia ye a.” (Mrɛlɛbulɛ 16:31; 20:29) Yemɔti, saa wɔgya anzɛɛ yeha ɛ ngome bieko a, kɔ zo fa Gyihova ɛzonlenlɛ ne dumua wɔ ɛbɛlabɔlɛ nu. Ɛhye bamaa wɔanyia duma kpalɛ wɔ Nyamenle anyunlu kɛkala na wɔanyia anyelazo kɛ ɛbanyia dahuu ngoane wɔ ewiade mɔɔ mgbanyinliyɛlɛ ɛnrɛyɛ amaneɛnwunlɛ bieko la anu.—Edwɛndolɛ 37:3-5; Ayezaya 65:20.