TILE 25

Kɛ Ɔkɛyɛ Na Meali Bɛnwobɔlɛ Zo Konim Ɛ?

“Membɔle bɛnwobɔlɛ bo la ɛnee menyia ɛvolɛ mɔtwɛ. Nzinlii menwunle kɛ Nyamenle kyi. Mekɛ biala mɔɔ mebava me nwo meawula nyɛleɛ ɛhye anu la, ɔgyegye me kpalɛ. Mebiza me nwo kɛ, ‘Asoo Nyamenle anye balie me nwo?’”​—Luiz.

SAA ɛbɔ fuamunli a, ɔkola ɔmaa ɛnyia nla nwo atiakunluwɔzo mɔɔ anu yɛ se la. Ɔbahola yeamaa wɔava ɛ nwo wɔawula bɛnwobɔlɛ nu. * Menli dɔɔnwo ka kɛ ɛhye ɛnle debie ɛzulolɛ. Bɛkile kɛ, “Ɔngyegye awie biala.” Noko akee, ɔlua ndelebɛbo kpalɛ bie ati ɔhyia kɛ ɛtwe ɛ nwo ɛfi nyɛleɛ ɛhye anwo. Ɛzoanvolɛ Pɔɔlo hɛlɛle kɛ: ‘Yemɔti, bɛhu bɛ sonlabaka ne nvɛyeba ne mɔ wɔ nla nwo atiakunluwɔzo ɛtane nwo.’ (Kɔlɔsaema 3:5) Bɛnwobɔlɛ ɛngu nla nwo atiakunluwɔzo ɛtane emomu ɔmaa ɔyɛ kpole. Akee suzu ninyɛne ɛhye mɔ anwo:

● Bɛnwobɔlɛ maa awie yɛ angomedi. Kɛ neazo la, saa awie ɛlɛbɔ ɔ nwo a, ɔfa ye adwenle ɔsie ɔ ngomekye ye nganeɛdelɛ zo.

● Awie mɔɔ bɔ ɔ nwo la bahola abu awie mɔ kɛ nla ti a bɛwɔ ɛkɛ a, anzɛɛ bɛle menli mɔɔ ɔwɔ kɛ awie fa bɛ dielie ɔ nye wɔ nla nu a.

● Angomedi adwenle mɔɔ bɛnwobɔlɛ maa bɛnyia la kola maa ɔyɛ se kɛ awie banyia nla nu anyelielɛ bɔbɔ wɔ agyalɛ nu.

Kɛ anrɛɛ ɛbalua bɛnwobɔlɛ zo wɔali nla nu atiakunluwɔzo nwo gyima la, bɔ mɔdenle kɛ ɛbazukoa bɛnwozohomonlɛ. (1 Tɛsalonaekama 4:4, 5) Debie mɔɔ limoa mɔɔ ɔbaboa wɔ la a le kɛ ɛbahwe ɛ nwo wɔavi debie biala mɔɔ bamaa wɔanyia nla nu atiakunluwɔzo la anwo. (Mrɛlɛbulɛ 5:8, 9) Na saa bɛnwobɔlɛ ɛha ɛ nwo ɛ? Bie a wɔbɔ mɔdenle kɛ ɛgyakyi noko ɛngola. Wɔannea a, ɛbanyia adwenle kɛ ɛnrɛhola ye gyakyi yɛɛ ɛnrɛhola ɛnrɛva Nyamenle ngyinlazo ne mɔ ɛnrɛbɔ wɔ ɛbɛla. Kɛ Pedro dele nganeɛ la ɛne. Ɔka kɛ, “Saa mebɔ me nwo biala a, ɔmaa meyɛ basaa, na mete nganeɛ kɛ menrɛnyia ɛtanefakyɛ ɛlɛ. Ɔba ye zɔhane a mengola menyɛ asɔne bɔbɔ.”

Saa zɛhae a wɔ tɛnlabelɛ ne de a, ɛnee ka wɔ ahonle to azule nu. Anyelazo wɔ ɛkɛ. Mgbavolɛ nee mbɛlɛra yɛɛ mgbanyinli bɔbɔ ɛhola ɛli bɛnwobɔlɛ zo konim. Ɛdawɔ noko ɛbahola!

Di Adwenle Nu Fɔlɛbualɛ Zo

Kɛ mɔɔ yɛnwu ye la, menli mɔɔ bɔ bɛ nwo la adwenle ta bua bɛ fɔlɛ. Nɔhalɛ nu, ‘saa ɛdi nyane wɔ adenle mɔɔ sɔ Nyamenle anye la azo a’ yemɔ bahola aboa wɔ yeamaa wɔali bɛnwobɔlɛ zo konim. (2 Kɔlentema 7:11) Noko saa wɔ adwenle bua wɔ fɔlɛ somaa a ɔnle kpalɛ. Ɔkola ɔmaa ɛ sa nu to na ɛnyia adwenle kɛ ɛnrɛhola ngyegyelɛ ne anloa gyinla.​—Mrɛlɛbulɛ 24:10.

Ɔti nyia adwenle kpalɛ wɔ wɔ tɛnlabelɛ ne anwo. Bɛnwobɔlɛ gua sonla nwo evinli. Ɔkola ɔmaa ɛyɛ akɛlɛ ɛmaa “atiakunluwɔzo nee anyelielɛ ngakyile,” na ɛnyia subane ɛtane dɔɔnwo. (Taetɛse 3:3) Noko akee, bɛnwobɔlɛ ɛmboka nla nu ɛbɛlatane le kɛ adwɔmane ɛbɛla la anwo. (Dwuudu 7) Ɔti saa ɛfa ɛ nwo ɛwula bɛnwobɔlɛ nu a, ɔnle kɛ ɛnyia adwenle kɛ wɔyɛ ɛtane mɔɔ ɛnrɛnyia ɛtanefakyɛ a. Mɔɔ hyia la a le kɛ ɛbahomo ɛ nwo zo na wɔayɛ biala mɔɔ ɛbahola la wɔali zolɛ konim!

Saa ɛsia ɛyɛ bieko a ɛbali nyane. Noko saa ɔba ye zɔ a, yemɔ ɛngile kɛ ɛle amumuyɛnli. Ɔti mmamaa ɛ sa nu to. Nwu debie mɔɔ ɔmaanle ɛbɔle ɛ nwo la na bɔ mɔdenle kɛ ɛnrɛmaa ɔnrɛha ɛ nwo.

Nyia mekɛ dwenledwenle Nyamenle ɛlɔlɛ nee ye anwunvɔnezelɛ ne anwo kpalɛ. Edwɛndolɛnli Devidi mɔɔ ɛnee lɛ sinlidɔlɛ ngakyile la hanle kɛ: “Kɛ mɔɔ selɛ se ɔ mra anwunvɔne la, zɔhane ala a Gyihova ɛze bɛdabɛ mɔɔ bɛsulo ye la anwunvɔne a. Ɔluakɛ ɔze kɛzi yɛde la kpalɛ, ɔkakye kɛ yɛle ndɛtɛlɛ.” (Edwɛne 103:13, 14) Gyihova ze kɛ yɛnli munli na ‘ɔlɛ ɛhulolɛ kɛ ɔbava ɛtane yeahyɛ.’ (Edwɛne 86:5) Noko eza ɔkulo kɛ yɛbɔ mɔdenle yɛyɛ yɛ afoa nu ɛdeɛ. Duzu a ɛbahola wɔayɛ amaa wɔagyakyi bɛnwobɔlɛ ɛ?

Nea ninyɛne mɔɔ ɛfa ɛdielie ɛ nye la boɛ. Asoo ɛnea TV anzɛɛ yintanɛte zo gyimalilɛ mɔɔ maa ɛnyia nla nwo nganeɛdelɛ la ɔ? Edwɛndolɛnli ne yɛle asɔne kɛ: “Ye me nye fi ninyɛne mgbane mgbane ɛnleanlɛ nwo.”​—Edwɛne 119:37.

Bɔ mɔdenle fa wɔ adwenle sie ninyɛne gyɛne zo. Kilisienenli bie mɔɔ bɛfɛlɛ ye William la hanle kɛ: “Kenga Baebolo ne anzɛɛ Baebolo nwo mbuluku bie kolaa na wɔahɔla. Ɔhyia kpalɛ kɛ ɛbadwenledwenle sunsum nu ninyɛne nwo kolaa na wɔahɔla.”​—Felepaema 4:8.

Ka nwolɛ edwɛkɛ kile awie. Wɔannea a nyianezelɛ ti, ɔbayɛ se kɛ ɛbaha nwolɛ edwɛkɛ wɔahile awie. Noko yemɔ baboa wɔ yeamaa wɔali nwolɛ gyima! Kilisienenli bie mɔɔ bɛfɛlɛ ye David la nwunle ɛhye. Ɔka kɛ: “Menganle nwolɛ edwɛkɛ mengilele me papa. Me rɛle ɛnrɛvi mɔɔ ɔhanle la ɛlɛ. Ɔzelele ɔnleanle me nyunlu koonwu na ɔhanle kɛ, ‘Wɔmaa me nye ɛlie ɛ nwo.’ Ɔnwunle kɛ menyianle akɛnrasesebɛ kpalɛ na meahola meaha meahile ye. Ɔvale mɔɔ mehyia nwo amaa meahola meali ngyegyelɛ ne anwo gyima la ɔmaanle me.

“Me papa nee me zuzule ngɛlɛlera bie mɔ anwo. Ngɛlɛlera ne mɔ maanle menwunle kɛ menle sonla ɛtane, noko akee eza ɔmaanle menwunle kɛzi Gyihova bu nyɛleɛ ɛhye mɔ la. Ɔzele me kɛ menyɛ ye ngyikyingyikyi na ɔbayɛ boɛ na ɔbɔle me ɛwɔkɛ kɛ yɛbazuzu nwolɛ bieko. Ɔhanle kɛ saa mesia meyɛ bieko a, memmamaa me sa nu to, emomu memia me nwo kɛ menrɛyɛ bieko.” David dwulale ye edwɛkɛ ne kɛ: “Moalɛ mɔɔ tɛla biala la a le kɛ ɛbaha nwolɛ edwɛkɛ wɔahile awie mɔɔ ɔlɛ ɛhulolɛ kɛ ɔbaboa wɔ la.”

[Ɔbodwɛkɛ]

NGƐLƐLERA TITILI

“Nriandi mgbavolɛ nu atiakunluwɔzo, na ɛ nee bɛdabɛ mɔɔ bɛfa ahonle mɔɔ anu te bɛfɛlɛ Awulae la ɛli tenleneyɛlɛ, diedi, ɛlɔlɛ nee anzodwolɛ nzi.”​—2 Timote 2:22.

NZUZULƐ

Yɛ asɔne kolaa na nganeɛdelɛ ne anu ayɛ se. Sɛlɛ Gyihova Nyamenle maa ɔmaa wɔ “tumi bedevinli ne” mɔɔ ɛbava wɔali sɔnea ne azo konim la.​—2 Kɔlentema 4:7.

ASOO ƐZE . . .

Nla nwo nganeɛdelɛ bahola avo awie mɔɔ le bɛtɛɛ la anwo zo. Noko nrenyia anzɛɛ raalɛ kpalɛ komo ɔ nwo zo wɔ fealera nu bɔbɔ.

YƐ ƐHYE!

Mebahola meava me adwenle meazie ninyɛne mɔɔ nwolɛ te la azo saa ․․․․․

Kɛ anrɛɛ mebamaa me nganeɛdelɛ avo me nwo zo la ․․․․․

Mɔɔ me nee me awovolɛ bazuzu nwo wɔ edwɛkɛ ɛhye anwo la a le ․․․․․

KƐ WƆ ADWENLE SE WƆ Ɛ?

● Duzu ati a ɔwɔ kɛ ɛkakye kɛ Gyihova ‘lɛ ɛhulolɛ kɛ ɔbava ɛtane yeahyɛ’ ɛ?​—Edwɛne 86:5.

● Saa Nyamenle mɔɔ vale nla nwo nganeɛdelɛ bɔle wɔ la se ɛzukoa bɛnwozohomonlɛ a, ɛnea a ɔnlɛ wɔ nu anwodozo ɔ?

[Edwɛkɛ mɔɔ bɛkpa]

Mɔɔ mengyakyile bɛnwobɔlɛ la, akee menyianle adwenle mɔɔ anu te wɔ Gyihova anyunlu, na ɛhye le debie mɔɔ nwolɛ hyia me kpalɛ tɛla biala a!’’​—Sarah

[Nvoninli]

Saa ɛlɛnriandi na ɛtɔ aze a ɛnzia ɛmbɔ ɔ bo bieko emomu ɛtoa zo, zɔhane ala a saa ɛkulo kɛ ɛgyakyi bɛnwobɔlɛ na ɛsia ɛyɛ bieko a ɔngile kɛ mɔdenle mɔɔ wɔbɔ la amuala ɛyɛ mgbane a