Ɛzonlenlɛ nu Koyɛlɛ wɔ Yɛ Mekɛ Ye Anu—Duzu a Ɔkile A?
Tile 1
Ɛzonlenlɛ nu Koyɛlɛ wɔ Yɛ Mekɛ Ye Anu—Duzu a Ɔkile A?
1, 2. (a) Duzu a menli dɔɔnwo anye ɛralie nwo wɔ yɛ mekɛ ye anu a? (b) Anyelazo boni a menli mɔɔ lɛ ahonle kpalɛ la ɛranyia a?
WƆ EWIADE amuala, menli dɔɔnwo anye ɛralie ɛzonlenlɛ bie mɔɔ koyɛlɛ wɔ nu la anwo. Ɛzonlenlɛ ɛhye ɛlɛka menli mgbe mgbe mɔɔ vi maanle, mbusua, nee aneɛ ngakyile nu la abɔ nu. Bɛboɔboa menli dɔɔnwo anloa ɛvolɛ biala. Baebolo ne ka menli ɛhye mɔ anwo edwɛkɛ kɛ Gyihova “alasevolɛ” na bɛfɛlɛ bɛ “menli pemgbenleamgbe” anzɛɛ ekpunli kpole. Bɛsonle Nyamenle “alehyenlɛ nee aledwolɛ.” (Ayezaya 43:10-12; Yekile 7:9-15) Duzu ati a bɛyɛ ɛhye a? Bɛyɛ ɛhye ɔluakɛ bɛranwu kɛ Gyihova a le nɔhalɛ Nyamenle kokye ne a. Ɛhye ka bɛ maa bɛbɔ ɛbɛla mɔɔ nee ye tenlene ndenle ne mɔ yia la. Eza bɛranwu ye kɛ yɛwɔ ewiade ɛtane ɛhye “awieleɛ mekɛ” nu, na ɔnrɛhyɛ Nyamenle bazɛkye ye, na yeava paladaese ewiade fofolɛ yeazie ɔ bo zo.—2 Temɔte 3:1-5, 13; 2 Pita 3:10-13.
2 Nyamenle Edwɛkɛ ne bɔ ɛwɔkɛ kɛ: “Ɔnrɛhyɛ biala ɛnee amumuyɛnli ne abo zo ɛminli . . . Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.” (Edwɛndolɛ 37:10, 11) “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.” (Edwɛndolɛ 37:29) Nyamenle bakyikyi “bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:4.
3 Bɛbava menli mɔɔ bɛlɛboɔboa bɛ nloa wɔ nɔhalɛ ɛzonlenlɛ nu ɛnɛ la a bɛabɔ ewiade fofolɛ ne abo a. Bɛranwu mɔɔ Nyamenle kulo la na bɛlɛbɔ mɔdenle kɛ bɛbayɛ. Gyisɛse kile kɛzi ɛhye anwo hyia la, ɔhanle kɛ: “Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ wɔzoa ye la.” (Dwɔn 17:3) Ɛzoanvolɛ Dwɔn hɛlɛle kɛ: “Ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu.”—1 Dwɔn 2:17.
Mɔɔ Ɔkile La
4 Duzu a menli dɔɔnwo mɔɔ bɛlɛboɔboa bɛ nloa wɔ nɔhalɛ ɛzonlenlɛ nu wɔ yɛ mekɛ ye anu la kile a? Ɔkile kɛ yɛbikye ewiade ɛtane ɛhye awieleɛ, na yɛ nye la kɛ ɔnrɛhyɛ Nyamenle bava ye ewiade fofolɛ ne ara. Yɛ muala yɛdi daselɛ kɛ Baebolo ngapezo mɔɔ ka anloaboɔboalɛ gyima kpole ɛhye anwo edwɛkɛ la ɛlɛba nu. Ngapezo ɛhye mɔ anu ko ka kɛ: “Ɔbara ye kɛ, mekɛ ne mɔɔ li amozi la [awieleɛ mekɛ ɛhye] anu, boka ne mɔɔ [Gyihova] Ɛzonlenlɛ Sua ne gyi zolɛ la [ye nɔhalɛ ɛzonlenlɛ ne] bayɛ boka tendenle adɛla ewiade boka biala [adɛla ɛzonlenlɛ gyɛne biala]. Maanle maanle bapia ara nwolɛ, na menli dɔɔnwo baraha kɛ, ‘Bɛrɛla bɛmaa yɛhɔ [Gyihova] Boka ne azo, yɛhɔ Gyekɔbo Nyamenle ne sua nu, amaa yeahilehile yɛ ye ndenle ne mɔ, na yɛalua ye ndenle ne mɔ anu.’”—Maeka 4:1, 2; Edwɛndolɛ 37:34.
5 Ɔle nɔhalɛ kɛ tɛ maanle maanle ne amuala a ɛlɛba Gyihova ɛzonlenlɛ sua ne anu a, noko nuhua menli mgbe mgbe ɛlɛyɛ zɔ. Saa bɛsukoa Gyihova Nyamenle atiakunlukpɔkɛ mɔɔ ɛlɔlɛ wɔ nu la na bɛnwu ye subane ngɛnlɛma ne mɔ a ɔka bɛ ahonle. Bɛbɛlɛ bɛ nwo aze bɛkpondɛ mɔɔ Nyamenle kulo kɛ bɛyɛ la. Bɛ asɔneyɛlɛ le kɛ mɔɔ edwɛndolɛnli ne hanle la: “Kilehile me maa menyɛ mɔɔ ɛkulo la ɔluakɛ wɔmɔ a ɛle me Nyamenle ne a.”—Edwɛndolɛ 143:10.
6 Asoo ɛboka ekpunli kpole ne, menli mɔɔ Gyihova ɛlɛka bɛ abɔ nu wɔ ɛzonlenlɛ mɔɔ koyɛlɛ wɔ nu la anwo ɔ? Asoo wɔ nyɛleɛ wɔ adehilelɛ mɔɔ ɔfa ɔmaa wɔ ye Edwɛkɛ ne anu la da ye ali kɛ ɛdie ɛto nu kɛ Gyihova a fa maa ɔ? Ɛbalua “ye ndenle ne mɔ anu” wɔahɔdwu ni?
Kɛzi Bɛkola Bɛnyia Ɛzonlenlɛ nu Koyɛlɛ La
7 Gyihova atiakunlukpɔkɛ a le kɛ ɔbaha abɔdeɛ mɔɔ ze nrɛlɛbɛ la amuala yeabɔ nu wɔ nɔhalɛ ɛzonlenlɛ nu. Nea kɛzi yɛ nye la kenle ne mɔɔ menli mɔɔ de aze la amuala bazonle nɔhalɛ Nyamenle kokye ne la ade a! (Edwɛndolɛ 103:19-22) Noko akee, kolaa na ɛhye ahola ayɛ zɔ la, ɔwɔ kɛ Gyihova sɛkye menli mɔɔ kpo kɛ bɛkɛyɛ ye ɛhulolɛdeɛ la. Ɔfi anwunvɔnezelɛ nu ɔdumua ɔbɔ kɔkɔ wɔ mɔɔ ɔbayɛ la anwo amaa menli kɔsɔɔti anyia adenle ayɛ nzenzaleɛ wɔ bɛ ɛbɛlabɔlɛ nu. (Ayezaya 55:6, 7) Yemɔti, wɔ yɛ mekɛ ye anu bɛlɛkakye “menli ngakyile, mbusua ekpunli ekpunli, aneɛ ngakyile, nee maanle maanle kɔsɔɔti” kɛ: “Bɛzulo Nyamenle, na bɛye ye ayɛlɛ. Ɔluakɛ mekɛ ne ɛdwu mɔɔ ɔbabua aleɛabo amra ndɛne a. Bɛzonle Nyamenle mɔɔ bɔle anwuma, azɛlɛ, nyevile, nee azule muala la.” (Yekile 14:6, 7) Asoo wɔlie zɔhane ɛvɛlɛlɛ ne azo? Saa wɔyɛ zɔ a, ɛnee ɛlɛ adenle ɛboa awie mɔ gyɛne ɛmaa bɛbanwu nɔhalɛ Nyamenle ne na bɛsonle ye.
8 Gyihova anye ɛnlie menli mɔɔ ka kɛ bɛdie ye bɛdi noko bɛ nyɛleɛ kile kɛ bɛnzonle ye kpalɛ la anwo. Nyamenle kulo kɛ menli nyia ye “ɛhulolɛdeɛ ne anwo ndelebɛbo” kpalɛ na bɛda ɛhye ali wɔ bɛ ɛbɛlabɔlɛ nu. (Kɔlɔsaema 1:9, 10) Yemɔti, menli mɔɔ kile ɛhye anwo anyezɔlɛ na bɛsukoa Baebolo ne anu mɔlebɛbo ngilehilelɛ ne la, pele kɛ bɛkɛnyi wɔ ɛzonlenlɛ nu. Bɛkulo kɛ bɛnwu Gyihova kpalɛ, bɛnyia ye Edwɛkɛ ne anu ndelebɛbo mɔɔ di munli, na bɛfa bɛdi gyima dahuu wɔ bɛ ɛbɛlabɔlɛ nu. Bɛbɔ mɔdenle bɛda yɛ Ze ne mɔɔ wɔ anwuma la subane ne mɔ ali na bɛnyia adwenle mɔɔ ɔlɛ ye wɔ ninyɛne nwo la bie. Ɛhye ka bɛ maa bɛyɛ ngoanelielɛ gyima ne mɔɔ Gyihova ɛlɛmaa bɛayɛ wɔ azɛlɛ ye azo wɔ yɛ mekɛ ye anu la. Asoo ɛlɛ ɛhulolɛ kɛ ɛkɛyɛ bie ɔ?—Maake 13:10; Hibuluma 5:12–6:3.
9 Baebolo ne da ye ali kɛ ɔwɔ kɛ menli mɔɔ sonle Gyihova la yɛ ko. (Ɛfɛsɛsema 4:1-3) Ɔwɔ nuhua kɛ yɛde ewiade mɔɔ anu ɛhyehyɛ la anu yɛɛ yɛpele kɛ yɛkɛli yɛ sinlidɔlɛ zo ɛdeɛ, noko koyɛlɛ ɛhye wɔ ɛkɛ ne ɛnɛ. Gyisɛse yɛle asɔne kɛ ye ɛdoavolɛ ne mɔ ɛyɛ ko na nɔhalɛ koyɛlɛ ɛdɛnla bɛ avinli. Duzu a ɛnee ɛhye bahile a? Mɔɔ lumua, ɛnee ɔwɔ kɛ bɛ nee Gyihova nee ɔ Ra ne nyia abusuabɔlɛ kpalɛ. Mɔɔ tɔ zo nwiɔ, ɛnee ɔwɔ kɛ ɛdoavolɛ ne mɔ bɔ nu yɛ ko. (Dwɔn 17:20, 21) Amaa ɛhye ayɛ zɔ la, Gyihova dua Keleseɛne asafo ne azo fa adehilelɛ maa ye menli.
Duzu Ninyɛne a Fa Koyɛlɛ Ba A?
10 Bɛhile ninyɛne nsuu mɔɔ boa maa yɛnyia koyɛlɛ wɔ ɛzonlenlɛ nu la wɔ aze ɛke. Mekɛ mɔɔ ɛlɛye kpuyia ne mɔ anloa la, dwenle kɛzi nuhua ko biala ka abusuabɔlɛ mɔɔ ɛ nee Gyihova nee ɛ gɔnwo mɔ Keleseɛnema lɛ ye la anwo. Saa yɛsuzu ninyɛne ɛhye mɔ anwo na yɛkenga tɛkese ne mɔ mɔɔ bɛangɛlɛ nuhua edwɛkɛ ne la a ɔbaboa yeamaa yɛanyia nyamenlezo nrɛlɛbɛ, adwenle kpalɛ, nee nwunu—subane mɔɔ yɛ muala yɛhyia nwo a. (Mrɛlɛbulɛ 5:1, 2; Felepaema 1:9-11) Suzu ninyɛne ɛhye mɔ anwo ngoko ngoko.
(1) Yɛdie yɛto nu kɛ Gyihova a lɛ adenle kile mɔɔ le kpalɛ nee mɔɔ le ɛtane a. “Yeye wɔ ahonle nu fa ɛ rɛle wula [Gyihova] anu, mmafa wɔ adwenle ɛsɔ ɛ ngome wɔ nrɛlɛbɛ. Nwu Nyamenle wɔ wɔ ɛbɛlabɔlɛ muala anu, na ɔbamaa wɔ ndenle adenrɛ fɔɔnwo amaa wɔ.”—Mrɛlɛbulɛ 3:5, 6.
Duzu ati a ɔwɔ kɛ yɛfa Gyihova folɛdulɛ nee ye adehilelɛ yɛdi gyima wɔ mekɛ mɔɔ yɛlɛsi kpɔkɛ la ɛ? (Edwɛndolɛ 146:3-5; Ayezaya 48:17)
(2) Yɛlɛ Nyamenle Edwɛkɛ ne mɔɔ kile yɛ adenle a. “Mɔɔ yɛvale Nyamenle nrɛlaleɛ ne yɛrɛlɛle bɛ la, bɛdiele na bɛzɔle nu kɛ ɔnle edwɛkɛ mɔɔ vi sonla ɛkɛ a, na ɔvi Nyamenle ɛkɛ, yɛɛ ɔle zɔhane noko. Ɔluakɛ Nyamenle ɛlɛyɛ ye gyima wɔ bɛdabɛ mɔɔ bɛdie bɛdi la anu.”—1 Tɛsalonaekama 2:13.
Esiane boni a wɔ nu kɛ yɛbayɛ mɔɔ yɛdayɛ mumua ne yɛsuzu kɛ ɔle kpalɛ la ɛ? (Mrɛlɛbulɛ 14:12; Gyɛlɛmaya 10:23, 24; 17:9)
Saa yɛnze mɔɔ Baebolo ne ka ye wɔ edwɛkɛ bie anwo a, duzu a ɔwɔ kɛ yɛyɛ a? (Mrɛlɛbulɛ 2:3-5; 2 Temɔte 3:16, 17)
(3) Yɛ muala yɛnyia sunsum nu ndetelɛ ko ne ala. “[Gyihova] bahilehile ɛ mra mrenya ne mɔ.” (Ayezaya 54:13) “Bɛmaa yɛdwenle yɛkpondɛ adenle mɔɔ yɛdua zolɛ a yɛkɛhulo yɛ nwo ngoko ngoko, na yɛkɛyɛ gyima kpalɛ la. Bɛmmamaa yɛgyakyi kɛ yɛkɛhɔ yɛ nyianu ne, kɛmɔ bie mɔ yɛ la. Bɛdabɛ bɛkola bɛnwu kɛ Awulae Kenle ne [ɛzɛkyelɛ ne] ɛbikye, yemɔti bɛmaa yɛsosɔ yɛ nwo ngoko ngoko.”—Hibuluma 10:24, 25.
Nvasoɛ boni a menli mɔɔ fa bɛ nwo wula sunsum nu ndetelɛ nwo nziezielɛ mɔɔ Gyihova ɛyɛ la anu la nyia a? (Ayezaya 65:13, 14)
(4) Gyisɛse Kelaese a le yɛ Menle anzɛɛ Adekilevolɛ a, tɛ dasanli biala ɔ. “Na bɛmɛ, bɛmmamaa awie fɛlɛ bɛ ‘Kilehilevolɛ,’ ɔluakɛ bɛ muala bɛle mediema yɛɛ bɛ Kilehilevolɛ kokye. Eza bɛmmafɛlɛ awie biala bɛ ‘ze’ wɔ azɛlɛ ye azo, ɔluakɛ bɛ Ze kokye, na yemɔ ala a wɔ anwuma lɔ la. Bɛmmamaa awie fɛlɛ bɛ ‘ɔ menle ’, ɔluakɛ bɛ Menle kokye; yemɔ a le Kelaese ne.”—Mateyu 23:8-10.
Asoo ɔwɔ kɛ yɛ nuhua bie suzu kɛ ɔsonle bolɛ ɔtɛla ɔ gɔnwo mɔ ɔ? (Wulomuma 3:23, 24; 12:3)
(5) Yɛ nye la kɛ Nyamenle Belemgbunlililɛ ne ala a bali alesama ngyegyelɛ nwo gyima a. “Bɛyɛ nzɛlɛlɛ a bɛyɛ ye zɛhae: ‘Yɛ Ze mɔɔ wɔ anwuma: Wɔ duma nwo ɛde; Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.’ Bɛbɔ mɔdenle bɛdwenle [“bɛlumua bɛkpondɛ,” NW] Nyamenle Belemgbunlililɛ ne nee mɔɔ Nyamenle kpondɛ kɛ bɛyɛ la anwo kpalɛ.”—Mateyu 6:9, 10, 33.
Adenle boni azo a belemgbunlililɛ ne mɔɔ yɛbalumua yɛakpondɛ la baboa amaa yɛabɔ yɛ koyɛlɛ ne anwo bane ɛ? (Maeka 4:3; 1 Dwɔn 3:10-12)
(6) Sunsum nwuanzanwuanza ne boa Gyihova azonvolɛ maa bɛnyia subane mɔɔ fa Keleseɛnema koyɛlɛ ba la. “Nyamenle Sunsum ne ma a le ɛhye mɔ: ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ, mɛlɛbɛnwoaze, yɛɛ bɛ nwo zo ɛhomolɛ.”—Galeehyeama 5:22, 23.
Duzu a ɔwɔ kɛ yɛyɛ na Nyamenle sunsum ne azo ma wɔ yɛ nu a? (Gyima ne 5:32)
Adenle boni azo a Nyamenle sunsum ne mɔɔ yɛbanyia la baboa amaa yɛ nee yɛ gɔnwo mɔ Keleseɛnema anyia abusuabɔlɛ kpalɛ a? (Dwɔn 13:35; 1 Dwɔn 4:8, 20, 21)
(7) Nyamenle nɔhalɛ azonvolɛ kɔsɔɔti bɔ ye Belemgbunlililɛ nwo edwɛkpa ne nolo. “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.”—Mateyu 24:14.
Duzu a ka yɛ maa yɛyɛ edwɛkɛhanlɛ gyima ɛhye dahuu a? (Mateyu 22:37-39; Wulomuma 10:10)
11 Gyihova mɔɔ yɛyɛ ko yɛsonle ye la twe yɛ bikye ye na ɔboa ɔmaa yɛ nee yɛ mediema diedima nyia agɔnwolɛvalɛ mɔɔ yɛ anyelielɛ a. Edwɛndolɛ 133:1 ka kɛ: “Bɛnlea kɛ ɔsi ɔle kɛnlɛma nee kpalɛ, kɛ mediema kɛbɔ nu kɛdɛnla koyɛlɛ nu!” Nea ahomeka mɔɔ ɔyɛ kɛ yɛkɛhwe yɛ nwo yɛkɛvi ewiade ne nee ye angomediyɛlɛ, ɛbɛlatane ɛbɔlɛ nee basabasayɛlɛ nwo na yɛ nee menli mɔɔ kulo Gyihova na bɛdi ye mɛla zo la kɛbɔ nu kɛdɛnla a!
Koati Ninyɛne Mɔɔ Fa Mgbakyemgbakyenu Ba La
12 Amaa yɛanzɛkye koyɛlɛ mɔɔ yɛ nee yɛ mediema mɔɔ wɔ ewiade ye amuala lɛ la, ɔwɔ kɛ yɛkoati ninyɛne mɔɔ fa mgbakyemgbakyenu ba la. Ninyɛne ɛhye mɔ anu ko a le kɛ yɛbali yɛ ti anwo na yɛahwe yɛ nwo yɛavi Nyamenle nee ye mɛla nwo. Gyihova boa yɛ maa yɛnwu ye kɛ subane ɛhye vi Seetan Abɔnsam ɛkɛ, na yɛkoati. (2 Kɔlentema 4:4; Yekile 12:9) Seetan a manle Adam nee Yive bule bɛ nye guale mɔɔ Nyamenle hanle la azo na bɛzile kpɔkɛ mɔɔ tia Nyamenle ɛhulolɛdeɛ a. Mɔɔ vi nu rale la yɛle munzule manle bɛ nee yɛdayɛ. (Mɔlebɛbo 3:1-6, 17-19) Ewiade ye anu amra dɔɔnwo ɛhwe bɛ nwo ɛvi Nyamenle nee ye mɛla nwo na bɛlɛdi bɛ ti anwo. Yemɔti ɔhyia kɛ yɛko yɛtia subane ɛhye mɔɔ wɔ yɛ nu la.
13 Kɛ neazo la, suzu ɛwɔkɛ kɛnlɛma mɔɔ Gyihova ɛbɔ kɛ ɔfa anwuma fofolɛ nee azɛlɛ fofolɛ mɔɔ “pɛlepɛlelilɛ wɔ nu” yeazie ewiade ɛtane ɛhye abo zo la anwo. (2 Pita 3:13) Ɔwɔ kɛ ɛhye ka yɛ maa yɛbɔ ɔ bo yɛbɔ ɛbɛla mɔɔ bamaa yɛanyia adenle yɛadɛnla ewiade fofolɛ ne mɔɔ pɛlepɛlelilɛ wɔ nu la anu. Ɔwɔ kɛ yɛdi Baebolo nu folɛdulɛ ɛhye azo: “Bɛmmakulo ewiade anzɛɛ ewiade debie biala. Awie biala mɔɔ kulo ewiade la ɛnlɛ Selɛ ne anwo ɛhulolɛ.” (1 Dwɔn 2:15) Ɛhye ati, yɛkoati ewiade nyɛleɛ—atianwolilɛ subane, angomediyɛlɛ, ɛbɛlatane ɛbɔlɛ nee basabasayɛlɛ kɔsɔɔti. Ɔnvane nwolɛ kɛ yɛnli munli la, yɛbɔ mɔdenle yɛyeye yɛ ahonle nu yɛtie Gyihova. Yɛ ɛbɛlabɔlɛ muala da ye ali kɛ yɛ nzuzulɛ nee yɛ adwenle gyi Nyamenle ɛhulolɛdeɛ ɛyɛlɛ zo.—Edwɛndolɛ 40:8.
14 Saa mekɛ mɔɔ Gyihova ɛhile kɛ ɔbava yeazɛkye ewiade ɛtane ɛhye nee menli mɔɔ kulo ewiade ne nyɛleɛ la dwu a, ɔnrɛmaa ɔnrɛkpa nwo. Ɔnrɛdu ɔnrɛzie anzɛɛ ɔnrɛhakyi ye ngyinlazodeɛ ne mɔ; ɔbazɛkye menli mɔɔ tɛdi ewiade ne anzi na bɛnyeye bɛ ahonle nu bɛnzukoa Nyamenle ɛhulolɛdeɛ bɛnyɛ la. Ɛnɛ a le mekɛ mɔɔ ɔwɔ kɛ yɛsi kpɔkɛ kpalɛ a! (Luku 13:23, 24; 17:32; 21:34-36) Yemɔti nea anyelielɛ mɔɔ ɔde kɛ yɛnwu ekpunli kpole ne kɛ bɛlɛfa nwolɛ adenle bɛazukoa Gyihova adehilelɛ mɔɔ ɔdua ye Edwɛkɛ ne nee ye ahyehyɛdeɛ ne azo ɔfa ɔmaa la, na bɛlua ye ndenle ne mɔ azo wɔ koyɛlɛ nu bɛlɛkɔ ewiade fofolɛ ne anu a! Saa yɛsukoa Gyihova anwo ninyɛne dɔɔnwo a ɔbaha yɛ yeamaa yɛahulo ye kpalɛ na yɛazonle ye.
Suzu nwo Fa Ti Nu
• Atiakunlukpɔkɛ boni a Gyihova lɛ ye wɔ ɛzonlenlɛ nwo a?
• Saa yɛsukoa Baebolo nu mɔlebɛbo ngilehilelɛ ne yɛwie a, duzu bieko a ɔwɔ kɛ yɛpele yɛdwu nwo a?
• Duzu a ɔwɔ kɛ yɛ nuhua ko biala yɛ amaa ɔ nee Gyihova azonvolɛ mɔɔ ɛha la ayɛ ko a?
[Debiezukoalɛ kpuyia ne mɔ]
3. Duzu a fa nɔhalɛ koyɛlɛ wɔ ɛzonlenlɛ nu ba a?
4. (a) Duzu a menli dɔɔnwo mɔɔ bɛlɛboɔboa bɛ nloa wɔ nɔhalɛ ɛzonlenlɛ nu wɔ yɛ mekɛ ye anu la kile a? (b) Kɛzi Baebolo ne ka anloaboɔboalɛ gyima ɛhye anwo edwɛkɛ ɛ?
5, 6. (a) Kɛzi yɛkola yɛnwu ye kɛ maanle maanle ne ɛlɛba arazonle Gyihova ɛ? (b) Edwɛkɛ boni mɔ a ɔwɔ kɛ yɛbiza yɛ nwo a?
7. (a) Mekɛ boni a ewiade amra amuala babɔ nu azonle wɔ koyɛlɛ nu a? (b) Duzu ati a ɔwɔ kɛ ɛyɛ ye ndɛ ɛbasonle Gyihova ɛnɛ a, na kɛ yɛbayɛ na yɛaboa awie mɔ gyɛne yɛamaa bɛayɛ zɔ ɛ?
8. Saa yɛsukoa Baebolo nu mɔlebɛbo ngilehilelɛ ne yɛwie a, duzu bieko a ɔwɔ kɛ yɛpele yɛdwu nwo a?
9. Duzu a yɛyɛ a ɔbamaa yɛanyia nɔhalɛ koyɛlɛ ɛnɛ a?
10. (a) Saa yɛdayɛ mumua ne yɛfa Baebolo ne yɛye kpuyia mɔɔ fane yɛ nwo la anloa a, duzu a yɛbanyia a? (b) Bua kpuyia ɛhye mɔ mɔɔ wɔ ɛdendɛkpunli ɛhye anu la fa suzu ninyɛne mɔɔ maa yɛnyia Keleseɛne koyɛlɛ la anwo.
11. Saa yɛfa nɔhalɛ edwɛkɛ mɔɔ wɔ Baebolo ne anu la yɛbɔ yɛ ɛbɛla a, duzu nvasoɛ a fi nu ba a?
12. Duzu ati a ɔhyia kɛ yɛkoati kɛ yɛkɛli yɛ ti anwo ɛ?
13. Duzu a bahile kɛ amgba yɛlɛsiezie yɛ nwo yɛamaa Nyamenle ewiade fofolɛ ne mɔɔ pɛlepɛlelilɛ wɔ nu la ɛ?
14. (a) Duzu ati a nwolɛ hyia kɛ yɛfa nwolɛ adenle mɔɔ yɛlɛ ye la yɛsukoa Gyihova ndenle ne mɔ na yɛfa yɛbɔ yɛ ɛbɛla ɛnɛ a? (b) Duzu a yɛsukoa yɛfi ngɛlɛlera ne mɔ mɔɔ wɔ ɛdendɛkpunli ne anu mɔɔ bɛangɛlɛ nuhua edwɛkɛ ne la anu a?
[Nvoninli wɔ mukelɛ 4]
“Bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo”
