Tile 3

Bɛzɔ Nyamenle Edwɛkɛ ne Anu Boɛ

1. (a) Kɛzi Nyamenle edwɛkɛ ne yɛle nɔhalɛ manle tete Yizilayɛma ɛ? (b) Duzu ati a ɛhye hyia yɛ a?

“BƐ NUHUA ko biala ze ye wɔ ye ahonle nu na ɔdie ɔto nu kɛ [Gyihova] bɛ Nyamenle ne ɛva ninyɛne kpalɛ ne mɔɔ ɔvale ɔbɔle bɛ ɛwɔkɛ la ɛmaa bɛ. Ɛwɔkɛ biala mɔɔ ɔbɔle la yeli zolɛ; kokye anga nu.” (Dwɔhyua 23:14-16) Dwɔhyua hanle edwɛkɛ ɛhye hilele Yizilayɛ mgbanyima ne mɔ wɔ mekɛ mɔɔ bɛhɔdɛnlanle Ɛwɔkɛ Azɛlɛ ne azo la. Ɛhɛe, Gyihova ɛwɔkɛ ne mɔ amuala rale nu. Bɛvale zɔhane edwɛkɛ ne nee Baebolo nu edwɛkɛ mɔɔ ɛha la kɔsɔɔti bɛziele bɛmanle yɛ amaa “yɛanyia anyelazo.”—Wulomuma 15:4.

2. (a) Saa bɛka kɛ bɛvale “Nyamenle Sunsum” a bɛhɛlɛle Baebolo ne a duzu a ɔkile a? (b) Kɛmɔ yɛnwu kɛ Baebolo ne vi Nyamenle ɛkɛ ne la ati, duzu a ɔwɔ kɛ yɛyɛ a?

² Ɔwɔ nuhua kɛ bɛluale menli kɛyɛ 40 anwo zo a bɛhɛlɛle Baebolo ne a, noko Gyihova mumua ne a le ye Kɛlɛvolɛ a. Asoo ɛhye kile kɛ ɔdaye mumua ne a ɔhilele bɛ debie biala mɔɔ ɔwɔ kɛ bɛkɛlɛ la ɔ? Ɛhɛe. Ɔluale ye nyɛleɛ tumi, ye sunsum nwuanzanwuanza ne tumi kpole ne, azo a ɔyɛle ɛhye a. Ɛzoanvolɛ Pɔɔlo hanle ye wienyi kɛ: “Bɛfa Nyamenle Sunsum a bɛkɛlɛ Nyamenle Edwɛkɛ ne a, . . . amaa sonla ne mɔɔ sonle Nyamenle la ali munli na bɛaziezie ye bɛamaa yeayɛ gyima kpalɛ.” Menli mɔɔ die ɛhye to nu la tie Baebolo nu edwɛkɛ ne na bɛfa bɛbɔ bɛ ɛbɛla.—2 Temɔte 3:16, 17; 1 Tɛsalonaekama 2:13.

 Boa Awie mɔ maa Bɛ Nye Ɛlie Nwo

3. Adenle mɔɔ le kpalɛ tɛla biala la boni a yɛbahola yɛava zo yɛaboa menli mɔɔ ɛnlie ɛnli kɛ Baebolo ne le Nyamenle Edwɛkɛ la ɛ?

³ Menli mɔɔ yɛ nee bɛ suzu Baebolo ne anwo la bie mɔ ɛnlie ɛnli kɛ ɔle Nyamenle Edwɛkɛ. Kɛ yɛbayɛ yɛaboa bɛ ɛ? Adenle mɔɔ le kpalɛ tɛla biala la a le kɛ yɛbabuke Baebolo ne anu na yɛahile bɛ mɔɔ ɔka la. “Nyamenle Edwɛkɛ ne gyi zo [ngoane wɔ nu] na ɔyɛ se, ɔyɛ nla ɔtɛla dadeɛ anye nwiɔ biala. . . . na ɔfede adwenle nee ahonle nu ɔnwu bɛ nzuzulɛ muala.” (Hibuluma 4:12) “Nyamenle Edwɛkɛ ne” ɛnle edwɛkɛ mɔɔ ɛkpa nwo a; nvasoɛ wɔ zo maa yɛ ɛnɛ. Baebolo nu ɛwɔkɛ ne mɔ ba nu mɔɔ debie biala ɛngola ɛnzi bɛ adenle a. Tumi mɔɔ Baebolo nu edwɛkɛ kola nyia ye wɔ awie ahonle zo la tɛla edwɛkɛ biala mɔɔ yɛdayɛ mumua ne yɛbaha yɛahile ye la.

4. Baebolo nu edwɛkɛ mɔɔ le nɔhalɛ la boni a ɛmaa menli ɛhakyi adwenle mɔɔ ɛnee bɛlɛ wɔ Baebolo ne anwo a, na duzu ati ɔ?

⁴ Nyamenle duma mɔɔ menli ɛnwu ye wɔ Baebolo ne anu la ɛmaa bɛlɛsukoa Baebolo ne kpalɛ. Bie mɔ noko ɛbɔ kpɔkɛ ɛlɛsukoa Baebolo ne ɔluakɛ bɛranwu mɔɔ Baebolo ne ka wɔ ɛbɛlabɔlɛ nwo, deɛ mɔɔ ɔti Nyamenle ɛmaa amaneɛnwunlɛ nwo adenle, mɔɔ ninyɛne mɔɔ ɛlɛsisi kenle nsa ye kile, yɛɛ dahuu ngoane anyelazo wɔ paladaese la ati. Wɔ maanle bie mɔ anu ɛzonlenlɛ nu nyɛleɛ ɛmaa sunsum evinli ɛlɛgyegye bie mɔ, noko ngilenu mɔɔ Baebolo ne fa maa wɔ mɔɔ fa ɛhye ba nee kɛzi yɛbahola yɛavi ngyegyelɛ ɛhye anu anwo la ɛmaa menli anye ɛralie Baebolo ne anwo. Duzu ati a menli mɔɔ lɛ ahonle kpalɛ la anye die edwɛkɛ ɛhye anwo a? Ɔluakɛ, Baebolo ne angome a kola maa yɛnyia edwɛkɛ ɛhye mɔ mɔɔ hyia la anu ngilenu a.—Edwɛndolɛ 119:130.

5. (a) Duzu ati a bie mɔ ɛnlie Baebolo ne ɛnli a? (b) Kɛ yɛbayɛ na yɛaboa menli zɛhae mɔ ɛ?

 ⁵ Noko akee, saa awie ka kɛ ɔnlie Baebolo ne ɔnli a duzu a yɛbayɛ a? Asoo ɔwɔ kɛ yɛgyakyi ye ɔ? Kyɛkyɛ, saa ɔbahulo kɛ ɔ nee yɛ kɛzuzu mɔɔ Baebolo ne ka la anwo a, ɔnle kɛ yɛgyakyi ye. Bie a ɛnee ɔsuzu kɛ Baebolo ne le Keleseɛnemaanle buluku bie ala. Keleseɛnemaanle ne nabalaba nyɛleɛ, ɔ nwo mɔɔ ɔfa ɔwulowula maanyɛlɛ nu, nee ye ezukoa ɛlielielɛ ne kola maa menli nyia Baebolo ne anwo adwenle mɔɔ ɛndenrɛ. Duzu ati a ɛmbiza ye saa ɛhye a maa ɔte nganeɛ zɔ a? Mɔɔ Baebolo ne ka tia Keleseɛnemaanle ne, nee ngakyile mɔɔ wɔ nɔhalɛ Keleseɛne ɛzonlenlɛ nee Keleseɛnemaanle ne avinli mɔɔ ɔbanwu ye la bahola amaa ɔ nye alie Baebolo ne anwo.—Maeka 3:11, 12; Mateyu 15:7-9; Gyemise 4:4.

6. (a) Duzu a maa ɛdie ɛdi kɛ Baebolo ne le Nyamenle Edwɛkɛ a? (b) Duzu edwɛkɛ bieko a ɛbahola wɔava wɔaboa menli wɔamaa bɛanwu kɛ amgba Baebolo ne vi Nyamenle a?

⁶ Ninyɛne mɔɔ kile kɛ Baebolo ne vi Nyamenle ɛkɛ ne mɔɔ yɛ nee menli bazuzu nwolɛ la bahola aboa bie mɔ. Duzu a maa ɛdawɔ mumua ne ɛdie ɛdi kɛ Baebolo ne vi Gyihova Nyamenle ɛkɛ a? Asoo kɛmɔ Baebolo ne ka kɛ ɔvi Nyamenle ɛkɛ ne la ati ɔ? Anzɛɛ kɛmɔ Baebolo ne lɛ ngapezo edwɛkɛ dɔɔnwo mɔɔ maa yɛnwu mɔɔ bazi kenlebie, mɔɔ da ali kɛ ngapezo ne mɔ ɛnvi sonla la ɔ? (2 Pita 1:20, 21) Asoo nuhua edwɛkɛ ne mɔɔ le ko mɔɔ yɛ nwanwane, ɔnvane nwolɛ kɛ menli ngakyile 40 a vale ɛvolɛ kɛyɛ 1,600 hɛlɛle la ɔ? Anzɛɛ ɔluakɛ nuhua edwɛkɛ di munli wɔ abɔdeɛ nwo nrɛlɛbɛnwunlɛ nu tɛla buluku biala mɔɔ bɛhɛlɛle ye tete ne la ɔ? Anzɛɛ menli mɔɔ hɛlɛle la nɔhalɛlilɛ ne? Anzɛɛ kɛmɔ bɛva bɛzie toonwo yɛ mekɛ ye na menli angola anzɛkye ye la ati ɔ? Ɛbahola wɔava debie biala mɔɔ wɔnwu ye mɔɔ ɛ nye die nwo la wɔaboa bɛ. *

 Yɛdayɛ Mumua ne Yɛ Baebolo Ɛgengalɛ

7, 8. (a) Duzu a ɔwɔ kɛ yɛyɛ wɔ Baebolo ne anwo a? (b) Duzu bieko a ɔwɔ kɛ yɛyɛ yɛboka Baebolo ne mɔɔ yɛdayɛ mumua ne yɛbagenga la anwo a? (d) Kɛzi ɛdawɔ mumua ne wɔde Gyihova atiakunlukpɔkɛ ne mɔ abo ɛ?

⁷ Saa ɛye Baebolo ne mɔɔ yɛboa awie mɔ yɛamaa bɛalie bɛali la ɛsie ahane a, ɔwɔ kɛ yɛdayɛ mumua ne yɛkenga Baebolo ne dahuu. Asoo ɛkenga ye dahuu? Baebolo ne sonle bolɛ tɛla buluku biala mɔɔ bɛyɛ la. Noko ɛhye ɛngile kɛ saa yɛdayɛ mumua ne yɛkenga Baebolo ne a ɛnee ɔngyia kɛ yɛkɛyɛ debie biala bieko. Ngɛlɛlera ne tendɛ tia sonla mɔɔ ɛnzo menli avinli anzɛɛ ɔte ɔ nwo ɔfi menli nwo la. Ɔnle kɛ yɛsuzu kɛ yɛ ngome yɛ neɛnleanu mɔɔ yɛbayɛ la bamaa yɛanyia edwɛkɛ biala anwo nyelebɛnloa. Bɛtianwo debie ɛzukoalɛ nee Nyamenle menli mɔɔ yɛ nee bɛ bɔ nu azonle dahuu la hyia amaa yɛayɛ Keleseɛnema kpalɛ.—Mrɛlɛbulɛ 18:1; Hibuluma 10:24, 25.

⁸ Mɔɔ fane ɛhye anwo la, Baebolo ne ka Yiteyopeanli abɔlɔba bie mɔɔ ɛnee ɛlɛkenga Ayezaya ngapezo ne la anwo edwɛkɛ. Anwumabɔvolɛ bie hilele ɛdoavolɛ Felepe adenle manle ɔhɔbizale nrenya ne kɛ: “Asoo ɛte mɔɔ ɛlɛkenga la abo?” Yiteyopeanli ne buale kɛ: “Na kɛ mesi meyɛ mete ɔ bo ɛ? Kyesɛ awie kilehile nu kile me.” Ɔzele Felepe kɛ ɔhilehile Ngɛlɛlera ne anu ɔhile ye. Ɛnee Felepe ɛnle awie mɔɔ ɔ ngome ɔsukoa Baebolo ne na ɔfa ye adwenle ɔkilehile Ngɛlɛlera ne anu a. Ɔvale ɔ nwo ɔbɔle Nyamenle ahyehyɛdeɛ ne mɔɔ ɛnyelɛ nwu ye la. Yemɔti ɔholale ɔboale Yiteyopeanli ne ɔmanle ɔnyianle ngilehilelɛ mɔɔ Gyihova dua ye ahyehyɛdeɛ ne azo fa maa la anu nvasoɛ. (Gyima ne 6:5, 6; 8:5, 26-35) Zɔhane ala a ɛnɛ, awie biala ɛnrɛhola ɛnrɛva ɔ ngome ye adwenle ɔnrɛde Gyihova atiakunlukpɔkɛ ne mɔ abo a. Yɛ muala yɛhyia moalɛ mɔɔ Gyihova fi ɛlɔlɛ nu dua ye ahyehyɛdeɛ ne mɔɔ ɛnyelɛ nwu ye azo fa maa la.

9. Baebolo ɛgengalɛ nwo ngyehyɛleɛ boni a bayɛ nvasoɛ amaa yɛ muala a?

 ⁹ Gyihova ahyehyɛdeɛ ne yɛ mbuluku ngakyile mɔɔ gyi Ngɛlɛlera ne azo amaa yɛade Baebolo ne abo kpalɛ. Eza yeyɛ dahuu Baebolo ɛgengalɛ nwo ngyehyɛleɛ wɔ Teokelase Ɛzonlenlɛ Sukulu ne mɔɔ bɛyɛ ye wɔ Gyihova Alasevolɛ asafo mɔɔ wɔ ewiade amuala anu la yemaa yɛ. Saa yɛdayɛ mumua ne yɛsukoa Baebolo ne boɛ a yɛbanyia zolɛ nvasoɛ dɔɔnwo. (Edwɛndolɛ 1:1-3; 19:7, 8) Bɔ mɔdenle kenga Baebolo ne alehyenlɛ biala. Ɔwɔ nuhua kɛ ɛnrɛde debie biala abo kpalɛ ɛdeɛ, noko ɛbanyia mɔɔ Ngɛlɛlera ne ka la anwo adwenle mɔɔ baboa wɔ a. Kɛ neazo la, saa ɛkenga mukelɛ nna anzɛɛ nnu kenle ko biala a ɛbahola wɔagenga Baebolo ne amuala wɔ ɛvolɛ ko anu.

10. (a) Mekɛ boni a ɛkenga wɔ Baebolo ne a? (b) Nwane mɔ a ɛbahola ɛ nee bɛ agenga a, na duzu ati a ɔhyia kɛ ɔyɛ dahuu ɛ?

¹⁰ Mekɛ boni a ɛbahola wɔagenga wɔ Baebolo ne a? Saa ɛfa mitini 10 anzɛɛ 15 ɛkenga ye alehyenlɛ biala a, ɔbayɛ nvasoɛ kpole yeamaa wɔ. Saa ɛnrɛhola ye kenle ko biala kenga a, ɛnee yɛ ngyehyɛleɛ kenga ye dapɛne biala. Saa wɔgya a, ɛ nee wɔ bokavolɛ ne bahola abɔ nu agenga. Saa bɛlɛ ngakula mɔɔ kola kenga noko a, bɛbahola bɛamaa bɛagenga bie. Ɔwɔ kɛ yɛkenga Baebolo ne dahuu, kɛmɔ yɛdi aleɛ dahuu la. Kɛmɔ yɛze la, awie mɔɔ ɛnli aleɛ kpalɛ la yia kpɔkɛdelɛ nwo ngyegyelɛ. Zɔhane ala yɛɛ agɔnwolɛvalɛ kpalɛ mɔɔ yɛ nee Nyamenle banyia anzɛɛ yɛ dahuu ngoane gyi Gyihova “Nyamenle anloa edwɛkɛ biala” mɔɔ yɛbadie ye dahuu la azo a.—Mateyu 4:4.

Yɛ Bodane

11. Adwenle boni a ɔwɔ kɛ yɛfa yɛkenga Baebolo ne a?

¹¹ Adwenle boni a ɔwɔ kɛ yɛfa yɛkenga Baebolo ne a? Ɔnle kɛ yɛyɛ yɛ adwenle kɛ yɛkenga mukelɛ dodo bie ala. Ɔwɔ kɛ yɛfa yɛsie yɛ nye zo kɛ yɛsukoa yɛanwu Nyamenle  kpalɛ, amaa yɛanyia ɛlɔlɛ kpole yɛamaa ye na yɛazonle ye wɔ adenle mɔɔ ɔdie ɔto nu la azo. (Dwɔn 5:39-42) Ɔwɔ kɛ yɛ nyɛleɛ yɛ kɛ Baebolo kɛlɛvolɛ ne mɔɔ hanle kɛ: “O [Gyihova], kilehile me maa menwu wɔ ndenle ne mɔ; kilehile me wɔ ndenle ne mɔ,” ɛdeɛ ne la.—Edwɛndolɛ 25:4.

12. (a) Duzu ati a “nɔhalɛ ndelebɛbo” mɔɔ yɛbanyia la anwo hyia a, na saa yɛlɛkenga Ngɛlɛlera ne a mɔdenle boni a ɔwɔ kɛ yɛbɔ na yɛanyia ndelebɛbo ɛhye a? (b) Ndenle nna boni a saa yɛdua zo yɛsuzu mɔɔ yɛkenga ye wɔ Baebolo ne anu la anwo a ɔbayɛ nvasoɛ yeamaa yɛ a? (Nea ɛlɛka ne mɔɔ wɔ mukelɛ 30 la anu.) (d) Bua edwɛkɛ mɔɔ wɔ ɛdendɛkpunli ɛhye anu la fa kilehile ndenle ɛhye mɔ anu. Kenga tɛkese ne mɔ mɔɔ bɛangɛlɛ nuhua edwɛkɛ ne mɔ la.

¹² Mekɛ mɔɔ Gyihova ɛlɛkilehile yɛ la ɔwɔ kɛ yɛnyia ɛhulolɛ kɛ yɛbanyia “nɔhalɛ ndelebɛbo.” Saa yɛannyia ɛhye a kɛ ɔkɛyɛ na yɛahola yɛava Nyamenle Edwɛkɛ ne yɛali gyima kpalɛ wɔ yɛ ɛbɛlabɔlɛ nu anzɛɛ yɛahilehile nu kpalɛ yɛahile menli gyɛne ɛ? (Wulomuma 10:2; 2 Temɔte 2:15) Nɔhalɛ ndelebɛbo mɔɔ yɛbanyia la kile kɛ ɔwɔ kɛ yɛto yɛ rɛle aze yɛkenga Ngɛlɛlera ne kpalɛ, yɛɛ saa ye ɛleka ne bie anu yɛ se na yɛnde ɔ bo a, yɛbahola yɛagenga ye bieko amaa yɛade ɔ bo kpalɛ. Eza saa yɛtɔ alagye yɛdwenledwenle mɔɔ yɛkɛgenga la anwo kpalɛ na yɛsuzu nwo wɔ ndenle ngakyile zo a, ɔbaboa yɛ kpole. Bɛhile ndenle nna mɔɔ yɛbahola yɛalua zo yɛayɛ ɛhye la wɔ mukelɛ 30. Yɛbahola yɛalua ndenle ɛhye anu ko anzɛɛ mɔɔ bo la azo yɛazuzu Ngɛlɛlera ne anu edwɛkɛ bie mɔ anwo amaa yɛanyia nu nvasoɛ. Mekɛ mɔɔ ɛlɛye kpuyia mɔɔ wɔ mukelɛ mɔɔ doɔdoa zo anloa la, ɛbanwu nɔhalɛ mɔɔ wɔ ɛhye anu a.

(1) Fane dɔɔnwo ne ala, saa ɛkenga Ngɛlɛlera ne foa bie a ɔkile wɔ sonla holɛ mɔɔ Gyihova de a. Kɛ neazo la, Edwɛndolɛ 139:13, 14 maa yɛnwu kɛ Gyihova dwenle kakula mɔɔ la ɛkolɛ nu bɔbɔ la anwo: “Ɛdawɔ a ɛnwonle me wɔ ɔmɔ akunlu  a. Meye wɔ ayɛlɛ, ɔluakɛ ɛ nwo yɛ ɛzulolɛ nee nwanwane. Wɔ gyima yɛ nwanwane!” Nea kɛzi Gyihova gyima yɛ nwanwane a! Adenle mɔɔ ɔvale zo ɔyɛle sonla la di ye ɛlɔlɛ kpole mɔɔ ɔlɛ ɔmaa yɛ la anwo daselɛ.

Kɛmɔ bɛhile ye wɔ Dwɔn 14:9, 10 la, saa yɛkenga kɛzi Gyisɛse nee menli lile la anwo edwɛkɛ a, ɔmaa yɛnwu mɔɔ anrɛɛ Gyihova mumua ne bayɛ la. Ɛhye ati, saa yɛkenga Luku 5:12, 13 nee Luku 7:11-15 ne a, duzu a yɛbahola yɛaha yɛavane Gyihova anwo a?

(2) Suzu kɛzi edwɛkɛ ne fane Baebolo ne edwɛkɛtile ne anwo: Belemgbunlililɛ ne mɔɔ wɔ Abozonli ne mɔɔ bɛbɔle ɔ nwo ɛwɔkɛ, Gyisɛse Kelaese, asa anu la azo a Gyihova balua ala ye tumililɛ ne ali na yeade ye duma nwo a.

Kɛzi Yizikeɛle nee Daneɛle zile Baebolo ne edwɛkɛtile ne azo ɛ? (Yizikeɛle 38:21-23; Daneɛle 2:44; 4:17; 7:9-14)

Adenle boni azo a Baebolo ne hilele ye wienyi kɛ Gyisɛse a le Abozonli ne mɔɔ bɛbɔle ɔ nwo ɛwɔkɛ la ɛ? (Galeehyeama 3:16)

Kɛzi Yekile buluku ne ka ninyɛne mɔɔ basisi amaa Baebolo ne edwɛkɛtile ne ara nu bɔkɔɔ la anwo edwɛkɛ ɛ? (Yekile 11:15; 12:7-10; 17:16-18; 19:11-16; 20:1-3; 21:1-5)

(3) Suzu kɛzi ɛdawɔ mumua ne ɛbahola wɔava mɔɔ ɛlɛkenga la wɔali gyima la anwo. Kɛ neazo la, yɛkenga Yizilayɛma ɛbɛlatane ne nee bɛ atuadelɛ ne anwo edwɛkɛ wɔ Adendulɛ kɔdwu Mɛla ne. Yɛnwu ninyɛndane mɔɔ dole bɛ a. Yemɔti, ɔwɔ kɛ ɛhye ka yɛ maa yɛsonle Gyihova kpalɛ na yɛkpo ninyɛndane mɔɔ Yizilayɛma yɛle la. “Ninyɛne ɛhye mɔ sisile bɛ nwo zo, amaa yeayɛ kɔkɔbɔlɛ yeamaa awie mɔ, yɛɛ bɛhɛlɛle kɛ bɛfa bɛahilehile yɛ, ɔluakɛ ewiade ne awieleɛ mekɛ a yɛwɔ nu la.”—1 Kɔlentema 10:11.

 Duzu a yɛsukoa yɛfi Keen mɔɔ hunle Ebɛle la anwo edwɛkɛ ne anu a? (Mɔlebɛbo 4:3-12; Hibuluma 11:4; 1 Dwɔn 3:10-15; 4:20, 21)

Asoo Baebolo nu folɛdulɛ mɔɔ wɔ ɛkɛ ne maa menli mɔɔ bahɔ anwuma la fane Keleseɛnema mɔɔ badɛnla azɛlɛ ye azo dahuu la anwo ɔ? (Ɛdianlɛ 15:16; Dwɔn 10:16)

Ɔwɔ nuhua kɛ yɛlɛbɔ mɔdenle wɔ Keleseɛne asafo ne anu ɛdeɛ, noko duzu ati a ɔwɔ kɛ yɛsuzu adenle mɔɔ yɛbava zo yɛali Baebolo nu folɛdulɛ mɔɔ yɛze la azo kpalɛ la anwo a? (2 Kɔlentema 13:5; 1 Tɛsalonaekama 4:1)

(4) Suzu kɛzi ɛbava mɔɔ ɛlɛkenga la wɔaboa menli gyɛne la anwo. Anwodolɛ gyegye menli dɔɔnwo, yemɔti yɛbahola yɛ nee bɛ agenga mɔɔ Gyisɛse yɛle la na yɛahile bɛ mɔɔ ɔbayɛ ye wɔ ye Belemgbunlililɛ ne anu la: “Menli dɔɔnwo kpalɛ vale abuburama, anyenzinliravolɛma, mumule,  yɛɛ bɛdabɛ mɔɔ ewule ngakyile ɛha bɛ la amuala raguale Gyisɛse agyakɛ anu, na ɔyɛle bɛ muala ayile.”—Mateyu 15:30.

Nwane a yɛbahola yɛava Gyeeyaelɛse ara ne mɔɔ Gyisɛse dunwuele ye la anwo edwɛkɛ ne yɛaboa ye a? (Luku 8:41, 42, 49-56)

13. Saa yɛkenga Baebolo ne dahuu na yɛ nee Gyihova ahyehyɛdeɛ ne bɔ nu sukoa a, duzu nvasoɛ a yɛbanyia a?

¹³ Nea nvasoɛ kpole mɔɔ yɛnyia yɛfi Baebolo ne mɔɔ yɛbagenga na yɛazuzu nwo wɔ ndenle nna ne mɔɔ yɛha nwolɛ edwɛkɛ la azo a! Nɔhalɛ nu, Baebolo ne ɛgengalɛ hyia mɔdenlebɔlɛ. Noko ɔbahola yeamaa yɛanyia nvasoɛ mɔɔ ɛnlɛ awieleɛ, ɔluakɛ saa yɛkenga Baebolo ne a ɔbamaa abusuabɔlɛ mɔɔ yɛ nee Gyihova lɛ la anu amia. Baebolo ne mɔɔ yɛbagenga ye dahuu la bamaa yɛahwe yɛabikye Gyihova, yɛ Ze ne mɔɔ lɛ ɛlɔlɛ la yɛɛ yɛ mediema Keleseɛnema. Ɔbaboa yɛ yeamaa yɛadie folɛdulɛ ne mɔɔ se “bɛzɔ ngoane edwɛkɛ ne anu boɛ” la.—Felepaema 2:16.

[Ɔ bo ɛkɛ ne edwɛkɛ]

Suzu nwo Fa Ti Nu

• Duzu ati a bɛhɛlɛle Baebolo ne na bɛvale bɛziele toonwo yɛ mekɛ ye ɛ?

• Kɛzi yɛbahola yɛaboa awie mɔ yɛamaa bɛade Baebolo ne abo ɛ?

• Duzu ati a nvasoɛ wɔ zo kɛ yɛdayɛ mumua ne yɛbagenga Baebolo ne dahuu a? Ndenle nna boni a saa yɛfa zo yɛsuzu mɔɔ yɛkenga la anwo a ɔbayɛ nvasoɛ yeamaa yɛ a?

[Debiezukoalɛ kpuyia ne mɔ]

[Ɛlɛka/Nvoninli wɔ mukelɛ 30]

SAA ƐKENGA BAEBOLO NE FOA BIE A, SUZU

Mɔɔ ɔka ye wɔ Gyihova anwo ɔkile wɔ la anwo

Kɛzi ɔfane Baebolo ne edwɛkɛtile ne anwo la anwo

Kɛzi ɔwɔ kɛ ɔka ɛdawɔ mumua ne wɔ ɛbɛlabɔlɛ la anwo

Kɛzi ɛbahola wɔava wɔaboa menli gyɛne la anwo