1-3. Kɛzi Gyisɛse yɛle rale Gyɛlusalɛm ɛ, na duzu ati a ɔbayɛ kɛ ɔzinle menli mɔɔ nwunle ye la bie mɔ anwo a?

 GYƐLUSALƐMMA anye ɛlie kpalɛ. Sonlakpole bie ɛlɛba ɛkɛ! Menli gyigyi adenle ne anloa. Bɛkulo kɛ bɛnwu sonla ɛhye, ɔluakɛ bie mɔ ɛlɛka kɛ ɔbali Belemgbunli Devidi agya na ɔdaye a ɔwɔ kɛ ɔyɛ Belemgbunli wɔ Yizilayɛ a. Menli dɔɔnwo pepɛle arɛlɛ mrɛlakɛ hɔyiale ye; bie mɔ vale bɛ adɛladeɛ aguzo sesɛle adenle ne anu yɛɛ bie mɔ vale mbaka ngane guale adenle ne anu kɛ ɔlua zolɛ. (Mateyu 21:7, 8; Dwɔn 12:12, 13) Noko, bie a ɛnee menli dɔɔnwo ɛnnwu kɛzi ɔbayɛ na yeara sua ne azo a.

² Ɛnee bie mɔ anye la kɛ ye ɛralɛ ne bayɛ ngakyile kolaa. Bɛze kɛzi menli titili bie mɔ mɔɔ rale sua ne azo la yɛle la. Kɛ neazo la, mekɛ mɔɔ Devidi ara Abesalɛm hanle kɛ ɔle belemgbunli la; ɔmaanle menli 50 lile ye konle ehwili ne anyunlu. (2 Samoɛle 15:1, 10) Wulomu tumivolɛ Julius Caesar yɛle mɔɔ le kpole tɛla zɔ la; mekɛ bie ɔmaanle menli dɔɔnwo lile ɔ nyunlu na ɔhɔle Wulomu suakpole ne azo, na ɛnee ɛzonle 40 mɔɔ ahɛnlaneɛ hendɛhenda bɛ la li ye bɛne zo nee fema zo! Noko, kɛkala, Gyɛlusalɛmma ɛlɛkendɛ sonlakpole mɔɔ tɛla awie biala la. Saa menli ne te ɔ bo zɔ anzɛɛ bɛnze bɔbɔ a, yemɔ a le Mɛzaya ne a, sonlakpole mɔɔ tɛla biala la. Noko, saa kenle bie Belemgbunli ɛhye ba sua ne azo a, ɔbazi bie mɔ anwo.

³ Bɛannwu konle ehwili, menli, mgbɔnwɔ yɛɛ bɛannwu ɛzonle dɔɔnwo noko. Emomu, Gyisɛse de asoaso mɔɔ bɛfa bɛyɛ gyima la azo. a Yeanva ninyɛne mɔɔ bɛ awolɛ se la  yeanziezie ɔ nwo yɛɛ yeanva bie yeangua ye nane ne mɔɔ ɔde zo la anwo zo. Kɛ anrɛɛ Gyisɛse agɔnwo mɔ bava ndanlɛ mɔɔ bɛ awolɛ yɛ se bɛagua nane ne anwo zo la, bɛvale ndanlɛ mɔɔ bɛ awolɛ ɛnyɛ se la. Duzu ati a Gyisɛse luale adenle sikalɛ ɛhye azo hɔle Gyɛlusalɛm, wɔ mekɛ mɔɔ menli bɔbɔ mɔɔ bɛndwu ye la yɛle ninyɛne mgbole la ɛ?

4. Duzu a Baebolo ne hanle dole ɛkɛ wɔ kɛzi Mɛzaya Belemgbunli ne bahɔ Gyɛlusalɛm la anwo a?

⁴ Gyisɛse ɛlɛmaa ngapezo bie ara nu: “Di fɛlɛko kpole. O suakpole Gyɛlusalɛm, fa anyelielɛ tea nu. Nea! Wɔ belemgbunli ne ɛlɛba ɛ nwo ɛkɛ. Ɔle tenlenenli, ɔ nee ngoanelielɛ ɛlɛba, ɔbɛlɛ ɔ nwo aze yɛɛ ɔde asoaso zo.” (Zɛkalaya 9:9) Ɛnee ngapezo ɛhye kile kɛ Ahenle Mɔɔ Nyamenle Ɛkpokpa ye, mɔɔ ɔle Mɛzaya ne la, bala ɔ nwo ali ahile Gyɛlusalɛmma kenle ko kɛ yemɔ a ɔle Belemgbunli mɔɔ Nyamenle ɛkpa ye a. Bieko, adenle mɔɔ ɔluale zo ɔhɔle suakpole ne azo yɛɛ nane mɔɔ ɔdɛnlanle zo la bamaa bɛanwu ye mɛlɛbɛnwoaze subane kɛnlɛma ne.

5. Duzu ati a yɛsuzu Gyisɛse mɛlɛbɛnwoaze ne anwo a ɔka yɛ ahonle a, na kɛmɔti a ɔwɔ kɛ yɛsukoa Gyisɛse mɛlɛbɛnwoaze ne ɛ?

⁵ Gyisɛse mɛlɛbɛnwoaze ne le ye subane ngɛnlɛma ne mɔ ko mɔɔ saa yɛsuzu nwo a ɔka yɛ ahonle a. Kɛ mɔɔ yɛzuzule nwolɛ wɔ tile ne mɔɔ li ɛhye anyunlu la anu la, Gyisɛse angomekye a le “adenle ne nee nɔhalɛ ne nee ngoane ne a.” (Dwɔn 14:6) Ɔda ali wienyi kɛ menli mgbe mgbe dɔɔnwo mɔɔ ɛdɛnla azɛlɛ ye azo la anu biala ɛnle ɛkɛ mɔɔ anwo hyia tɛla Nyamenle Ara ne a. Noko Gyisɛse ammemaa ɔ nwo zo yɛɛ yeambu ɔ nwo ɛlɛ kɛ ɔtɛla awie mɔ kɛ mɔɔ alesama mɔɔ tɔ sinli yɛ la. Saa yɛbahola yɛayɛ Kelaese ɛdoavolɛma a, ɔwɔ kɛ yɛko yɛtia anwomemaazo subane biala mɔɔ yɛlɛ la. (Gyemise 4:6) Kakye kɛ, Gyihova kyi anwomemaazo. Ɛhye ati, ɔhyia kɛ yɛsukoa Gyisɛse mɛlɛbɛnwoaze ne.

6. Mɛlɛbɛnwoaze kile duzu, na kɛzi Gyihova nwunle kɛ Mɛzaya ne babɛlɛ ɔ nwo aze ɛ?

⁶ Mɛlɛbɛnwoaze kile awie mɔɔ le bɛtɛɛ, ɔmmemaa ɔ nwo zo anzɛɛ ɔndu ɔ nwo la. Ɔle subane mɔɔ bɔ ɔ bo wɔ awie ahonle nu na ɔda ali wɔ ye ɛdendɛlɛ, ye nyɛleɛ yɛɛ kɛzi ɔ nee menli di la anu. Kɛzi Gyihova nwunle kɛ Mɛzaya ne babɛlɛ ɔ nwo aze ɛ? Ɔze kɛ ɔ Ra ne zukoale ye mɛlɛbɛnwoaze ne mɔɔ di munli la. (Dwɔn 10:15) Ɛnee eza yenwu kɛzi Ralɛ ne lɛ mɛlɛbɛnwoaze la. Wɔ adenle boni azo?

7-9. (a) Kɛzi Maekeɛle hilele kɛ ɔbɛlɛ ɔ nwo aze wɔ ɔ nee Seetan kpolerazulɛ ne anu ɛ? (b) Kɛzi Kilisienema bahola azukoa Maekeɛle na bɛanyia mɛlɛbɛnwoaze ɛ?

⁷ Dwuudu buluku ne maa yɛnwu ɛhye anwo neazo kɛnlɛma bie: “Mekɛ mɔɔ anwumabɔvolɛ kpanyinli Maekeɛle nee Abɔnsam ɛlɛsu Mosisi funli ne anwo kpolera la, yeanzi ye ahonle yeanga edwɛkɛ ɛtane yeambua ye ndɛne, emomu ɔhanle kɛ: ‘Gyihova ɛdea wɔ.’” (Dwuudu 9) Maekeɛle le duma mɔɔ ɛnee bɛfa bɛfɛlɛ Gyisɛse kolaa na yeara azɛlɛ ye azo yɛɛ mekɛ mɔɔ ɔziale ɔhɔle anwuma la, na ɔkile ye gyima mɔɔ ɔyɛ kɛ anwumabɔvolɛ kpanyinli anzɛɛ awie mɔɔ gyi Gyihova anwumabɔvolɛma ɛlɔne ne ati la. b (1 Tɛsalonaekama 4:16) Noko, yɛ mɔɔ Maekeɛle yɛle ye wɔ ɔ nee Seetan kpolerazulɛ ne la anwo nzonlɛ.

⁸ Dwuudu kɛlɛtokɛ ne anga debie mɔɔ ɛnee Seetan kulo kɛ ɔfa Mosisi funli ne ɔyɛ la ɛdeɛ, noko yɛze kɛ ɛnee Abɔnsam lɛ adwenle ɛtane bie wɔ ɔ ti anu. Bie a ɛnee ɔkulo kɛ ɔfa Mosisi funli ne ɔdi gyima wɔ adalɛ ɛzonlenlɛ nu. Maekeɛle honle tiale adwenle ɛtane mɔɔ ɛnee Seetan lɛ la, noko ɔhomonle ɔ nwo zo kpalɛ. Ɛnee ɔfɛta kɛ Maekeɛle tea Seetan, noko mekɛ zɔhane mɔɔ ɔ nee Seetan ɛlɛsu kpolera la ɛnee bɛtɛfale “ndɛnebualɛ kɔsɔɔti” bɛtɛwulale ɔ sa nu, na ɔdele  nganeɛ kɛ ɔwɔ kɛ Gyihova Nyamenle a bua ndɛne zɛhae a. (Dwɔn 5:22) Ɛnee Maekeɛle lɛ tumi kpole kɛ anwumabɔvolɛ kpanyinli la. Noko, ɔbɛlɛle ɔ nwo aze na ɔgyakyile nwolɛ adenle ne ɔmaanle Gyihova, yeambɔ mɔdenle kɛ ɔkpondɛ tumi kpole. Saa yɛye mɛlɛbɛnwoaze yɛsie ahane a, ɛnee eza ɔze ninyɛne mɔɔ ɔnrɛhola ye yɛ la.

⁹ Adwenle bie ati a sunsum ne hanle Dwuudu maanle ɔhɛlɛle edwɛkɛ ɛhye a. Ɔyɛ alɔbɔlɛ kɛ, ɛnee Kilisienema bie mɔ ɛmbɛlɛ bɛ nwo aze wɔ Dwuudu mekɛ zo. Ɛnee bɛfa anwomemaazo bɛka “debie biala mɔɔ bɛnde ɔ bo la anwo edwɛkɛ ɛtane.” (Dwuudu 10) Nea kɛzi ɔnyɛ se kɛ alesama mɔɔ tɔ sinli la bayɛ anwomemaazo a! Saa yɛnde debie bie mɔɔ bɛyɛ wɔ Kilisiene asafo ne anu la abo a​—bie a kpɔkɛ bie mɔɔ mgbanyima eku ne ɛzi la​—duzu a yɛyɛ ye wɔ nwolɛ a? Saa yɛka nwolɛ edwɛkɛ ɛtane, na yɛtendɛ yɛtia bɛ wɔ mekɛ mɔɔ yɛnze deɛmɔti bɛzile zɔhane kpɔkɛ ne la a, asoo ɔngile kɛ yɛmbɛlɛ yɛ nwo aze ɔ? Bɛmaa yɛzukoa Maekeɛle anzɛɛ Gyisɛse, na yɛgyakyi kɛ yɛbabua edwɛkɛ mɔɔ Nyamenle ɛtɛmaanle yɛ nwolɛ tumi la.

10, 11. (a) Kɛzi Nyamenle Ara ne mɔɔ vile ye ɛhulolɛ nu rale azɛlɛ ye azo la maa yɛnwu kɛ ɔbɛlɛ ɔ nwo aze ɛ? (b) Kɛ ɔkɛyɛ na yɛazukoa Gyisɛse mɛlɛbɛnwoaze ne ɛ?

¹⁰ Nyamenle Ara ne liele dole nu kɛ ɔbara azɛlɛ ye azo ɔluakɛ ɔbɛlɛ ɔ nwo aze. Suzu mɔɔ ɔgyakyile ye wɔ ɔ nzi la anwo nea. Ɛnee ɔdaye a ɔle anwumabɔvolɛ kpanyinli a. Ɛnee eza noko ɔle “Edwɛkɛ ne”​—Gyihova Kpɔmavolɛ. (Dwɔn 1:1-3) Ɛnee ɔwɔ anwuma, Gyihova “anyunlunyia nee nwuanzanwuanza tɛnlabelɛ ne.” (Ayezaya 63:15) Noko akee, Ralɛ ne gyakyile “debie biala mɔɔ ɔlɛ la, ɔyɛle ɔ nwo akɛlɛ na ɔrale kɛ sonla.” (Felepaema 2:7) Suzu mɔɔ hɔle zo na yeahola yeadɛnla azɛlɛ ye azo la anwo nea! Bɛyele ye ngoane bɛrawulale Dwuunli raalɛ mɔɔ ɛnze nrenyia la awodeɛ nu, bɛnrenzɛle ye siane ngɔnla na bɛwole ye kɛ adɔma la. Bɛwole ye wɔ kapentanli ehyianli bie sua nu, ɔnyinle na ɔdiale, ɔyɛle kakula  nrenyia, na ɔyɛle kpavolɛ. Ɛnee ɔdi munli ɛdeɛ, noko wɔ ye ngakula nu ɔbɛlɛle ɔ nwo aze ɔmaanle ye awovolɛ mɔɔ bɛnli munli la. (Luku 2:40, 51, 52) Mɛlɛbɛnwoaze kpole boni ɛne!

¹¹ Saa yɛfi yɛ ɛhulolɛ nu yɛyɛ gyima mɔɔ bɛmbu ye bie la a yɛbahola yɛazukoa Gyisɛse mɛlɛbɛnwoaze ne. Kɛ neazo la, saa menli ɛndie Nyamenle Belemgbunlililɛ ne anwo edwɛkpa ne, bɛgolo yɛ nwo anzɛɛ bɛdwazo bɛtia yɛ a, ɔle kɛ asɛɛ bɛmbu ye bie la. (Mateyu 28:19, 20) Noko, saa yɛkɔ zo yɛyɛ gyima ɛhye a, yɛbaboa yɛamaa bɛalie menli ngoane. Ɛhye baboa yɛ yeamaa yɛazukoa mɛlɛbɛnwoaze, na yɛayɛ kɛ yɛ Menle Gyisɛse Kelaese la.

12-14. (a) Kɛzi Gyisɛse hilele kɛ ɔlɛ mɛlɛbɛnwoaze wɔ mekɛ mɔɔ menli yele ye ayɛlɛ la ɛ? (b) Ndenle boni mɔ azo a Gyisɛse lale mɛlɛbɛnwoaze ali hilele awie mɔ a? (d) Duzu a kile kɛ Gyisɛse mɛlɛbɛnwoaze ne ɛnle ɛnyelɛzo anzɛɛ subane kpalɛ mɔɔ ɔlale ye ali a?

¹² Gyisɛse bɛlɛle ɔ nwo aze wɔ ye ɛzonlenlɛ gyima ne anu ɔvi mɔlebɛbo kɔdwu awieleɛ. Ɔyɛle ye ɛhye ɔlua ayɛlɛyelɛ nee anyunlunyia kɔsɔɔti mɔɔ ɔvale ɔmaanle ɔ Ze la azo. Ɔyɛ a ɛnee menli ye Gyisɛse ayɛlɛ wɔ ye nrɛlɛbɛ edwɛkɛ, tumi mɔɔ ɔfa ɔyɛ nwanwane ninyɛne nee ye subane kpalɛ ne anwo. Fane dɔɔnwo ne ala, Gyisɛse ɛnlie anyunlunyia ɛhye ɛmmaa ɔ nwo, emomu ɔfa ɔmaa Gyihova.​—Maake 10:17, 18; Dwɔn 7:15, 16.

¹³ Gyisɛse bɛlɛle ɔ nwo aze maanle menli. Nɔhalɛ nu, ɔhanle ye wienyi kɛ, yeamba kɛ bɛzonle ye, na emomu ɔrale kɛ ɔbazonle awie mɔ. (Mateyu 20:28) Ɔbɛlɛle ɔ nwo aze wɔ kɛzi ɔ nee menli zuzule edwɛkɛ nwo la anu. Mekɛ mɔɔ ye ɛdoavolɛma ne angola anyɛ mɔɔ ɔhanle la, yeandendɛ yɛantia bɛ; ɔhɔle zo ɔhanle edwɛkɛ mɔɔ baha bɛ ahonle la. (Mateyu 26:39-41) Mekɛ mɔɔ menli dɔɔnwo ne ammaa yeannyia adenle yeanlie ye ɛnwomenle la, yeanvoa bɛ; ɔhɔle zo ɔbɔle mɔdenle ɔhilehilele bɛ “ninyɛne dɔɔnwo.” (Maake 6:30-34) Mekɛ  mɔɔ raalɛ bie mɔɔ ɛnle Yizilayɛnli hɔle zo kpale ye kyɛlɛ kɛ ɔyɛ ɔ ra raalɛ ne ayile la, mɔlebɛbo ne ɔyɛle kɛ ɔnrɛyɛ. Noko yeanga ye ɛya zo; mekɛ mɔɔ ɔnwunle raalɛ ne diedi kpole ne la ɔdiele ye kɛ mɔɔ yɛbazukoa nwolɛ debie wɔ Tile 14 ne anu la.​—Mateyu 15:22-28.

¹⁴ Wɔ ndenle dɔɔnwo anu, Gyisɛse maanle edwɛkɛ mɔɔ ɔhanle ye wɔ ɔ nwo kɛ: “Mele bɛtɛɛ yɛɛ mebɛlɛ me nwo aze wɔ ahonle nu” la rale nu. (Mateyu 11:29) Ɛnee ye mɛlɛbɛnwoaze ne ɛnle ɛnyelɛzo anzɛɛ subane kpalɛ bie ala. Ɛnee ɔvi ye ahonle nu. Ɔnyɛ nwanwane kɛ, Gyisɛse maanle ɔ nye bolole ɔhilehilele ye ɛdoavolɛma mɛlɛbɛnwoaze la!

15, 16. Subane boni a Gyisɛse hanle kɛ ewiade tumivolɛma lɛ mɔɔ ɔle ngakyile ɔfi ye ɛdoavolɛma anwo a?

¹⁵ Ɔliele mekɛ na Gyisɛse ɛzoanvolɛma anyia mɛlɛbɛnwoaze. Gyisɛse bɔle mɔdenle fane dɔɔnwo hilehilele bɛ mɛlɛbɛnwoaze. Kɛ neazo la, mekɛ bie Gyemise nee Dwɔn luale bɛ mame anwo zo hanle hilele Gyisɛse kɛ ɔbɔ bɛ ɛwɔkɛ kɛ ɔbamaa bɛ dibilɛ kpole wɔ Nyamenle Belemgbunlililɛ ne anu. Gyisɛse buale bɛ kɛ: “Me sa fema zo anzɛɛ bɛne zo ɛdɛnlanlɛ ɛdeɛ, ɔnle me ɛdeɛ na meava meamaa, emomu ɔle bɛdabɛ mɔɔ me Ze ɛziezie ɛmaa bɛ la ɛdeɛ.” Ɛzoanvolɛma bulu ne mɔɔ ɛha la vale Gyemise nee Dwɔn anwo “ɛya.” (Mateyu 20:20-24) Kɛzi Gyisɛse lile ngyegyelɛ ɛhye anwo gyima ɛ?

¹⁶ Gyisɛse denrɛle bɛ wɔ atiakunlukɛnlɛma nu kɛ: “Bɛze kɛ maanle maanle arelemgbunli kile bɛ tumi wɔ bɛ menli nwo zo yɛɛ bɛ menli titili di bɛ nwo zo tumi. Noko bɛmɛ, bɛnle zɔ; emomu awie biala mɔɔ kpondɛ kɛ ɔyɛ kpole wɔ bɛ nu la ɛyɛ bɛ sonvolɛ, na awie biala mɔɔ kpondɛ kɛ ɔdi bɛ nyunlu la ɛyɛ bɛ akɛlɛ.” (Mateyu 20:25-27) Ɔda ali kɛ ɛnee ɛzoanvolɛma ne ze kɛzi “maanle maanle arelemgbunli” ne mɔ memaa bɛ nwo zo, bɛkulo tumi na bɛle angomedi la. Gyisɛse hilehilele ye ɛdoavolɛma ne kɛ, ɔnle kɛ bɛyɛ kɛ atisesebɛma  zɔhane mɔ mɔɔ kulo tumi la. Ɛnee ɔwɔ kɛ bɛbɛlɛ bɛ nwo aze. Asoo ɛzoanvolɛma ne dele edwɛkɛ ne abo?

17-19. (a) Nɔe ne mɔɔ aleɛ kye a Gyisɛse bawu la, duzu a ɔhilehilele ye ɛzoanvolɛma ne wɔ mɛlɛbɛnwoaze nwo mɔɔ bɛ rɛle anvi a? (b) Mɛlɛbɛnwoaze nwo debie boni a Gyisɛse hilehilele mɔɔ tumi wɔ nu a?

¹⁷ Ɛnee ɔnla aze ɔmmaa bɛ. Tɛ ɛhye a le mekɛ mɔɔ limoa anzɛɛ mɔɔ li amozi mɔɔ Gyisɛse ɛhilehile bɛ debie zɛhae a. Mekɛ bie mɔɔ bɛzule bɛ nuhua mɔɔ le kpole kpalɛ anwo kpolera la, ɔvɛlɛle kakula na ɔmaanle ɔragyinlanle bɛ nyunlu ɛkɛ ne na ɔzele bɛ kɛ, bɛyɛ kɛ ngakula mɔɔ bɛmmemaa bɛ nwo zo, bɛngulo tumi, yɛɛ bɛndwenle gyinlabelɛ nwo kɛ mgbanyima la. (Mateyu 18:1-4) Noko, nɔe ne mɔɔ aleɛ kye a ɔbawu la, ɔnwunle kɛ anwomemaazo tɛbɔ ɛzoanvolɛma ne anwo. Ɔti ɔhilehilele bɛ debie mɔɔ bɛ rɛle anvi ye ɛlɛ la. Ɔvale tohulu ɔpɛle ɔ bo, na ɔyɛle gyima mɔɔ bɛmbu ye bie mɔɔ zɔhane mekɛ ne ɛnee ngɛkɛlɛ a yɛ maa nyɛvolɛ la. Gyisɛse wowole ye ɛzoanvolɛ ko biala agyakɛ anwo​—ɛnee Dwudase mɔɔ ɔnrɛhyɛ ɔbaye ye yeamaa la boka nwo!​—Dwɔn 13:1-11.

¹⁸ Gyisɛse boale bɛ maanle bɛdele mɔɔ ɔyɛle la abo wɔ mekɛ mɔɔ ɔhanle ɔhilele bɛ kɛ: “Meyɛ neazo memaa bɛ” la. (Dwɔn 13:15) Asoo mɔɔ bɛnwunle ye la hanle bɛ ahonle kpalɛ? Zɔhane nɔsolɛ ne, bɛzule mɔɔ le kpole kpalɛ wɔ bɛ nu la anwo kpolera bieko! (Luku 22:24-27) Noko, Gyisɛse hɔle zo nyianle bɛ nwo abotane na ɔbɛlɛle ɔ nwo aze ɔhilehilele bɛ. Akee ɔmaanle bɛzukoale debie mɔɔ tumi kpole wɔ nu la: “Ɔbɛlɛle ɔ nwo aze na ɔyɛle tieyɛ ɔhɔle ewule nu, ɛhɛe, ɔwule amaneɛnwunlɛ baka zo.” (Felepaema 2:8) Gyisɛse vile ye ɛhulolɛ nu liele dole nu kɛ ɔbawu anyiemgba ewule, na bɛbuale ye fɔlɛ kɛ ɛtanevolɛ mɔɔ ɛha munzule edwɛkɛ la. Nyamenle Ara ne luale ɛhye azo maanle ɔlale ali kɛ ɔle ngakyile, ɔluakɛ wɔ Gyihova abɔdeɛ kɔsɔɔti anu, ɔ ngomekye a ɔholale ɔnyianle mɛlɛbɛnwoaze mɔɔ di munli a.

¹⁹ Bie a mɛlɛbɛnwoaze ɛhye mɔɔ li awieleɛ mɔɔ Gyisɛse nyianle kolaa na yeawu la a maanle zɔhane subane ne hanle  ye nɔhalɛ ɛzoanvolɛma ahonle a. Baebolo ne ka kɛ, nzinlii ɛzoanvolɛma ne vale mɛlɛbɛnwoaze yɛle gyima ɛvolɛ dɔɔnwo. Na yɛdayɛ noko ɛ?

20. Kɛ ɔkɛyɛ na yɛanwu kɛ yɛbɛlɛ yɛ nwo aze wɔ ahonle nu ɛ?

²⁰ Pɔɔlo ɛdu yɛ muala folɛ kɛ: ‘Yɛnyia adwenle ɛhye mɔɔ ɛnee Kelaese Gyisɛse noko lɛ la bie.’ (Felepaema 2:5) Ɔwɔ kɛ yɛbɛlɛ yɛ nwo aze wɔ ahonle nu kɛ mɔɔ Gyisɛse yɛle la. Kɛ ɔkɛyɛ na yɛanwu kɛ yɛbɛlɛ yɛ nwo aze wɔ ahonle nu ɛ? Pɔɔlo ɛhakye yɛ kɛ, “bɛmmafa manzonlehwenlɛ anzɛɛ anwomemaazo bɛyɛ debie biala, emomu bɛbɛlɛ bɛ nwo aze na bɛbu bɛ gɔnwo mɔ bɛdɛla bɛ nwo.” (Felepaema 2:3) Ɔti ɔgyi kɛzi yɛbu awie mɔ la azo. Ɔwɔ kɛ yɛbu bɛ kɛ bɛsonle bolɛ, anzɛɛ bɛ nwo hyia kpalɛ tɛla yɛ. Ɛbava zɔhane folɛdulɛ ne wɔali gyima ɔ?

21, 22. (a) Duzu ati a ɔwɔ kɛ Kilisiene neavolɛma bɛlɛ bɛ nwo aze a? (b) Kɛ ɔkɛyɛ na yɛahile kɛ yɛwula mɛlɛbɛnwoaze ɛ?

²¹ Gyisɛse wule la ɔ nzi ɛvolɛ dɔɔnwo anu, ɛnee ɛzoanvolɛ Pita tɛdwenle nvasoɛ mɔɔ wɔ mɛlɛbɛnwoaze zo la anwo. Pita hilehilele Kilisiene neavolɛma kɛ bɛva mɛlɛbɛnwoaze bɛyɛ bɛ gyima ne, bɛmmadi Gyihova mboane ne anwo zo tumi. (1 Pita 5:2, 3) Ɔnle kɛ ɛzonlelilɛ mɔɔ yɛkɛnyia la maa yɛmemaa yɛ nwo zo. Emomu, bɛfa ɛzonlelilɛ bie bɛwula yɛ sa a ɔwɔ kɛ ɔmaa yɛbɛlɛ yɛ nwo aze kpalɛ. (Luku 12:48) Nɔhalɛ nu, tɛ neavolɛma angomekye a ɔwɔ kɛ bɛlɛ bɛ nwo aze a, ɔwɔ kɛ Kilisienenli biala bɛlɛ ɔ nwo aze.

²² Pita arɛle anvi nɔsolɛ zɔhane ne mɔɔ Gyisɛse wowole ɔ gyakɛ anwo la​—ɔnva nwo kɛ ɛnee Pita ɛngulo kɛ ɔyɛ la! (Dwɔn 13:6-10) Pita hɛlɛle hɔmaanle Kilisienema kɛ: “Bɛ muala bɛwula mɛlɛbɛnwoaze wɔ kɛzi bɛ nee bɛ gɔnwo mɔ di la anu.” (1 Pita 5:5) Edwɛkɛkpɔkɛ “bɛwula” maa yɛkakye akɛlɛ mɔɔ ɔfa ɛdanlɛ ɔpɛ ɔ bo na ɔyɛ gyima mɔɔ bɛmbu ye bie la. Eza ɔmaa yɛkakye mekɛ mɔɔ Gyisɛse vale tohulu pɛle ɔ bo na ɔhotole ɔwowole ɛzoanvolɛma ne agyakɛ anwo la.  Saa yɛbɛlɛ yɛ nwo aze kɛ Gyisɛse a, asoo yɛbabu mɔɔ ɔbaha kɛ yɛyɛ la kɛ ɔnfɛta yɛ ɔ? Ɔwɔ kɛ menli kɔsɔɔti nwu yɛ mɛlɛbɛnwoaze ne kɛ asɛɛ tɛladeɛ mɔɔ yɛwula la.

23, 24. (a) Duzu ati a ɔwɔ kɛ yɛko yɛtia anwomemaazo subane biala ɛ? (b) Mɛlɛbɛnwoaze nwo adwenle mɔɔ ɛndenrɛ la boni a yɛbazuzu nwo wɔ tile mɔɔ doa zo la anu a?

²³ Anwomemaazo le kɛ pɔezen la. Ɔsɛkye ninyɛne dɔɔnwo. Ɔle subane mɔɔ kola maa sonla mɔɔ bɔ mɔdenle la yɛ mgbane wɔ Nyamenle anyunlu. Noko, mɛlɛbɛnwoaze kola maa mɔɔ dwenle kɛ ɔmbɔ mɔdenle la anwo yɛ nvasoɛ maa Gyihova. Saa yɛbɔ mɔdenle yɛsukoa Kelaese mɛlɛbɛnwoaze ne dahuu a, yɛbanyia zolɛ nyilalɛ kpole kpalɛ. Pita hɛlɛle kɛ: “Bɛbɛlɛ bɛ nwo aze wɔ Nyamenle tumi kpole ne abo, amaa yeamaa bɛ zo wɔ mekɛ mɔɔ fɛta la anu.” (1 Pita 5:6) Gyihova kpogyale Gyisɛse zo ɔluakɛ ɔbɛlɛle ɔ nwo aze bɔkɔɔ la ati. Saa ɛbɛlɛ ɛ nwo aze a, yɛ Nyamenle ne bayila ɛdawɔ noko.

²⁴ Noko bie mɔ dwenle kɛ mɛlɛbɛnwoaze kile kɛ awie anwo ɛnyɛ se. Gyisɛse neazo ne maa yɛnwu kɛ zɔhane adwenle ne ɛnle nɔhalɛ, ɔluakɛ Gyisɛse mɔɔ ɛnee bɛlɛ ɔ nwo aze kpalɛ la a eza le awie mɔɔ lɛ akɛnrasesebɛ kpole a. Yɛbazuzu edwɛkɛ ɛhye anwo wɔ tile mɔɔ doa zo la anu.