Gyihova bɔle Gyekɔbo ɛwɔkɛ kɛ ɔbabɔ ɔ nwo bane kɛ mɔɔ ɔbɔle Ebileham nee Ayezeke anwo bane la. Gyekɔbo dɛnlanle ɛleka bie mɔɔ bɛfɛlɛ ye Hɛlan la, ɔgyale raalɛ na ɔnyianle abusua kpole, akee ɔyɛle sukoavolɛ kpole.

Nzinlii Gyihova zele Gyekɔbo kɛ: ‘Sia kɔ wɔ sua zo.’ Yemɔti Gyekɔbo nee ye abusua ne bɔle bɛ adendulɛ ne abo. Mɔɔ bɛlɛkɔ la, Gyekɔbo azonvolɛ ne mɔ razele ye kɛ: ‘Ɛ diema ne ɛlɛba, ɔ nee menli 400 a lua a!’ Gyekɔbo zulole kɛ ɔ diema ne bahu ye nee ye abusua ne. Yemɔti ɔzɛlɛle Gyihova kɛ: ‘Mesɛlɛ wɔ, die me fi me diema ne asa nu.’ Aleɛ hyenle la, Gyekɔbo vale ahyɛlɛdeɛ dɔɔnwo hɔyiale Yisɔ; mboane, mbɔnkye, nlankɛ, afunlumu yɛɛ asoaso.

Kenle zɔhane nɔɔzo mɔɔ ɛnee yeha Gyekɔbo angome la, ɔnwunle anwumabɔvolɛ! Anwumabɔvolɛ ne bɔle ɔ bo kɛ ɔ nee ye pele. Bɛpelele too alehyenlɛ. Gyekɔbo bodale noko yeangyakyi. Anwumabɔvolɛ ne zele ye kɛ: ‘Maa mengɔ.’ Noko Gyekɔbo zele kɛ: ‘Kyɛkyɛ, kyesɛ ɛyila me.’

Awieleɛ bɔkɔɔ ne, anwumabɔvolɛ ne yilale Gyekɔbo. Akee Gyekɔbo nwunle kɛ Gyihova ɛnrɛmaa Yisɔ ɛnrɛhu ye.

Aleɛ hyenle nwonlomɔ la, Gyekɔbo nwunle kɛ Yisɔ nee mrenyia 400 ne ɛlɛba. Gyekɔbo limoale ye abusua ne anyunlu na ɔbɔle ɔ ti aze ɔmaanle ɔ diema ne fane nsuu. Yisɔ nriandile hɔyiale Gyekɔbo  na ɔyɛle ye atuu. Akee bɛzunle na bɛzieziele bɛ avinli. Ɛnea a kɛzi Gyihova dele nganeɛ wɔ adenle mɔɔ Gyekɔbo luale zo lile tɛnlabelɛ ne anwo gyima la anwo ɛ?

Akee biala ziale hɔle ye sua nu. Gyekɔbo wole mralɛ mrenyia 12. Bɛ aluma ɛne: Wulubɛn, Semɛyɔn, Livae, Dwuda, Dan, Nafetalae, Gaade, Ahya, Yesakaa, Zɛbulɛn, Dwosefi nee Bɛngyaman. Gyihova luale ngakula ɛhye mɔ anu ko mɔɔ bɛfɛlɛ ye Dwosefi la anwo azo liele Ye menli. Kɛzi ɔrale ye ɛ? Maa yɛnlea.