NEA azɛlɛ ne mɔɔ wɔ ɛke la! Nea kɛ debie biala si de kɛnlɛma la! Nea ndile nee mbaka ne mɔ, ndotolo nee nane ne mɔ kɔsɔɔti. Asoo ɛnwu ɛzonle ne nee awenade ne mɔ?

Kɛ tola kɛnlɛma ɛhye zi rale ɛ? Aa, maa yɛnlea kɛ Nyamenle zi zieziele azɛlɛ ne manle yɛ la.

Mɔɔ lumua la, Nyamenle manle ndile fifile hedale azɛlɛ ne anye. Na Nyamenle bɔle mbaka ngyikyi nee mgbole yɛɛ ndile ngakyile kɔsɔɔti. Ninyɛne ɛhye mɔ mɔɔ fifi la boa maa azɛlɛ ne yɛ kɛnlɛma. Noko bɛyɛ dɔɔnwo bɛtɛla zɔhane. Bɛ nuhua dɔɔnwo maa yɛ aleɛ mɔɔ yɛ fɛ kpalɛ kpalɛ a.

Akee Nyamenle bɔle fɛlɛ guale nzule nu yɛɛ nloma kɛ bɛdu bɛluolua anwomanyunlu. Ɔbɔle ahwea nee ahusu yɛɛ mgbɔnwɔ; nane mgbole nee nane ngyikyi. Duzu nane a wɔ wɔ sua nu a? Asoo ɔnle kɛ yɛmaa yɛ nye die kɛ Nyamenle ɛbɔ ninyɛne ɛhye mɔ amuala ɛmaa yɛ la ɔ?

Awieleɛ kolaa ne, Nyamenle zieziele azɛlɛ ne azo ɛleka ko kɛnlɛma kpalɛ. Ɔvɛlɛle ɛkɛ ne Yidɛn tola. Ɛnee ɔle kɛnlɛma bɔkɔɔ. Ɛnee debie biala mɔɔ wɔ ɛkɛ ne la le kɛnlɛma. Na ɛnee Nyamenle kpondɛ kɛ azɛlɛ ne amuala yɛ kɛ tola kɛnlɛma ɛhye mɔɔ yeyɛ la pɛpɛɛpɛ.

Na nea tola ɛhye nvoninli ne bieko. Ɛze debie mɔɔ Nyamenle nwunle kɛ bie ɛnle ɛkɛ ne la ɔ? Maa yɛnlea ɛ.