DUZU a ɛlɛsi ɛke a? Menli ne mɔ ɛlɛto ɛkponle kpole bie. Babelɔnma belemgbunli ne ɛdo ɛsalɛ ɛvɛlɛ menli mɔɔ le titile la apenle ko. Bɛlɛfa ezukoa nvutuke ahɔpo ne nee dwɛtɛ fufule ahɔpo ne yɛɛ ahyɛnze ne mɔ mɔɔ bɛsesale bɛvile Gyihova ɛzonlenlɛ sua ne anu wɔ Gyɛlusalɛm la a bɛado ɛkponle ne a. Noko, arɛlevilɛ nu ala, sonla sa ɛlɛsɛka vindele na ɔhɛlɛle bane ne anwo. Ɛzulolɛ hanle awie biala.

Nɛbukadenɛza alɔnra Bɛlehyaza a ɛnee le belemgbunli a. Ɔdeanle nuhua kɛ bɛvɛlɛ ye nrɛlɛbɛvolɛma ne mɔ bɛmaa bɛrɛla. Belemgbunli ne hanle kɛ: ‘Awie biala mɔɔ kɛhola kɛgenga ngɛlɛlera ɛhye na ɔkɛhile me ɔ bo la, banyia ahyɛlɛdeɛ dɔɔnwo na yeayɛ tumivolɛ kpole mɔɔ anwo hyia mɔɔ tɔ zolɛ nsa wɔ belemgbunlililɛ ne anu a.’ Noko nrɛlɛbɛvolɛma ne anu biala angola ngɛlɛlera ne mɔɔ wɔ bane ne anwo la kenga na yeahile ɔ bo.

Belemgbunli ne ɔ nli dele dede ne na ɔrale ɛleka mɔɔ bɛlɛto ɛkponle ne la. Ɔzele belemgbunli ne kɛ: ‘Mmamaa ɛ rɛle bɔ. Nrenya bie wɔ wɔ belemgbunlililɛ ye anu mɔɔ ze nyamenle nwuanzanwuanza ne mɔ a. Mekɛ mɔɔ ɛ nlenya Nɛbukadenɛza di ebia la ɔyɛle ye ye nrɛlɛbɛvolɛma kpanyinli. Bɛfɛlɛ ye Daneɛle. Maa bɛhɔvɛlɛ ye, na ɔkɛha mɔɔ ɔkile la amuala ɔkɛhile wɔ.’

Yemɔti bɛhɔvale Daneɛle bɛrale ɛkɛ ne ala. Mɔɔ ɔkpole kɛ ɔkɛlie ahyɛlɛdeɛ biala ɔwiele la, Daneɛle hanle deɛ mɔɔ ɔti mekɛ bie mɔɔ ɛze ɛhɔ la Gyihova yele Bɛlehyaza ɔ nlenya Nɛbukadenɛza vile ebia ne azo la. Daneɛle hanle kɛ: ‘Ɔmemanle ɔ nwo zo. Na Gyihova hwenle ɔ nzo.’

Daneɛle akee zele Bɛlehyaza kɛ: ‘Na wɔmɔ, ɛze mɔɔ dole ye la amuala, noko ɛmemaa ɛ nwo zo kɛ Nɛbukadenɛza ala la. Wɔva ahɔpo ne nee ahyɛnze ne mɔ mɔɔ wɔ Gyihova ɛzonlenlɛ sua ne anu la wɔra na wɔnlo bɛ nloa. Wɔye nyamenle mɔɔ bɛva baka nee bolɛ a bɛyɛ la ayɛlɛ, na wɔanli yɛ Bɔvolɛ Kpole ne eni. Yemɔti a Nyamenle ɛzoa ɛsalɛ ne yemaa yerahɛlɛ ngɛlɛlera ɛhye mɔ la.’

Daneɛle hanle kɛ: ‘Debie mɔɔ bɛhɛlɛle la a le: MINI, MINI, TIKƐLE U PASEN.’

‘MINI abo kile kɛ Nyamenle ɛbu wɔ belemgbunlililɛ mekɛ yezɔ ɔ nloa na yeva yera awieleɛ. TIKƐLE kile kɛ bɛzuzu wɔ wɔ tone nu bɛnwu kɛ ɛndo ɛhwee. U PASEN kile kɛ bɛva wɔ belemgbunlililɛ ne bɛmaa Midiama nee Pɛhyeama.’

Mɔɔ Daneɛle anloa wɔ zo bɔbɔ ɔlɛka edwɛkɛ ne la, ɛnee Midiama nee Pɛhyeama ɛbɔ Babelɔn anwo zo ɛhololɛ bo. Bɛvale suakpole ne na bɛhunle Bɛlehyaza. Ngɛlɛlera ne mɔɔ wɔ bane ne anwo la rale nu nɔe ne ala! Noko duzu a bado Yizilayɛma ne a? Ɔnrɛhyɛ biala yɛbanwu ye, noko maa yɛlumua yɛnlea mɔɔ dole Daneɛle la.