OO, OO! Ɔle kɛ asɛɛ edwɛkɛ kpole bie ɛdo Daneɛle la. Noko awenade ne mɔ ɛnyɛ ye ɛhwee! Ɛze deɛ mɔɔ ɔti yera ye zɔ la ɔ? Nwane a vale Daneɛle dole ɛke wɔ awenade ɛhye mɔ amuala anu a? Maa yɛnlea.

Nrenya bie mɔɔ bɛfɛlɛ ye Dalayɛse la a kɛkala le Babelɔn belemgbunli a. Ɛnee ɔkulo Daneɛle edwɛkɛ kpole kpalɛ ɔluakɛ Daneɛle le nrɛlɛbɛvolɛ na ɔ ti akunlu le kɛnlɛma. Dalayɛse yele Daneɛle kɛ amɛnladoma kpanyinli wɔ ye belemgbunlililɛ ne anu. Ɛhye manle mrenya gyɛne mɔɔ wɔ belemgbunlililɛ ne anu la vale Daneɛle ati ɛkpɔlɛ, ɔti mɔɔ bɛyɛle la ɛne.

Bɛhɔle Dalayɛse ɛkɛ na bɛzele ye kɛ: ‘Nana, yɛlie yɛdo nu kɛ ɔwɔ kɛ ɛdi mɛla kɛ awie biala mmayɛ nzɛlɛlɛ maa nyamenle biala toonwo kenle 30 kɛ ɛ ngomekye ala, nana. Awie biala mɔɔ anli zolɛ la ɔwɔ kɛ bɛfuandi ye bɛto awenade ne mɔ tunli ne anu.’ Ɛnee Dalayɛse ɛnze deɛ mɔɔ ɔti menli ɛhye mɔ kpondɛ kɛ ɔdi mɛla ɛhye la. Noko ɔliele adwenle ne ɔdole nu, na ɔvale ɔ sa ɔwulale ɔ bo. Kɛkala bɛngola bɛngakyi mɛla ne.

Mekɛ mɔɔ Daneɛle dele kɛ bɛli mɛla ne la, ɔhɔle sua nu ɔhɔzɛlɛle, kɛmɔ dahuu ɛnee ɔyɛ la. Ɛnee mrenya ne mɔ mɔɔ vale Daneɛle ati ɛkpɔlɛ la ze ye kɛ ɔnrɛgyakyi nzɛlɛlɛ mɔɔ ɔyɛ yeamaa Gyihova la ɛlɛ. Bɛ nye liele, ɔboalekɛ ɛnee ɔle kɛ asɛɛ bɛ kpɔkɛ mɔɔ bɛbɔ kɛ bɛye Daneɛle ɛkɛ ne la ɛlɛyɛ boɛ.

Mɔɔ Belemgbunli Dalayɛse nwunle deɛ mɔɔ ɔti ɛnee mrenya ɛhye mɔ kpondɛ kɛ ɔdi mɛla ne la, ɔgyegyele ye. Noko ɛnee ɔnrɛhola mɛla ne kakyi, yemɔti ɛnee ɔwɔ kɛ ɔmaa bɛkɔfa Daneɛle na bɛfuandi ye bɛto awenade tunli ne anu. Noko belemgbunli ne hanle hilele Daneɛle kɛ: ‘Meze kɛ wɔ Nyamenle ne, mɔɔ ɛsonle ye la, balie wɔ.’

Ɔgyegyele Dalayɛse kpalɛ na nɔe ne yeangola da. Aleɛ hyenle la ɔhanle ɔ nwo ɔhɔle awenade tunli ne anwo. Kɛ ɛnwu ye kɛ ɔgyi ɛkɛ ɛ. Ɔdeanle nuhua kɛ: ‘Tease Nyamenle ne sonvolɛ Daneɛle! Asoo wɔ Nyamenle ne mɔɔ ɛsonle ye dahuu la ɛhola ɛlie wɔ ɛvi awenade ne mɔ asa anu ɔ?’

Daneɛle buale kɛ: ‘Me Nyamenle ne zoanle ye anwumabɔvolɛ manle ɔratotole awenade ne mɔ anloa anu, yemɔti bɛanva bɛ nloa bɛanga me.’

Belemgbunli ne nyianle ahomeka. Ɔzile ɔ gyakɛ aze kɛ bɛye Daneɛle bɛvi awenade tunli ne anu. Akee ɔmanle bɛdole mrenya ne mɔ mɔɔ kpɔle Daneɛle la bɛguale awenade tunli ne anu. Bɛandwu aze wɔ tunli ne anu bɔbɔ, yɛɛ awenade ne mɔ sosɔle bɛ anwuma tetele bɛ azinli lile a.

Akee Belemgbunli Dalayɛse hɛlɛle hɔmanle menli mɔɔ wɔ ye belemgbunlililɛ ne anu la amuala kɛ: ‘Meli mɛla kɛ ɔwɔ kɛ awie biala di Daneɛle Nyamenle ne eni. Ɔyɛ nwanwane gyima mgbole. Yelie Daneɛle yevi awenade ne mɔ asa nu.’