Sunsum nu menli mɔɔ Gyihova bɔle bɛ la kɔsɔɔti ɛnee le kpalɛ. Akee anwumabɔvolɛ ne mɔ anu ko rayɛle ɛtane. Yemɔ a le Seetan Abɔnsam. Seetan angulo kɛ menli mɔɔ wɔ azɛlɛ ye azo la kɛzonle Gyihova na emomu kɛ bɛkɛzonle ɔdaye. Mɔɔ zile la ɛne:

Ɛnee mbaka dɔɔnwo mɔɔ so ma mɔɔ yɛ fɛ la wɔ Yidɛn tola ne anu. Gyihova zele Adam nee ɔ ye Yive kɛ bɛkola bɛdi mbaka ɛhye mɔ ma ne bie. Noko ɛnee baka ko bie wɔ ɛkɛ ne mɔɔ Nyamenle ɛha kɛ bɛmmadi ye ma ne bie a. Ɔhanle kɛ saa bɛdi bie a, bɛbawu.—Mɔlebɛbo 2:9, 16, 17.

Kenle ko bie mɔɔ ɛnee Yive angomekye a wɔ ɛkɛ ne la ɛwɔlɛ bie dendɛle hilele ye. Nɔhalɛ nu, tɛ ɛwɔlɛ ne a amgba dendɛle a; emomu Seetan Abɔnsam a manle ɔyɛle kɛ asɛɛ ɛwɔlɛ ne a ɛlɛtendɛ a. Seetan zele Yive kɛ, saa ɔdi baka ne mɔɔ bɛdua bɛ la ma ne bie a, ɔbanwu nrɛlɛbɛ kɛ Nyamenle la. Eza ɔhanle kɛ Yive ɛnrɛwu. Ɛnee edwɛkɛ nwiɔ ɛhye mɔ biala ɛnle nɔhalɛ. Noko akee, Yive liele Seetan lile na ɔlile baka ne ma ne bie. Nzinlii, ɔvale bie ɔmanle Adam, na ɔdaye noko ɔlile.—Mɔlebɛbo 3:1-6.

Yɛnwu ye wɔ edwɛkɛ ɛhye mɔɔ zile zɔ la anu kɛ, Seetan le atuadelɛnli yɛɛ eza ɔle alane. Ɔzele Yive kɛ saa ɔyɛ Nyamenle anwo anzosesebɛ a ɔnrɛwu. Ɛnee ɛhye ɛnle nɔhalɛ. Yive wule yɛɛ Adam noko wule. Ɔwɔ nuhua kɛ Seetan anwu ɛkɛ ne ala ɛdeɛ, noko awieleɛ bɔkɔɔ ne ɔbawu ɔluakɛ yeyɛ ɛtane. Kɛkala, ɔwɔ ngoane nu yɛɛ ɔtɛkɔ zo ɔtɛbɛlɛbɛla alesama. Ɔtɛde adalɛ, yɛɛ ɔlɛbɔ mɔdenle kɛ ɔmaa menli  abulu Nyamenle mɛla zo.—Dwɔn 8:44.

Amozii, anwumabɔvolɛ gyɛne noko yɛle ɛtane. Anwumabɔvolɛ ɛhye mɔ nwule azɛlɛ ye azo mraalɛ kɛ bɛ nwo yɛ fɛ na bɛhulole kɛ bɛ nee bɛ kɛnyia nla nu ngitanwo. Yemɔti bɛhakyile bɛ nwo mrenya bɛrale azɛlɛ ye azo. Akee bɛvale mraalɛ ne mɔ mɔɔ bɛkulo la bɛgyale bɛ. Ɛnee ɛhye nee Nyamenle atiakunlukpɔkɛ ɛnyia.—Mɔlebɛbo 6:1, 2; Dwuudu 6.

Eza ɔvale ngyegyelɛ dɔɔnwo ɔrɛlɛle alesama. Anwumabɔvolɛ ɛhye mɔ aye mɔ wole mralɛ, noko ɛnee mralɛ ɛhye mɔ ɛnle kɛ ngakula mɔɔ wɔ ɛkɛ ne la. Bɛnyinle bɛyɛle kakanyinlima mɔɔ ninyɛndane nee atisesebɛ ɛyi bɛ tɛkɛɛ a. Awieleɛ ne, basabasayɛlɛ yile azɛlɛ ne kɔsɔɔti, yemɔti Gyihova zile kpɔkɛ kɛ ɔbava azuyilɛ kpole yeazɛkye ɛtanevolɛma ne. Tenlenenli Nowa nee ye abusua ne ala a le menli mɔɔ nyianle bɛ ti wɔ Azuyilɛ ne anu a.—Mɔlebɛbo 6:4, 11; 7:23.

Noko akee, anwumabɔvolɛ atisesebɛma ne ziale hɔle sunsum ɛleka ne; bɛanwu. Noko bɛhwenle bɛ nzo. Nyamenle ammaa bɛ adenle yeammaa bɛangɔmboka ye tenlene anwumabɔvolɛ abusua ne anwo. Eza Gyihova ammaa bɛ adenle yeammaa bɛangakyi bɛ nwo menli bieko. Na awieleɛ bɔkɔɔ ne, bɛbawu ndɛnebualɛ kpole ne anu.—Dwuudu 6.

Wɔ ɛvoya ne mɔɔ ɛze ɛhɔ la foa ne mɔɔ lumua la anu, konle bie zile anwuma. Yekile buluku ne mɔɔ wɔ Baebolo ne anu la ka mɔɔ zile la anwo edwɛkɛ kɛ: “Akee konle zile anwuma lɔ. . . . Maekeɛle [Gyisɛse Kelaese mɔɔ bɛdwazo ye bɛvi ewule nu] nee ɔ sa zo [anwumabɔvolɛ kpalɛ ne mɔ] nee nane anwo ɛzulolɛ ne [Seetan] nee ɔdaye ye [anwumabɔvolɛ ɛtane ne mɔ] honle. Maekeɛle nee ɔ sa zo lile nane ne anwo zo konim. Yemɔti bɛdule nane ne nee ye [anwumabɔvolɛ ɛtane ne mɔ] amuala bɛvile anwuma lɔ. Bɛvuandinle nane anwo ɛzulolɛ ne mɔɔ le kɛ ɛlɛnrɛne la bɛdole azɛlɛ ye azo. Yemɔ a le mɔmoane ɛwɔlɛ ne mɔɔ bɛfɛlɛ ye Abɔnsam anzɛɛ Seetan, mɔɔ ɛbɛlɛbɛla ewiade amra amuala la. Bɛvuandinle ye [anwumabɔvolɛ ɛtane ne mɔ] noko bɛguale azɛlɛ ye azo.”

Duzu a vile nuhua rale a? Amaneɛbɔlɛ ne toa zo kɛ: “Zɔhane ati bɛmɛ anwumaneamra, nee bɛdabɛ mɔɔ bɛwɔ zolɛ la amuala, bɛli fɛlɛko!” Anwumabɔvolɛ kpalɛ ne mɔ bahola ali fɛlɛko ɔluakɛ Seetan nee anwumabɔvolɛ anzɛɛ sunsum ɛtane ne mɔ ɛvi anwuma. Na menli mɔɔ wɔ azɛlɛ ye azo la noko ɛ? Baebolo ne ka kɛ: “Na bɛmɛ azɛlɛ nee nyevile, bɛ gyakɔ! Ɔluakɛ Abɔnsam ɛdwu ɛra bɛ nwo lɔ, na ɛya kpole wɔ ye nuhua, ɔboalekɛ ɔze kɛ ye mekɛ ɛha ekyi bie ala.”—Yekile 12:7-9, 12.

Ɛhɛe, Seetan nee ɔ gɔnwo mɔ atisesebɛma ne bɛlɛbɛla na bɛfa ngyegyelɛ dɔɔnwo bɛbɛlɛ menli mɔɔ wɔ azɛlɛ ye azo la. Bɛfɛlɛ anwumabɔvolɛ atisesebɛ ɛhye mɔ sunsum evinli. Bɛle Nyamenle agbɔvolɛ. Bɛ kɔsɔɔti bɛnle kpalɛ.