“SAA debie wɔ ɛkɛ ne mɔɔ mebahola meayɛ meaboa a wɔmɔ ka kile me.” Ɛhye a le edwɛkɛ mɔɔ yɛ nuhua dɔɔnwo ta ka wɔ mekɛ mɔɔ yɛ busuanli anzɛɛ yɛ gɔnwo bie anwo sonla ɛwu la. O, mɔɔ yɛlɛka la le nɔhalɛ. Yɛbayɛ debie biala mɔɔ yɛbahola la yɛava yɛaboa. Noko asoo ahenle mɔɔ ye awie ɛwu la bavɛlɛ yɛ na yeaha kɛ: “Medwenle debie nwo, asoo ɛbahola wɔayɛ wɔamaa me ɔ”? Bɛnda bɛmbiza ye zɔ. Ɔda ali wienyi kɛ, saa yɛdayɛ mumua ne yɛkulo kɛ amgba yɛboa na yɛkyekye ahenle mɔɔ ɛlɛdi nyane la arɛle a ɔwɔ kɛ yɛdumua yɛyɛ ninyɛne bie mɔ.

Baebolo nu ɛrɛlɛ bie ka kɛ: “Edwɛkɛ mɔɔ bɛkɛha ye wɔ ye adenle zo la le kɛ ezukoa nvutuke ampolo mɔɔ la dwɛtɛ fufule pɛlɛte nu la.” (Mrɛlɛbulɛ 15:23; 25:11) Nrɛlɛbɛ wɔ nu kɛ ɛbanwu mɔɔ ɔwɔ kɛ ɛka nee mɔɔ ɔnle kɛ ɛka, mɔɔ ɔwɔ kɛ ɛyɛ nee mɔɔ ɔnle kɛ ɛyɛ la. Baebolo nu folɛdulɛ mɔɔ menli mɔɔ debie ɛdɔ bɛ nye zo la ɛnwu kɛ nvasoɛ wɔ zo la anu ekyi bie ɛne.

Tie: Gyemise 1:19 ka kɛ, “Ɔwɔ kɛ awie biala tie ɔ nzo anwo.” Ninyɛne mɔɔ hyia kpalɛ mɔɔ ɛbahola wɔayɛ wɔaboa awie mɔɔ ye awie ɛwu la anu ko a le kɛ ɛbayɛ ɛnzolɛ wɔadie ye. Menli mɔɔ debie ɛdɔ bɛ nye zo la bie mɔ bahulo kɛ bɛkɛha bɛ dɔvolɛ ne ewule, esiane mɔɔ dole ye anzɛɛ anwonyane mɔɔ manle ɔwule anzɛɛ bɛ nganeɛdelɛ ɔvi mekɛ mɔɔ ɔwule la anwo edwɛkɛ. Yemɔti biza kɛ: “Kɛ ɔrale ye ɛ, ɔ nwo dole ye ɔ?” Maa bɛzi nwolɛ kpɔkɛ. Kpavolɛ bie kakyehakye ye papa ewule ne la, ɔhanle kɛ: “Mekɛ mɔɔ awie mɔ bizale me mɔɔ zile la anwo edwɛkɛ na bɛdiele ye kpalɛ la ɔboale me.” Gyele ɛ nzo na fa anwunvɔnezelɛ tie, mɔɔ ɛnde nganeɛ kɛ ɔwɔ kɛ ɛbua nwolɛ bie anzɛɛ ɛkile debie bie mɔɔ ɔwɔ kɛ bɛyɛ a. Maa bɛnyia adenle bɛha mɔɔ bɛkulo kɛ bɛka la.

Wula bɛ anwosesebɛ: Maa bɛnwu kɛ mɔɔ ɔwɔ kɛ bɛyɛ la ala a bɛyɛle la (anzɛɛ ka debie biala mɔɔ ɛze kɛ ɔle nɔhalɛ na ɔfɛta la). Kyekye bɛ rɛle kɛ tɛ bɛ ngome a nyanelilɛ, ɛyavalɛ, fɔlɛbualɛ, anzɛɛ nganeɛdelɛ gyɛne bie ɛdo bɛ a. Ka menli gyɛne mɔɔ ɛze bɛ na deɛ ko ne ala bie ɛdo bɛ na bɛhola bɛgyinla ɔ nloa la anwo edwɛkɛ kile bɛ. Mrɛlɛbulɛ 16:24 ka kɛ “ɛdendɛlɛ kɛnlɛma” zɛhae maa “sonla te kpɔkɛ.”​—1 Tɛsalonaekama 5:11, 14.

Kɔ ɛkɛ: Tɛ mekɛ mɔɔ edwɛkɛ ne kɛzi ɛkɛ ne ala mɔɔ agɔnwolɛma nee mbusua wɔ ɛkɛ ne la ala a ɔwɔ kɛ ɛkɔ ɛkɛ a, emomu wɔ siane dɔɔnwo anzi wɔ mekɛ mɔɔ awie biala ɛzia ɛhɔ ye gyima zo bɔbɔ la.  Saa ɛyɛ ye zɔ a ɔbahile kɛ ɛle ‘agɔnwolɛ kpalɛ’ mɔɔ boa ɔ gɔnwo wɔ “anwongyelelɛ” mekɛ nu la. (Mrɛlɛbulɛ 17:17) Teresea mɔɔ kale esiane hunle ɔ ra la hilehilele nu kɛ, “Yɛ gɔnwo mɔ rale yɛ nwo ɛkɛ nɔsolɛ biala yemɔti yeanga yɛ ngome wɔ sua nu ɛlɛ.” Ɔdoale zolɛ kɛ, “Ɛhye boale yɛ manle yɛlile yɛ nwo mɔɔ yɛle yɛ koonwu la azo.” Wɔ ɛvolɛ dɔɔnwo anzi, saa mekɛ mɔɔ ahenle gyale anzɛɛ wule la dwu na bɛkakye ye a ɔkola ɔmaa menli mɔɔ ɔwule ɔgyakyile bɛ la di nyane. Duzu ati a ɛnyɛ mekɛ ɛhye mɔ nzonlɛ na ɔkɛyɛ boɛ a wɔahɔ ɛkɛ ne na wɔakyekye bɛ rɛle a?

Dumua yɛ ninyɛne mɔɔ fɛta la: Asoo ninyɛne bie mɔ wɔ ɛkɛ mɔɔ hyia kɛ bɛyɛ a? Bɛhyia awie mɔɔ banlea ngakula ne mɔ ɔ? Bɛkpondɛ ɛleka bɛazokoɛ nyɛvolɛ ɔ? Menli mɔɔ bɛ nwo amra bie ɛwu mɔɔ ɔtɛkyɛle la ta yɛ basaa mɔɔ bɛnnwu mɔɔ ɔwɔ kɛ bɛyɛ a, yɛɛ bɛnnwu kɛzi bɛyɛ na bɛaha bɛahile awie mɔ kɛ bɛboa bɛ a. Yemɔti saa ɛnwu kɛ moalɛ bie hyia a mmamaa bɛsɛlɛ wɔ; dumua boa. (1 Kɔlentema 10:24; Fa to 1 Dwɔn 3:17, 18 anwo.) Raalɛ ko mɔɔ ɔ hu ɛwu la hanle kɛ: “Menli dɔɔnwo hanle kɛ ‘saa debie bie wɔ ɛkɛ ne mɔɔ mebahola meayɛ meaboa wɔ a, wɔ ɛdeɛ ka kile me.’ Noko me gɔnwo ko mɔɔ, yeambiza me edwɛkɛ biala. Ɔwolole ɔhɔle ekpumgbunli ne anu, ɔyele ɛsokpa ne azo ninyɛne ne mɔɔ anu ɛzɛkye la, ɔkpole na ɔdole zo. Ko noko vale bokiti zale nzule na ɔkyikyile sua ne anu ɛleka mɔɔ me hu vele guale la. Dapɛne ekyi guale nu la, yɛ asafo ne anu mgbanyima ne mɔ anu ko wulale ye gyima tɛladeɛ na ɔvale mbulalɛ mɔɔ ɔfa ɔyɛ gyima la ɔrahanle kɛ, ‘Meze kɛ debie bie ɛzɛkye mɔɔ ɔwɔ kɛ bɛyɛ ye boɛ a. Duzu debie ɔ?’ Nea me nye mɔɔ liele kɛ nrenya ɛhye raduale yɛ anlenkɛ ne mɔɔ ɛnee ɛdu ɛhenda nwo na ɔyɛle yɛ ngɛnlaneɛ ne mɔ boɛ a!”​—Fa to Gyemise 1:27 anwo.

Die nyɛvolɛ: Baebolo ne tu yɛ folɛ kɛ, “Bɛhakye kɛ bɛkɛlie nyɛvolɛ wɔ bɛ azua nu” (Hibuluma 13:2) Menli mɔɔ ɛlɛdi nyane la titile a ɔwɔ kɔ yɛkakye kɛ yɛbazonle bɛ nyɛvolɛ a. Kɛ anrɛɛ ɛbaha kɛ bɛbahola bɛara “mekɛ  biala” la, kile mekɛ nee kenle mɔɔ bɛva bɛrɛla la. Saa bɛamkponle zo a, mmamaa ɛ sa nu to ndɛndɛ. Bie a bɛbahyia anwosesebɛwulalɛ ekyi. Bie a ɛnee bɛamba ɔluakɛ bɛsulo kɛ bɛnrɛhola bɛ nwo sɔ wɔ menli mɔɔ wɔ ɛkɛ ne la anyunlu. Anzɛɛ bie a bɛ adwenle babua bɛ fɔlɛ kɛ bɛbali debie na bɛalie bɛ nye wɔ mekɛ zɛhae anu. Kakye Ledea, raalɛ ne mɔɔ ɛnee sonle menli nyɛvolɛ mɔɔ bɛha ɔ nwo edwɛkɛ wɔ Baebolo ne anu la. Mekɛ mɔɔ ɔdole ɛsalɛ ɔvɛlɛle bɛ kɛ bɛrɛla ye sua nu la, Luku se, “Ɔtinlinle zolɛ na ɔ nee yɛ hɔle.”​—Gyima ne 16:15.

Nyia abotane na te edwɛkɛ bo: Mmamaa edwɛkɛ mɔɔ awie mɔɔ ye awie ɛwu balumua aha la si ɛ nwo somaa. Kakye kɛ, bie a ɛnee bɛva ɛya anzɛɛ bɛbua bɛ nwo fɔlɛ. Saa bɛfa bɛ ɛya ne bɛgua ɛ nwo zo a, ɔbahyia nwunu nee abotane na ɛdawɔ noko wɔanva ɛya wɔambua bɛ. Baebolo ne ka kɛ: “Bɛze anwunvɔne, bɛyɛ atiakunlukɛnlɛma, bɛbɛlɛ bɛ nwo aze, bɛyɛ bɛtɛɛ na bɛzi abotane wɔ debie biala anu.”​—Kɔlɔsaema 3:12, 13.

Kɛlɛ kɛlata: Debie mɔɔ sonle bolɛ mɔɔ bɛta bɛbu bɛ nye bɛgua zolɛ la a le kɛlata mɔɔ bɛfa bɛkyekye awie arɛle la. Nvasoɛ boni a wɔ zo a? Cindy mɔɔ anahɛlɛ hunle ɔ nli la bua kɛ: “Me gɔnwo ko hɛlɛle me kɛlata kɛnlɛma bie. Zɔhane kɛlata ne boale me kpalɛ ɔluakɛ mengengale ye fane dɔɔnwo.” Kɛlata zɛhae mɔɔ bɛfa bɛwula anwosesebɛ la bahola ayɛ mɔɔ “anwa biala,” noko ɔwɔ kɛ ɔka wɔ ahonle nu edwɛkɛ. (Hibuluma 13:22) Ɔbahola yeahile kɛ ɛdwenle bɛ nwo na ɛkakye ahenle ne mɔɔ ɛwu la anwo debie titile, anzɛɛ ɔbahola yeahile kɛzi ɛnee ɛ nye die ahenle mɔɔ ɛwu la anwo la.

Ɛ nee bɛ ɛbɔ nu ɛyɛ asɔne: Mmabu nvasoɛ mɔɔ wɔ asɔne mɔɔ ɛ nee menli mɔɔ bɛ awie ɛwu bayɛ anzɛɛ ɛbayɛ wɔamaa bɛ azo la debie ekyi. Baebolo ne se: “Sonla tenlene biala nzɛlɛlɛ . . . tumi wɔ nu.” (Gyemise 5:16) Kɛ neazo la, saa bɛte kɛ ɛlɛyɛ asɔne wɔamaa bɛ a ɔbaboa bɛ yeamaa bɛaye fɔlɛbualɛ nganeɛdelɛ biala bɛavi ɛkɛ.​—Fa to Gyemise 5:13-15 anwo.

Mmatwe ɛ nwo ɔluakɛ ɛnnwu mɔɔ ɛka anzɛɛ ɛyɛ la ati: Bie a yɛbaha kɛ, ‘Ɔnle kɛ yɛgyegye bɛ.’ Noko bie a ɛnee nɔhalɛ nu yɛkulo kɛ yɛtwe yɛ nwo ɔluakɛ yɛsulo kɛ yɛbayɛ debie anzɛɛ yɛbaha edwɛkɛ bie mɔɔ ɛnle kpalɛ. Noko akee, saa ahenle mɔɔ ye awie ɛwu la agɔnwo mɔ, ye mbusua, anzɛɛ ɔ gɔnwo mɔ diedima twe bɛ nwo fi ɔ nwo a ɔbamaa ɔ nwo ayɛ ye koonwu na nyanelilɛ ne ayɛ kpole. Kakye kɛ, edwɛkɛ sikalɛ nee debie ekyi bie ala mɔɔ ɛbayɛ la le debie mɔɔ bɛ nye sɔ ye kpalɛ. (Ɛfɛsɛsema 4:32) Ɛkɛ ne ala mɔɔ ɛbahɔ bɔbɔ la kola wula bɛ anwosesebɛ. (Fa to Gyima ne 28:15 anwo.) Teresea hanle kenle mɔɔ ɔ ra raalɛ ne wule la anwo edwɛkɛ kɛ: “Dɔnehwele ko anu, yɛ gɔnwo mɔ dɔɔnwo yile asopiti ɛkɛ; mgbanyima ne mɔ amuala nee bɛ ye mɔ rale ɛkɛ. Mraalɛ ne mɔ bie mɔ rale ɛkɛ ne mɔɔ ɛnee ninyɛne mɔɔ bɛlɛfa bɛayɛ bɛ enrinli la tɛbɔ bɛ ti zo a, ɛnee bie mɔ noko wula bɛ gyima nu tɛladeɛ. Bɛgyakyile debie biala na bɛrale. Bɛ nuhua dɔɔnwo hanle hilele yɛ kɛ bɛnnwu mɔɔ bɛka a, noko ɛkɛ ne mɔɔ bɛrale bɔbɔ la a ɛnee hyia kpalɛ a.”

Mmaka ye kyengye kɛ bɛmmasu: Bie a yɛbaha kɛ, ‘Wɔzu bie a yeyɛ boɛ.’ Noko ɔbayɛ kpalɛ kpalɛ kɛ yɛbamaa bɛazu. Mɔɔ Katherine ɛlɛdwenledwenle ɔ hu ewule ne anwo la ɔhanle kɛ: “Mesuzu kɛ ɔhyia kɛ bɛmaa menli mɔɔ bɛ awie ɛwu la adenle bɛmaa bɛda bɛ nganeɛdelɛ ali amaa bɛahola bɛaye bɛavi bɛ nu.” Kpo kɛ ɛbahile awie mɔ kɛzi ɔwɔ kɛ bɛte nganeɛ la. Na mmasuzu kɛ saa ɛfa wɔ  nganeɛdelɛ ɛfea a ɛbahola wɔabɔ bɛ ɛdeɛ ne anwo bane. Emomu, Baebolo ne ka kɛ: “Bɛ nee mɔɔ su la ɛzu.”​—Wulomuma 12:15.

Mmapele ɛ nwo ɛka kɛ bɛye ahenle mɔɔ ɛwu la anwo ninyɛne bie bɛvi ɛkɛ ne kolaa na bɛadwenle nwo: Bie a ɛbade nganeɛ kɛ ɔle kpalɛ kɛ bɛbaye ninyɛne bie mɔ mɔɔ maa bɛkakye ahenle la bɛavi ɛkɛ, ɔluakɛ, ɔbamaa bɛali nyane bɛahyɛ. Noko ɛrɛlɛ ne mɔɔ se “Ɛnyelɛ annwu ɛkpa a ɔngo” la ɛnyɛ gyima wɔ ɛke. Ahenle mɔɔ ye awie ɛwu la arɛle bavi ye ngyikyi ngyikyi. Kakye edwɛkɛ mɔɔ Baebolo ne hanle ye wɔ kɛzi tete selɛ Gyekɔbo dele nganeɛ wɔ mekɛ mɔɔ bɛmanle ɔliele ɔlile kɛ nanemgbole ɛhu ɔ ra Dwosefi la. Mekɛ mɔɔ bɛvale Dwosefi tɛladeɛ ne mɔɔ bɛva mogya bɛyɛ nu bɛrɛlɛle Gyekɔbo la, “ɔzunle ɔ ra ne mekɛ dɔɔnwo. Ɔ mra mrenya ne mɔ nee ɔ mra mraalɛ ne mɔ amuala rakyekyele ɔ rɛle, noko yeamkponle.”​—Mɔlebɛbo 37:31-35.

 Mmaka kɛ, ‘Ɛbawo bieko’: Raalɛ ko mɔɔ ara wule la hanle kɛ: “Ɛnee saa menli ka kile me kɛ mebawo bieko a ɔyɛ me ɛya.” Bie a ɛnee adwenle kpalɛ a bɛfa bɛka ɛhye a, noko ɛhanlɛ mɔɔ bɛka bɛkile awie mɔɔ ara ɛwu kɛ ɔbahola yeawo kakula fofolɛ yeazie mɔɔ ɛwu la agyakɛ anu la “wowɔ kɛ dadeɛ.” (Mrɛlɛbulɛ 12:18) Kakula ko ɛngola ɛngyinla kakula fofolɛ agyakɛ anu. Duzu ati ɔ? Ɔboalekɛ asolo kɛzi bɛ nuhua ko biala de la.

Mmakpo kɛ ɛkɛbɔ mɔɔ ɛwu la duma: Ninli ko mɔɔ ara wule la hanle kɛ, “Menli dɔɔnwo ambɔ me ra Jimmy duma anzɛɛ anga ɔ nwo edwɛkɛ bɔbɔ.” Ɔdoale zolɛ kɛ, “Zɔhane mɔɔ bɛyɛle la manle menlile nyane.” Yemɔti, saa bɛbɔ ahenle mɔɔ ɛwu la duma a mmabɔ mɔdenle ɛkakyi edwɛkɛ ne anye. Maa ye adenle maa ɔha ye dɔvolɛ ne mɔɔ ɛwu la anwo edwɛkɛ. (Fa to Dwobu 1:18, 19 nee 10:1 anwo.) Menli mɔɔ bɛ awie ɛwu la bie mɔ anye die kɛ bɛkɛde kɛ agɔnwolɛma kɛha debie mɔɔ ɛnee maa bɛ nye die ahenle mɔɔ ɛwu la anwo la.​—Fa to Gyima ne 9:36-39 anwo.

Mmapele ɛ nwo ɛka kɛ, ‘Ye kpalɛ nu ɔ’: Tɛ mekɛ ne amuala a mɔdenle mɔɔ ɛbabɔ kɛ ɛka ewule nwo edwɛkɛ mɔɔ fɛta la ‘bazi mɔɔ . . . ɛlɛdi nyane la ahonle’ a. (1 Tɛsɛlonaekama 5:14) Bɛlɛra ko mɔɔ hakyele mekɛ mɔɔ ɔ nli wule la hanle kɛ: “Bie mɔ se, ‘Kɛkala ɔnnwu amaneɛ’ anzɛɛ, ‘Yela anzondwolɛ nu.’ Noko ɛnee memkpondɛ kɛ metie mɔɔ bɛlɛka la.” Edwɛkɛ zɛhae mɔ bahola amaa menli mɔɔ bɛ awie ɛwu la ade nganeɛ kɛ ɔnle kɛ bɛdi nyane anzɛɛ mɔɔ bɛminli la anwo ɛngyia. Noko akee, bie a ɛnee bɛlɛdi nyane kpole ɔluakɛ bɛminli debie kpole.

Ɔnle kpalɛ kɛ ɛkɛha kɛ, ‘Meze kɛzi ɛte nganeɛ la’: Amgba ɛze kɛzi ɔte nganeɛ la ɔ? Kɛ neazo la, saa ɛ ra ɛtɛwule ɛlɛ a asoo ɛbahola wɔanwu kɛzi awovolɛ te nganeɛ wɔ mekɛ mɔɔ bɛ ra ɛwu la ɔ? Saa ɛ ra ɛwu ɛlɛ bɔbɔ a, nwu ye kɛ asolo kɛzi awie biala te nganeɛ la. (Fa to Awolɛyelɛ 1:12 anwo.) Wɔ adenle fofolɛ zo, saa ɔfɛta a, ɔbayɛ kpalɛ kɛ ɛbaha kɛzi ɛholale ɛgyinlanle wɔ dɔvolɛ bie ewule nloa la anwo edwɛkɛ. Raalɛ ko mɔɔ ara wule la nyianle anwosesebɛwulalɛ vile raalɛ ko mɔɔ ɔdaye noko ɔ ra wule nee kɛzi ɔholale ɔgyinlanle ɔ nloa la anwo edwɛkɛ mɔɔ ɔhanle ɔhilele ye la anu. Ɔhanle kɛ: “Kakula raalɛ ne mame anva ‘meze kɛzi ɛte nganeɛ la ambɔ ye edwɛkɛ ne abo.’ Ɔhanle kɛzi ɔdele nganeɛ la anwo edwɛkɛ ɔhilele me ala na ɔmanle menvale mendole me ɛdeɛ ne anwo.”

Ɔhyia anwunvɔnezelɛ, nwunu, nee ɛlɔlɛ kpole wɔ yɛ afoa nu na yɛahola yɛaboa awie mɔɔ ye awie ɛwu la. Mmakendɛ ɛmaa mɔɔ ye awie ɛwu la ba ɛ nwo ɛkɛ. Mmaka kɛ, “Saa debie bie wɔ ɛkɛ ne mɔɔ mebahola meayɛ a . . . ” Ɛdawɔ mumua ne dumua kpondɛ “deɛ zɔhane” na di nwolɛ gyima kɛmɔ ɔfɛta la.

Kpuyia ekyi tɛbɔ ɛkɛ: Ewudwazo nwo anyelazo boni a wɔ Baebolo ne anu a? Duzu a ɔkile ɔmaa wɔ nee wɔ dɔvolɛ mɔɔ ɛwu la ɛ? Kɛzi yɛkola yɛdie yɛdi kɛ ɔle anyelazo kpalɛ ɛ?