Alɔvolɛ Mɔɔ Bɛkulo Gyihova:

Ɛnee ɛvolɛ ne le 1971. Bɛdabɛ mɔɔ bɛhɔle “Divine Name” Maanzinli Nyianu ne bie wɔ ɛvolɛ zɔhane anu la anye liele kɛ bɛnyianle mbuluku ngakyile la. Bɛhanle mbuluku ne mɔ anwo edwɛkɛ kɛ “bɛbo awie biala ndelebɛbo zo.” Adiema nrenyia bie hanle ye wɔ mbuluku ne mɔ mɔɔ bɛyele la ko anwo kɛ: “Ɔle ninyɛne mɔɔ bara la anwo edwɛkɛ mɔɔ bɛlimoa bɛha mɔɔ yɛ anyelielɛ tɛla biala mɔɔ yɛ sa ɛha ye a!” Duzu a ɛnee ɔlɛka nwolɛ edwɛkɛ a? “The Nations Shall Know That I Am Jehovah”—How? buluku ne ɔ. Noko duzu ati a menli dɔɔnwo anye liele buluku ne anwo a? Ɔluakɛ ɛnee ngapezo ne mɔ mɔɔ wɔ Yizikeɛle buluku ne anu la anu ngilenu fofolɛ a wɔ nu a—ngapezo mɔɔ fale alesama kɔsɔɔti kenle bie nwo la.

Ɔvi mekɛ mɔɔ bɛyele ‘Know Jehovah’ buluku ne la, Nyamenle menli ɛnyia anyuhɔlɛ ndɛndɛ—ɛnee bɛ dodo bayɛ mgbe 1.5 ala, noko kɛkala bɛbo mgbe 8. (Aye. 60:22) Gyihova azonvolɛ mgbe dɔɔnwo ɛhye mɔ ka aneɛ ngakyile mɔɔ bo 900. (Zɛk. 8:23) Bɛ nuhua dɔɔnwo ɛtɛnyianle adenle ɛtɛsukoale buluku mɔɔ kilehile ngapezo ne mɔ mɔɔ sunsum ne maanle ngapezonli Yizikeɛle hɛlɛle anu mɔɔ kɔ moa la ɛlɛ.

Bieko, ɔvi 1971, ndelebɛbo mɔɔ yɛlɛ ye wɔ Baebolo ne anu nɔhalɛ bie mɔ anwo la ɛnyia anyuhɔlɛ kpalɛ ɔluakɛ wienyi ne ɛlɛkɔ zo ada. (Mrɛ. 4:18) Yɛnwunle kɛzi bɛbule “mboane gyɛne” ne anu amra tenlenema nee Nyamenle agɔnwo mɔ la wienyi wɔ 1985. (Dwɔn 10:16; Wlo. 5:18; Gye. 2:23) Akee wɔ 1995 a yɛlimoale yɛdele ɔ bo kɛ “mboane” ne nee “mbɔnkye” ne ndɛnebualɛ mɔɔ li awieleɛ la bazi wɔ “anwongyelelɛ kpole” ne anu a. (Mat. 24:21; 25:31, 32) Nzenzaleɛ ɛhye mɔ amuala ɛha kɛzi yɛte Yizikeɛle buluku ne abo la.

Kenlensa ye, wienyi ne ɛhɔ zo ɛda kpalɛ. Suzu mɔɔ yɛzukoa yɛvi Gyisɛse ndonwo ne mɔ anu la anwo nea. Kɛkala ɛzukoalɛdeɛ zɔhane mɔ anu dɔɔnwo anu ɛla ɛkɛ ne wienyi wɔ yɛ adwenle nee yɛ ahonle nu. Ndonwo ne mɔ fale ninyɛne mɔɔ ɔnrɛhyɛ ɔbasisi wɔ anwongyelelɛ kpole ne anu la anwo. Bɛyɛ nzenzaleɛ wɔ ndelebɛbo mɔɔ yɛlɛ ye wɔ ngapezo ne mɔ mɔɔ wɔ Yizikeɛle buluku ne anu la noko bie mɔ anu. Ɛhye mɔ bie a le Gɔgo mɔɔ vi Meegɔgo (tile 38 nee 39), nrenyia ne mɔɔ kɛlɛhɛlɛvolɛ toba ne bɔ ye foa ko (tile 9) nee bɔnza ne mɔɔ mbowule welera ne mɔ wɔ nu yɛɛ mbaka nwiɔ ne mɔɔ bɛbava bɛabɔ nwo mɔɔ le sɛkɛlɛneɛ la anwo ngapezo ne mɔ (tile 37). Nzenzaleɛ ɛhye mɔ noko le ndelebɛbo fofolɛ mɔɔ yɛnyia ye wɔ mɔɔ bɛhɛlɛle ye wɔ ‘Know Jehovah’ buluku ne anu la anwo a.

Ɔti ɔnyɛ azibɛnwo kɛ Gyihova menli ne anu dɔɔnwo bizale kɛ, “Kenlenzu a yɛbanyia buluku mɔɔ Yizikeɛle ngapezo ne mɔ anu ngilehilenu fofolɛ wɔ nu a?” Buluku zɔhane a le Bɛva Nɔhalɛ Ɛzonlenlɛ Bɛzie Ɛkɛ Ne Bieko! Saa ɛkenga tile 22 ne amuala na ɛdwenledwenle nvoninli ngɛnlɛma mɔɔ wɔ nu la anwo a, neɛnleanu kpalɛ mɔɔ bɛyɛle amaa bɛayɛ buluku ne la bazi ɛ nwo. Bɛvale asɔneyɛlɛ dɔɔnwo bɛzuzule deɛmɔti Gyihova maanle bɛhɛlɛle Yizikeɛle buluku kɛnlɛma ne la anwo. Bɛzuzule kpuya ɛhye mɔ anwo kpalɛ: Ɛzukoalɛdeɛ boni a wɔ Yizikeɛle buluku ne anu maa bɛdabɛ mɔɔ ɛnee bɛwɔ ɛkɛ wɔ Yizikeɛle mekɛ zo nee yɛdayɛ noko a? Ngapezo boni mɔ a ka ninyɛne mɔɔ bara kenle bie la anwo edwɛkɛ a? Asoo ɔwɔ kɛ yɛ nye da kɛ Yizikeɛle  ngapezo ne bie mɔ le edwɛkɛ mɔɔ zile dɛba na ɔbara nu kpole kenle bie ɔ? Kpuya ɛhye mɔ anwo mualɛ ne bamaa yɛade Yizikeɛle buluku ɛhye mɔɔ yɛ nye die ye ɛgengalɛ nwo la abo kpalɛ.

Ɛkenga Yizikeɛle buluku ne ɛfi ye mɔlebɛbo ɛkɔdwu ye awieleɛ a, kɛzi Gyihova ahyehyɛdeɛ ne foa mɔɔ wɔ anwuma de la bazi ɛ nwo. Kɛzi Gyihova ngyinlazo ne mɔ mɔɔ wɔ ɛkɛ ne maa bɛdabɛ mɔɔ bɛwɔ anwuma nee aze mɔɔ bɛkulo kɛ bɛsonle ye na ɔdie ɔto nu kpogya la noko bazi ɛ nwo. Nɔhalɛ Ɛzonlenlɛ buluku ne bamaa wɔahile mɔɔ Gyihova ɛyɛ ɛmaa ye menli nee mɔɔ ɔbayɛ yeamaa bɛ kenle bie la anwo anyezɔlɛ kpalɛ. Ɛbanwu kɛ buluku ɛhye ka ninyɛne nwiɔ anwo edwɛkɛ fane dɔɔnwo. Mɔɔ limoa, saa yɛbazɔ Gyihova anye a ɔwɔ kɛ yɛnwu kɛ ɔle Anwuma Nee Aze Belemgbunli na yɛdie yɛto nu. Mɔɔ tɔ zo nwiɔ, ɔwɔ kɛ yɛsonle Gyihova wɔ adenle mɔɔ ɔdie ɔto nu la azo, na yɛmaa yɛ ɛbɛlabɔlɛ nee ye ngyinlazo ne mɔ mɔɔ kpogya la yɛ ko.

Yɛ nye die nwolɛ kpalɛ kɛ buluku ɛhye bamaa kpɔkɛ mɔɔ bɛzi kɛ bɛsonle Gyihova wɔ adenle mɔɔ di ye duma kpole nee nwuanzanwuanza ne eni azo la anu ayɛ se. Ɔrɛla ye kɛ, eza ɔbamaa bɛ anwosesebɛ yeamaa bɛava bɛ nye bɛado mekɛ mɔɔ maanle maanle ne mɔ kɔsɔɔti banwu kɛ ɔdaye a ɔle Gyihova la azo.—Yiz. 36:23; 38:23.

Yɛ ɛlɔlɛ Selɛ ne, Gyihova ɛyila mɔdenle mɔɔ bɛbabɔ kɛ bɛte buluku ne mɔɔ ɔluale ye sunsum ne azo ɔmaanle ngapezonli Yizikeɛle hɛlɛle abo la azo kpalɛ.