Suzu tɛnlabelɛ ɛhye anwo: Ngakula mrenyia nwiɔ mɔɔ bɛ nee Brian kɔ sukulu la ɛlɛba ɔ nwo ɛkɛ, ye ahonle ɛdu. Bɛra ɔ nwo ɛkɛ ne fane nwiɔ kɛ bɛmaa yeanlo sigalɛte. Ye fane nsa azo ɛne.

Kakula mɔɔ limoa la ka kɛ:

Mekɛ mɔɔ ɔlɛka “me gɔnwo” la ɔbɔ ɔ nye na ɔye debie wɔ ye kodoku nu na ɔtende ɔ sa kɛ Brian ɛlie.

Brian nwu sigalɛte ne mɔɔ zia kakula ne asa mrɛlɛsɛka ne avinli la. Brian ahonle ɛdu kpole.

Saa ɛdawɔ a ɛle Brian a, anrɛɛ boni a ɛbayɛ a?

Asoo Brian agɔnwo mɔ ɛdwenle mɔɔ bɛlɛyɛ la anwo kpalɛ? Asoo bɛzi bɛ ti anwo kpɔkɛ? Kyɛkyɛ. Bɛle kɛ ngakula gyɛne la, bɛmaa bɛ gɔnwo mɔ ɛnyia bɛ nwo zo tumi. Bɛkulo kɛ bɛ gɔnwo mɔ die bɛ to nu, yemɔti bɛmaa awie mɔ kile bɛ mɔɔ ɔwɔ kɛ bɛyɛ la.

Saa ɛyia tɛnlabelɛ ko ne ala bie a, kɛ ɔkɛyɛ na wɔayɛ ngakyile na wɔagyinla atipɛnema ngyegyelɛ nloa ɛ?

1. MAA Ɛ NYE ƐLA YE ADE

   Baebolo ne ka kɛ: “Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea, na mɔɔ ɛnlɛ adwenle la kɔtɔ nu na ɔnwu amaneɛ.”—Mrɛlɛbulɛ 22:3.

   Fane dɔɔnwo ne ala, ɛbahola wɔanwu ngyegyelɛ ne kolaa na yeara. Kɛ neazo la, fa ye kɛ wɔnwu ɛ gɔnwo mɔ kɛ bɛlɛno sigalɛte. Ɛmaa ɛ nye da ngyegyelɛ mɔɔ ɛbahola wɔayia ye la ade a, ɛbahola wɔagyinla ɔ nloa.

2. DWENLE

   Baebolo ne ka kɛ: “Bɛnyia adwenle kpalɛ.”—1 Pita 3:16, NW.

   Biza ɛ nwo kɛ, ‘Saa medi menli dɔɔnwo ne anzi a, awieleɛ bɔkɔɔ ne kɛzi mebade nganeɛ ɛ?’ Nɔhalɛ nu, bie a ɛ gɔnwo mɔ anye ɛnrɛlie ɛ nwo ɛkɛ ne ala. Noko nzinlii kɛzi ɛbade nganeɛ ɛ? Ɛlɛ ɛhulolɛ kɛ ɛbahakyi kɛzi ɛde la amaa ɛ gɔnwo mɔ sukuluma anye alie ɔ?—Adendulɛ 23:2.

3. SI KPƆKƐ

   Baebolo ne ka kɛ: “Nrɛlɛbɛvolɛ nea boɛ.”—Mrɛlɛbulɛ 14:16.

   Saa tɛ ɛnɛ bɔbɔ a, bie a kenle bie ɔwɔ kɛ yɛsi kpɔkɛ na yɛdie mɔɔ vi nu bara la yɛto nu. Baebolo ne ka mrenyia le kɛ Dwosefi, Dwobu, nee Gyisɛse mɔɔ bɛzile kpɔkɛ kpalɛ la anwo edwɛkɛ. Eza ɔka Keen, Yisɔ nee Dwudase mɔɔ bɛzile kpɔkɛ ɛtane la anwo edwɛkɛ. Boni a ɛbayɛ a?

Baebolo ne ka kɛ, fa ‘nɔhalɛlilɛ’ yɛ gyima. (Dwɔhyua 24:14) Saa wɔlimoa wɔdwenle mɔɔ vi nu bara la anwo na wɔzi nwolɛ kpɔkɛ a, ɔnrɛyɛ se kɛ ɛbaha wɔ gyinlabelɛ ne anwo edwɛkɛ—yɛɛ ɛ nye balie.

Mmamaa ɔgyegye wɔ—ɔngyia kɛ ɛbaha ndendenle wɔahile ɛ gɔnwo mɔ. Bie a ɛbahola wɔava anwodozo wɔaha ye sikalɛ kɛ KYƐKYƐ. Anzɛɛ ɛbahola wɔaha kpɔkɛ mɔɔ wɔbɔ la anwo edwɛkɛ kɛ:

• “Bɛye me bɛvi nu!”

• “Menyɛ ninyɛne zɔhane mɔ!”

• “Gyakyi na ɛze kɛ menrɛyɛ!”

Mɔɔ hyia la a le kɛ ɛbava anwodozo wɔayɛ ninyɛne ndɛndɛ. Saa ɛyɛ zɔ a, ɔbazi ɛ nwo kɛ ɛ gɔnwo mɔ bahwe bɛ nwo ndɛndɛ!

Saa ɛ gɔnwo mɔ golo ɛ nwo ɛ? Saa bɛka kɛ, “Boni a gyegye wɔ a, ɛle foanvoanle ɔ?” Nwu ye kɛ edwɛkɛ ɛhye mɔ boka atipɛnema ngyegyelɛ ne anwo. Kɛzi ɛbabua ɛ? Ɛbahola wɔayɛ ninyɛne nwiɔ.

• Ɛbahola wɔalie wɔado nu. (“Ɔle nɔhalɛ, mesulo kpalɛ!” Akee ka deɛmɔti ɛsulo la sikalɛ.)

• Ɛbahola wɔaye edwɛkɛ ne wɔado bɛ nwo zo. Ka deɛmɔti ɛnrɛyɛ la, akee ka edwɛkɛ mɔɔ bamaa bɛadwenle la. (“Kɛzi bɛde la ati meanzuzu nwo ɛlɛ kɛ bɛbanlo sigalɛte!”)

Saa bɛangyakyi na bɛtoa zo a, fi ɛkɛ ne kɔ! Kakye kɛ, ɛgyinla ɛkɛ ne ɛkyɛ a, bɛbaha edwɛkɛ dɔɔnwo. Ɛfi ɛkɛ ne ɛkɔ a, ɔkile kɛ wɔammaa ɛ gɔnwo mɔ angakyi kɛzi ɛde la.

Kɛ ɔde ye biala la ɛbayia atipɛnema ngyegyelɛ. Noko ɛbahola wɔazi mɔɔ ɛbayɛ la anwo kpɔkɛ, maa bɛnwu wɔ gyinlabelɛ, na nwu mɔɔ ɔwɔ kɛ ɛyɛ la. Awieleɛ bɔkɔɔ ne, kpɔkɛzilɛ ne le wɔ ɛdeɛ!—Dwɔhyua 24:15.