1, 2. (a) Edwɛkɛ boni a ɔyɛ a yɛbiza yɛ nwo wɔ menli mɔɔ ɛgya fofolɛ la anwo a, na duzu ati ɔ? (b) Kpuyia boni mɔ a yɛbazuzu nwo wɔ tile ɛhye anu a?

ƐKƆ atɔfolɛlielɛ bo ɔ? Menli dɔɔnwo kɔ, ɔluakɛ mekɛ zɛhae yɛ anyelielɛ kpalɛ. Ɛnwu kɛ agyalɛma ne ɛziezie bɛ nwo kɛnlɛma. Ɛnea bɛ nyunlu noko a ɛzelekɛ ngome! Wɔ kenle ɛhye anu, agyalɛma ne anye die kpole kpalɛ, na ɔzɔho kɛ ninyɛne bahɔ zo kɛnlɛma amaa bɛ kenlebie.

² Noko akee, bɛmaa yɛha, na agyalɛ dɔɔnwo ɛlɛyia ngyegyelɛ wɔ ndenle ngakyile zo ɛnɛ. Yɛ nye la kɛ menli mɔɔ ɛgya fofolɛ la agyalɛ bazɔ ɛdeɛ, noko ɔyɛ a yɛbiza yɛ nwo kɛ: ‘Asoo agyalɛ ɛhye bayɛ anyelielɛ? Asoo ɔbagyinla?’ Kpuyia ɛhye mɔ mualɛ bagyinla kɛzi kunli ne nee yelɛ banyia anwodozo wɔ Nyamenle agyalɛ nwo folɛdulɛ nu, na bɛava bɛabɔ bɛ ɛbɛla la azo. (Bɛgenga Mrɛlɛbulɛ 3:5, 6.) Ɔwɔ kɛ bɛyɛ zɔ amaa bɛadɛnla Nyamenle ɛhulolɛ ne anu. Akee bɛmaa yɛnlea kɛzi Baebolo ne bua kpuyia nna ɛhye mɔ la: Duzu ati a ɔwɔ kɛ ɛgya a? Saa ɛkulo kɛ ɛgya a, nwane a ɛbagya ye a? Kɛzi ɛbaziezie ɛ nwo wɔamaa agyalɛ ɛ? Na duzu a baboa agyalɛma na bɛ agyalɛ ne ayɛ anyelielɛ dahuu a?

3. Duzu ati a nrɛlɛbɛ ɛnle nu kɛ yɛbadwazo ala yɛagya a?

³ Bie mɔ die di kɛ agyalɛ a maa awie anye die a, kile kɛ awie akunlu badwo ɔ nwo na ɔ nye alie wɔ ɛbɛlabɔlɛ nu  a kyesɛ ɔnyia bokavolɛ. Ɛhye ɛnle nɔhalɛ fee! Gyisɛse mɔɔ yeangya la hanle kɛ belazinlililɛ le ahyɛlɛdeɛ na ɔhanle kɛ bɛdabɛ mɔɔ bɛbahola la ɛyɛ zɔ. (Mateyu 19:11, 12) Ɛzoanvolɛ Pɔɔlo noko hanle nvasoɛ mɔɔ wɔ belazinlililɛ zo la anwo edwɛkɛ. (1 Kɔlentema 7:32-38) Noko, Gyisɛse anzɛɛ Pɔɔlo anyɛ mɛla kyengye biala wɔ nwolɛ; nɔhalɛ nu, awie ka kɛ ‘agyalɛ ɛnle kpalɛ a’ ɔle “mbɔnsam ngilehilelɛ.” (1 Temɔte 4:1-3) Noko akee, belazinlililɛ le nvasoɛ maa bɛdabɛ mɔɔ bɛkulo kɛ bɛsonle Gyihova mɔɔ bɛmmaa debie ɛndwehwe bɛ adwenle la. Ɛhye ati, nrɛlɛbɛ ɛnle nu kɛ yɛbadwazo ala yɛagya, ɔluakɛ yɛ gɔnwo mɔ ɛlɛgya la ati.

4. Kɛzi agyalɛ kpalɛ boa maa bɛtete ngakula ɛ?

⁴ Noko, asoo ndelebɛbo kpalɛ bie wɔ ɛkɛ mɔɔ ɔti ɔwɔ kɛ awie gya ɔ? Ɛhɛe. Agyalɛ noko le ahyɛlɛdeɛ mɔɔ vi ɛlɔlɛ Nyamenle ne ɛkɛ a. (Bɛgenga Mɔlebɛbo 2:18.) Ɛhye ati, nvasoɛ wɔ zo yɛɛ ɔkola ɔfa anyelielɛ ɔba. Kɛ neazo la, agyalɛ kpalɛ le adiabo kpalɛ maa abusua asetɛnla. Ngakula hyia tɛnlabelɛ mɔɔ anzondwolɛ wɔ nu nee awovolɛ mɔɔ batete bɛ, anyia bɛ nwo ɛlɔlɛ, adenrɛdenrɛ bɛ, na bahile bɛ adenle la. (Edwɛndolɛ 127:3; Ɛfɛsɛsema 6:1-4) Noko, tɛ ngakula ɛtetelɛ angomekye ti a agyalɛ wɔ ɛkɛ a.

5, 6. (a) Kɛmɔ Nolobɔvo ne 4:9-12 kile la, agɔnwolɛ kpalɛ zo nvasoɛ bie mɔ a le boni? (b) Kɛzi agyalɛ kola yɛ kɛ nyɛma mɔɔ bɔ nwolɛ nsa la ɛ?

⁵ Suzu ngɛlɛlera mɔɔ tile ɛhye gyi zo nee nwolɛ edwɛkɛ ne anwo nea: “Menli nwiɔ le kpalɛ tɛla sonla ko, ɔboalekɛ bɛ mu nwiɔ bɛbɔ nu a bɛkola bɛyɛ gyima bɛnyia zolɛ nvasoɛ. Ɔluakɛ saa ko tɔ aze a, ko ne badwazo ye. Na munzule ɛha mɔɔ le baholɛ la, ɔ ngome la ati saa ɔtɔ aze a, awie bieko ɛnle ɛkɛ mɔɔ ɔboa ye yeamaa yeadwazo a. Bieko, saa menli nwiɔ da a bɛ nwo yɛ wuluwulu, na kɛ ɔkɛyɛ na sonla ko ahola amaa ɔ nwo ayɛ wuluwulu ɛ? Saa awie teta menli nwiɔ a, bɛkɛhola bɛkɛgyinla bɛ gyakɛ anu bɛkɛdɛla sonla ko. Nyɛma bɔ nwolɛ nsa a nuhua ɛdelɛ ɛnla aze.”​—Nolobɔvo ne 4:9-12.

 ⁶ Ngɛlɛlera ɛhye kile kɛ nvasoɛ wɔ agɔnwolɛvalɛ zo. Nɔhalɛ nu, agyalɛ le agɔnwolɛvalɛ mɔɔ anu le kyengye kpalɛ. Kɛmɔ ngɛlɛlera ɛhye kile la, koyɛlɛ ɛhye kola maa agyalɛma ne boa bɛ nwo, kyekye bɛ nwo bɛ nwo bɛ rɛle na ko biala bɔ ɔ gɔnwo anwo bane. Saa koyɛlɛ mɔɔ wɔ menli nwiɔ ne avinli la anu bayɛ se kpalɛ a ɛnee ɔwɔ kɛ bɛfa debie bieko bɛboka nwo. Kɛmɔ ngɛlɛlera ɛhye kile la, nyɛma mɔɔ bɔ nwo nwiɔ la anu kola te. Noko, nyɛma mɔɔ bɔ nwo nsa la anu ɛdelɛ ɛnla aze. Saa kunli nee yelɛ maa ɔkyia bɛ kɛ bɛbazɔ Gyihova anye a, bɛ agyalɛ ne bayɛ kɛ nyɛma mɔɔ bɔ nwolɛ nsa la. Gyihova baboka agyalɛ ne anwo, yemɔti bɛ koyɛlɛ ne anu bayɛ se kpalɛ.

7, 8. (a) Folɛ boni a Pɔɔlo dule Keleseɛnema mɔɔ bɛtɛgyale mɔɔ bɛngola bɛ nwo sɔ la ɛ? (b) Agyalɛ nwo nɔhalɛ edwɛkɛ boni a Baebolo ne ka a?

⁷ Bieko, agyalɛ nu ala a bɛkola bɛdi nla nwo atiakunluwɔzo nwo gyima wɔ adenle kpalɛ zo a. Bɛbu agyalɛ nu nla wɔ adenle ɛhye azo kɛ ɔfa anyelielɛ ɔba. (Mrɛlɛbulɛ 5:18) Saa awie mɔɔ ɛtɛgyale la “ɛdwu agyalɛ zo” kɛmɔ Baebolo ne ka la a, ɔkile kɛ yedɛla mekɛ mɔɔ nla nwo nganeɛdelɛ ne yɛ se la anu, noko ɔbahɔ zo yeanyia nla nwo nganeɛdelɛ. Saa yeangomo ɔ nwo zo a, zɛhae nganeɛdelɛ ne bahola amaa yeava ɔ nwo yeawula nyɛleɛ evinli anzɛɛ ɛbɛlatane nu. Nyamenle sunsum ne manle Pɔɔlo dule menli mɔɔ bɛtɛgyale la folɛ kɛ: “Saa bɛnea na bɛnrɛhola bɛ nwo sɔ a, ɛnee bɛgya bie; ɔle kpalɛ kɛ bɛkɛgya bie tɛla kɛ bɛ nwo kɛhyele bɛ na bɛnrɛhola bɛ nwo sɔ.”​—1 Kɔlentema 7:9, 36; Gyemise 1:15.

⁸ Kɛzi adwenle biala mɔɔ awie bagyinla zo agya de la, ɔwɔ kɛ ɔnwu mɔɔ ɔbado ye la. Kɛmɔ Pɔɔlo hanle la “nwuvolɛ nwo kyele bɛ kpalɛ.” (1 Kɔlentema 7:28) Ngyegyelɛ mɔɔ agyalɛma yia la, menli mɔɔ bɛtɛgyale la ɛnyia bie. Noko, saa ɛsi kpɔkɛ kɛ ɛbagya a, kɛ ɔkɛyɛ na wɔamaa ngyegyelɛ ne azo ade na wɔanyia anyelielɛ kpole ɛ? Adenle ko a le kɛ ɛbakpondɛ wɔ bokavolɛ nrɛlɛbɛ nu.

9, 10. (a) Kɛzi Pɔɔlo hilele esiane mɔɔ wɔ nu kɛ yɛ nee menli mɔɔ bɛnle diedima la bava agɔnwolɛ kyengye ɛ? (b) Saa awie andie Nyamenle folɛdulɛ na ɔgya awie mɔɔ ɔnle diedinli la a duzu a ɔta ɔfa ɔba a?

⁹ Nyamenle sunsum ne hanle Pɔɔlo manle ɔhɛlɛle ngyinlazo bie mɔɔ hyia mɔɔ ɔwɔ kɛ yɛfa yɛdi gyima wɔ mekɛ mɔɔ yɛlɛkpondɛ agyalɛ bokavolɛ la: “Bɛ nee bɛdabɛ mɔɔ bɛnlie bɛnli la mmatwe gyɛnvayile ko.” (2 Kɔlentema 6:14, NW) Debie mɔɔ bɛfa bɛyɛ gyima wɔ ɛyazonlɛ nu la a ɔhanle nwolɛ edwɛkɛ a. Saa bɛkyekye nane nwiɔ mɔɔ bɛ mgbole nee bɛ anwosesebɛ ɛnzɛ fee la wɔ baka nwo kɛ bɛfa bɛazo ɛya a, bɛ mu nwiɔ bɛbanwu amaneɛ. Zɔhane ala a ɔda ali kɛ diedinli nee awie mɔɔ ɛnle diedinli la gya a bɛbayia ngyegyelɛ a. Saa agyalɛma ne anu ko kulo kɛ ɔtɛnla Gyihova ɛhulolɛ ne anu, na ko ne mɔɔ ɛha la ɛngulo ye zɔhane a, ninyɛne mɔɔ nwolɛ hyia wɔ bɛ ɛbɛlabɔlɛ nu la ɛnrɛyɛ ko, na ɛhye bahola ava ngyegyelɛ dɔɔnwo ara. Ɛhye ati, Pɔɔlo dule folɛ kɛ ɔwɔ kɛ Keleseɛnenli gya “Awulae anu ala.”​—1 Kɔlentema 7:39, NW.

¹⁰ Wɔ tɛnlabelɛ bie mɔ anu, Keleseɛnema mɔɔ bɛtɛgyale la ɛha kɛ ɔle kpalɛ kɛ bɛkɛgya awie mɔɔ ɛnle diedinli la tɛla kɛ bɛ nwo kɛyɛ bɛ koonwu. Bie mɔ bu bɛ nye gua Baebolo folɛdulɛ zo, na bɛgya awie mɔɔ ɛnzonle Gyihova la. Ɛhye ta fa nyanelilɛ dɔɔnwo ba. Menli zɛhae mɔ gya awie mɔɔ bɛngola bɛ nee ye ɛnga ninyɛne mɔɔ hyia titile wɔ ɛbɛlabɔlɛ nu anwo edwɛkɛ la. Bɛ anwokoonwuyɛlɛ yɛ kpole tɛla mekɛ bɔbɔ mɔɔ ɛnee bɛtɛgyale la. Mɔɔ yɛ anyelielɛ la a le kɛ, Keleseɛnema mɔɔ bɛtɛgyale la apenle dɔɔnwo fi nɔhalɛlilɛ nu tie Nyamenle folɛdulɛ mɔɔ bɛfa bɛmaa wɔ ɛhye anwo la na bɛfa bɛ nwo bɛto zo. (Bɛgenga Edwɛndolɛ 32:8.) Bɛ nye la kɛ bɛbagya kenlebie ɛdeɛ, noko bɛ ngome bɛtɛnla bɛkɔdwu mekɛ mɔɔ bɛkɛnyia bokavolɛ mɔɔ sonle Gyihova Nyamenle la.

11. Duzu a baboa wɔ yeamaa wɔakpondɛ agyalɛ bokavolɛ nrɛlɛbɛ nu a? (Eza nea ɛlɛka “ Duzu a Mekpondɛ Wɔ Bokavolɛ Nwo a?”)

¹¹ Nɔhalɛ nu, tɛ Gyihova sonvolɛ biala a bahola ayɛ agyalɛ  bokavolɛ kpalɛ a. Saa ɛlɛsuzu agyalɛ nwo a kpondɛ awie mɔɔ ye subane nee ye sunsum nu bodane nee wɔ ɛdeɛ ne le ko, na ɔkulo Nyamenle kɛ ɛdawɔ la. Akɛlɛ nɔhavo nee nrɛlɛbɛvolɛ ne ɛhɛlɛ ɛhye anwo edwɛkɛ dɔɔnwo, yemɔti nrɛlɛbɛ wɔ nu kɛ ɛbava asɔneyɛlɛ wɔazuzu folɛdulɛ ɛhye mɔɔ gyi Ngɛlɛlera ne azo la anwo na wɔamaa yeahile wɔ adenle wɔ mekɛ mɔɔ ɛlɛsi kpɔkɛ ɛhye mɔɔ hyia la. *​—Bɛgenga Edwɛndolɛ 119:105.

12. Agyalɛ nwo amaamuo boni a kɔ zo wɔ maanle dɔɔnwo anu a, na nwolɛ Baebolo neazo boni a maa yɛnyia adehilelɛ bie mɔ a?

¹² Wɔ maanle dɔɔnwo anu, bɛ amaamuo ne kile kɛ awovolɛ a gya maa bɛ mra a. Bɛdie bɛdi kɛ awovolɛ lɛ anwubielɛ nee nrɛlɛbɛ kpole mɔɔ boa maa bɛsi kpɔkɛ zɛhae mɔɔ hyia la. Agyalɛ zɛhae mɔ ta wie ye boɛ, kɛmɔ ɛnee ɔde wɔ Baebolo mekɛ zo la. Awovolɛ mɔɔ kulo kɛ gya mraalɛ maa bɛ mra ɛnɛ la bahola azukoa debie avi neazo mɔɔ Ebileham yɛle wɔ mekɛ mɔɔ ɔzoanle ye sonvolɛ ɔmanle ɔhɔgyale raalɛ ɔrɛlɛle Ayezeke la anu. Ɛnee tɛ ezukoa nee gyinlabelɛ a hyia Ebileham a. Emomu, ɔbɔle mɔdenle biala kɛ ɔbanyia yelɛ wɔ menli mɔɔ sonle Gyihova la anu yeamaa Ayezeke. *​—Mɔlebɛbo 24:3, 67.

13-15. (a) Kɛzi ngyinlazo mɔɔ wɔ Mrɛlɛbulɛ 24:27 la bahola aboa kpavolɛ mɔɔ ɛlɛdwenle agyalɛ nwo la ɛ? (b) Duzu a bɛlɛra bahola ayɛ ava aziezie ɔ nwo amaa agyalɛ a?

¹³ Saa ɛlɛsuzu agyalɛ nwo ɛsesebɛ a, ɛnee ɔwɔ kɛ ɛbiza ɛ  nwo kɛ, ‘Asoo meziezie me nwo?’ Tɛ nganeɛ mɔɔ ɛte ye wɔ ɛhulolɛ, nla, agɔnwolɛ, anzɛɛ awolɛ nwo la azo a ɛhye gyi a. Emomu, bodane bie mɔ wɔ ɛkɛ mɔɔ ɔwɔ kɛ nrenya anzɛɛ raalɛ mɔɔ ɛlɛsuzu agyalɛ nwo la dwenle nwo a.

¹⁴ Ɔwɔ kɛ kpavolɛ mɔɔ ɛlɛkpondɛ raalɛ agya la suzu ngyinlazo ɛhye anwo kpalɛ: “Boɔboa ɛ nwo sie; duolua ɛbɔ nu kpondɛ nwolɛ ninyɛne ne amuala sie kolaa na wɔarazi wɔ sua ne.” (Mrɛlɛbulɛ 24:27) Duzu a ɛhye kile a? Zɔhane mekɛ ne, ɛnee saa nrenya bie kpondɛ kɛ ɔgya na ɔkyekye abusua a, ɔwɔ kɛ ɔbiza ɔ nwo kɛ, ‘Asoo meziezie me nwo kɛ mebanlea na meaboa yelɛ nee ngakula mɔɔ yɛbanyia la ɔ?’ Ɛnee ɔwɔ kɛ ɔdumua ɔyɛ gyima, ɔnea ye ɛya nu ninyɛne zo. Ngyinlazo ko ne ala a tɛbɔ ɛkɛ ɛnɛ a. Ɔwɔ kɛ nrenya mɔɔ kpondɛ kɛ gya la siezie ɔ nwo maa gyima mɔɔ ɔlɛfa yeado ɔ kɔme zo la. Saa ɔte kpɔkɛ a, ɔwɔ kɛ ɔyɛ gyima. Nyamenle Edwɛkɛ ne ka kɛ nrenya biala mɔɔ ɛnva ye abusua ne nwonane nu, nganeɛdelɛ nu, nee bɛ sunsum nu ngyianlɛ ɛmmaa bɛ la le sonla ɛtane tɛla awie bɔbɔ mɔɔ ɛnlɛ diedi la!​—Bɛgenga 1 Temɔte 5:8.

¹⁵ Saa raalɛ bie si kpɔkɛ kɛ ɔbagya a, ɛnee ɔdaye noko ɔlɛdie yɛado nu kɛ ɔbava gyima kpole yeado ɔ nwo zo. Baebolo ne ka mɔdenlebɔlɛ nee subane bie mɔ mɔɔ ɔwɔ kɛ yelɛ nyia wɔ mekɛ mɔɔ ɔlɛboa ɔ hu na eza ɔlɛnea ye sua nu amra la. (Mrɛlɛbulɛ 31:10-31) Mrenya nee mraalɛ mɔɔ pele bɛ nwo kɔ agyalɛ wɔ mekɛ mɔɔ bɛtɛsieziele bɛ nwo kɛ bɛbali ɛzonlelilɛ mɔɔ wɔ nu anwo gyima la le angomedi, na bɛndwenle mɔɔ bɛbahola bɛayɛ bɛaboa bɛ bokavolɛ ne la anwo. Noko, mɔɔ hyia kpalɛ la, ɔwɔ kɛ bɛdabɛ mɔɔ bɛlɛsuzu agyalɛ nwo la siezie bɛ nwo kɛ bɛbava Nyamenle ngyinlazo ne bɛali gyima wɔ bɛ agyalɛ nu.

16, 17. Baebolo ngyinlazo boni mɔ a ɔwɔ kɛ menli mɔɔ ɛlɛsiezie bɛ nwo amaa agyalɛ la dwenledwenle nwo a?

¹⁶ Saa awie ɛlɛsiezie ɔ nwo amaa agyalɛ a, ɔwɔ kɛ ɔsuzu gyima mɔɔ Nyamenle ɛva ɛwula kunli nee yelɛ sa nu la  anwo. Ɔwɔ kɛ nrenya nwu kɛzi tile mɔɔ ɔbayɛ wɔ Keleseɛne sua nu kile la. Ɛhye ɛngile kɛ ɔwɔ kɛ ɔyɛ kyengye. Emomu, ɔwɔ kɛ ɔsukoa adenle mɔɔ Gyisɛse luale zo yɛle ye tileyɛlɛ ne la. (Ɛfɛsɛsema 5:23) Zɔhane ala a ɔwɔ kɛ Keleseɛne raalɛ noko te gyinlabelɛ mɔɔ enililɛ wɔ nu mɔɔ yelɛ lɛ la abo a. Asoo ɔlɛ ɛhulolɛ kɛ ɔbabɛlɛ ɔ nwo aze yeavea “mɛla [mɔɔ] kyekye ye beta ɔ hu anwo” la abo ɔ? (Wulomuma 7:2) Ɔwɔ Gyihova nee Kelaese mɛla bo dɛba. (Galeehyeama 6:2) Tumi mɔɔ ɔ hu lɛ ye wɔ sua nu ɛkɛ la le mɛla fofolɛ. Asoo ɔbabɛlɛ ɔ nwo aze yeamaa nrenya mɔɔ ɛnli munli la tumililɛ ɔ? Saa ɔyɛ se kɛ ɔbayɛ zɔ a, ɛnee ɔnle kɛ ɔgya.

¹⁷ Bieko, ɔwɔ kɛ bokavolɛ biala siezie ɔ nwo kɛ ɔbava mɔɔ hyia ye bokavolɛ titile la yeamaa ye. (Bɛgenga Felepaema 2:4.) Pɔɔlo hɛlɛle kɛ: “Ɔwɔ kɛ kunli biala kulo ɔ ye kɛ ɔdaye ɔ nwo, na yelɛ biala noko di ɔ hu eni.” Nyamenle sunsum ne manle Pɔɔlo nwunle kɛ ɔwɔ kɛ nrenya te nganeɛ kɛ ɔ ye bu ye kpalɛ. Ɔwɔ kɛ raalɛ noko nwu kɛ ɔ hu kulo ye kpalɛ.​—Ɛfɛsɛsema 5:21-33.

18. Duzu ati a ɔwɔ kɛ menli mɔɔ kulo kɛ bɛgya la sɔ bɛ nwo wɔ agyalɛ nwo ɛdulɛ nu a?

¹⁸ Ɛhye ati, agyalɛ nwo ɛdulɛ ɛnle anyelielɛ mekɛ ala. Ɔle mekɛ mɔɔ nrenya nee raalɛ fa sukoa kɛzi bɛbahola bɛadɛnla la, na bɛanwu kɛ ɔle kpalɛ kɛ bɛgya anzɛɛ ɔnle kpalɛ a. Eza ɔle mekɛ mɔɔ ɔwɔ kɛ bɛsɔ bɛ nwo a! Kɛmɔ bɛkulo bɛ nwo la ati, ɔbahola yeayɛ sɔnea kɛ bɛbade nganeɛ mɔɔ anu yɛ se la bɛamaa bɛ nwo na bɛasosɔ bɛ nwo. Noko, bɛdabɛ mɔɔ bɛkulo bɛ nwo nɔhalɛ nu la nea kɛ bɛnrɛyɛ debie mɔɔ bazɛkye bɛ kulovolɛ bie nee Nyamenle avinli la. (1 Tɛsalonaekama 4:6) Yemɔti, saa ɛlɛfa ɛ nwo wɔawula agyalɛ nwo ɛdulɛ nu a, bɔ mɔdenle sɔ ɛ nwo; saa bɛgya anzɛɛ bɛangya bɔbɔ a, ɛbanwu kɛ zɔhane subane ne baboa wɔ wɔ ɛbɛlabɔlɛ nu.

19, 20. Kɛzi ɔwɔ kɛ adwenle mɔɔ Keleseɛnenli lɛ wɔ agyalɛ nwo la yɛ ngakyile fi ewiade menli dɔɔnwo ɛdeɛ nwo ɛnɛ ɛ? Kilehile nu.

¹⁹ Saa agyalɛma bie bamaa bɛ agyalɛ agyinla a, ɔwɔ kɛ bɛnyia ɛzonlelilɛ nwo adwenle kpalɛ. Saa bɛka agyalɛ nwo edwɛkɛ wɔ mbuluku nee sini nu, bɛmaa ɔta ɔkɔwie anyelielɛ nu kɛmɔ menli kulo la. Noko, ɔle nɔhalɛ kɛ agyalɛ ɛnle awieleɛ, ɔle debie mɔɔ Gyihova ɛyɛ kɛ ɔdɛnla ɛkɛ dahuu la mɔlebɛbo. (Mɔlebɛbo 2:24) Noko, ɔyɛ nyane kɛ menli dɔɔnwo ɛnnwu ye zɔ wɔ ewiade ye anu ɛnɛ. Wɔ maanle bie mɔ anu, menli ka agyalɛ nwo edwɛkɛ kɛ “nyɛma mɔɔ bɛbɔ ye kpɔkɛ.” Bie a bɛnnwu ye kɛ edwɛkɛ ɛhye kile adwenle mɔɔ bɛlɛ ye wɔ agyalɛ nwo la. Duzu ati ɔ? Ɔwɔ kɛ kpɔkɛ kpalɛ kyɛ kɛmɔ bɛhyia nwolɛ la ɛdeɛ, noko ɔhyia kɛ kpɔkɛ kpalɛ yɛ mɔɔ bɛkola bɛbɔ na bɛtulu a.

²⁰ Ɛnɛ, menli dɔɔnwo bu agyalɛ kɛ ɔle mekɛ ezinra nu debie. Bɛpele bɛfa bɛ nwo bɛwula nu ɔluakɛ bɛdwenle kɛ ɔbaboa bɛ, noko saa ngyegyelɛ ɛlɛba a bɛsuzu kɛ bɛbahola bɛazɛkye ye. Noko, kakye kɛzi Baebolo ne vale nyɛma yɛle ndonwo na ɔvale ɔhilehilele debie mɔɔ kola kyɛ kɛ agyalɛ la anu. Bɛfa nyɛma mɔɔ yɛ se kpalɛ na ɔkyɛ la a bɛyɛ meli avɛla a. Saa ahumu kpole bɔbɔ tu a, nyɛma ɛhye ɛnyeye anzɛɛ ɛnde ɛlɛ. Wɔ adenle ko ne ala azo, bɛhyehyɛ agyalɛ kɛ ɔdɛnla ɛkɛ dahuu. Kakye kɛ Gyisɛse hanle kɛ: “Mɔɔ Nyamenle ɛha ɛbɔ nu la, ɔnle kɛ awie biala kpakye nu.” (Mateyu 19:6) Saa ɛgya a, ɔwɔ kɛ ɛnyia adwenle ko ne ala bie wɔ agyalɛ nwo. Asoo ɛzonlelilɛ ɛhye maa agyalɛ yɛ adesoa ɔ? Kyɛkyɛ.

21. Subane boni a ɔwɔ kɛ kunli nee yelɛ nyia maa bɛ anwo a, na duzu a bamaa bɛahola bɛayɛ zɔ a?

²¹ Ɔwɔ kɛ kunli nee yelɛ nyia bɛ nwo adwenle kpalɛ. Saa ko biala pele fa ye adwenle sie subane kpalɛ nee mɔdenle mɔɔ ɔ gɔnwo bɔ la azo a, bɛ agyalɛ ne bayɛ anyelielɛ na yeava ahunlundwolɛ yeara. Asoo ɔbayɛ se kɛ yɛbava yɛ adwenle yɛazie debie kpalɛ mɔɔ bokavolɛ mɔɔ ɛnli munli yɛ la azo?  Gyihova ze kɛzi yɛde la, noko yɛze kɛ ɔlɛ yɛ nwo adwenle kpalɛ. Edwɛndolɛnli ne bizale kɛ: ‘O Gyihova, saa ɛse ɛdi ɛtane nzi a, Awulae, anrɛɛ nwane a kɛhola kɛgyinla a?’ (Edwɛndolɛ 130:3) Zɔhane ala a ɔwɔ kɛ kunlima nee yelɛma nyia bɛ nwo adwenle kpalɛ na bɛfa bɛ ɛtane bɛkyɛ bɛ nwo a.​—Bɛgenga Kɔlɔsaema 3:13.

22, 23. Kɛzi Ebileham nee Sɛla yɛle neazo kpalɛ manle agyalɛma mɔɔ wɔ ɛkɛ ɛnɛ la ɛ?

²² Agyalɛ kyɛ a ɔkola ɔfa anyelielɛ nee ahunlundwolɛ  kpole ɔba. Baebolo ne ka Ebileham nee Sɛla agyalɛ nwo edwɛkɛ wɔ mekɛ mɔɔ ɛnee bɛyɛ mgbanyinli la. Bɛvale anwongyelelɛ nee ngyegyelɛ dɔɔnwo nu. Suzu nganeɛ mɔɔ Sɛla dele la anwo nea, ɛnee ɔbayɛ kɛ yebo ɛvolɛ 60, noko, ɔwɔ kɛ ɔgyakyi ye awuke mɔɔ anwodɔlɛ wɔ nu la, na ɔtu ɔfi suakpole Yule mɔɔ ɛnee gyi boɛ la azo, ɔkɔtɛnla ndanlɛ sua nu wɔ ye ngoane mekɛ mɔɔ ɛha la kɔsɔɔti anu. Noko akee, ɔbɛlɛle ɔ nwo aze ɔmanle ɔ hu tileyɛlɛ ne. Ɔyɛle boavolɛ kpalɛ na ɔgyinlanle Ebileham anzi, na ɔvile ɛbulɛ nu ɔlile ɔboale ye kpɔkɛzilɛ ne. Yeanyɛ ye mɛlɛbɛnwoaze ne wɔ ɛnyelɛ zo. Ɔhanle ɔhilele “ɔ nwo” bɔbɔ kɛ ɔ hu le ɔ menle. (Mɔlebɛbo 18:12; 1 Pita 3:6) Ɛnee ɛbulɛ mɔɔ ɔlɛ ɔmaa Ebileham la vi ye ahonle nu.

²³ Noko, ɛnee ɛhye ɛngile kɛ Ebileham nee Sɛla adwenle yɛle ko wɔ ninyɛne nwo dahuu. Kenle ko Sɛla hilele ye adwenle wɔ edwɛkɛ bie anwo na Ebileham “anye anlie ɛhye anwo fee.” Noko, Gyihova hanle hilele ye kɛ ɔdie ɔ ye. Ebileham bɛlɛle ɔ nwo aze na ɔdiele ɔ ye ane, na ɛhye yɛle nyilalɛ kpole manle abusua ne. (Mɔlebɛbo 21:9-13) Ɛnɛ, kunlima nee yelɛma, mɔɔ bɛgya bɛ nwo bɛhyɛ kpalɛ bɔbɔ la, bahola azukoa ninyɛne dɔɔnwo avi agyalɛma ɛhye mɔɔ ɛnee sulo Nyamenle la ɛkɛ.

24. Agyalɛ boni mɔ a wula Gyihova Nyamenle anyunlunyia a, na duzu ati ɔ?

²⁴ Menli apenle dɔɔnwo mɔɔ bɛva anyelielɛ bɛgya la wɔ Keleseɛne asafo ne anu​—agyalɛ mɔɔ yelɛ bu ɔ hu kpalɛ, na kunli noko kulo ɔ ye na ɔdi ye eni, na bɛ mu nwiɔ bɛbɔ mɔdenle bɛfa Gyihova ɛhulolɛdeɛyɛlɛ bɛdumua debie biala anu la. Saa wɔyɛ wɔ adwenle kɛ ɛbagya a, kpondɛ wɔ bokavolɛ ne nrɛlɛbɛ nu, siezie ɛ nwo kpalɛ, na bɔ mɔdenle kɛ ɛbamaa anzondwolɛ nee ɛlɔlɛ adɛnla wɔ agyalɛ nu na yeawula Gyihova Nyamenle anyunlunyia dahuu. Saa ɛyɛ zɔ a, wɔ agyalɛ ne baboa wɔ yeamaa wɔadɛnla Nyamenle ɛhulolɛ ne anu.