1, 2. (a) Duzu ati a ɔyɛ se ɔmaa yɛ kɛ yɛkɛbu menli mɔɔ lɛ tumi la ɛ? (b) Kpuyia boni mɔ a yɛbazuzu nwolɛ a?

WƆNWU kɛzi kakula bie yɛ ye nyɛleɛ wɔ mekɛ mɔɔ bɛkɛha kɛ ɔyɛ debie mɔɔ ɔngulo kɛ ɔkɛyɛ la ɛlɛ ɔ? Ɛbanwu kɛ ɔmunla ɔ nyunlu. Ɔte ɔ nli anzɛɛ ɔ ze ane, na ɔze ye wienyi kɛ ɔwɔ kɛ ɔbu ye. Noko akee, wɔ mekɛ ɛhye anu ɔngulo kɛ ɔtie. Mɔɔ ɛdo kakula ɛhye la bie kola to yɛ muala.

² Tɛ kenle ne amuala a ɔla aze kɛ yɛkɛbu menli mɔɔ lɛ tumi la a. Asoo ɔyɛ a ɔyɛ se ɔmaa wɔ kɛ ɛkɛbu menli mɔɔ nea ɛ nwo zo la? Saa zɔhane yɛɛ ɔde a, ɛnee tɛ ɛ ngome ɔ. Yɛwɔ mekɛ mɔɔ menli dɔɔnwo ɛmbu tumililɛ la anu. Noko, Baebolo ne ka kɛ ɔwɔ kɛ yɛbu menli mɔɔ lɛ tumi wɔ yɛ nwo zo la. (Mrɛlɛbulɛ 24:21) Nɔhalɛ nu, saa yɛkulo kɛ yɛtɛnla Nyamenle ɛhulolɛ ne anu a ɛnee ɔwɔ kɛ yɛyɛ zɔ. Ɛhye maa yɛbiza kpuyia bie mɔ. Duzu ati a ɔyɛ se kɛ yɛkɛbu menli mɔɔ lɛ tumi la ɛ? Duzu ati a Gyihova kulo kɛ yɛyɛ zɔ a, na duzu a baboa yɛ yeamaa yɛadie bɛ a? Mɔɔ li awieleɛ la, kɛ ɔkɛyɛ na yɛahile kɛ yɛbu menli mɔɔ lɛ tumi la ɛ?

3, 4. Kɛzi ɛtane nee sinlidɔlɛ bɔle ɔ bo ɛ, na kɛmɔti a ɛtane mɔɔ wɔ yɛ nwo la maa ɔyɛ se kɛ yɛkɛbu menli mɔɔ lɛ tumi la ɛ?

³ Bɛmaa yɛzuzu ninyɛne nwiɔ mɔɔ maa ɔyɛ se kɛ yɛkɛbu menli mɔɔ nea yɛ nwo zo la anwo. Mɔɔ lumua la, yɛnli munli; mɔɔ tɔ zo nwiɔ, menli mɔɔ nea yɛ nwo zo la noko ɛnli munli. Ɛtane mɔɔ wɔ alesama anwo nee munli mɔɔ  bɛnli la bɔle ɔ bo la yehyɛ, wɔ Yidɛn tola ne anu, mekɛ mɔɔ Adam nee Yive dele Nyamenle tumililɛ ne anwo atua la. Yemɔti, atuadelɛ a vale ɛtane rale a. Bɛva atuadelɛ bɛwo yɛ ɔvi zɔhane mekɛ ne badwu ɛnɛ.​—Mɔlebɛbo 2:15-17; 3:1-7; Edwɛndolɛ 51:5; Wulomuma 5:12.

⁴ Kɛmɔ yɛnli munli la ati, ɔnyɛ se kɛ yɛbayɛ anwomemaazo na yɛadu yɛ nwo, noko akee, ɔwɔ kɛ yɛbɔ mɔdenle kpalɛ na yɛahola yɛazukoa mɛlɛbɛnwoaze. Saa yɛva mekɛ tendenle yɛzonle Nyamenle nɔhalɛ nu bɔbɔ a, yɛbahola yɛayɛ anzosesebɛ na yɛayɛ anwomemaazo. Kɛ neazo la, suzu Kɔla mɔɔ nee Gyihova menli bɔle nu nwunle amaneɛ kpole la anwo nea. Amozi, ɔbɔle mɔdenle kɛ ɔbanyia tumi kpole na yeanze nyiane kɛ ɔkɛli atuadelɛma anyunlu ɔkɛmaa bɛkɛde atua bɛkɛtia Mosisi mɔɔ ɛnee le bɛlɛvo tɛla awie biala wɔ zɔhane mekɛ ne la. (Ɛdianlɛ 12:3; 16:1-3) Akee dwenle Belemgbunli Ɛzaya mɔɔ memanle ɔ nwo zo hɔwolole Gyihova ɛzonlenlɛ sua ne anu hɔyɛle gyima nwuanzanwuanza mɔɔ ɛnee ɔwɔ kɛ ɛsɔfo ne mɔ ala a yɛ la anwo. (2 Edwɛkɛsisilɛ 26:16-21) Menli ɛhye mɔ nwunle bɛ atuadelɛ ne anwo amaneɛ kpole. Noko, bɛ neazo ɛtane ne le ngakyelɛ kpalɛ maa yɛ muala. Ɔwɔ kɛ yɛko yɛtia anwomemaazo subane mɔɔ maa ɔyɛ se kɛ yɛkɛbu menli mɔɔ lɛ tumi la.

5. Adenle boni azo a alesama mɔɔ ɛnli munli la ɛli tumi wɔ adenle ɛtane zo ɛ?

⁵ Alesama mɔɔ ɛnli munli mɔɔ lɛ tumi la noko ɛnyɛ ninyɛne kpalɛ, ɛhye ati menli ɛmbu bɛ. Bɛ nuhua dɔɔnwo ati yɛ se, bɛle amumuyɛ, anzɛɛ bɛka a awie ɛnga bie. Nɔhalɛ nu, tumi mɔɔ bɛnva bɛnli gyima wɔ adenle kpalɛ zo la anwo edwɛkɛ ɛyi alesama tetedwɛkɛ nu. (Bɛgenga Nolobɔvo ne 8:9.) Kɛ neazo la, mekɛ mɔɔ Gyihova kpale Sɔɔlo kɛ belemgbunli la, ɛnee ɔle sonlakpalɛ na ɔbɛlɛ ɔ nwo aze. Noko, ɔyɛle anwomemaazo na ɔhwenle nungule; akee ɔkpɔle Devidi mɔɔ ɛnee di nɔhalɛ la. (1 Samoɛle 9:20, 21; 10:20-22; 18:7-11) Nzinlii Devidi rayɛle Yizilayɛ  arelemgbunli kpalɛ ne mɔ anu ko, noko ɔvale ye tumi ne ɔlile gyima wɔ adenle ɛtane zo na ɔvale Hɛtenli Yulaya aye; akee ɔmanle bɛvale Yulaya mɔɔ ɛtɛyɛle ɛtane biala la bɛhɔlile konle nyunlu amaa bɛahu ye. (2 Samoɛle 11:1-17) Nɔhalɛ nu, sinlidɔlɛ maa ɔyɛ se kɛ menli kɛva tumi kɛli gyima wɔ adenle kpalɛ zo. Na saa menli mɔɔ lɛ tumi la ɛmbu Gyihova a yemɔ bɛnga. Mekɛ mɔɔ Britain maanyɛlɛnli bie hanle kɛzi Kateleke pope ne mɔ kpɔle menli dɔɔnwo anwo edwɛkɛ wiele la, ɔhɛlɛle kɛ: “Tumi sɛkye sonla, na tumi kpole sɛkye sonla bɔkɔɔ.” Mekɛ mɔɔ edwɛkɛ ɛhye mɔ wɔ yɛ adwenle nu la, bɛmaa yɛzuzu kpuyia ɛhye anwo: Duzu ati a ɔwɔ kɛ yɛbu menli mɔɔ lɛ tumi la ɛ?

6, 7. (a) Duzu a ɛlɔlɛ mɔɔ yɛlɛ yɛmaa Gyihova la ka yɛ maa yɛyɛ a, na duzu ati ɔ? (b) Duzu a yɛyɛ a ɔkile kɛ yɛbɛlɛ yɛ nwo aze a?

⁶ Ɛlɔlɛ a le debie titile mɔɔ ɔti yɛbu debie a​—ɛlɔlɛ mɔɔ yɛlɛ yɛmaa Gyihova, yɛ gɔnwo mɔ, yɛɛ yɛ nwo la. Kɛmɔ yɛkulo Gyihova yɛtɛla debie biala la ati, yɛkulo kɛ yɛmaa ɔ nye die. (Bɛgenga Mrɛlɛbulɛ 27:11; Maake 12:29, 30.) Yɛze kɛ ɔvi mekɛ mɔɔ atuadelɛ bɔle ɔ bo wɔ Yidɛn la, bɛdwazo bɛtia Gyihova tumililɛ, nwolɛ adenle mɔɔ ɔlɛ ɔdi tumi wɔ aleɛabo la, na alesama anu dɔɔnwo nee Seetan ɛyɛ adwenle, bɛkpo Gyihova tumililɛ. Noko yɛ nye die kɛ yɛgyi Gyihova afoa a. Saa yɛkenga edwɛkɛ mɔɔ wɔ Yekile 4:11 la a, ɔka yɛ ahonle kpole. Yɛnwu ye wienyi kɛ Gyihova a lɛ adenle di ewiade ye azo tumi a! Yɛdie Gyihova tumililɛ ne yɛto nu na yɛmaa ɔkile yɛ adenle wɔ ɛbɛlabɔlɛ nu alehyenlɛ biala.

⁷ Ɛbulɛ zɛhae kile kɛ ɔwɔ kɛ yɛyɛ tieyɛ na yɛbɛlɛ yɛ nwo aze. Yɛfi ahonle nu yɛtie Gyihova ɔluakɛ yɛkulo ye. Noko akee, ɔdwu mekɛ ne bie a ɔyɛ se kɛ yɛbayɛ tieyɛ. Wɔ mekɛ zɛhae anu, ɔwɔ kɛ yɛyɛ kɛ kakula ne mɔɔ yɛhanle ɔ nwo  edwɛkɛ la, yɛsukoa mɛlɛbɛnwoaze. Yɛkakye kɛ Gyisɛse bɛlɛle ɔ nwo aze yɛle ɔ Ze ɛhulolɛdeɛ wɔ mekɛ bɔbɔ mɔɔ ɛnee ye ɛyɛlɛ yɛ se maa ye la. Ɔhanle ɔhilele ɔ Ze kɛ: “Tɛ me ɛhulolɛdeɛ ɔ, na wɔ ɛhulolɛdeɛ ɛyɛ ɛkɛ.”​—Luku 22:42.

8. (a) Duzu a boka Gyihova tumililɛ mɔɔ yɛbɛlɛ yɛ nwo aze yɛamaa ye ɛnɛ la anwo a, na duzu a maa yɛnwu kɛzi Gyihova te nganeɛ wɔ nwolɛ a? (b) Duzu a baboa yɛ amaa yɛadie folɛdulɛ na yɛalie ɛdenrɛdenrɛlɛ yɛado nu a? (Nea ɛlɛka “ Tie Folɛdulɛ Na Die Ɛdenrɛdenrɛlɛ To Nu.”)

⁸ Gyihova ɛndendɛ ɛngile yɛ nuhua ko biala ɛnɛ; ɔdua ye Edwɛkɛ ne nee alesama mɔɔ gyi ɔ gyakɛ anu ɛnɛ la anwo zo a ɔtendɛ ɔkile yɛ a. Ɛhye ati, fane dɔɔnwo ne ala, yɛkile kɛ yɛbɛlɛ yɛ nwo aze yɛmaa Gyihova ɔlua menli mɔɔ yekpa bɛ anzɛɛ yemaa bɛ adenle kɛ bɛhɔ zo bɛnlea yɛ nwo zo mɔɔ yɛbu bɛ la azo. Saa yɛte atua yɛtia menli zɛhae mɔ​—kɛ neazo la, saa bɛdua Baebolo ne azo bɛtu yɛ folɛ na bɛtenrɛdenrɛ yɛ na yɛandie a​—yɛbaha Nyamenle ɛya. Mekɛ mɔɔ Yizilayɛma dendɛle bɛ nzo abo na bɛdele atua bɛtiale Mosisi la, Gyihova bule bɛ nyɛleɛ ne kɛ ɔdaye a bɛdendɛ bɛtiale ye a.​—Ɛdianlɛ 14:26, 27.

9. Duzu ati a ɛlɔlɛ mɔɔ yɛlɛ yɛmaa yɛ gɔnwo mɔ la ka yɛ maa yɛbu menli mɔɔ lɛ tumi la ɛ? Maa nwolɛ neazo.

⁹ Ɛlɔlɛ mɔɔ yɛlɛ yɛmaa yɛ gɔnwo mɔ la a le debie bieko mɔɔ ɔti yɛbu tumililɛ a. Adenle boni azo? Fa ye kɛ ɛle sogyanli. Saa sogyama ekpunli bie bali konim a, ɔgyi ko mɔɔ sogyanli ko biala nee mgbanyima mɔɔ gyigyi bɛ ti bayɛ, yeadie bɛ, na yeabu bɛ la azo. Saa wɔandie mgbanyima ɛhye mɔ a, ɛbahola wɔava ɛ gɔnwo sogyama amuala ngoane wɔado esiane nu. Ɔle nɔhalɛ kɛ sogyama mɔɔ wɔ ewiade ɛnɛ la sɛkye ninyɛne dɔɔnwo. Noko akee, Gyihova lɛ sogyama mɔɔ ninyɛne kpalɛ ala a bɛyɛ a. Baebolo ne fɛlɛ Nyamenle fane dɔɔnwo kɛ “Ɛlɔne Gyihova.” (1 Samoɛle 1:3, NW) Ɔnea sunsum nu abɔdeɛ dɔɔnwo mɔɔ lɛ tumi la anwo zo. Ɔdwu mekɛ ne bie a, Gyihova fa ye azonvolɛ mɔɔ wɔ azɛlɛ ye azo la toto ɛlɔne nwo. (Edwɛndolɛ 68:11; Yizikeɛle 37:1-10, NW) Saa yɛdwazo yɛtia menli mɔɔ Gyihova  ɛmaa bɛ tumi kɛ bɛnlea yɛ nwo zo la a, yɛbahola yɛava yɛ gɔnwo mɔ sunsum nu sogyama ngoane yɛado esiane nu. Saa Keleseɛnenli bie te atua tia mgbanyima mɔɔ bɛkpa bɛ la a, ɔbaha asafo ne anu amra mɔɔ ɛha la. (1 Kɔlentema 12:14, 25, 26) Saa kakula bie te atua a, ɔbaha abusua ne anu amra amuala. Saa yɛbu bɛ na yɛ nee bɛ yɛ ko a, ɔkile kɛ yɛkulo yɛ gɔnwo mɔ.

10, 11. Kɛzi ɛhulolɛ mɔɔ yɛlɛ kɛ yɛyɛ ninyɛne mɔɔ baboa yɛ la ka yɛ maa yɛtie menli mɔɔ lɛ tumi la ɛ?

¹⁰ Eza yɛbu menli mɔɔ lɛ tumi la, ɔluakɛ ɔboa yɛdayɛ mumua ne. Saa Gyihova ka kɛ yɛbu menli mɔɔ lɛ tumi la a, ɔta ɔkile nvasoɛ mɔɔ yɛbanyia yɛavi nu la. Kɛ neazo la, ɔse ngakula ɛdie bɛ awovolɛ amaa bɛ mekɛ mɔɔ bɛbali la awa na bɛ nye alie. (Mɛla ne 5:16; Ɛfɛsɛsema 6:2, 3) Ɔse yɛbu asafo nu mgbanyima ɔboalekɛ saa yɛandie bɛ a ɔbazɛkye agɔnwolɛvalɛ mɔɔ yɛ nee Gyihova Nyamenle lɛ la. (Hibuluma 13:7, 17) Eza ɔka ɔkile yɛ kɛ yɛdie maanle  mgbanyima amaa yeayɛ banebɔlɛ yeamaa yɛ.​—Wulomuma 13:4.

¹¹ Asoo ɛnlie ɛndo nu kɛ saa yɛnwu deɛmɔti Gyihova kulo kɛ yɛyɛ tieyɛ la a, ɔboa yɛ ɔmaa yɛbu menli mɔɔ lɛ tumi la ɔ? Akee bɛmaa yɛnlea ɛleka titile nsa mɔɔ yɛbahola yɛahile kɛ yɛbu menli mɔɔ lɛ tumi la.

12. Gyima boni a Gyihova ɛva ɛwula kunli anzɛɛ selɛ asa wɔ abusua ne anu a, na kɛ ɔwɔ kɛ ɔyɛ ye ɛ?

¹² Gyihova mumua ne a hyehyɛle abusua ne a. Nyamenle ne mɔɔ dahuu yɛ debie biala pɛpɛ la, ɛhyehyɛ abusua ne amaa yeali gyima kpalɛ. (1 Kɔlentema 14:33) Yeva tumi yemaa kunli anzɛɛ selɛ kɛ abusua tile. Kunli ne kile kɛ ɔbu Kelaese Gyisɛse mɔɔ le ɔ Ti la ɔlua kɛzi Gyisɛse di ye tileyɛlɛ ne wɔ asafo ne azo mɔɔ ɔbazukoa la azo. (Ɛfɛsɛsema 5:23) Ɛhye ati, ɔnle kɛ kunli kpo ɛzonlelilɛ mɔɔ ɔlɛ la, ɔwɔ kɛ ɔyɛ ye gyima ne kpalɛ; yɛɛ ɔnle kɛ ɔyɛ mɔɔ ɔka a awie ɛnga bie anzɛɛ ɔ ti yɛ se a, emomu ɔwɔ kɛ ɔda ɛlɔlɛ, ndelebɛbo, yɛɛ atiakunlukɛnlɛma ali. Ɔwɔ kɛ ɔmaa ɔtɛnla ye adwenle nu kɛ ye tumi ne lɛ ɛweɛne​—ɔmbo Gyihova tumi ɛdeɛ ne azo.

13. Kɛzi yelɛ anzɛɛ ninli bahola ayɛ ye gyima mɔɔ ɔlɛ wɔ abusua ne anu la wɔ adenle mɔɔ sɔ Gyihova anye la azo ɛ?

¹³ Ɔwɔ kɛ yelɛ anzɛɛ ninli noko boa ɔ hu. Bɛmaa  ɔdaye noko tumi wɔ abusua ne anu ɔluakɛ Baebolo ne ka “ɛ nli folɛdulɛ” anzɛɛ mɛla nwo edwɛkɛ. (Mrɛlɛbulɛ 1:8) Noko akee, ɔ hu tumi bo ye ɛdeɛ ne azo. Keleseɛnenli yelɛ kile kɛ ɔbu ɔ hu tumililɛ ɔlua ɔ hu tileyɛlɛ ne mɔɔ ɔbaboa ye yeamaa yeali nwolɛ gyima la azo. Ɔmbu ɔ hu kɛ ɔ nwo ɛngyia, ɔnva adenle ɛtane zo ɔngile ye mɔɔ ɔwɔ kɛ ɔyɛ anzɛɛ ɔnlie ye gyinlabelɛ ne. Emomu, ɔboa ye na ɔ nee ye yɛ ko. Saa ɔnlie ɔ hu kpɔkɛzilɛ bie ɔndo nu a, ɔbahola yeavi ɛbulɛ nu yeahile ye adwenle, noko ɔbahɔ zo yeabɛlɛ ɔ nwo aze. Saa ɔ hu ɛnle diedinli a, ɔbahola yeahɔ ngyegyelɛ dɔɔnwo anu, noko ye mɛlɛbɛnwoaze ne bahola aha ɔ hu yeamaa yeakpondɛ Gyihova.​—Bɛgenga 1 Pita 3:1.

14. Kɛzi ngakula bahola amaa bɛ awovolɛ nee Gyihova anye alie ɛ?

¹⁴ Saa ngakula tie bɛ ze nee bɛ nli a, ɔmaa Gyihova anye die. Eza ɔmaa bɛ awovolɛ anyunlu ba anyia na bɛ nye die. (Mrɛlɛbulɛ 10:1) Wɔ awovolɛ ko mbusua nu, ɔwɔ kɛ ngakula ne mɔ yɛ tieyɛ maa bɛ awovolɛ, na bɛkakye kɛ awovolɛ  ne hyia bɛ moalɛ nee bɛ koyɛlɛ. Abusua mɔɔ nuhua menli kɔsɔɔti yɛ bɛ gyima mɔɔ Nyamenle ɛva ɛmaa bɛ la nyia anzondwolɛ nee anyelielɛ kpole. Ɛhye wula Gyihova Nyamenle, abusua Hyehyɛvolɛ ne anyunlunyia.​—Ɛfɛsɛsema 3:14, 15.

15. (a) Duzu a yɛyɛ wɔ asafo ne anu a ɔkile kɛ yɛbu Gyihova tumililɛ a? (b) Ngyinlazo boni mɔ a baboa yeamaa yɛadie yɛ mgbanyima ne mɔ a? (Nea ɛlɛka “ Bɛdie Bɛ Mgbanyima Ne Mɔ.”)

¹⁵ Gyihova ɛkpa ɔ Ra ne kɛ ɔnlea Keleseɛne asafo ne azo. (Kɔlɔsaema 1:13) Gyisɛse noko ɛkpa ye ‘akɛlɛ nɔhavo nee nrɛlɛbɛvolɛ’ ne kɛ ɔnlea ɔmaa Nyamenle menli mɔɔ wɔ azɛlɛ ye azo la asa ɛha bɛ sunsum nu ngyianlɛ. (Mateyu 24:45-47) Gyihova Alasevolɛ Neazo Eku ne sonle kɛ ‘akɛlɛ nɔhavo nee nrɛlɛbɛvolɛ’. Kɛmɔ ɛnee ɔde wɔ ɛvoya mɔɔ lumua Keleseɛne asafo ne mɔ anu la, Neazo Eku ne fa adehilelɛ nee folɛdulɛ maa mgbanyima mɔɔ wɔ ɛkɛ ne ɛnɛ la anzɛɛ ɔfa ɔdua ɔ gyakɛ anu gyinlavolɛma mɔɔ bie a le neavolɛ adenduvoma la anwo zo. Saa yɛ nuhua ko biala bu Keleseɛne mgbanyima ne mɔ a, ɛnee yɛlɛtie Gyihova.​—Bɛgenga 1 Tɛsalonaekama 5:12; Hibuluma 13:17.

16. Duzu ati a yɛkola yɛka kɛ sunsum nwuanzanwuanza a kpa mgbanyima ne mɔ a?

¹⁶ Mgbanyima nee azonvolɛ ɛnli munli. Bɛtɔ sinli kɛ yɛdayɛ la. Noko akee, mgbanyima ne mɔ le ‘menli nu ahyɛlɛdeɛ’ mɔɔ bɛva bɛmaa kɛ bɛboa asafo ne bɛmaa ɔyɛ se sunsum nu a. (Ɛfɛsɛsema 4:8) Sunsum nwuanzanwuanza a kpa mgbanyima ne mɔ a. (Gyima ne 20:28) Adenle boni azo? Ɔboalekɛ ɔwɔ kɛ menli ɛhye mɔ dwu ninyɛne bie mɔ mɔɔ wɔ Nyamenle Edwɛkɛ ne mɔɔ bɛva sunsum bɛhɛlɛ la anwo. (1 Temɔte 3:1-7, 12; Taetɛse 1:5-9) Bieko, mgbanyima mɔɔ nea nwu kɛ adiema nrenya bie fɛta kɛ bɛkpa ye kɛ asafo nu sonvolɛ anzɛɛ kpanyinli la, sɛlɛ Gyihova sunsum nwuanzanwuanza ne moalɛ.

17. Duzu ati a ɔdwu mekɛ ne bie a ɔwɔ kɛ Keleseɛne mraalɛ keda bɛ ti zo wɔ mekɛ mɔɔ bɛlɛyɛ gyima wɔ asafo ne anu la ɛ?

 ¹⁷ Wɔ asafo ne anu, ɔdwu mekɛ ne bie a mgbanyima nee azonvolɛ ɛnle ɛkɛ mɔɔ bayɛ bɛ gyima mɔɔ bɛva bɛwula bɛ sa nu mɔɔ bie a le kɛ bɛbanlea daselɛlilɛ nyianu zo la. Wɔ mekɛ zɛhae mɔ anu, adiema nrenya mɔɔ bɛzɔne ye la bahola ayɛ gyima ɛhye. Saa bie ɛnle ɛkɛ a, Keleseɛne mraalɛ mɔɔ fɛta la bahola ali nwolɛ gyima. Noko akee, ɔwɔ kɛ raalɛ keda ɔ ti zo wɔ mekɛ mɔɔ ɔlɛyɛ gyima mɔɔ ɔwɔ kɛ nrenya mɔɔ bɛzɔne ye a yɛ la. * (1 Kɔlentema 11:3-10) Ɛhye ɛngile kɛ mraalɛ nwo ɛngyia. Emomu, ɔmaa bɛnyia adenle bɛbu tileyɛlɛ nwo ngyehyɛleɛ mɔɔ Gyihova ɛyɛ wɔ abusua ne nee asafo ne anu la.

18, 19. (a) Kɛzi ɛbahilehile ngyinlazo mɔɔ wɔ Wulomuma 13:1-7 la anu ɛ? (b) Duzu a yɛyɛ a ɔkile kɛ yɛbu maanle mgbanyima ɛ?

¹⁸ Nɔhalɛ Keleseɛnema bɔ mɔdenle di ngyinlazo mɔɔ wɔ Wulomuma 13:1-7 la azo. (Bɛgenga.) Mekɛ mɔɔ ɛlɛkenga zɔhane edwɛkɛ ne la, ɛbanwu kɛ ɔka “mgbanyima mɔɔ ɛlɛbu maanle ne” la anwo edwɛkɛ. Maanle mgbanyima ɛhye mɔ mɔɔ Gyihova ɛmaa bɛ adenle la yɛ gyima mɔɔ hyia, bɛmaa yɛnyia anzondwolɛ ekyi nee ninyɛne bie mɔ mɔɔ yɛhyia la. Saa yɛdi bɛ mɛla zo a ɛnee ɔkile kɛ yɛbu bɛ. Yɛtua adwule biala mɔɔ fɛta la, yɛdi ngɛlata biala mɔɔ arane kulo kɛ yɛyɛ la anwo gyima, na yɛdi mɛla biala mɔɔ fane yɛ nwo, yɛ abusua, yɛ gyima, anzɛɛ yɛ agyapadeɛ biala anwo la azo. Noko akee, saa bɛka kɛ yɛyɛ debie mɔɔ Nyamenle ɛngulo la a, yɛndie bɛ. Emomu, yɛyɛ ye kɛmɔ ɛzoanvolɛ ne mɔ yɛle ye wɔ tete ne la: “Ɔwɔ kɛ yɛtie Nyamenle yɛtɛla sonla.”​—Gyima ne 5:28, 29; nea ɛlɛka “ Nwane A Ɔwɔ kɛ Metie Ye A?”

 ¹⁹ Eza yɛkile kɛ yɛbu maanle mgbanyima ɔlua yɛ subane kpalɛ zo. Ɔbahola yeara ye kɛ yɛ nee arane mgbanyima bie mɔ bali ngitanwo. Ɛzoanvolɛ Pɔɔlo nee mgbanyima mɔɔ le kɛ Belemgbunli Hɛlɔdo Agelepa nee Amelado Fɛsetɛse lile ngitanwo. Ɛnee menli ɛhye mɔ yɛ ninyɛne mɔɔ ɛnle kpalɛ, noko Pɔɔlo bule bɛ wɔ mekɛ mɔɔ ɔ nee bɛ tendɛ la. (Gyima ne 26:2, 25) Saa yɛ nee arane kpanyinli bie anzɛɛ kpolisinli bie mɔɔ wɔ yɛ sua ne azo la nyia edwɛkɛ a, ɔwɔ kɛ yɛsukoa Pɔɔlo neazo ne. Wɔ sukulu nu, ɔwɔ kɛ Keleseɛne ngakula bu bɛ kilehilevolɛma, sukulu mgbanyima nee menli mɔɔ yɛ gyima wɔ sukulu ɛkɛ ne la. Nɔhalɛ nu, tɛ menli mɔɔ die yɛ diedi ne to nu la angome a yɛbu bɛ a; yɛbu menli mɔɔ kpɔ Gyihova Alasevolɛ la noko. Ɔwɔ kɛ menli mɔɔ ɛnle diedima la nwu ye kɛ yɛbu debie.​—Bɛgenga Wulomuma 12:17, 18; 1 Pita 3:15.

20, 21. Saa yɛbu menli mɔɔ lɛ tumi la kpalɛ a, nyilalɛ boni mɔ a yɛbanyia a?

²⁰ Bɛmaa yɛvi yɛ ahonle nu yɛbu debie. Ɛzoanvolɛ Pita hɛlɛle kɛ: “Bɛli menli kɔsɔɔti eni.” (1 Pita 2:17) Saa menli nwu ye kɛ amgba yɛbu bɛ a, bɛ nye balie yɛ nwo kpole. Kakye kɛ subane ɛhye ɛlɛminli ewiade. Yemɔti, saa yɛda ye ali a, ɛnee ɔle adenle ko mɔɔ yɛdua zo yɛdi Gyisɛse mɛla zo a: “Bɛmaa bɛ ɛbɛla kpalɛ ne ɛyɛ kɛ kɛnlaneɛ na ɔda wɔ menli nu . . . amaa bɛanwu bɛ gyima kpalɛ ne mɔɔ bɛyɛ la na bɛaye bɛ Ze mɔɔ wɔ anwuma la ayɛlɛ.”​—Mateyu 5:16.

²¹ Wɔ ewiade ɛhye mɔɔ wɔ awozinli nu la anu, menli mɔɔ lɛ ahonle kpalɛ la bikye sunsum nu wienyi ne. Yemɔti, saa yɛda ɛbulɛ ali wɔ abusua ne anu, asafo ne anu, yɛɛ ewiade ngyehyɛleɛ nu a, menli bie mɔ anye balie nwolɛ na ɔbaha bɛ yeamaa bɛ nee yɛ alua wienyi ne anu. Nwolɛ adenle kpole boni a le ɛhye! Saa yeamba ye zɔ bɔbɔ a, yɛze kɛ menli mɔɔ yɛbu bɛ la sɔ Gyihova Nyamenle anye na ɔboa ɔmaa yɛtɛnla ye ɛhulolɛ ne anu. Nyilalɛ boni a tɛla ɛhye a?