1-3. (a) Ahyɛlɛdeɛ kpalɛ mɔɔ Gyihova ɛva ɛmaa yɛ la ko a le boni? Kɛzi yɛbahola yɛava yɛali gyima wɔ adenle ɛtane zo ɛ? (b) Kɛzi ɔwɔ kɛ yɛfa ɛdendɛlɛ ahyɛlɛdeɛ ne yɛdi gyima ɛ?

SELƐ bie ɛmaa ɔ ra kpavolɛ bie basekɛ. Ɔ nye ɛlie kɛ yeva ahyɛlɛdeɛ kɛnlɛma ɛhye yemaa ɔ ra ne la. Noko saa ɔ ra ne ka basekɛ ne mgbane mgbane, ɔfa ɔbɔ awie na ɔboda ye ɛ? Kɛzi ye papa bade nganeɛ ɛ?

² Gyihova a fa “ahyɛlɛdeɛ kpalɛ biala nee ɛlolɛdeɛ biala mɔɔ di munli” la maa a. (Gyemise 1:17) Ahyɛlɛdeɛ kpalɛ mɔɔ yeva yemaa yɛ la ko a le ɛdendɛlɛ. Ɛdendɛlɛ ahyɛlɛdeɛ ne maa yɛkola yɛkile yɛ adwenle na yɛka kɛzi yɛte nganeɛ la. Yɛkola yɛka edwɛkɛ mɔɔ boa menli na ɔmaa bɛ nye die la. Noko mɔɔ yɛka la bahola agyegye awie mɔ na yeamaa bɛali nyane.

³ Tumi kpole wɔ ɛdendɛlɛ nu, na Gyihova kilehile yɛ kɛzi ɔwɔ kɛ yɛfa ɛdendɛlɛ ahyɛlɛdeɛ ne yɛdi gyima kpalɛ la. Ɔka ɔkile yɛ kɛ: “Bɛmmamaa edwɛkɛ ɛtane fi bɛ nloa anu finde, emomu edwɛkɛ kpalɛ mɔɔ hyia na ɔmaa anwosesebɛ, mɔɔ nvasoɛ wɔ zo maa bɛdabɛ mɔɔ bɛtie la ala.” (Ɛfɛsɛsema 4:29) Maa yɛzuzu kɛzi yɛbahola yɛava ahyɛlɛdeɛ ɛhye mɔɔ vi Nyamenle ɛkɛ la yɛali gyima wɔ adenle mɔɔ ɔbazɔ ɔ nye na yeamaa awie mɔ anwosesebɛ la anwo.

4, 5. Tumi mɔɔ wɔ ɛdendɛlɛ nu la anwo debie boni a yɛsukoa yɛfi mrɛlɛ bie mɔ mɔɔ wɔ Baebolo ne anu la anu a?

⁴ Tumi wɔ ɛdendɛlɛ nu, ɔti ɔwɔ kɛ yɛnea mɔɔ yɛka nee kɛzi yɛka ye la boɛ. Mrɛlɛbulɛ 15:4 ka kɛ: “Ɛtafinlimalɛ bɛtɛɛ le ngoane baka, noko mɛlɛbɛla ɛdendɛlɛ maa bɛdi nyane.” Kɛ mɔɔ baka bo alubo maa bɛ nwo yɛ bɛ fɔɔnwo wɔ wuluwulu mekɛ nu la, zɔhane ala a yɛtendɛ kɛnlɛma yɛkile menli a bɛ nye die a. Noko saa yɛtendɛ ɛtane yɛkile menli a, ɔgyegye bɛ na ɔmaa bɛdi nyane.​—Mrɛlɛbulɛ 18:21.

⁵ Mrɛlɛbulɛ 12:18 ka kɛ: “Ɛdendɛlɛ mgbane mgbane le kɛ konle dadeɛ mɔɔ wowɔ la.” Edwɛkɛ ɛtane maa bɛdi nyane yɛɛ ɔsɛkye agɔnwolɛvalɛ. Bie a ɛkakye mekɛ bie mɔɔ awie hanle edwɛkɛ ɛtane hilele wɔ ɔmaanle ɛlile nyane kpole la. Noko ɛrɛlɛ zɔhane toa zo kɛ: “Nrɛlɛbɛvolɛ atafinlima yɛ ayile.” Ɛdendɛlɛ kɛnlɛma kola yɛ ahonle mɔɔ ɛlɛdi nyane la ayile na ɔmaa agɔnwolɛvalɛ mɔɔ akɛsakɛsa ɛmaa yezɛkye la yɛ boɛ. (Kenga Mrɛlɛbulɛ 16:24.) Saa yɛkakye kɛ yɛ edwɛkɛ ka awie mɔ a, yɛbanlea yɛ ɛdendɛlɛ boɛ.

6. Duzu ati a ɔyɛ se kɛ yɛbahomo yɛ nwo zo wɔ mɔɔ yɛka la anwo a?

⁶ Debie bieko mɔɔ ɔti ɔwɔ kɛ yɛnea yɛ ɛdendɛlɛ boɛ la a le kɛ yɛ muala yɛnli munli. Sonla “ahonle nu nzuzulɛ le ɛtane” yɛɛ edwɛkɛ mɔɔ yɛka la ta maa mɔɔ wɔ yɛ ahonle nu la da ali. (Gyɛnɛsese 8:21; Luku 6:45) Ɔbahola yeayɛ se kɛ yɛbahomo yɛ nwo zo wɔ mɔɔ yɛka la anwo. (Kenga Gyemise 3:2-4.) Noko ɔwɔ kɛ yɛkɔ zo yɛbɔ mɔdenle kɛ yɛbanyia anyuhɔlɛ wɔ kɛzi yɛtendɛ yɛkile menli la anu.

7, 8. Kɛzi yɛ ɛdendɛlɛ ka agɔnwolɛvalɛ mɔɔ yɛ nee Gyihova lɛ la ɛ?

⁷ Eza ɔwɔ kɛ yɛnea yɛ ɛdendɛlɛ boɛ ɔluakɛ yɛbabu  mɔɔ yɛka nee kɛzi yɛka ye la anwo mgbonda yɛahile Gyihova. Gyemise 1:26 ka kɛ: “Saa awie dwenle kɛ ɔsonle Nyamenle noko ɔngola ɔngomo ɔ tafinlima azo a, ɛnee ɔlɛbɛlɛbɛla ɔdaye mumua ne ye ahonle, na ye ɛzonlenlɛ ne le mgbane.” Ɔti saa yɛannea yɛ ɛdendɛlɛ boɛ a, ɔbaha agɔnwolɛvalɛ bɔbɔ mɔɔ yɛ nee Gyihova lɛ la na yeazɛkye ye.​—Gyemise 3:8-10.

⁸ Ɔda ali kɛ, ndelebɛbo kpalɛ bie ati a ɔwɔ kɛ yɛnea mɔɔ yɛka nee kɛzi yɛka ye la boɛ a. Saa yɛnwu ɛdendɛlɛ mɔɔ ɔwɔ kɛ yɛkpo la a, ɔbaboa yɛ yeamaa yɛava yɛ ɛdendɛlɛ ahyɛlɛdeɛ ne yɛali gyima wɔ adenle mɔɔ Gyihova kulo la azo.

9, 10. (a) Ɛdendɛlɛ boni a ɛbu zo ɛnɛ a? (b) Duzu ati a yɛkpo kɛ yɛbaha edwɛkɛ mgbane mgbane a?

⁹ Ɛnɛ, menli dɔɔnwo ka edwɛkɛ ɛtane anzɛɛ ɛdendɛlɛ mɔɔ nwolɛ ɛnde la. Menli dɔɔnwo lɛ adwenle  kɛ ɔwɔ kɛ bɛka edwɛkɛ mgbane mgbane nee edwɛkɛ mɔɔ ɛnle kpalɛ la bɛfa bɛkilehile bɛ edwɛkɛ nu. Menli mɔɔ ka edwɛkɛ dielie menli nye la ta bɔ ngoayɛ anzɛɛ ka edwɛkɛ mgbane mgbane maa bɛsele. Noko ɛzoanvolɛ Pɔɔlo hɛlɛle kɛ: “Noko kɛkala, ɔwɔ kɛ bɛye ɛhye mɔ amuala bɛgua: ɛya, ɛya kpole, ninyɛndane, aholoba, yɛɛ bɛmmamaa edwɛkɛ ɛtane fi bɛ nloa anu finde.” (Kɔlɔsaema 3:8) Eza ɔhanle kɛ ɔnle kɛ bɛbɔ ngoayɛ mgbane mgbane zo bɔbɔ wɔ nɔhalɛ Kilisienema avinli.​—Ɛfɛsɛsema 5:3, 4.

¹⁰ Gyihova nee menli mɔɔ kulo ye la amuala anye ɛnlie ngoayɛ mgbane mgbane nwo. Nwolɛ ɛnde. Baebolo ne fa “evinli nyɛleɛ” boka “nwonane ne gyima ne mɔ” anwo. (Galeehyeama 5:19-21) “Evinli nyɛleɛ” bahola ahile ɛtane ngakyile dɔɔnwo, na evinli nyɛleɛ ko maa bɛyɛ evinli nyɛleɛ bieko. Saa ɔyɛ awie subane kɛ ɔbabɔ ngoayɛ mgbane mgbane mɔɔ anwo ɛnde fee la na yeangyakyi a, ɛhye bahile kɛ ɔnle kɛ ɔtɛnla asafo ne anu bieko.​—2 Kɔlentema 12:21; Ɛfɛsɛsema 4:19; nea Awieleɛdwɛkɛ 23.

11, 12. (a) Duzu a le ndɛneyelɛ? (b) Duzu ati a ɔnle kɛ yɛsɛkye awie duma ɛ?

¹¹ Eza ɔwɔ kɛ yɛtwe yɛ nwo yɛfi ndɛneyelɛ nwo. Yɛ nye die menli nwo yɛɛ yɛkulo kɛ yɛka yɛ gɔnwo mɔ nee yɛ mbusuafoɔ anwo edwɛkɛ yɛkile awie mɔ. Alimoa Kilisienema mɔɔ dɛnlanle aze wɔ ɛvoya mɔɔ limoa la anu bɔbɔ la ɛnee kulo kɛ bɛnwu kɛzi bɛ mediema ne mɔ anwo de nee mɔɔ bɛbahola bɛayɛ bɛaboa bɛ la. (Ɛfɛsɛsema 6:21, 22; Kɔlɔsaema 4:8, 9) Noko ɔnyɛ se kɛ awie mɔ anwo edwɛkɛhanlɛ bahola ahakyi ndɛneyelɛ. Saa yɛka awie mɔ anwo edwɛkɛ mɔɔ yɛde la yɛkile awie a, ɔbamaa yɛaha edwɛkɛ mɔɔ  bie a ɔnle nɔhalɛ anzɛɛ yɛaha awie fealeranu edwɛkɛ. Saa yɛannea boɛ a, edwɛkɛ ɛtane zɛhae bahola ahakyi ɛzonledolɛ anzɛɛ dumazɛkyelɛ. Falasiima zɛkyele Gyisɛse duma wɔ mekɛ mɔɔ bɛdole ye ɛzonle wɔ ninyɛne mɔɔ ɔtɛyɛle la anwo la. (Mateyu 9:32-34; 12:22-24) Dumazɛkyelɛ maa duma kpalɛ mɔɔ awie ɛnyia la anwo ba edwɛkɛ, ɔfa kpolerazulɛ nee nyanelilɛ ɔba na ɔsɛkye agɔnwolɛma avinli.​—Mrɛlɛbulɛ 26:20.

¹² Gyihova kulo kɛ yɛka edwɛkɛ mɔɔ baboa awie mɔ na yeamaa bɛ anwosesebɛ la na tɛ kɛ yɛmaa agɔnwolɛma ahakyi agbɔvolɛ. Gyihova kyi “awie biala mɔɔ twehwe manzonle to mediema avinli la.” (Mrɛlɛbulɛ 6:16-19) Dumasɛkyevo mɔɔ limoa la a le Seetan Abɔnsam mɔɔ zɛkyele Nyamenle duma la. (Yekile 12:9, 10) Ɛnɛ, ɔnyɛ se kɛ menli babɔ adalɛ ahile bɛ nwo. Noko ɔnle kɛ ɛhye bie si wɔ Kilisiene asafo ne anu. (Galeehyeama 5:19-21) Ɔti ɔwɔ kɛ yɛnea mɔɔ yɛka la boɛ na dahuu yɛdwenle edwɛkɛ nwo na yɛaha. Kolaa na wɔaha awie anwo edwɛkɛ bie wɔahile awie gyɛne la, biza ɛ nwo kɛ: ‘Asoo edwɛkɛ mɔɔ mekpondɛ kɛ meka la le nɔhalɛ ɔ? Ɔle kpalɛ ɔ? Ɔbaboa ɔ? Asoo mekulo kɛ ahenle mɔɔ melɛka ɔ nwo edwɛkɛ la te bie ɔ? Saa awie ka me nwo edwɛkɛ zɛhae a kɛzi mebade nganeɛ ɛ?’​—Kenga 1 Tɛsalonaekama 4:11.

13, 14. (a) Kɛzi aholoba maa menli te nganeɛ? (b) Duzu ati a ɔnle kɛ Kilisienema bɔ awie mɔ aholoba ɛ?

¹³ Ɔdwu mekɛ ne bie a, yɛ muala yɛka edwɛkɛ mɔɔ nzinlii yɛnu yɛ nwo wɔ nwolɛ a. Noko yɛngulo kɛ ɔyɛ yɛ subane kɛ yɛbadendɛ yɛatia awie mɔ anzɛɛ yɛbaha edwɛkɛ ɛtane mɔɔ ɛngile ɛlɔlɛ la yɛahile bɛ. Ɔnle kɛ aholoba yɛ yɛ subane. Pɔɔlo hanle kɛ: “Bɛye  ɛkpɔlɛ biala, ɛya, ɛya kpole, ɛdeɛdeanlɛ nee aholoba . . . bɛgua.” (Ɛfɛsɛsema 4:31) Baebolo bie mɔ kile aholoba abo kɛ “munzule edwɛkɛ,” “edwɛkɛ mɔɔ yɛ nyane” anzɛɛ “safule.” Aholoba sɛkye ɛbulɛ mɔɔ menli lɛ la na ɔmaa bɛte nganeɛ kɛ nvasoɛ ɛnle bɛ nwo zo. Ɔngyɛ na ngakula ali nyane, yemɔti ɔwɔ kɛ yɛnea boɛ na yɛanga edwɛkɛ mɔɔ bagyegye bɛ la.​—Kɔlɔsaema 3:21.

¹⁴ Baebolo ne bɔ yɛ kɔkɔ ɛsesebɛ wɔ aholoba anzɛɛ awie mɔɔ ɔ nloa ɛdendɛlɛ ɛnyɛ fɛ la anwo. Saa awie bɔ ɔ ye anzɛɛ ɔ hu anzɛɛ ɔ mra aholoba a, nea kɛzi ɔbayɛ alɔbɔlɛ la! Nɔhalɛ nu, saa awie kɔ zo bɔ aholoba na yeangyakyi a, ɔnfɛta kɛ ɔtɛnla asafo ne anu bieko. (1 Kɔlentema 5:11-13; 6:9, 10) Kɛ mɔɔ yɛnwu ye la, saa yɛka edwɛkɛ ɛtane, edwɛkɛ mɔɔ ɛnle nɔhalɛ anzɛɛ ɔngile ɛlɔlɛ la a, ɔbazɛkye agɔnwolɛvalɛ mɔɔ yɛ nee Gyihova nee awie mɔ lɛ la.

15. Ɛdendɛlɛ boni a maa agɔnwolɛvalɛ nu mia a?

¹⁵ Kɛ ɔkɛyɛ na yɛava yɛ ɛdendɛlɛ ahyɛlɛdeɛ ne yɛali gyima kɛ mɔɔ Gyihova kulo kɛ yɛyɛ la ɛ? Baebolo ne ɛnga edwɛkɛ fɔɔnwo mɔɔ ɔwɔ kɛ yɛka anzɛɛ ɔnle kɛ yɛka la ɛngile yɛ ɛdeɛ, noko ɔka ɔkile yɛ kɛ yɛha ‘edwɛkɛ kpalɛ mɔɔ maa anwosesebɛ la.’ (Ɛfɛsɛsema 4:29) Ɛdendɛlɛ mɔɔ maa anwosesebɛ la anwo te, ɔle kpalɛ yɛɛ ɔle nɔhalɛ. Gyihova kulo kɛ yɛka edwɛkɛ mɔ maa awie mɔ anwosesebɛ na ɔboa bɛ la. Ɛhye bahola ayɛ se. Ɔhyia kɛ yɛbɔ mɔdenle na yɛaha edwɛkɛ kpalɛ, noko ɔnyɛ se kɛ yɛbaha edwɛkɛ ɛtane anzɛɛ edwɛkɛ mɔɔ bɛndwenle nwolɛ la. (Taetɛse 2:8) Maa  yɛzuzu ndenle bie mɔ mɔɔ yɛbahola yɛalua zo yɛava mɔɔ yɛka la yɛamaa awie mɔ anwosesebɛ la anwo.

16, 17. (a) Duzu ati a ɔwɔ kɛ yɛkanvo awie mɔ ɛ? (b) Nwane mɔ a yɛbahola yɛahanvo bɛ a?

¹⁶ Gyihova nee Gyisɛse fi bɛ ɛhulolɛ nu kanvo awie mɔ. Yɛkulo kɛ yɛsukoa bɛ. (Mateyu 3:17; 25:19-23; Dwɔn 1:47) Saa yɛ nganvolɛ bamaa awie mɔ anwosesebɛ kpalɛ a, ɔwɔ kɛ yɛdwenle bɛ nwo na yɛkile bɛ nwo anyelielɛ. Mrɛlɛbulɛ 15:23 ka kɛ: “Edwɛkɛ mɔɔ bɛkɛha ye mekɛ mɔɔ fɛta la​—nea kɛzi ɔle kpalɛ a.” Saa awie fi ye ahonle nu kanvo yɛ wɔ gyima ɛsesebɛ mɔɔ yɛyɛ la anwo anzɛɛ kile debie mɔɔ yɛyɛ la anwo anyezɔlɛ a yɛnyia anwosesebɛ.​—Kenga Mateyu 7:12; nea Awieleɛdwɛkɛ 27.

¹⁷ Saa ɛfa ɛyɛ wɔ subane kɛ ɛbanwu debie kpalɛ mɔɔ awie mɔ yɛ la a, ɔnrɛyɛ se kɛ ɛbavi wɔ ahonle nu wɔahanvo bɛ. Kɛ neazo la, bie a wɔyɛ ye nzonlɛ kɛ awie bie mɔɔ wɔ asafo ne anu la siezie ɔ nwo kpalɛ na yeamaa ɛdendɛlɛ anzɛɛ ɔbɔ mɔdenle kɛ ɔbamaa mualɛ wɔ debiezukoalɛ bo. Bie a kakula bie ɛgyinla nɔhalɛ ne anzi kpundii wɔ sukulu, anzɛɛ kpanyinli bie kɔ daselɛlilɛ dahuu. Bie a edwɛkɛ mɔɔ kile anyezɔlɛ mɔɔ ɛbaha la ala a le debie mɔɔ bɛhyia nwolɛ a. Ɔhyia kpalɛ noko kɛ kunli kɛha kɛhile ɔ ye kɛ ɔkulo ye yɛɛ ɔ nye sɔ mɔɔ ɔyɛ la. (Mrɛlɛbulɛ 31:10, 28) Kɛ mɔɔ mbaka hyia wienyi nee nzule la, zɔhane ala a menli hyia nganvolɛ nwo a. Ɛhye le nɔhalɛ titili wɔ ngakula nwo. Kpondɛ ndenle dua zo kanvo bɛ wɔ bɛ subane mgbalɛ nee bɛ mɔdenlebɔlɛ nwo. Nganvolɛ kola maa bɛnyia akɛnrasesebɛ nee anwodozo na ɔmaa bɛbɔ mɔdenle kpole bɛyɛ mɔɔ le kpalɛ la.

18, 19. Duzu ati a ɔwɔ kɛ yɛbɔ mɔdenle yɛmaa awie mɔ anwosesebɛ na yɛkyekye bɛ rɛle a? Kɛ ɔkɛyɛ na yɛayɛ zɔ ɛ?

 ¹⁸ Saa yɛmaa awie mɔ anwosesebɛ na yɛkyekye bɛ rɛle a, ɛnee yɛlɛsukoa Gyihova neazo ne. Ɔdwenle “bɛlɛvoma” nee “menli mɔɔ anwo ɛbubu bɛ” la anwo kpole. (Ayezaya 57:15) Gyihova kulo kɛ ‘yɛkɔ zo yɛmaa yɛ nwo anwosesebɛ’ na ‘yɛkyekye menli mɔɔ arɛle ɛbɔ la arɛle.’ (1 Tɛsalonaekama 5:11, 14) Saa yɛbɔ mɔdenle yɛyɛ zɔ a, ɔnwu ye na ɔ nye die yɛ mɔdenlebɔlɛ ne anwo.

¹⁹ Bie a wɔnwu kɛ awie wɔ asafo ne anu mɔɔ ɔ sa nu ɛdo anzɛɛ ɔ rɛle ɛbɔ a. Duzu a ɛka a ɔbaboa ye a? Bie a ɛnrɛhola ɛnrɛye ngyegyelɛ ne ɛnrɛvi ɛkɛ, noko ɛbahola  wɔamaa ahenle anwu kɛ ɛdwenle ɔ nwo. Kɛ neazo la, ɛbahola wɔayɛ ngyehyɛleɛ wɔahɔkpɔla ye. Ɛbahola wɔagenga Baebolo ngyɛnu bie mɔɔ maa anwosesebɛ la na wɔayɛ asɔne bɔbɔ wɔamaa ye. (Edwɛne 34:18; Mateyu 10:29-31) Maa menli zɛhae mɔ anwosesebɛ kɛ bɛ mediema mɔɔ wɔ asafo ne anu la kulo bɛ edwɛkɛ. (1 Kɔlentema 12:12-26; Gyemise 5:14, 15) Na tendɛ maa ɔnwu ye kɛ ɛdie mɔɔ ɛlɛka la ɛdi yɛɛ nwolɛ hyia wɔ.​—Kenga Mrɛlɛbulɛ 12:25.

20, 21. Duzu a ɛmmaa ɔnyɛ se kɛ menli balie folɛdulɛ ado nu a?

²⁰ Eza yɛmaa awie mɔ anwosesebɛ wɔ mekɛ mɔɔ yɛkɛdu bɛ folɛ kpalɛ la. Kɛmɔ yɛle menli mɔɔ yɛnli  munli la ati, ɔdwu mekɛ ne bie a yɛ muala yɛhyia folɛdulɛ nwo. Mrɛlɛbulɛ 19:20 ka kɛ: “Tie folɛdulɛ na die ɛdenrɛdenrɛlɛ to nu, amaa wɔanwu nrɛlɛbɛ kenle bie.” Tɛ asafo nu mgbanyima angome a kola tu folɛ a. Ɔwɔ kɛ awovolɛ maa bɛ mra adehilelɛ. (Ɛfɛsɛsema 6:4) Mediema mraalɛ bahola adu bɛ nwo ngoko folɛ kpalɛ. (Taetɛse 2:3-5) Kɛmɔ yɛkulo yɛ mediema la ati, yɛkulo kɛ yɛnea kɛ yɛbadu bɛ folɛ wɔ adenle mɔɔ ɔnrɛmaa bɛnrɛli nyane la azo. Duzu a baboa yɛ a?

²¹ Bie a ɛkakye mekɛ bie mɔɔ awie dule wɔ folɛ kpalɛ wɔ adenle mɔɔ yeanyɛ se yeammaa wɔ kɛ ɛbalie wɔado nu la azo. Duzu a maanle ɔyɛle folɛdulɛ kpalɛ a? Bie a ɛdele nganeɛ kɛ ahenle dwenlenle ɛ nwo kpalɛ. Anzɛɛ bie a ɔdendɛle wɔ atiakunlukɛnlɛma nee ɛlɔlɛ adenle zo. (Kɔlɔsaema 4:6) Ɔbayɛ kɛ ɛnee folɛdulɛ ne gyi Baebolo ne azo. (2 Timote 3:16) Saa yɛka edwɛkɛ ne mɔɔ wɔ Baebolo ne anu la fɔɔnwo anzɛɛ yɛanyɛ ye zɔ bɔbɔ a, ɔwɔ kɛ folɛ biala mɔɔ yɛkɛdu la gyinla Ngɛlɛlera ne azo. Ɔnle kɛ awie biala fa ye adwenle kile mɔɔ ɔwɔ kɛ awie mɔ yɛ la anzɛɛ kyibehyiba ngɛlɛlera ne fa da ɔdaye ye nzuzulɛ ali. Saa ɛkakye kɛzi bɛdule wɔ folɛ bie la a, ɔbaboa wɔ wɔ mekɛ mɔɔ ɛlɛtu awie mɔ folɛ la.

22. Kɛzi ɛkulo kɛ ɛfa wɔ ɛdendɛlɛ ahyɛlɛdeɛ ne ɛdi gyima ɛ?

²² Ɛdendɛlɛ le ahyɛlɛdeɛ mɔɔ vi Nyamenle ɛkɛ a. Ɔwɔ kɛ ɛlɔlɛ mɔɔ yɛlɛ yɛmaa ye la ka yɛ maa yɛfa yɛdi gyima wɔ adenle kpalɛ zo. Kakye kɛ ɛdendɛlɛ kola maa anwosesebɛ anzɛɛ ɔmaa bɛdi nyane. Yemɔti, bɛmaa yɛyɛ biala mɔɔ yɛbahola la yɛha edwɛkɛ mɔɔ bamaa awie mɔ anwosesebɛ na bɛ nye alie la.