ƐZUKOALƐDEƐ 01
Kɛzi Baebolo Ne Bahola Aboa Wɔ Ɛ?
Asɛɛ yɛ muala yɛlɛ ɛbɛlabɔlɛ, amaneɛnwunlɛ, ewule yɛɛ kenle bie nwo kpuya mɔɔ gyegye yɛ a. Eza alehyenlɛ biala yɛdwenle kɛzi yɛbanyia ezukoa yɛanlea yɛ nwo anzɛɛ kɛzi yɛ abusua ne anye balie la anwo. Menli dɔɔnwo ɛnwu kɛ tɛ kpuya mɔɔ hyia la angomekye a Baebolo ne boa bɛ maa bɛnyia nwolɛ mualɛ a, emomu eza ɔfa folɛdulɛ kpalɛ mɔɔ boa bɛ wɔ bɛ ɛbɛlabɔlɛ nu la ɔmaa bɛ. Ɛze awie mɔɔ ɛnea a Baebolo ne bahola aboa ye ɔ?
1. Kpuya mɔɔ Baebolo ne bua la bie mɔ a le boni?
Baebolo ne bua kpuya ɛhye mɔ mɔɔ anwo hyia la: Kɛzi ngoane bɔle ɔ bo ɛ? Duzu ati a bɛbɔle yɛ a? Duzu ati a menli nwu amaneɛ a? Awie wu a ɔkɔ ni? Saa awie biala kulo anzodwolɛ a, ɛnee duzu ati a konle ɛbu zo a? Kenle bie, kɛ bɛbayɛ azɛlɛ ne ɛ? Baebolo ne maa yɛ anwosesebɛ kɛ yɛkpondɛ kpuya ɛhye mɔ anwo mualɛ, na menli mgbe dɔɔnwo ɛnwu kɛ mualɛ mɔɔ ɔfa ɔmaa la yɛ anyelielɛ.
2. Kɛzi Baebolo ne bahola aboa yɛ yeamaa yɛ nye alie ɛ?
Baebolo ne tu yɛ folɛ kpalɛ. Kɛ neazo la, ɔmaa mbusua nwu mɔɔ bɛyɛ a bɛ nye balie kpalɛ la. Ɔtu yɛ folɛ wɔ kɛzi yɛbagyinla adwenleadwenle nloa nee kɛzi yɛ nye bahola alie yɛ gyima nwo la anwo. Ɛbazukoa mɔɔ Baebolo ne kilehile wɔ edwɛkɛ ɛhye mɔ nee gyɛne dɔɔnwo anwo wɔ mekɛ mɔɔ yɛlɛbɔ nu yɛazukoa buluku ɛhye la. Bie a ɛbalie wɔado nu kɛ ‘Ngɛlɛlera ne amuala [debie biala mɔɔ wɔ Baebolo ne anu la] le kpalɛ.’—2 Timote 3:16.
Buluku ɛhye ɛnle Baebolo. Noko, ɔbaboa wɔ yeamaa wɔazukoa Baebolo ne. Ɔti yɛsɛlɛ wɔ, kenga Baebolo tɛkese mɔɔ wɔ ɛzukoalɛdeɛ ne mɔ anu la na fa toto mɔɔ ɛlɛsukoa la anwo.
SUKOA DƆƆNWO
Sukoa kɛzi Baebolo ne ɛboa menli, kɛzi ɛ nye bahola alie ye ɛgengalɛ nwo yɛɛ deɛmɔti ɔle kpalɛ kɛ ɛbamaa bɛaboa wɔ amaa wɔade ɔ bo la.
3. Baebolo ne kola kile yɛ adenle
Baebolo ne le kɛ tɔɔkye mɔɔ ta kpalɛ la. Ɔkola ɔboa yɛ ɔmaa yɛsi kpɔkɛ kpalɛ yɛɛ ɔmaa yɛnwu mɔɔ la yɛ nyunlu la.
Kenga Edwɛne 119:105, na akee bɛzuzu kpuya ɛhye mɔ anwo:
-
Kɛzi ahenle mɔɔ hɛlɛle edwɛne ɛhye la bu Baebolo ne ɛ?
-
Kɛzi ɛbu Baebolo ne ɛ?
4. Baebolo ne bahola abua kpuya mɔɔ yɛlɛ la
Raalɛ bie nwunle kɛ kpuya mɔɔ ɛnee gyegye ye wɔ ɛvolɛ dɔɔnwo anu la anwo mualɛ wɔ Baebolo ne anu. Ye VIDIO ne, na akee bɛzuzu kpuya ɛhye mɔ anwo.
-
Wɔ vidio ne anu, kpuya boni mɔ a ɛnee raalɛ ne lɛ a?
-
Kɛzi Baebolo ne mɔɔ ɔzukoale la boale ye ɛ?
Baebolo ne ka kɛ yɛbiza kpuya. Kenga Mateyu 7:7, na akee bɛzuzu kpuya ɛhye anwo:
-
Kpuya boni mɔ a ɛlɛ mɔɔ Baebolo ne bahola abua a?
5. Ɛ nye bahola alie Baebolo ne ɛgengalɛ nwo
Menli dɔɔnwo anye die Baebolo ne ɛgengalɛ nwo yɛɛ bɛlɛnyia zolɛ nvasoɛ. Ye VIDIO ne, na akee bɛzuzu kpuya ɛhye mɔ anwo.
-
Wɔ vidio ne anu, ɛnee kɛzi mgbavolɛ nee mbɛlɛra ne mɔ te nganeɛ wɔ debie ɛgengalɛ nwo ɛ?
-
Duzu ati a kɛkala bɛ nye die Baebolo ne ɛgengalɛ nwo a?
Baebolo ne se ɔbamaa yɛanyia ngilehilelɛ mɔɔ kyekye yɛ rɛle na ɔmaa yɛnyia anyelazo la. Kenga Wulomuma 15:4, na akee bɛzuzu kpuya ɛhye anwo:
-
Ɛ nye die arɛlekyekyelɛ nee anyelazo mɔɔ Baebolo ne bɔ nwolɛ ɛwɔkɛ la anwo ɔ?
6. Awie mɔ kola boa yɛ maa yɛte Baebolo ne abo
Menli dɔɔnwo kenga Baebolo ne, noko bɛnwu kɛ bɛ nee awie mɔ sukoa Baebolo ne a ɔboa kpalɛ. Kenga Gyima ne 8:26-31, na akee bɛzuzu kpuya ɛhye anwo:
-
Kɛ ɔkɛyɛ na yɛade Baebolo ne abo ɛ?—Nea ngyehyɛnu 30 nee 31.
Ɛnee Yiteyopeanli ne hyia awie mɔɔ baboa ye amaa yeade mɔɔ ɔlɛkenga la abo. Ɛnɛ, menli dɔɔnwo ɛnwu kɛ bɛ nee awie mɔ sukoa Baebolo ne a ɔboa bɛ kpalɛ
BIE MƆ KA KƐ: “Baebolo ne ɛzukoalɛ sɛkye mekɛ.”
-
Kɛzi ɛnwu ye ɛ? Duzu ati ɔ?
EDWƐKƐ TITILI
Baebolo ne tu yɛ folɛ mɔɔ yɛfa yɛbɔ yɛ ɛbɛla la, ɔbua kpuya mɔɔ anwo hyia la na ɔmaa menli nyia arɛlekyekyelɛ nee anyelazo.
Ndinu
-
Folɛdulɛ boni a yɛnyia yɛfi Baebolo ne anu a?
-
Kpuya mɔɔ Baebolo ne bua la bie mɔ a le boni?
-
Duzu a ɛkulo kɛ ɛsukoa ɛfi Baebolo ne anu a?
KPONDƐ DƆƆNWO
Sukoa kɛzi nvasoɛ wɔ Baebolo ne anu folɛdulɛ zo ɛnɛ la.
“Baebolo Ngilehilelɛ —Nrɛlɛbɛ Mɔɔ Ɛmkpa Nwo” (Ɛzinzalɛ Arane No. 1 2018)
Nea kɛzi Baebolo ne boale nrenyia bie mɔɔ ɛnee ninyɛne gyegye ye ɔvi ye ngakula nu la.
Nea kɛzi Baebolo ne anu folɛdulɛ kpalɛ boa mbusua la.
“Ninyɛne 12 Mɔɔ Maa Abusua Asetɛnla Yɛ Kpalɛ La” (Awake! No. 2 2018)
Sukoa kɛzi Baebolo ne boa maa yɛnwu ahenle mɔɔ amgba nea ewiade ne azo la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
