Foa 8
Saa Esiane Si A
“Saa yera kɛ ɔwɔ kɛ bɛdi nyane wɔ mekɛ ekyi ye anu wɔ sɔnea nee amaneɛnwunlɛ ngakyile nu a, ɔwɔ kɛ bɛdi fɛlɛko wɔ ɛhye anwo.”—1 Pita 1:6
Mekɛ mɔɔ ɛlɛbɔ mɔdenle wɔamaa wɔ agyalɛ nee wɔ abusua ayɛ anyelielɛ la, ninyɛne mɔɔ ɛ nye ɛnla la kola si na ɔsɛkye wɔ anyelielɛ. (Nolobɔvo ne 9:11) Nyamenle fi ɛlɔlɛ nu boa yɛ wɔ ngyegyelɛ mekɛ nu. Saa ɛfa Baebolo ngyinlazo mɔɔ wɔ ɔ bo ɛke la ɛdi gyima a, ɛ nee wɔ abusua ne bahola agyinla ngyegyelɛ mɔɔ anu yɛ se bɔbɔ la anloa.
1 FA Ɛ NWO TO GYIHOVA ANWO ZO
MƆƆ BAEBOLO NE KA LA: “Bɛva bɛ adwenleadwenle muala bɛgua ɔ nwo zo, ɔboalekɛ ɔdwenle bɛ nwo.” (1 Pita 5:7) Dahuu kakye kɛ tɛ Nyamenle a maa ngyegyelɛ to wɔ a. (Gyemise 1:13) Saa ɛtwe ɛbikye ye a, ɔbaboa wɔ wɔ adenle biala anu. (Ayezaya 41:10) “Bɛha bɛ ngyianlɛ kɔsɔɔti bɛhile ye.”—Edwɛndolɛ 62:8.
Saa ɛkenga Baebolo ne na ɛsukoa ye alehyenlɛ biala a ɔbakyekye ɛ rɛle. Ɛhye bamaa wɔanwu kɛ Gyihova kyekye “yɛ rɛle wɔ amaneɛnwunlɛ kɔsɔɔti anu.” (2 Kɔlentema 1:3, 4; Wulomuma 15:4) Yebɔ ɛwɔkɛ kɛ ɔbamaa wɔanyia “Nyamenle anzonudwolɛ ne mɔɔ bo sonla ndelebɛbo muala azo la.”—Felepaema 4:6, 7, 13.
DUZU A ƐBAHOLA WƆAYƐ A?:
-
Sɛlɛ Gyihova moalɛ na si abotane dwenle ninyɛne nwo kpalɛ
-
Suzu mɔɔ ɛbahola wɔayɛ la amuala anwo na kpa mɔɔ baboa kpalɛ la
2 NEA Ɛ NWO NEE WƆ ABUSUA NE
MƆƆ BAEBOLO NE KA LA: “Sonla mɔɔ lɛ adwenle la nyia adwenlenubukelɛ, yɛɛ nrɛlɛbɛvolɛ buke ɔ nzo tie adwenlenubukelɛ edwɛkɛ.” (Mrɛlɛbulɛ 18:15) Nwu edwɛkɛ ne kɔsɔɔti. Nwu mɔɔ abusua ne anu sonla ko biala hyia nwo la. Ɛ nee bɛ ɛdendɛ na tie bɛ.—Mrɛlɛbulɛ 20:5.
Na saa dɔvolɛ bie wu ɛ? Mmasulo kɛ ɛbala wɔ nganeɛdelɛ ali. Kakye kɛ Gyisɛse “zunle.” (Dwɔn 11:35; Nolobɔvo ne 3:4) Nafelɛ nee bɛ menle ɛlielɛ nwo hyia kpalɛ. (Maake 6:31) Ɛhye baboa yeamaa wɔagyinla ngyegyelɛ ne anloa.
DUZU A ƐBAHOLA WƆAYƐ A?:
-
Kolaa na esiane azi la, ɛ nee wɔ abusua ne ɛli adwelie dahuu. Saa ngyegyelɛ ba a, ɔnrɛyɛ se kɛ bɛbaha kɛzi bɛte nganeɛ la bɛahile wɔ
-
Ɛ nee menli mɔɔ ɛyia ngyegyelɛ zɛhae bie la ɛli adwelie
3 KPONDƐ MOALƐ
MƆƆ BAEBOLO NE KA LA: “Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenya a.” (Mrɛlɛbulɛ 17:17) Ɛ gɔnwo mɔ kulo kɛ bɛboa wɔ noko bie a bɛnnwu mɔɔ bɛyɛ a. Ka mɔɔ ɛhyia nwo la kile bɛ. (Mrɛlɛbulɛ 12:25) Bieko, kpondɛ sunsum nu moalɛ wɔ bɛdabɛ mɔɔ bɛte Baebolo ne abo la ɛkɛ. Adehilelɛ mɔɔ wɔ Baebolo ne anu mɔɔ bɛbava bɛamaa wɔ la baboa wɔ.—Gyemise 5:14.
Saa ɛ nee menli mɔɔ bɛdie Nyamenle nee ye ɛwɔkɛ ne mɔ bɛdi la tu a ɛbanyia moalɛ mɔɔ ɛhyia la. Saa ɛboa bɛdabɛ mɔɔ bɛhyia arɛlekyekyelɛ la a, ɔbakyekye ɛdawɔ noko ɛ rɛle. Ka diedi mɔɔ ɛlɛ ye wɔ Gyihova nee ye ɛwɔkɛ ne mɔ anu la anwo edwɛkɛ kile bɛ. Fa wɔ mekɛ boa bɛdabɛ mɔɔ bɛhyia moalɛ la, mmatwe ɛ nwo ɛfi bɛdabɛ mɔɔ bɛkulo wɔ na bɛdwenle ɛ nwo la anwo.—Mrɛlɛbulɛ 18:1; 1 Kɔlentema 15:58.
DUZU A ƐBAHOLA WƆAYƐ A?:
-
Ka wɔ edwɛkɛ ne kile ɛ gɔnwo mɔɔ bikye wɔ la maa ɔboa wɔ
-
Ka mɔɔ ɛhyia nwo amgba la kile ye
