Saamuʼel Lammaffaa 5:1-25
5 Yeroo booda gosoonni Israaʼel hundi gara Daawit isa Kebroonitti+ argamuu dhufanii akkana isaan jedhan: “Kunoo, nuti lafee kee fi foon kee ti.*+
2 Kanaan dura yommuu Saaʼol mootii keenya turetti, situ Israaʼeliin duula irratti geggeessa ture.*+ Yihowaan, ‘Ati saba koo Israaʼeliin ni tiksita; Israaʼel irrattis geggeessaa ni taata’ siin jedheera.”+
3 Akka kanaan, jaarsoliin Israaʼel hundi gara mooticha isa Kebroonitti argamuu dhufan; Daawit Mootichis Kebroonitti Yihowaa duratti isaanii wajjin kakuu gale.+ Achiis isaan Daawitiin Israaʼel irratti mootii godhanii diban.+
4 Daawit yeroo mootii taʼetti umuriin isaa waggaa 30 ture; inni waggaa 40f ni bulche.+
5 Kebroon keessa taaʼee waggaa 7 fi jiʼa 6f Yihudaa ni bulche; Yerusaalem+ keessa taaʼee immoo waggaa 33f guutummaa Israaʼelii fi Yihudaa ni bulche.
6 Mootichii fi namoonni isaa Yebuusota+ warra biyyattii keessa jiraatan waraanuuf gara Yerusaalemitti baʼan. Isaanis, “Ati matumaa as hin seentu! Jaamonnii fi naafonni illee si ariʼu” jedhanii Daawititti qoosan. Isaan, ‘Daawit matumaa as hin seenu’ jedhanii yaadanii turan.+
7 Haa taʼu malee, Daawit dahoo Xiyoon ishii yeroo ammaatti Magaalaa Daawit+ jedhamtu qabate.
8 Kanaafuu, Daawit guyyaa sanatti, “Warri Yebuusota rukutan, ‘naafotaa fi jaamota’ warra Daawit jibbu* sana rukutuuf boʼoo bishaanii keessa darbuu qabu!” jedhe. “Jaamonnii fi naafonni matumaa manichatti hin seenan” kan jedhame kanaafi.
9 Achiis Daawit dahoo sana keessa jiraachuu jalqabe; dahoon sunis Magaalaa Daawit jedhame;* Daawit Koobicha*+ irrattii fi magaalattii keessa bakka kan biraatti dallaawwanii fi gamoowwan kan biraa ijaaruu jalqabe.+
10 Akka kanaan Daawit caalaatti jabaachaa deeme;+ Yihowaan Waaqni Raayyaas isaa wajjin jira ture.+
11 Hiiraam+ mootiin Xiiros ergamtoota gara Daawititti erge; kana malees, ijaarsa dallaatiif saanqaa gaattiraa,+ akkasumas anaaxotaa fi namoota dhagaa bocan ni erge; isaanis Daawitiif mana* ijaaruu jalqaban.+
12 Daawitis Yihowaan Israaʼel irratti mootii godhee cimsee akka isa dhaabe,+ mootummaa isaas saba isaa Israaʼeliif jedhee+ akka ol qabe+ ni beeke.
13 Daawit Kebroonii erga dhufee booda Yerusaalem keessatti saajjatootaa+ fi haadhotii manaa dabalataa ni fuudhe; ijoollee dhiiraa fi ijoollee durbaa dabalataas ni dhalche.+
14 Ilmaan inni Yerusaalem keessatti dhalche kanneen kana dha: Shaamuʼaa, Shoobaab, Naataan,+ Solomoon,+
15 Yibhaar, Elishuʼaa, Nefeeg, Yaafiʼaa,
16 Elishaamaa, Eliyaadaa fi Elifeelet.
17 Filisxeemonnis Daawit Israaʼel irratti mootii taʼee dibamuu+ isaa yommuu dhagaʼan, hundi isaanii isa barbaaduu dhufan.+ Daawitis kana yommuu dhagaʼu, gara dahoo sanaatti gad buʼe.+
18 Achiis Filisxeemonni dhufanii Sulula* Refaayim+ keessa faffacaʼan.
19 Daawitis, “Ol baʼee Filisxeemota waraanuu? Harka kootti dabarsitee isaan ni kennitaa?” jedhee Yihowaa gaafate.+ Yeroo kanatti Yihowaan Daawitiin, “Ani Filisxeemota harka keetti dabarsee waanan kennuuf, ol baʼi” jedhe.+
20 Kanaafuu, Daawit gara Baʼaal Peraaziim dhufee achitti isaan rukute. Yeroo kanatti Daawit, “Akkuma bishaan ittisa isaa cabsee baʼutti, Yihowaan diinota koo na duratti ni caccabse” jedhe.+ Inni maqaa iddoo sanaa Baʼaal Peraaziim*+ jedhee kan moggaase kanaafi.
21 Filisxeemonnis waaqolii tolfamoo isaanii achumatti dhiisan; Daawitii fi namoonni isaas isaan fudhatan.*
22 Boodas Filisxeemonni deebiʼanii dhufanii Sulula* Refaayim+ keessa faffacaʼan.
23 Daawitis Yihowaa ni gaafate; inni garuu akkana isaan jedhe: “Kallattiidhaan ol hin baʼin. Kanaa mannaa, duuba isaaniitiin naannaʼiitii tusii* baakaa* fuulduratti isaan waraani.
24 Fiixee tusii baakaa irraa sagalee adeemsa duulaa yommuu dhageessu, Yihowaan raayyaa waraanaa Filisxeemotaa rukutuuf si dura waan baʼeef, gara kuteenyaan tarkaanfii fudhadhu.”
25 Kanaafuu, Daawit akkuma Yihowaan isa ajaje ni godhe; Geebaadhaa*+ jalqabee hanga Geezerittis+ Filisxeemota ni rukute.+
Miiljaleewwan
^ Ykn., “firoota dhiigaa kee ti.”
^ Kal., “Israaʼeliin kan baasuu fi kan galchu si ture.”
^ Ykn., “warra lubbuun Daawit jibbitu.”
^ Ykn tarii, “innis dahoo kana Magaalaa Daawit jedhee waame.”
^ Ykn., “Miiloo.” Jecha Afaan Ibrootaa hiika, “itti guutuu” jedhu qabu.
^ Ykn., “mana mootummaa.”
^ Ykn., “Dirree Gad Buʼaa.”
^ “Caccabsuudhaan Dandeettii kan Qabu” jechuu dha.
^ Daawitii fi namoonni isaa waaqolii tolfamoo kana fudhatanii akka balleessan haala isaa irraa hubachuun ni dandaʼama. 1Se 14:12 ilaali.
^ Ykn., “Dirree Gad Buʼaa.”
^ Jechuunis, muka gaggabaabaa gobbatee biqilu.
^ Jechi “baakaa” jedhu jecha Afaan Ibrootaa ti. Maalummaan biqiltuu kanaa hin beekamu.
