Faarfannaa 17:1-15
Kadhannaa Daawit.
17 Yaa Yihowaa, kadhata ani haqa argachuuf dhiheessu dhagaʼi;Iyya ani gargaarsa argachuuf dhageessisuuf xiyyeeffannaa kenni;Kadhannaa koo isa gowwoomsaa malee dhihaate dhagaʼi.+
2 Anaaf jedhiitii murtoo haqaa kenni;+Ijji kee wanta sirrii taʼe haa argu.
3 Ati garaa koo ni qorte, halkaniinis na sakattaate;+Na qulqulleessites;+Ani wanta hamaa akkamii iyyuu akkan hin yaanne ni argita,Afaan koos seera hin cabsine.
4 Namoonni kaan maal iyyuu yoo godhan,Ani dubbii afaan keetii wajjin haala wal simuun daandii saamtotaa irraa nan fagaadha.+
5 Miilli koo akka hin gufannetti,+Faanni koo daandii kee irra haa turu.
6 Yaa Waaqayyo, deebii waan naa kennituuf ani sin waammadha.+
Gurra kee natti qabi.* Dubbii koos dhagaʼi.+
7 Ati inni warra harka kee mirgaatti kooluu galuu barbaadanNamoota si irratti fincila kaasan jalaa oolchitu,Karaa dinqisiisaa taʼeen jaalala kee isa amanamaa argisiisi.+
8 Akka qaroo ija keetiitti na eegi;+Gaaddisa qoochoo* keetii jalattis na dhoksi.+
9 Namoota hamoo na miidhan irraa,Diinota koo warra na marsanii fi na ajjeesuu barbaadan* irraas na eegi.+
10 Isaan gara jabeeyyii taʼaniiru;*Afaan isaaniitiin of tuulummaadhaan dubbatu;
11 Isaan nutti marsaniiru;+Nu kuffisuuf* carraa eeggatu.
12 Inni akka leenca wanta adamsu cicciruuf eeggachaa jiruu ti;Akka leenca saafelaa riphee eeggachaa jiruu ti.
13 Yaa Yihowaa, isa mormuudhaaf kaʼi,+ isa kuffisis;Goraadee keetiin isa hamaa irraa na* oolchi;
14 Yaa Yihowaa, harka keetiinNamoota addunyaa* kanaa warra qoodni isaanii jireenyuma kana taʼe jalaa,+Warra wantoota gaggaarii qopheessiteen quubsitu jalaa,+Akkasumas ilmaan isaanii warra hedduu taʼaniif dhaala dabarsan jalaa na oolchi.
15 Ani garuu, qajeelummaadhaan fuula kee nan arga;Si* arguuf yommuun dammaqu nan gammada.+
Miiljaleewwan
^ Ykn., “Gad jedhii na dhaggeeffadhu.”
^ Jechuunis, goflaa.
^ Ykn., “lubbuu irratti kaʼan.”
^ Ykn., “Isaan cooma isaaniitiin marfamaniiru.”
^ Ykn., “Lafatti nu darbachuuf.”
^ Ykn., “lubbuu koo.”
^ Ykn., “sirna.”
^ Ykn., “Bifa kee.”
