Iyyoob 7:1-21
7 “Namni lafa irraa, inni duʼu jireenyi isaa akkuma hojii dirqamaa mitii?
Guyyoonni isaas akkuma guyyoota nama mindeeffamee hojjetuu mitii?+
2 Inni akkuma garbicha tokkoo gaaddisa hawwa,Akkuma nama mindeeffamee hojjetuus mindaa isaa eeggata.+
3 Jiʼoonni gatii hin qabne naaf ramadamaniiru,Halkanoonni dhiphinaan guutamanis naaf kennamaniiru.+
4 Yommuun ciisu, ‘Yooman kaʼa?’ jedheen gaafadha;+Halkanichi yommuu dheeratu garuu, hamma guyyichi bariʼutti* boqonnaa malee asii fi achi nan gaggaragala.
5 Foon koo raammoo fi bungulloo* biyyootiin uwwifameera;+Gogaan koos qonyonyaa fi malaadhaan guutameera.+
6 Guyyoonni koo kolloo nama wayyaa dhaʼuu caalaa ni ariifatu,+Abdii malees ni dhumu.+
7 Jireenyi koo bubbee akka taʼe,+Ijji koos matumaa lammata gammachuu* akka hin argine yaadadhu.
8 Ijji amma na argu deebiʼee na hin argu;Ijji kee na barbaada, garuu ani hin jiru.+
9 Akkuma duumessi bittinnaaʼuu fi badutti,Namni gara Awwaalaatti* gad buʼes deebiʼee ol hin baʼu.+
10 Inni lammata gara mana isaatti hin deebiʼu,Iddoon isaas sana booda isa hin beeku.+
11 Kanaafuu, ani afaan koo hin qabadhu.
Dhiphina hafuura kootii irraa kan kaʼe nan dubbadha;Yaaddoo koo isa hadhaaʼaa taʼe* irraa kan kaʼes komii nan dhiheessa!+
12 Ati ana irratti eegduu kan dhaabdu,Ani galaana moo uumama galaanaa guddaa taʼe dha?
13 Yommuun, ‘Sireen koo na jajjabeessa;Iddoon ciisichaa koos dhiphina koo naaf salphisa’ jedhu,
14 Ati immoo abjuudhaan na naasista,Mulʼataanis na sodaachista;
15 Kanaafuu, hafuurri koo waan addaan citeef duʼa nan filadha.
Eeyyee, qaamni koo akkana taʼuu isaa* mannaa duʼuu naa wayya.+
16 Ani jireenya koo baayʼeen jibbe;+ jiraachuu koo itti fufuu hin barbaadu.
Guyyoonni koo akkuma hafuura afaanii baʼuu waan taʼaniif, na dhiisi.+
17 Ati yaada kee isa irra akka keessuuf,Isa irratti akka xiyyeeffattuufis* namni duʼu maali dha?+
18 Ati yeroo hundumaa ganama ganama hubattee kan isa ilaaltu,Yeroo yeroottis kan isa qortu maaliifi?+
19 Ati ija kee narraa hin buqqifattuu?
Hamman hancufa koo liqimsutti illee na hin dhiistuu?+
20 Yaa isa ilmaan namootaa toʼattuu,+ ani yoon cubbuu raawwadhe akkamittan si miidha?
Ati akeeka kee kan na godhatte maaliifi?
Ani baʼaa sitti taʼeeraa?
21 Balleessaa koo kan irra naaf hin darbine,Dogoggora koos kan anaaf hin dhiisne maaliifi?
Ani dhiheenyatti biyyoo keessa nan ciisa,+Ati na barbaadda, ani garuu hin jiru.”
Miiljaleewwan
^ Ykn., “hamma dimimmisa ganamaatti.”
^ Biyyoo walitti qabatee goge.
^ Kal., “wanta gaarii.”
^ Ykn., “Siʼoolitti,” jechuunis, bakka ilmaan namootaa hundi itti awwaalaman. Ibsa Jechootaa ilaali.
^ Ykn., “Hadhaaʼina lubbuu kootii.”
^ Kal., “lafee koo.”
^ Kal., “garaa kee akka irra keessuufis.”
