ADOOLESSA 8, 2022
RAASHIYAA

Kadhannaa Irraa Jabina Argachuu

BANI

Manni Murtii Koonyaa Piyervoomooskii inni magaalaa Iizyefiskiitti argamu himata obboloota keenya Sargee Aashiikmiin, Maaksiim Darandiyaʼeevii fi Aleeksaandar Kuutiin irratti dhiheenyatti murtoo ni dabarsa. Hanga ammaatti abbaan alangaa wanta obboloota keenya irratti akka murteeffamu barbaadu hin beeksisne.

Chaartii Yeroo

Ebla 14, 2021

Namoota Tajaajila Nageenyaa Federaalaa irraa ergamaniin, yoo xinnaate manneen Dhugaa Baatota Yihowaa 12 sakattaʼamaniiru. Saʼaatii torbaaf Sargee irratti qorannaan geggeeffameera. Maaksiimii fi Aleeksaandar qabamanii hidhamaniiru
Ebla 15, 2021

Maaksiimii fi Aleeksaandar mana hidhaa hamma murtiin kennamutti itti tursiisanitti ergamaniiru
Ebla 29, 2021

Aleeksaandar mana hidhaa hamma murtiin kennamutti itti tursiisan keessaa gadhiifame
Caamsaa 14, 2021

Aleeksaandar manaa akka hin baane dhorkame
Adoolessa 9, 2021

Maaksiim mana hidhaa hamma murtiin kennamutti itti tursiisan keessaa kan gadhiifame taʼus, manaa akka hin baane dhorkame
Bitootessa 14, 2022

Himanni yakkaa isa irratti dhihaachuu jalqabe

Ibsa Gabaabaa

Sargee Aashiikmiin

Bara Dhalootaa: 1973 (Zyeeshaarti, Rippabliikii Koomii)

Seenaa Jireenyaa: Waardiyyaa taʼee hojjeteera, yeroo booda immoo hojii gurgurtaa irratti hirmaateera. Dhiheenya kana yaalii baqaqsanii hodhuu onnee waan godhateef, yeroo ammaatti hojii hojjechuu hin dandaʼu

Yesuus furii akka nuuf taʼe barachuun isaa baayʼee isa tuqeera. Bara 2001tti cuuphamee Dhugaa Baatuu Yihowaa taʼe. Bara 2007tti Anistaasiyaa wajjin gaaʼela godhatan

Yaada Dhuunfaa

Kadhannaan kan si gargaare haalawwan akkamii keessatti dha?

Yeroo manni keenya sakattaʼametti, wanti hundi kan taʼe saffisaan ture. Kadhannaa dheeraa gochuuf yeroo hin arganneen ture, kanaaf akkuma Nahimiyaa isa bara duriitti turee, ogummaa fi ija jabina argachuuf kadhannaa gabaabaan dhiheesse.

Kana malees, yeroo qorannaan na irratti geggeeffamaa turetti, gaaffiiwwan nama dogoggorasan hedduu gaafatameera. Yeroon dubbachuu hin qabne akkan beekuu fi yeroo barbaachisaa taʼu qofa akkan dubbadhu akka na gargaaru Yihowaan kadhadhe.

Maaksiim Darandiyaʼeev

Bara Dhalootaa: 1985 (Iizyefiskii, Riipablikii Udmuurtiyaa)

Seenaa Jireenyaa: Ogeessa elektiriikaa taʼee hojjeta

Gaarummaa Dhugaa Baatonni Yihowaa argisiisan qoʼannaa Kitaaba Qulqulluu jalqabuuf isa kakaaseera. Bara 2000tti cuuphame. Bara 2015tti Taatyaanaa wajjin gaaʼela godhatan

Yaada Dhuunfaa

Yeroo mana hidhaa hamma murtiin kennamutti itti tursiisan keessa turtetti rakkinni addaa akkamii si mudatee ture? Kan dandamatte hoo akkamitti?

Namoota wajjin hidhamtu filachuu hin dandeessu. Yeroo tokko tokko qoosaawwan gaarii hin taane natti qoosu, qoosaawwan akkasii kolfanii akkasumaan bira darbuun baayʼee ulfaataa dha.

Wanta namoonni naa wajjin hidhaman jedhan gar malee na yaaddessaa akka jirun hubadhe. Kanaaf Yihowaatti kadhannaa dhiheessuudhaan, haalli isaa baayʼee akka natti ulfaatee fi karaa sirrii taʼeen deebii kennuu akkan dandaʼu akka na gargaaruun isa gaafadhe. Haala kana hunda keessatti, Yihowaan Waaqa namaa yaaduu fi nama kunuunsu akka taʼe hubachuu dandaʼeera.

Aleeksaandar Kuutiin

Bara Dhalootaa: 1982 (Iizyefiskii)

Seenaa Jireenyaa: Nama sibila bayyadu taʼee hojjeta

Waaʼee Yesuus erga baratee booda fakkeenya isaa hordofuuf kakaʼe. Bara 2002tti cuuphame. Bara 2018tti Guuzeelii wajjin gaaʼela godhatan

Yaada Dhuunfaa

Yeroo mana hidhaa hamma murtiin kennamutti itti tursiisan keessa turtetti gammachuu kee eeggattee itti fufuu kan dandeesse akkamiti?

Yeroon mana hidhaa hamma murtiin kennamutti itti tursiisan keessa turetti wantootan kanaan dura itti bare, jechuunis namootan jaalladhu, walgaʼiiwwan gumii, Kitaabni Qulqulluu fi barsiifanni koo na jalaa fudhatameera. Yeroon mana turetti, ganamaan kaʼee shaayee ykn buna ergan danfisee booda, haadha manaaa koo wajjin caqasa Kitaaba Quluqlluu tokko dubbisnee irratti mariʼanna turre. Namni kana gochuu na dhowwu jira jedhee matumaa yaadee hin beekun ture. Haa taʼu malee, wanti namni kam iyyuu na irraa fudhachuu hin dandeenye kadhannaa akka taʼe hubadheera. Yeroon kadhannaa dhiheessu, Yihowaan gammachuu koo eeggadhee akkan jiraadhuu fi akkan abdii hin kutanneef hafuura qulqulluu isaa naaf kennaa akka ture hubachuu dandaʼeera.

Kana malees, dhugaa baʼuuf carraawwan hedduu argadheera. . . . Namoota torbaa wajjin kutaa tokko keessatti yeroon hidhamee turetti, namoonni achi jiran hundi maaliif akkan hidhame na gaafatanii turan. Anis taaʼee sababii isaa isaaniif ibseera. Yeroo sanatti, Yihowaan tasgabbii fi nagaan akka natti dhagaʼamu na gargaareera. Anis utuu sagalee koo hin dhageessisin kadhannaadhaan Yihowaa galateeffadheera.

Obboloonni keenya Yihowaa isa, “Ani sii wajjin waanan jiruuf, hin sodaatin” jechuudhaan waadaa galetti, amanamuudhaan jalʼina haqaa isaan mudatu dandamachaa jiru.—Isaayyaas 43:5.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA