FULBAANA 14, 2023 | ODUU HAAREFFAME: FULBAANA 22, 2023
RAASHIYAA

ODUU HAAREFFAME—OBBOLEETTOTA KEENYATTI YAKKAMTOOTA AKKA TAʼAN ISAANITTI MURTAAʼE | Obboleettonni Sadii Kadhannaadhaan Jabina Argataniiru

BANI

Fulbaana 21, 2023, Manni Murtii Godinaa Ziyeeyaa inni Naannoo Amuuritti argamu obboleettota keenya Maargaaritaa Moosiyeenkoo, Gaaliinaa Yaatisikii fi Yeeleenaa Yaatsaak yakkamtoota akka taʼan murteesse. Hidhaan daangaa waggaa sadii, waggaa lamaa akkasumas waggaa lamaa fi jiʼa jaʼa akkuma toora maqaa isaanitti isaanitti murtaaʼeera. Kanaafuu yeroo kanatti mana hidhaa galuun isaan hin barbaachisu.

Ibsa Gabaabaa

Maargaaritaa Moosiyeenkoo

Bara Dhalootaa: 1978 (Kiraasnooyariskii, Naannoo Kiraasnooyariskii)

Seenaa Jireenyaa: Uffata hodhiti. Konistaantiinii wajjin bara 1998tti gaaʼela godhatan. Konistaantiin Adoolessa 14, 2021 yakkamaa jedhamee himatame, hidhaa daangaa waggaa jaʼaatu isatti murteeffame

Kitaaba Qulqulluu qoʼachuu kan jalqabde umurii ishii waggaa 18tti, firri ishii dhihoo erga duʼee boodadha. Dhugaa Baatuu Yihowaa taatee kan cuuphamte bara 2001ttidha

Yaada Dhuunfaa

Jabaattee akka dhaabbattu kan si gargaare maalidha?

Fakkeenyi 21:31 Walgaʼii naannoo bara 2018 “Ija Jabeeyyii Taʼaa”! jedhamu irratti yommuu ibsamu dhagaʼee akkan ture nan yaadadha. Caqasichi, “Fardi guyyaa waraanaatiif ni qopheeffama, fayyinni garuu Yihowaa biraa argama” jedha. Fardeen uumamaan dafanii biraʼtu. Yeroo waraanaatti akka hin sodaanne gochuuf, ‘qopheeffamuu’ ykn leenjifamuu qabu. Kun nuufis ni hojjeta. Amantii fi ija jabina qabaannee hin dhalanne. Amalawwan kana horachuudhaan waraana nu mudatuuf qophaaʼuu qabna. Kana gochuuf immoo, hariiroo Yihowaa wajjin qabu cimsachuun, Kitaaba Qulqulluu gad fageenyaan qoʼachuunii fi haalli isaa maal iyyuu yoo taʼe amantiin koo cimaa taʼee akka itti fufu kadhachuun baayʼee barbaachisaa taʼuu isaa hubadheera.

Gaaliinaa Yaatisik a

Bara Dhalootaa: 1950 (Ziyeeyaa)

Seenaa Jireenyaa: Gulaaltuu baasii dippaartimentiiwwan ijaarsaa fi suphaa magaalaa taatee hojjechaa turte. Amma soorama baateetti

Bara 1971tti Vaalarii wajjin gaaʼela godhatan. Intala tokkoo fi ilma tokko godhataniiru. Bara 1995tti abbaan manaa ishii irraa duʼe

Waaqayyo hin jiru jedhamaa kan guddatte taatus, akkaataan jireenyi itti uumame garuu yeroo hundumaa gaaffii ishiitti taʼa ture. Masaraa Eegumsaa fi Dammaqaa! dubbisuu fi walgaʼii irratti argamuu jalqabde. Ragaa Uumaan jiraachuu isaa mirkaneessu argatte. Bara 1994tti cuuphamte

Yaada Dhuunfaa

Yeroo rakkisaa kanatti humna kadhannaan qabu kan hubatte akkamitti?

Haala hin eegamne keessatti illee kadhannaa gabaabaa dhiheessuun faayidaa guddaa akka qabu caalaatti hubachuu dandaʼeera. Kun immoo miira koo toʼachuu fi deebii sirrii deebisuuf na gargaara. Warri kaanis akka naaf kadhatan beekuun koo baayʼee na gammachiisa. Yaaqoob 5:16, “Wawwaannaan nama qajeelaa humna qaba” jedha. Nagaa keessaa qabaachuu kanan dandaʼee fi kanan hin sodaanne kadhannaa namoonni kaan waaʼee kootiif dhiheessaniin akka taʼe beeka. Kadhannaan koos taʼe kadhannaan warri kaan waaʼee koo dhiheessan, akkuma bidiruu yeroo balaa bishaan irra bololiʼuuf gargaaruuti.

Yeleenaa Yitisaak b

Bara Dhalootaa: 1972 (Ziyeeyaa)

Seenaa Jireenyaa: Uffata hodhiti

Bara 1994tti Andiree wajjin gaaʼela godhatan. Intala tokko godhataniiru

Haati Yeleenaa fi obboleessi ishii quxusuun Yeevgenii Bitusoov jalqaba Dhugaa Baatota Yihowaa wajjin qoʼannaa Kitaaba Qulqulluu eegalan. Yeleenaa faayidaa qajeelfamni Kitaabni Qulqulluun qabuu fi qajeelfama kana hojii irra oolchuun ishii jireenya ishii akka fooyyessu hubatte. Bara 1997tti cuuphamte

Yaada Dhuunfaa

Ariʼatamni kun dhiibbaa akkamii si irraan geessiseera?

Hariiroon Waaqayyoo wajjin qabu caalaatti cimeera. Yihowaan tasgabbii akka naaf kennu nan kadhadha, innis nagaa keessaa naaf kennuudhaan deebii akka naaf kenne hubadheera. Dinqisiifannaan obbolootaa fi obboleettota kootiif qabus guddateera. Na gargaaruuf qophaaʼoo akka taʼan beekuun koo na jajjabeessa. Miseensa maatii guddaa tokkoo akkan taʼe natti dhagaʼama. Kana malees, obboloota keenya akkuma obboleessa keenya Yeevgenii mana hidhaa jiraniif kadhachuun barbaachisaa akka taʼe hubadheera. Guyyaa guyyaadhaanan isaaniif kadhadha.

Muuxannoon obboleettota keenyaa Yihowaan kadhannaa keenya akka dhagaʼuu fi amalawwan qorumsa nu mudatu kam iyyuu moʼuuf nu gargaaru horachuuf akka nu gargaaru nu yaadachiisa.—1 Yohaannis 5:14.

Chaartii Yeroo

Bitootessa 21, 2019

Manni Maargaaritaa fi Konistaantiin ni sakattaʼame
Onkoloolessa 13, 2020

Manni Yeleenaa fi Gaaliinaa ni sakattaʼame
Sadaasa 22, 2021

Himanni yakkaa ni dhihaate.
Guraandhala 15, 2022

Imala akka hin goone dhorkaman
Ebla 24, 2023

Himanni yakkaa mana murtiitti ilaalamuu eegale

a b Obboleettonni keenya Gaaliinaa Yaatisikii fi Yeleenaa Yaatsaak firoota dhiigaa miti.

Dabalataan Ilaali

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA