MUDDEE 6, 2023
RAASHIYAA

“Qorumsi Kamiyyuu Amantii Dhugaa Laaffisuu hin Dandaʼu”

BANI

Manni Murtii Godina Kaaltaansikii Naannoo Kemeroovoo dhimma obboleessa keenya Aleksaandar Siikuunoov irratti dhiheenyatti murtoo kenna jedhamee eegama. Abbaan alangaa hanga ammaatti wanta obboleessa keenya irratti akka murteeffamu barbaadu hin beeksisne.

Chaartii Yeroo

Aleksaandar Siikuunoov

Bara Dhalootaa: 1967 (Kaaltaan)

Seenaa Jireenyaa: Mahaandiisii siviilii taʼee hojjeteera

Bara 1989tti Yeeleenaa wajjin gaaʼela godhatan

Waaqayyo jiraachuu isaatti kan hin amanne ture. Waaʼee Kitaaba Qulqulluu kan beeke Dhugaa Baatuu Yihowaa isaa wajjin hojjetaa turerraati. Aleksaandar affeerraa akka qoʼatu isaaf dhihaate fudhachuu isaa dura, jiʼa jaʼa keessatti guutummaa Kitaaba Qulqulluu dubbisee xumure. Bara 1997tti cuuphame. Dhugaa barates haadha isaa, obboleettii isaa hangafaa fi haadha manaa isaatti kan hime yommuu taʼu, hundi isaanii iyyuu Dhugaa Baatota Yihowaa taʼaniiru

Yaada Dhuunfaa

Seenaan Kitaaba Qulqulluu keessumaa yeroo rakkisaa taʼe kanatti baayʼee si gargaare isa kami?

Fakkeenyi Daaniʼel raajichaa baayʼee na jajjabeesseera. Daaniʼel 6:4, 5tti akkana jedheera: “Yeroo sanatti abbootiin taayitaa ol aanoonii fi bulchitoonni koonyaa dhimmoota mootummaa wajjin haala wal qabateen Daaniʼel irratti himata dhiheessuuf sababa barbaadaa turan; haa taʼu malee, inni amanamaa, kan hin dhiboofnee fi balleessaa tokko illee kan hin qabne waan tureef, sababa itti isa himatanis taʼe balleessaa tokko illee isa irratti argachuu hin dandeenye. Achiis namoonni kun, ‘Wanta seera Waaqa isaa wajjin wal qabatuun yoo taʼe malee, sababa Daaniʼel kana himachuu itti dandeenyu tokko illee hin argannu’ jedhan.” Daaniʼeliin himachuuf sababii tokkollee waan hin qabneef, wanta amanamummaa fi waaqeffannaa isaa wajjin wal qabate tokko akka sababiitti dhiheessuu qabu turan. Kanaafuu, kiyyoo keessa isa galchuuf isa hordofuu jalqaban. Haa taʼu malee, Daaniʼel akkuma yeroo hunda godhu Yihowaa waaqeffachuu isaa itti fufeera. Daaniʼel dhugaa yoom iyyuu hin jijjiiramne tokko mirkaneesseera: Qorumsi kamiyyuu amantii dhugaa laaffisuu hin dandaʼu. Fakkeenyi kun waaqeffannaa Yihowaa irratti hamma naaf dandaʼame dammaqaa taʼee itti fufuuf na gargaareera.

Namoota amanamoo hedduu, namni Yihowaa fi Ilma isaa Yesuus Kiristoos irratti amantii qabu kam iyyuu akka hin qaanofne nu yaadachiisan qabaachuu keenyatti guddaa galateeffanna.—Roomaa 10:11.

Chaartii Yeroo

Ebla 27, 2021

Himanni isa irratti dhihaate
Caamsaa 2, 2021

Manni isaa ni sakattaʼame. Qabamee mana hidhaa hamma mana murtiitti dhihaatanitti keessatti hidhame
Caamsaa 4, 2021

Mana hidhaa hamma mana murtiitti dhihaatanitti keessatti hidhaman keessaa gadhiifamee manaa akka hin baane dhorkame
Waxabajjii 24, 2021

Dhorkaan manaa akka hin baane isa irratti godhame kaʼee akka hin imalle dhorkame
Adoolessa 25, 2023

Himanni yakkaa isa irratti dhihaate ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA