ADOOLESSA 7, 2022
RAASHIYAA

Yeevgeenii Ziniichiin Akkuma Warra Isaa, Akkoo fi Akkaakayyuu Isaa Yihowaadhaaf Amanamaa Taʼeera

BANI

Waxabajjii 27, 2022, Manni Murtii Koonyaa Okitiyaabirskii inni Kiraasnaayaarsikitti argamu, obboleessi keenya Yeevgeenii Ziniichiin waggaa jaʼaaf akka hidhamu itti murteesseera. Yeruma sana mana hidhaatti geeffameera.

Chaartii Yeroo

Muddee 11, 2020

Manni Yeevgeenii ni sakattaʼame
Amajjii 21, 2021

Himanni yakkaa isa irratti dhihaachuu jalqabe
Onkoloolessa 19, 2021

Sochii jaarmiyaa finxaaleessaa taʼe qindeessiteetta jedhamee himatame
Onkoloolessa 20, 2021

Akka hin imalle dhorkaan isaan irratti godhame
Muddee 14, 2021

Himanni yakkaa isa irratti dhihaachuu jalqabe

Ibsa Gabaabaa

Yeevgeenii Ziniichii

Bara Dhalootaa: 1966 (Naazaarovo, Naannoo Kiraasnaayaarsik)

Seenaa Jireenyaa: Warri isaa, akkoon isaa fi akaakayyuun isaa sababii amantaa isaaniitiin bara bulchiinsa Sooviyeetitti ariʼatamni isaan irra gaʼeera

Bara 1982tti cuuphamee Dhugaa Baatuu Yihowaa taʼe. Bara 1988tti Maariyaa wajjin gaaʼela kan dhaabbatan yommuu taʼu, intala isaanii waliin guddisaniiru. Maariyaan himanni yakkaa isa irratti baname kun utuu ilaalamee hin xumuramin duʼaan boqottetti

Yaada Dhuunfaa

Warri kee, akkoonkee fi akaakayyuun kee, akkasumas warri, akkoonii fi akaakkayyuu haadha manaa keetii sababii amantii isaaniitiin ariʼatamni isaan irra gaʼee ture. Fakkeenyi isaanii dhiibbaa akkamii si irratti godheera?

Yeroo sanatti, Dhugaa Baatota Yihowaa irra yeroo baayʼee ariʼatamni gaʼaa ture. Ilaalcha isaan ariʼatamaaf qaban irraa barumsa guddaa argadheera. Wanta isaan irra gaʼaa turetti akka aaran ykn akka mufatan matumaa dubbatanii hin beekan. Hundi isaanii iyyuu, Kiristiyaanota dhugaa waan taʼaniif ariʼatamni isaan irra gaʼuu akka dandaʼu eeganii turan. Fakkeenya warra koo irratti yommuun xiinxalu, amantii akkasii qabaachuu kan dandaʼan dhugaa akka gaariitti waan hubatanii fi Yihowaa wajjin hariiroo cimaa waan qabaniif akka taʼe hubachuu dandaʼeera. Wanta abbaan koo raawwachaa ture keessaa tokko kanan amma illee akka gaariitti yaadadhu, abbaan koo yeroo hunda gad of qabuudhaan jilbeenfatee kadhannaa yommuu dhiheessu isa ilaalaa akkan ture dha.

Waaʼee warra haadha manaa koo Maariyaas wantuma walfakkaatu jechuun ni danaʼama. Dhugaan kutaa jireenya isaanii utuu hin taʼin jireenya isaanii ture. Maariyaan amantii cimaa akka qabaattu, yeroo hundumaa Kitaaba Qulqulluu akka dubbistuu fi akka qoʼattu, akkasumas obbolootaa fi obboleettota gumii keessa jiraniif garaadhaa akka yaaddu ishii gargaaraniiru. Yeroo dhukkubsachaa turtettii fi yaaliin godhamaafii turetti dabalatee, hamma gaafa duʼaan boqottetti, warri kaan amantii isaanii akka cimsatan isaan gargaaruu ishii itti fufteetti. Namoonni jajjabinni isaan barbaachisu eenyufaa akka taʼan na yaadachiisti turte.

Haalawwan baayʼee rakkisoo taʼan kana akka dandamattu kan si gargaare maali dha?

Wanti abdii akka hin kutanne na kakaase fedhii ani Yihowaa cina dhaabbachuuf, akkasumas obbolootaa fi obboleettota koo gargaaruu koo itti fufuuf qabu dha. Hamma naaf dandaʼame obboloota mana hidhaa keessa jiran hedduudhaaf gargaarsa qabatamaa gochuuf carraaqqii godheera. Yihowaan obboloota koo gargaaruuf natti fayyadamuun isaa miirri gaariin akka natti dhagaʼamu godheera; akkasumas akkan barbaadamu akka natti dhagaʼamu godheera. Kana malees, Yihowaan tokkoon tokkoon keenya akkamitti akka kunuunsu na barsiiseera.

Gaarummaa fi arjummaa obboloonnii fi obboleettonni natti argisiisanis, Yihowaan akka na jaallatuu fi isa duratti fudhatama akkan qabu caalaatti hubachuuf na gargaareera. Keessumaa jiʼoota muraasaa asitti, gadda cimaa yeroo Maariyaan duʼaan boqottetti natti dhagaʼametti gaarummaan akkasii caalaatti faayidaa guddaa naaf argamsiiseera.

Hamma Yeevgeeniin akkuma warra isaa, akkasumas akkoo fi akaakayyuu isaa, yeroo rakkisaa taʼe kanatti ija jabina argisiisuu fi jabaatee dhaabbachuuf carraaqqii gochuu isaa itti fufetti, Yihowaan jaalala akka isatti argisiisuu fi akka isa jajjabeessu amanannaa guutuu qabna.—Faarfannaa 86:17.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA