ଆପଣ ଦେଖିଥିବେ ଯେ ବର୍ତ୍ତମାନ ଦୁନିଆରେ ଅଧିକାଂଶ ଲୋକ କେବଳ ନିଜ ବିଷୟରେ ହିଁ ଭାବନ୍ତି । ସେମାନେ ଭାବନ୍ତି ଯେ ତାଙ୍କୁ ଅନ୍ୟମାନଙ୍କଠାରୁ ଅଧିକ ଗୁରୁତ୍ୱ ଦିଆଯିବା ଉଚିତ୍‌ ଓ ସେମାନଙ୍କୁ ଲାଗେ ଯେ ସବୁ ଜିନିଷରେ ସେମାନଙ୍କର ଅଧିକାର ଅଛି । ସେମାନଙ୍କୁ ଯେତେ ଆଦର ଦିଆଗଲେ ମଧ୍ୟ ସେମାନଙ୍କୁ ଲାଗେ ଯେ ସେମାନେ ଆହୁରି ଆଦର ପାଇବାର ଯୋଗ୍ୟ । ଏପରି ଲୋକମାନେ ସ୍ୱାର୍ଥୀ ଥାଆନ୍ତି ଏବଂ ସେମାନେ କୌଣସି କଥା ପାଇଁ କୃତଜ୍ଞତା ଦେଖାନ୍ତି ନାହିଁ । ବାଇବଲରେ କୁହାଯାଇଥିଲା ଯେ ଶେଷକାଳରେ ଏପରି ହିଁ ଲୋକମାନେ ଥିବେ ।—୨ ତୀମ. ୩:୨.

ପ୍ରାଚୀନ ସମୟରେ ମଧ୍ୟ ଅନେକ ଲୋକ ଏପରି ହିଁ ଥିଲେ । ଯେପରି, ଆଦମ ଓ ହବା ଭାବିଲେ ଯେ ସେମାନେ ନିଜେ ନିଷ୍ପତ୍ତି ନେବେ ଯେ ସେମାନଙ୍କ ପାଇଁ ଠିକ୍‌ କʼଣ ଓ ଭୁଲ କʼଣ । ସେମାନଙ୍କର ଏହି ନିଷ୍ପତ୍ତିର ଖରାପ ପରିଣାମ ଆମେ ଆଜି ଯାଏ ଭୋଗୁଛୁ । ଅନେକ ଶତାବ୍ଦୀ ପରେ ରାଜା ଉଷୀୟ ଯିହୋବାଙ୍କ ମନ୍ଦିରରେ ଧୂପ ଜଳାଇବାର ଦୁଃସାହସ କଲେ, ଯାହାକି ଯାଜକମାନଙ୍କର କାମ ଥିଲା । (୨ ବଂଶା. ୨୬:୧୮, ୧୯) ଫାରୂଶୀ ଓ ସାଦ୍ଦୂକୀମାନଙ୍କୁ ଲାଗୁଥିଲା ଯେ ସେମାନେ ଅବ୍ରହାମଙ୍କ ବଂଶରୁ ହୋଇଥିବା ଯୋଗୁଁ ଯିହୋବାଙ୍କଠାରୁ ବିଶେଷ ଆଶିଷ ପାଇବାର ଯୋଗ୍ୟ ।—ମାଥି. ୩:୯.

ଆଜି ଆମ ଚାରିପାଖରେ ଏପରି ଲୋକମାନେ ଅଛନ୍ତି ଯେଉଁମାନେ କେବଳ ନିଜ ବିଷୟରେ ଭାବନ୍ତି ଓ ଅହଙ୍କାରୀ ଅଟନ୍ତି । ଏପରି ଚିନ୍ତାଧାରାର ପ୍ରଭାବ ଆମ ଉପରେ ବି ପଡ଼ିପାରେ । (ଗାଲା. ୫:୨୬) ଆମେ ହୁଏତ ଭାବିବା ଯେ ଆମକୁ ଅନ୍ୟମାନଙ୍କଠାରୁ ଅଧିକ ଗୁରୁତ୍ୱ ଦିଆଯିବା ଉଚିତ୍‌ କିମ୍ବା କୌଣସି ଜିନିଷ ଉପରେ ଆମର ହିଁ ଅଧିକାର ଅଛି । ଏପରି ଚିନ୍ତାଧାରାଠାରୁ ଦୂରେଇ ରହିବା ପାଇଁ ଆମେ କʼଣ କରିପାରିବା ? ସବୁଠୁ ପ୍ରଥମେ ଆମକୁ ଯିହୋବାଙ୍କ ଚିନ୍ତାଧାରା ଜାଣିବାକୁ ହେବ । ଆସନ୍ତୁ ଆମେ ଏହି କଥାକୁ ଦୁଇଟି ସିଦ୍ଧାନ୍ତରୁ ବୁଝିବା ପାଇଁ ଚେଷ୍ଟା କରିବା ।

 ଆମେ କʼଣ ପାଇବାର ଯୋଗ୍ୟ ଏହା ନିର୍ଦ୍ଧାରିତ କରିବାର ଅଧିକାର କେବଳ ଯିହୋବାଙ୍କର ଅଛି । କିଛି ଉଦାହରଣ ଉପରେ ଧ୍ୟାନ ଦିଅନ୍ତୁ:

• ପରିବାର ବିଷୟରେ ଯଦି ଦେଖିବା, ତାହେଲେ ସ୍ୱାମୀ ନିଜ ସ୍ତ୍ରୀଙ୍କୁ ପ୍ରେମ ଓ ସ୍ତ୍ରୀ ନିଜ ସ୍ୱାମୀଙ୍କୁ ଆଦର କରିବା ଉଚିତ୍‌ । (ଏଫି. ୫:୩୩) ବିବାହ ପରେ ସ୍ୱାମୀ ସ୍ତ୍ରୀ କେବଳ ନିଜ ସାଥୀକୁ ପ୍ରେମ ଦେଖାଇବା ଉଚିତ୍‌ । (୧ କରି. ୭:୩) ବାପାମାଆ ନିଜ ପିଲାମାନଙ୍କର ଲାଳନପାଳନ କରିବା ସହିତ ସେମାନଙ୍କୁ ପ୍ରେମ ଦେଖାଇବା ଜରୁରୀ ଏବଂ ପିଲାମାନଙ୍କୁ ନିଜ ବାପାମାଆଙ୍କର ଆଜ୍ଞା ମାନିବା ଜରୁରୀ ।—୨ କରି. ୧୨:୧୪; ଏଫି. ୬:୨.

• ମଣ୍ଡଳୀ ବିଷୟରେ ଯଦି ଦେଖିବା, ତାହେଲେ ଭାଇଭଉଣୀମାନଙ୍କୁ ପ୍ରାଚୀନମାନଙ୍କର ଆଦର କରିବା ଉଚିତ୍‌, କାରଣ ସେମାନେ ଭାଇଭଉଣୀମାନଙ୍କ ପାଇଁ କଠିନ ପରିଶ୍ରମ କରନ୍ତି । (୧ ଥେସ. ୫:୧୨) କିନ୍ତୁ ପ୍ରାଚୀନମାନଙ୍କୁ ଭାଇଭଉଣୀମାନଙ୍କ ଉପରେ ଶାସନ କରିବାର ଅଧିକାର ନାହିଁ ।—୧ ପିତ. ୫:୨, ୩.

• ସରକାର ଓ ଅଧିକାରୀମାନଙ୍କ ବିଷୟରେ ଯଦି ଦେଖିବା, ତାହେଲେ ସେମାନଙ୍କର ଏହା ଅଧିକାର ଅଛି ଯେ ଲୋକମାନେ ସେମାନଙ୍କର ଆଦର କରନ୍ତୁ ଓ ଟ୍ୟାକ୍ସ ଦିଅନ୍ତୁ ।—ରୋମୀ. ୧୩:୧, ୬, ୭.

ଯିହୋବା ଆମକୁ ବହୁତ କିଛି ଦେଇଛନ୍ତି, ଯାହାର ଆମେ ଯୋଗ୍ୟ ବି ନାହୁଁ । ପାପ ଯୋଗୁଁ ମଣିଷମାନେ କେବଳ ମୃତ୍ୟୁର ହିଁ ଯୋଗ୍ୟ । (ରୋମୀ. ୬:୨୩) କିନ୍ତୁ ଯିହୋବା ନିଜ ଅଟଳ ପ୍ରେମ ଯୋଗୁଁ ଆମକୁ ଅନେକ ଆଶିଷ ଦିଅନ୍ତି । (ଗୀତ. ୧୦୩:୧୦, ୧୧) ତାଙ୍କଠାରୁ ମିଳିଥିବା ପ୍ରତ୍ୟେକ ଆଶିଷ ଓ ପ୍ରତ୍ୟେକ ଦାୟିତ୍ୱ ତାଙ୍କ ମହାକୃପାର ପ୍ରମାଣ ଅଟେ ଯାହାର ଆମେ ଯୋଗ୍ୟ ବି ନାହୁଁ ।—ରୋମୀ. ୧୨:୬-୮; ଏଫି. ୨:୮.

ଦୁନିଆର ଚିନ୍ତାଧାରାଠାରୁ ଦୂରେଇ ରୁହନ୍ତୁ । ଯଦି ଆମେ ଧ୍ୟାନ ଦେବା ନାହିଁ, ତାହେଲେ ହୁଏତ ଆମେ ଦୁନିଆର ଲୋକଙ୍କ ଭଳି ଭାବିବା ଯେ ଆମେ ଅନ୍ୟମାନଙ୍କଠାରୁ ଅଧିକ ଯୋଗ୍ୟ । ଯୀଶୁ ଏହି କଥାକୁ ବୁଝାଇବା ପାଇଁ ଗୋଟିଏ ଉଦାହରଣ ଦେଲେ । ସେ କହିଲେ ଦ୍ରାକ୍ଷାକ୍ଷେତ୍ରର ଜଣେ ମାଲିକ ଭୋର ସକାଳେ କିଛି ଶ୍ରମିକମାନଙ୍କୁ କାମ କରିବା ପାଇଁ ଡାକିଲେ । ସେମାନେ ପାରିଶ୍ରମିକ ଭାବେ ଆଠ ଅଣା ବା ରୂପାର ଗୋଟିଏ ମୁଦ୍ରା ନେବା ପାଇଁ ରାଜି ହୋଇଯାʼନ୍ତି । ତାʼପରେ ମାଲିକ ଆଉ କିଛି ଶ୍ରମିକମାନଙ୍କୁ କାମ ପାଇଁ ଡାକନ୍ତି । ସନ୍ଧ୍ୟାରେ କାମ କରିବା ପରେ ମାଲିକ ସମସ୍ତଙ୍କୁ ରୂପାର ଗୋଟିଏ ମୁଦ୍ରା ଦିଅନ୍ତି । ସେସମୟରେ ଯେଉଁ ଶ୍ରମିକମାନେ ସକାଳୁ ନେଇ ପ୍ରଖର ଖରାରେ କାମ କରୁଥିଲେ, ସେମାନେ ଅଭିଯୋଗ କରିବାକୁ ଲାଗନ୍ତି ଯେ ସେମାନଙ୍କୁ ସେହି ଶ୍ରମିକମାନଙ୍କଠାରୁ ଅଧିକ ମିଳିବା ଉଚିତ୍‌ ଯେଉଁମାନେ କେବଳ ଗୋଟିଏ ଘଣ୍ଟା କାମ କଲେ । (ମାଥି. ୨୦:୧-୧୬) ଏହି ଉଦାହରଣରୁ ଯୀଶୁ ଶିଖାଇଲେ ଯେ ଯିହୋବାଙ୍କଠାରୁ ଆମକୁ ଯାହା ବି ମିଳିଛି, ସେତିକିରେ ଆମକୁ ଖୁସି ରହିବା ଉଚିତ୍‌ ।

କୃତଜ୍ଞତା ଦେଖାନ୍ତୁ ଓ ଅତ୍ୟଧିକ ଆଶା କରନ୍ତୁ ନାହିଁ । (୧ ଥେସ. ୫:୧୮) ପ୍ରେରିତ ପାଉଲ ଚାହିଁଥିଲେ ତାଙ୍କ ଆବଶ୍ୟକତା ପୂରା କରିବା ପାଇଁ କରିନ୍ଥର ଭାଇଭଉଣୀମାନଙ୍କୁ କହିପାରିଥାʼନ୍ତେ, କିନ୍ତୁ ସେ ଏପରି କଲେ ନାହିଁ । (୧ କରି. ୯:୧୧-୧୪) ଆମକୁ ମଧ୍ୟ ଯାହା ମିଳିଛି ତାʼପାଇଁ କୃତଜ୍ଞତା ଦେଖାଇବା  ଉଚିତ୍‌ ଏବଂ ଅନ୍ୟମାନଙ୍କଠାରୁ ସବୁବେଳେ କିଛି ପାଇବାର ଆଶା କରିବା ଉଚିତ୍‌ ନୁହେଁ ।

ନମ୍ର ରହନ୍ତୁ । ଯେବେ କେହି ନିଜକୁ ଅଧିକ ଗୁରୁତ୍ୱ ଦିଏ, ତେବେ ହୁଏତ ତାକୁ ଲାଗେ ଯେ ତାକୁ ଅନ୍ୟମାନଙ୍କଠାରୁ ଅଧିକ ପାଇବାର ଅଧିକାର ଅଛି । ଏପରି ଚିନ୍ତାଧାରାଠାରୁ ଦୂରେଇ ରହିବା ପାଇଁ ନମ୍ର ହେବା ବହୁତ ଜରୁରୀ ।

ନମ୍ର ରହିବା ବିଷୟରେ ଭବିଷ୍ୟଦ୍‌ବକ୍ତା ଦାନିୟେଲ ଆମ ପାଇଁ ଗୋଟିଏ ବଢ଼ିଆ ଉଦାହରଣ । ସେ ଉଚ୍ଚ ବଂଶର ଥିଲେ, ଦେଖିବାକୁ ବହୁତ ସୁନ୍ଦର ଥିଲେ, ବୁଦ୍ଧିମାନ ଥିଲେ ଓ ତାଙ୍କ ପାଖରେ ଅନେକ ଦକ୍ଷତା ଥିଲା । କିନ୍ତୁ ସେ କେବେ ବି ଏପରି ଭାବିଲେ ନାହିଁ ଯେ ତାଙ୍କୁ ଯେଉଁ ମାନସମ୍ମାନ ମିଳିଛି ତାହା ପାଇବାର ତାଙ୍କ ଅଧିକାର ଅଛି ଓ ସେ ଅନ୍ୟମାନଙ୍କଠାରୁ ଶ୍ରେଷ୍ଠ । (ଦାନି. ୧:୩, ୪, ୧୯, ୨୦) ସେ ନମ୍ର ଥିବା ଯୋଗୁଁ ଯିହୋବାଙ୍କ ପାଇଁ ବହୁମୂଲ୍ୟ ଥିଲେ ।—ଦାନି. ୨:୩୦; ୧୦:୧୧, ୧୨.

ତାହେଲେ ଆସନ୍ତୁ ଆମେ ଦୁନିଆର ଲୋକମାନଙ୍କ ଭଳି ସ୍ୱାର୍ଥୀ ହେବା ନାହିଁ । ଏହା ପରିବର୍ତ୍ତେ ଆମ ପାଖରେ ଯାହା ଅଛି ସେତିକିରେ ଖୁସି ରହିବା ଓ ମନେରଖିବା ଯେ ଏସବୁ ଆମକୁ ଯିହୋବାଙ୍କ ମହାକୃପା ଯୋଗୁଁ ହିଁ ମିଳିଛି ।