РОМАН нырма гыццыл уыди, йӕ хуыздӕр ӕмбал аварийы куы фӕмард, уӕд. «Ме ’мбал куы амард, уӕд тынг маст кодтон,– загъта Роман.– Уыцы хабары фӕстӕ мын бирӕ азты дӕргъы ӕнцой нӕ лӕвӕрдта иу хъуыды, цымӕ мӕрдты исты ис, зӕгъгӕ».

Кӕд адӕм ӕнусты дӕргъы мӕлынц, уӕддӕр нӕм мӕлӕт ӕнахуыр кӕсы. Адӕймагыл цасфӕнды ма цӕуа – мӕлын ӕй нӕ фӕфӕнды. Бирӕтӕ мӕлӕтӕй тӕрсынц, уымӕн ӕмӕ йӕ нӕ зонынц, мӕрдты исты ис ӕви нӕ.

Фӕзӕгъынц, зӕгъгӕ, адӕймаг куы амӕлы, уӕд йӕ уд цӕргӕйӕ баззайы. Сӕ хъуыдымӕ гӕсгӕ, хорз адӕм уӕлӕрвтӕм ацӕуынц, фыдгӕнджытӕ та сӕ тӕригъӕдты тыххӕй ӕнустӕм зындоны фӕхъизӕмар кӕнынц. Иннӕтӕ та хъуыды кӕнынц, адӕймаг куы амӕлы, уӕд бынтондӕр кӕй нал вӕййы ӕмӕ ӕппынфӕстаг кӕй ферох вӕййы.

Фыццӕгты ныхӕстӕм гӕсгӕ, адӕймаг куы амӕлы, уӕд ӕндӕр кӕмдӕр фӕцӕры. Дыккӕгты ныхӕстӕй та афтӕ уайы, ӕмӕ адӕймаг дзӕгъӕлы цӕры. Афтӕ чи хъуыды кӕны, уыдон вӕййынц ахӕм зондыл хӕст: «Хӕрӕм ӕмӕ нуазӕм,– уӕддӕр райсом амӕлдзыстӕм» (1 Коринфӕгтӕм 15:32).

Библийы афтӕ фыст нӕй, ӕмӕ адӕймаг куы амӕлы, уӕд дзы цыдӕр цӕргӕйӕ кӕй баззайы. Паддзах Соломон Хуыцауы фӕндӕй ныффыста: «Удӕгӕстӕ зонынц, кӕй амӕлдзысты, мӕрдтӕ та ӕппындӕр ницы зонынц» (Екклесиаст 9:5). «Ӕппындӕр [чи] ницы зоны», уый, йӕ алыварс цы фӕцӕуы, уый нӕ фембары. Мӕрдтӕн сӕ бон ӕппындӕр ницы у. Уӕдӕ удӕгӕстыл сӕ бон нӕдӕр хӕрзаудӕн кӕнын у, нӕдӕр – фыдаудӕн.

Хуыцау адӕймаджы афтӕ не сфӕлдыста, цӕмӕй иу гыццыл ацӕра, ӕмӕ уый фӕстӕ амӕла. Фыццаг нӕлгоймаг Адамы сфӕлдыста, цӕмӕй зӕххыл ӕнустӕм цардаид. Хуыцау мӕлӕты кой скодта ӕрмӕстдӕр иу хатт, Адам коммӕ куы нӕ бакастаид, уӕд ӕм цы  ӕнхъӕлмӕ каст, уый тыххӕй йын куы дзырдта, уӕд. Хуыцау ын бафӕдзӕхста, цӕмӕй иу бӕласы дыргътӕй ма бахордтаид, ӕмӕ йын загъта, зӕгъгӕ дзы куы бахӕрай, уӕд «амӕлдзынӕ» (Райдиан 2:17). Адам ӕмӕ Евӕ Хуыцауы ныхасы сӕрты куы нӕ ахызтаиккой, уӕд сӕхӕдӕг дӕр ӕмӕ сӕ байзӕддӕгтӕ иууылдӕр зӕххыл ӕнустӕм цардаиккой.

Фӕлӕ Адам Хуыцаумӕ нӕ байхъуыста, ӕмӕ афтӕмӕй тӕригъӕд сарӕзта, ӕмӕ фӕстӕдӕр амард (Ромӕгтӕм 6:23). Йӕ мӕлӕты фӕстӕ дзы цӕргӕйӕ ницы баззад. Куы амард, уӕд нал уыд. Хуыцау Адамӕн загъта: «Дӕ хид калгӕйӕ амал кӕндзынӕ дӕ къӕбӕр, цалынмӕ фӕстӕмӕ зӕхмӕ нӕ аздӕхай, уӕдмӕ, уымӕн ӕмӕ уымӕй конд дӕ. Сыджыт дӕ, ӕмӕ фӕстӕмӕ сыджытмӕ аздӕхдзынӕ» (Райдиан 3:19). Адӕм иууылдӕр Адамӕй кӕй равзӕрдысты, уымӕ гӕсгӕ не ’ппӕт дӕр нӕ туджы рахастам тӕригъӕд ӕмӕ мӕлӕт (Ромӕгтӕм 5:12).

Кӕд Адам Хуыцауы коммӕ нӕ бакаст, уӕддӕр Хуыцау йӕ фӕнд сӕххӕст кӕндзӕн – зӕхх ын йӕ байзӕддӕгтӕй байдзаг кӕндзӕн (Райдиан 1:28; Исай 55:11). Чи амард, уыдонӕй бирӕты тагъд Хуыцау фӕстӕмӕ цардмӕ раздахдзӕн. Уыцы рӕстӕджы тыххӕй апостол Павел загъта: «Райгас уыдзысты рӕстгӕнджытӕ дӕр ӕмӕ фыдгӕнджытӕ дӕр» (Хъуыддӕгтӕ 24:15).

Уӕлдӕр кӕй кой кодтам, уыцы нӕлгоймаг, Роман, Библи ахуыр кӕнын райдыдта, ӕмӕ базыдта, Йегъовӕйы тыххӕй ӕмӕ мӕлӕты тыххӕй Библи цы дзуры, уый. Уый йыл тынг фӕзынд. Йӕхӕдӕг цы радзырдта, уый бакӕсӕн ис ацы журналы 11 фарсыл.