Хуыцау адӕймаг нӕу, цӕмӕй йын ус уа ӕмӕ йын сывӕллӕттӕ рауадза, уымӕн ӕмӕ уый у Сфӕлдисӕг ӕмӕ Царддӕттӕг. Хуыцау адӕмы афтӕ сфӕлдыста, ӕмӕ йӕ сӕ бон у фӕзмын. Уымӕ гӕсгӕ Хуыцау фыццаг кӕй сфӕлдыста, уыцы адӕймаг, Адам, хуыйны «Хуыцауы фырт». Чырысти дӕр хуыйны «Хуыцауы Фырт», уымӕн ӕмӕ уымӕ дӕр ис йӕ Фыды миниуджытӕ. (Бакӕс Лукайы 3:38; Иоанны 1:14, 49.)

Хуыцау Чырыстийы сфӕлдыста Адамӕй раздӕр. Растдӕр зӕгъгӕйӕ та, Хуыцау Чырыстийы ӕппӕты фыццаг сфӕлдыста. Уый фӕстӕ та йемӕ иумӕ сфӕлдыстой, арвыл ӕмӕ зӕххыл цыдӕриддӕр ис, уыдӕттӕ иууылдӕр, суанг зӕдты дӕр. Уымӕ гӕсгӕ Библийы Чырыстийы тыххӕй фыст ис, зӕгъгӕ, уый у, «Хуыцау цыдӕриддӕр сфӕлдыста, уыдонӕй фыццаг». (Бакӕс Колоссӕгтӕм 1:15, 16.)

Чырысти цалынмӕ Вифлеемы нӕ райгуырд, уӕдмӕ уыд зӕд ӕмӕ цард уӕлӕрвты. Рӕстӕг куы ’рцыд, уӕд ын Хуыцау йӕ цард Марийӕйы хуылфмӕ рахаста, цӕмӕй адӕймагӕй райгуырдаид. (Бакӕс Лукайы 1:30–32; Иоанны 6:38; 8:23.)

Цымӕ Хуыцау афтӕ цӕмӕн бакодта, цӕмӕй Чырысти зӕхмӕ ӕрцыдаид? Цавӕр ахсджиаг хъуыддаг сарӕзта Йесо? Ацы фарстатӕн дзуапп базондзынӕ Библийӕ. Уый фӕрцы хуыздӕр бамбардзынӕ ӕмӕ аргъ кӕнын райдайдзынӕ, Хуыцау ӕмӕ Чырысти дӕу тыххӕй цы сарӕзтой, уымӕн.