ਕੀ ਤੁਹਾਨੂੰ ਪਤਾ ਹੈ . . . ? ਭਾਰਤ ਵਿਚ ਅਕਸਰ ਹਰ ਸਾਲ ਹਜ਼ਾਰ ਤੋਂ ਵੀ ਜ਼ਿਆਦਾ ਫ਼ਿਲਮਾਂ ਬਣਦੀਆਂ ਹਨ ਜੋ ਕਿਸੇ ਵੀ ਦੂਸਰੇ ਦੇਸ਼ ਨਾਲੋਂ ਜ਼ਿਆਦਾ ਹਨ।

ਅਜਿਹੇ ਮਨੋਰੰਜਨ ਤੋਂ ਦੂਰ ਰਹੋ। ਕਈ ਫ਼ਿਲਮਾਂ ਵਿਚ ਅਜਿਹੀਆਂ ਕਦਰਾਂ-ਕੀਮਤਾਂ ਨੂੰ ਹੱਲਾਸ਼ੇਰੀ ਦਿੱਤੀ ਜਾਂਦੀ ਹੈ ਜੋ ਬਾਈਬਲ ਦੇ ਮਿਆਰਾਂ ਤੋਂ ਬਿਲਕੁਲ ਉਲਟ ਹਨ। ਕੁਝ ਫ਼ਿਲਮਾਂ ਵਿਚ ਸੈਕਸ ਅਤੇ ਹਿੰਸਾ ਦੇ ਸੀਨ ਦਿਖਾਏ ਜਾਂਦੇ ਹਨ ਤੇ ਕਈ ਫ਼ਿਲਮਾਂ ਭੂਤ-ਪ੍ਰੇਤਾਂ ਅਤੇ ਜਾਦੂਗਰੀ ਬਾਰੇ ਹੁੰਦੀਆਂ ਹਨ। ਪਰ ਬਾਈਬਲ ਕਹਿੰਦੀ ਹੈ ਕਿ “ਤੁਸੀਂ ਇਹ ਸਭ ਕੁਝ ਛੱਡ ਦਿਓ ਯਾਨੀ ਕ੍ਰੋਧ, ਗੁੱਸਾ, ਬੁਰਾਈ, ਗਾਲ਼ੀ-ਗਲੋਚ ਅਤੇ ਆਪਣੇ ਮੂੰਹੋਂ ਅਸ਼ਲੀਲ ਗੱਲਾਂ ਕਰਨੀਆਂ।” (ਕੁਲੁੱਸੀਆਂ 3:8) ਇਸ ਦੇ ਨਾਲ-ਨਾਲ ਪਰਮੇਸ਼ੁਰ ਜਾਦੂਗਰੀ ਨਾਲ ਸੰਬੰਧਿਤ ਹਰ ਕੰਮ ਦੀ ਨਿੰਦਿਆ ਕਰਦਾ ਹੈ।—ਬਿਵਸਥਾ ਸਾਰ 18:10-13.

ਚੋਣ ਕਰਨ ਦਾ ਤਰੀਕਾ। “ਜੇ ਟ੍ਰੇਲਰ ਮੈਨੂੰ ਠੀਕ ਨਾ ਲੱਗੇ, ਤਾਂ ਮੈਂ ਫ਼ਿਲਮ ਨਹੀਂ ਦੇਖਦੀ।”—ਜਰੀਨ। *

“ਮੈਂ ਕਿਸੇ ਦੇ ਕਹੇ ਤੇ ਕੋਈ ਫ਼ਿਲਮ ਨਹੀਂ ਦੇਖਦੀ, ਬਸ਼ਰਤੇ ਉਸ ਦੇ ਅਸੂਲ ਮੇਰੇ ਅਸੂਲਾਂ ਨਾਲ ਮਿਲਦੇ ਹੋਣ।”—ਕੇਟਲੀਨ।

“ਜੇ ਮੈਂ ਸਿਨਮੇ ਵਿਚ ਫ਼ਿਲਮ ਦੇਖਦੀ ਹੋਵਾਂ ਤੇ ਮੈਨੂੰ ਉਸ ਵਿਚ ਕੁਝ ਠੀਕ ਨਾ ਲੱਗੇ, ਤਾਂ ਮੈਂ ਉੱਠ ਕੇ ਤੁਰ ਪੈਂਦੀ ਹਾਂ।”—ਮਾਰੀਨਾ।

“ਕਿਸੇ ਫ਼ਿਲਮ ਬਾਰੇ ਜਾਣਨ ਲਈ ਮੈਂ ਇੰਟਰਨੈੱਟ ’ਤੇ ਰਿਪੋਰਟਾਂ ਦੇਖ ਲੈਂਦੀ ਹਾਂ ਕਿ ਉਸ ਵਿਚ ਕਿੰਨਾ ਕੁ ਸੈਕਸ, ਹਿੰਸਾ ਅਤੇ ਗੰਦੀ ਬੋਲੀ ਵਰਤੀ ਗਈ ਹੈ।”—ਨਾਤਾਸ਼ਾ।

ਸੁਝਾਅ: ਉਹ ਫ਼ਿਲਮਾਂ ਚੁਣੋ ਜਿਨ੍ਹਾਂ ਵਿਚ ਤੁਹਾਨੂੰ ਲੱਗਦਾ ਹੈ ਕਿ ਘਟੀਆ ਗੱਲਾਂ ਨਹੀਂ ਹੋਣਗੀਆਂ। 19 ਸਾਲਾਂ ਦੀ ਮਾਸਾਮੀ ਕਹਿੰਦੀ ਹੈ: “ਮੈਨੂੰ ਉਹ ਫ਼ਿਲਮਾਂ ਦੇਖਣ ਵਿਚ ਮਜ਼ਾ ਆਉਂਦਾ ਹੈ ਜੋ ਕਲਾਸਿਕ ਸਾਹਿੱਤ ਦੇ ਆਧਾਰ ’ਤੇ ਬਣਾਈਆਂ ਜਾਂਦੀਆਂ ਹਨ।”

 ਕੀ ਤੁਹਾਨੂੰ ਪਤਾ ਹੈ . . . ? ਅਮਰੀਕਾ ਵਿਚ ਹਰ ਹਫ਼ਤੇ ਹਜ਼ਾਰ ਤੋਂ ਜ਼ਿਆਦਾ ਕਿਤਾਬਾਂ ਛਾਪੀਆਂ ਜਾਂਦੀਆਂ ਹਨ।

ਅਜਿਹੀਆਂ ਕਿਤਾਬਾਂ ਨਾ ਪੜ੍ਹੋ। ਫ਼ਿਲਮਾਂ ਵਾਂਗ ਕਈ ਕਿਤਾਬਾਂ ਵਿਚ ਵੀ ਅਜਿਹੀਆਂ ਕਦਰਾਂ-ਕੀਮਤਾਂ ਨੂੰ ਹੱਲਾਸ਼ੇਰੀ ਦਿੱਤੀ ਜਾਂਦੀ ਹੈ ਜੋ ਬਾਈਬਲ ਦੇ ਮਿਆਰਾਂ ਤੋਂ ਬਿਲਕੁਲ ਉਲਟ ਹਨ। ਮਿਸਾਲ ਲਈ, ਕੁਝ ਕਿਤਾਬਾਂ ਵਿਚ ਸੈਕਸ ਬਾਰੇ ਖੋਲ੍ਹ ਕੇ ਗੱਲ ਕੀਤੀ ਜਾਂਦੀ ਹੈ ਜਾਂ ਉਹ ਜਾਦੂਗਰੀ ਬਾਰੇ ਹੁੰਦੀਆਂ ਹਨ। ਪਰ ਬਾਈਬਲ ਕਹਿੰਦੀ ਹੈ: “ਤੁਹਾਡੇ ਵਿਚ ਹਰਾਮਕਾਰੀ ਦਾ ਅਤੇ ਹਰ ਤਰ੍ਹਾਂ ਦੇ ਗੰਦੇ-ਮੰਦੇ ਕੰਮਾਂ ਦਾ ਜਾਂ ਲੋਭ ਦਾ ਜ਼ਿਕਰ ਤਕ ਨਾ ਕੀਤਾ ਜਾਵੇ।” (ਅਫ਼ਸੀਆਂ 5:3) ਬਾਈਬਲ ਇਹ ਵੀ ਕਹਿੰਦੀ ਹੈ ਕਿ ਜਾਦੂਗਰੀ ਦੇ ਕੰਮ “ਯਹੋਵਾਹ ਦੀ ਨਿਗਾਹ ਵਿੱਚ ਬੁਰੇ” ਹਨ।—2 ਰਾਜਿਆਂ 17:17.

ਚੋਣ ਕਰਨ ਦਾ ਤਰੀਕਾ। “ਵਧੀਆ ਕਿਤਾਬ ਦੀ ਚੋਣ ਕਰਦਿਆਂ ਮੈਂ ਇਸ ਦੀ ਪਿਛਲੀ ਜਿਲਦ ਪੜ੍ਹਦੀ ਹਾਂ ਅਤੇ ਅਧਿਆਵਾਂ ’ਤੇ ਸਰਸਰੀ ਨਜ਼ਰ ਮਾਰਦੀ ਹਾਂ। ਜੇ ਮੈਨੂੰ ਕੁਝ ਠੀਕ ਨਾ ਲੱਗੇ, ਤਾਂ ਮੈਂ ਉਹ ਕਿਤਾਬ ਖ਼ਰੀਦਦੀ ਨਹੀਂ।”—ਮੱਰੀ।

“ਮੈਂ ਜਿਉਂ-ਜਿਉਂ ਵੱਡੀ ਹੋਈ ਅਤੇ ਖ਼ੁਦ ਸੋਚ-ਵਿਚਾਰ ਕਰਨ ਲੱਗੀ, ਤਾਂ ਮੈਨੂੰ ਅਹਿਸਾਸ ਹੋਇਆ ਕਿ ਮੈਨੂੰ ਆਪਣੀ ਜ਼ਮੀਰ ਦੀ ਸੁਣਨ ਦੀ ਕਿੰਨੀ ਲੋੜ ਸੀ। ਜੇ ਮੈਨੂੰ ਲੱਗਦਾ ਸੀ ਕਿ ਕੋਈ ਕਿਤਾਬ ਚੰਗੀ ਨਹੀਂ, ਤਾਂ ਮੈਂ ਉਹ ਕਿਤਾਬ ਪੜ੍ਹਨੋਂ ਹਟ ਜਾਂਦੀ ਸੀ ਕਿਉਂਕਿ ਮੈਨੂੰ ਪਤਾ ਸੀ ਕਿ ਇਹ ਪਰਮੇਸ਼ੁਰ ਦੀ ਸੋਚਣੀ ਨਾਲ ਮੇਲ ਨਹੀਂ ਸੀ ਖਾਂਦੀ।”—ਕੋਰੀਨ।

ਸੁਝਾਅ: ਵੱਖੋ-ਵੱਖਰੀ ਕਿਸਮ ਦੀਆਂ ਕਿਤਾਬਾਂ ਪੜ੍ਹੋ। 17 ਸਾਲਾਂ ਦੀ ਲਾਰਾ ਕਹਿੰਦੀ ਹੈ: “ਆਧੁਨਿਕ ਕਲਪਿਤ ਕਹਾਣੀਆਂ ਨਾਲੋਂ ਮੈਨੂੰ ਕਲਾਸਿਕ ਸਾਹਿੱਤ ਪੜ੍ਹਨ ਵਿਚ ਜ਼ਿਆਦਾ ਰੁਚੀ ਹੈ। ਇਸ ਸਾਹਿੱਤ ਵਿਚ ਵਧੀਆ ਭਾਸ਼ਾ ਵਰਤੀ ਹੁੰਦੀ ਹੈ ਅਤੇ ਕਹਾਣੀ ਦੇ ਨਾਲ-ਨਾਲ ਇਸ ਵਿਚਲੇ ਲੋਕਾਂ ਨੂੰ ਵਧੀਆ ਤਰੀਕੇ ਨਾਲ ਪੇਸ਼ ਕੀਤਾ ਹੁੰਦਾ ਹੈ। ਇਹ ਕਹਾਣੀਆਂ ਸੱਚ-ਮੁੱਚ ਲਾਜਵਾਬ ਹੁੰਦੀਆਂ ਹਨ!”

 ਕੀ ਤੁਹਾਨੂੰ ਪਤਾ ਹੈ . . . ? ਚਾਰ ਵੱਡੀਆਂ-ਵੱਡੀਆਂ ਮਿਊਜ਼ਿਕ ਕੰਪਨੀਆਂ ਨੇ ਇਕ ਸਾਲ ਵਿਚ ਤਕਰੀਬਨ 30,000 ਐਲਬਮਾਂ ਰਿਲੀਜ਼ ਕੀਤੀਆਂ।

ਅਜਿਹੇ ਸੰਗੀਤ ਨਾ ਸੁਣੋ। ਫ਼ਿਲਮਾਂ ਤੇ ਕਿਤਾਬਾਂ ਵਾਂਗ ਕਈ ਸੰਗੀਤ ਵੀ ਬਹੁਤ ਹੀ ਗੰਦੇ ਹੁੰਦੇ ਹਨ। ਗਾਣਿਆਂ ਦੇ ਅਸ਼ਲੀਲ ਬੋਲਾਂ ਅਤੇ ਗੰਦੇ ਮਿਊਜ਼ਿਕ ਵਿਡਿਓ ਕਰਕੇ ਸ਼ਾਇਦ ਤੁਹਾਡੇ ਲਈ ਆਪਣੀ ਕਾਮ-ਵਾਸ਼ਨਾ ਨੂੰ ਕਾਬੂ ਵਿਚ ਰੱਖਣਾ ਹੋਰ ਵੀ ਮੁਸ਼ਕਲ ਹੋ ਜਾਵੇ। (1 ਕੁਰਿੰਥੀਆਂ 6:18) 21 ਸਾਲਾਂ ਦੀ ਲੀ ਕਹਿੰਦੀ ਹੈ: “ਅੱਜ-ਕੱਲ੍ਹ ਜ਼ਿਆਦਾਤਰ ਸੰਗੀਤਾਂ ਵਿਚ ਅਜਿਹੇ ਚਾਲ-ਚਲਣ ਨੂੰ ਹੱਲਾਸ਼ੇਰੀ ਦਿੱਤੀ ਜਾਂਦੀ ਹੈ ਜੋ ਬਾਈਬਲ ਦੇ ਮਿਆਰਾਂ ਦੇ ਖ਼ਿਲਾਫ਼ ਹੁੰਦਾ ਹੈ। ਅਤੇ ਸੰਗੀਤਾਂ ਦੀ ਧੁਨ ਲੋਕਾਂ ਨੂੰ ਅਸ਼ਲੀਲ ਢੰਗ ਨਾਲ ਡਾਂਸ ਕਰਨ ਲਈ ਉਕਸਾਉਂਦੀ ਹੈ।”

ਚੋਣ ਕਰਨ ਦਾ ਤਰੀਕਾ। “ਮੈਂ ਆਪਣੇ ਆਪ ਤੋਂ ਪੁੱਛਦੀ ਹਾਂ, ‘ਜੇ ਕੋਈ ਮੇਰੇ ਨਾਲੋਂ ਵੱਡੀ ਉਮਰ ਦਾ ਮਸੀਹੀ ਮੇਰੇ ਸੰਗੀਤਾਂ ਦੀ ਲਿਸਟ ਨੂੰ ਦੇਖੇ, ਤਾਂ ਕੀ ਮੈਂ ਸ਼ਰਮਿੰਦਾ ਹੋਵਾਂਗੀ?’ ਇਸ ਤਰ੍ਹਾਂ ਮੈਨੂੰ ਅੰਦਾਜ਼ਾ ਹੋ ਜਾਂਦਾ ਹੈ ਕਿ ਮੈਨੂੰ ਕਿਹੜੀ ਕਿਸਮ ਦੇ ਸੰਗੀਤ ਸੁਣਨੇ ਚਾਹੀਦੇ ਹਨ।”—ਲੀਐਨ।

ਸੁਝਾਅ: ਵੱਖੋ-ਵੱਖਰੇ ਕਿਸਮਾਂ ਦੇ ਸੰਗੀਤ ਸੁਣਨ ਦੀ ਕੋਸ਼ਿਸ਼ ਕਰੋ। 18 ਸਾਲਾਂ ਦਾ ਰੋਬੈਰਤੋ ਕਹਿੰਦਾ ਹੈ: “ਮੇਰੇ ਡੈਡੀ ਜੀ ਨੂੰ ਕਲਾਸਿਕ ਮਿਊਜ਼ਿਕ ਬਹੁਤ ਪਸੰਦ ਸੀ, ਇਸ ਲਈ ਵੱਡੇ ਹੁੰਦਿਆਂ ਮੈਂ ਇਸ ਤਰ੍ਹਾਂ ਦੇ ਬਹੁਤ ਸੰਗੀਤ ਸੁਣੇ ਸਨ। ਹੁਣ ਪਿਆਨੋ ਵਜਾਉਣਾ ਸਿੱਖਣ ਦੇ ਨਾਲ-ਨਾਲ ਮੈਂ ਕਲਾਸਿਕ ਮਿਊਜ਼ਿਕ ਬਾਰੇ ਵੀ ਬਹੁਤ ਕੁਝ ਸਿੱਖਿਆ ਹੈ ਅਤੇ ਇਸ ਵਿਚ ਮੇਰੀ ਰੁਚੀ ਜਾਗ ਉੱਠੀ ਹੈ!” (g11-E 11)