Nen Oktubre 12, 2017, inawat na European Court of Human Rights (ECHR) so impamidbir na Republic of Georgia ya kinontra to so karapatan na samploran Tasi nen Jehova. Diad kaso na Gabunia and others v. Georgia, inmabuloy so gobiernoy Georgia ya bayaran na EUR 800 (USD 947) so kada biktima bilang danyos lapud impankontra dad karapatan na saray biktima ya mandesisyon base ed relihyon tan pagmaliw ya bulos ed diskriminasyon ya protektado na Article 9 tan 14 na European Convention on Human Rights (Convention).

Nen Setyembre 2005, in-submit na samploran Tasi so application dad ECHR tungkol ed apatiran impangataki ed sikara ya insugsog na saray Orthodox extremist. Sayan amipat ya impan-ataki ed sikara et kabiangan na inisponsoran na Estado ya kampanya na panangataki ed Saray Tasi nen Jehova ed Georgia manlapu nen Oktubre 1999 anggad Nobyembre 2003. Sangkot ed saya iray opisyal ya nanpatupad na batas lapud akibiang irad impangataki odino agda pinrotektaan iray biktima.

Antis ni na kaso ya Gabunia, angipaway la so ECHR na taloran diretsaan ya desisyon kontra ed Georgia. Diad sarayan desisyon, tinetel na ECHR so gobierno lapud agto prinotektaan so karapatan na saray Tasi ed sayan impangataki. Imbaga na ECHR ya lapud anggapoy aksion ya ginawa na saray mangipapatupad na batas, “singa da ipapaamta ed totoo ya sangkot iray representative na Estado ed saray kriminal.” Imbaga ni na ECHR ya “saray gobierno na Georgia et mapaulyan, kanian wala ni ray arum ya angataki ed Saray Tasi nen Jehova ed interon bansa.” Asukayan met na ECHR ya walay “impankomplot na huis ed impan-ataki kontra ed saray aplikante” tan saray korte na Georgia et “walay papaboran da tan ataptapew” labat so impaneksamin dad saray reklamo na biktima.

Diad impangi-file na Georgia ed unilateral ya deklarasyon ya “magbabawi tan bidbiren” ya kinontra toy karapatan na saray biktima, naiwasan na Georgia so komapat ya husga ya seguradon natetel lamet komon a singa ed apalabas ya taloran impanhusga. Natan, saray Tasi nen Jehova diad Georgia et aliwa lan biktima na saray pangkat ya iisponsoran na Estado pian mangataki ed sikara. Bulos la ira natan ed relihyon da.