Diad tulong na saray 27 ya Disaster Relief Committee (DRC), tuloytuloy ya aasikasoen na Ukraine branch iray agagi ya apilitan ya tinmaynan ed kaabungan da tan linmad mas safe ya lugar diad Ukraine. Manlapu la nen ginmapoy guerra, masulok lan 250 tonelada na humanitarian aid odino tulong so inangkat manlapud Poland, kaiba la ray naakan, kawes, tan saray usaren parad panlinis. Ontan met, masulok ya 80 tonelada na naakan so inyarum ya inter na saray agagi ya walad saray mas safe ya lugar diad Ukraine.

Oniay imbaga nen sister Valentyna ya tagad Kyiv nen naawat toy tulong na saray agagi diad DRC: “Nen ginmapo so panlalaban, delikado lan maong no mansiansia ak ni ed syudad. Kanian nan-evacuate ak ed sakey a melag ya baley diad Cherkasy region. Masulok lan duay bulan ko dia natan. Agak papaulyanan na saray agagi diad kongregasyon ya aatendian ko. Wala ray iiter dad siak ya kahon ya nankargay naakan tan saray usaren parad panlinis. Lapud sarayan amin ya intulong dad siak, agko apokpokan so liknaan ko, alikliknak so panangaro ra. Diad samay sakey ya kahon, walay drowing na sakey ya apat taon ya manngaran ya Blanca tan walay makolor ya postcard . . . Iyatol ko irayan drowing pian agko nalingwanan iyan balibalin regalo. Misatsalamat ak ed saray agagi lapud kaabigan dad siak, tan nagkalalo la ed si Aman Jehova.”

Oniay insulat na 83 años ya sister ya walay kapansanan to ya manngaran met na Valentyna: “Nen ginmapoy guerra, bukbukor kod panaayaman ko. Inatey so alenleneg ya anak kon laki antis na guerra. Natatakot ak ya maong, ta inagew-agew ya walay nagagawan panagbomba diad syudad. Anggapoy danum, kuryente, gas, tan makapuy ya maong so Internet. Pero misatsalamat ak ta tinulongan ak na saray agagi, anggano nirisgay bilay da.”

Onia ni imbaga to: “Insan nen kien, inawit ak na saray agagi kaibay duara nin sister ya walay kapansanan da diad mas safe ya syudad diad Dnipro. Tinulongan ak na saray agagi diad Dnipro ya mananap na napanayaman ko. Natan, manaayam ak ed abung na sakey ya pamilyan Tasi, tan aasikasoen da ak. Inturing da ak lan kapamilya da. Inikdan da ak ni ingen na smartphone pian makaatendi tan makapankomento ak ed saray aral. Agkon balot nalingwanan so kaabigan ya impanengneng ed siak na saray agagi.”

Malikeliket tayo tan misatsalamat tayo ed maar-aron Ama tayo, si Jehova, ta tuloytuloy ton aasikasoen iray inar-aro tayon agagi diad Ukraine pian ag-ira ‘onkulang na antokaman a maabig.’—Salmo 34:10.

Nia ray bilang ya inreport anggad Hunyo 7, 2022 manlapud Ukraine. Imbase iraya ed saray akompirman report manlapud saray agagi ed Ukraine. Balet, nayarin mas atagey ni so aktual ya bilang lapud mair-irap ya pansiansiaen so komunikasyon ed amin ya lugar diad bansa.

• 42 ya manangipalapag so inatey

• 82 ya manangipalapag so asugatan

• 46,145 a manangipalapag so tinmaynan ed kaabungan da tan linmad mas safe iran lugar

• 469 ya abung so agaygay

• 540 ya abung so aderal ya maong

• 1,405 ya abung so medyo aderal

• 5 ya Kingdom Hall so aderal

• 8 ya Kingdom Hall so aderal ya maong

• 33 ya Kingdom Hall so medyo aderal

• 27 ya Disaster Relief Committee (DRC) so onkikiwas ed Ukraine

• 50,663 ya manangipalapag so direktan atulongan na saray DRC pian makaanap na mas safe ya napanayaman

• 22,995 ya manangipalapag so linmad arum ya bansa tan tutulongan ira na saray agagi diman