HELSINKI—Nen ngarem na Biernes, Agosto 18, 2017, apatey so sakey ed saray agi tayon bii diad Finland tan base ed imbestigasyon et lapu itan ed terorismo ya bibii so ginagalan biktimaen. Likud nid samay agi tayo, apatey met na nambiktima so sakey nin bii tan asugatan so waloran totoo diad lakoan ed Turku, ya syudad ed Finland ya asingger ed dayat ed bandad abalaten. Tampol kayari na saman, saray representative na branch office ed Finland, pati say manangasikaso na sirkito tan saray elder ed saman a lugar et personal a linma pian mangiter na ligliwa tan suporta ed saray naapektoan na trahedya.

Oniay imbaga nen Veikko Leinonen, ya walad branch office ed Finland: “Talagan grabe tan makapabigla iyan trahedya. Makapaermen ta sakey ed saray sister tayon payunir ya mibibiang ed metropolitan public witnessing so apatey ed agawan terorismo. Amta mi ya anggan panoy panalwar, agtayo lanang ya napaliisan iray ‘ag-iilaloan a nagawa,’ kaiba la ray krimen tan terorismo. Balet, itultuloy tayon ligliwaen so balang sakey, lalo lad kapamilya na sister ya apatey. Ipipikasi mi ya ikdan komon nen Jehova na deen na nonot iramay maneermen ed impatey na inad-aro da. Itultuloy tayo met so manggawa na praktikal iran paraan tan agtayo alabas ya manpaga pian nituloy tayoy kimey ya panagpulong.”—Eclesiastes 9:11; Roma 15:13; Filipos 4:6, 7.

Angipawit na sulat so branch office ed amin ya kongregasyon ed Finland pian mangiter na emosyonal tan espiritual ya ligliwa. Angorganisa met so branch na special meeting pian pasesegen iray 135 ya agagin mibibiang ed metropolitan public witnessing diad Turku. Sankanengneng ed saray payunir so pakpel tan labalabay da nin siansia ya ituloy so mibiang ed public witnessing.

Abigbigla so dakel ya manaayam ed Turku ta agawa so terorismo ed Finland, ya ipapasen a sakey ed saray sankaligtasan ya bansa ed interon mundo. Diad sinmublay ya agew kayari na trahedya, tampol ya nampulong iray agagi tayo diad samay lakoan tan diad kaabungan. Maan-anos iran dinmengel tan angiter na espiritual ya ligliwa ed totoo.

Aapresyaen na branch office ed Finland so dakel ya pikakasi tan makaligliwan mensahe na saray agagi tayod interon mundo. (1 Pedro 2:17; 5:9) Manuna ed amin, nankakasakey tayon pisalamatan si Jehova “say Dios a manliligliwa tan ontutulong ed sikatayon makapansungdo.”—Roma 15:5.

Media Contact:

International: David A. Semonian, Office of Public Information, +1-845-524-3000

Finland: Veikko Leinonen, +358-400-453-020