Nilibon totoo diad Pilipinas so apilitan ya man-evacuate lapud duaran makmaksil ya bagyo, say Urduja (Kai-tak) tan Vinta (Tembin). Lapud saratan et pinasya so delap tan mudslide nen mansampot so Disyembre.

Dineral na bagyo so duaran Kingdom Hall tan anemiran abung na Saray Tasi nen Jehova, tan nan-evacuate so 281 ya pamilya. Makapaermen ta diad Lanao del Norte et nalner ed delap so sakey ya 24 años ya sister.

Wala ray relief supply ya inter na saray Tasi ya asingger ed apektadon lugar. Namparaan met iray representative na branch office ed Pilipinas ya bisitaen so lugar pian amtaen no anto ni ray pankaukolan na agagi diman, pian pabiskegen tan iter so espiritual tan emosyonal ya suporta ed sikara.

Mililikna tayo ed amin ya naapektoan na sarayan bagyo. Matalek tayon tuloytuloy ya mangiter si Jehova na panamabiskeg tan praktikal ya tulong panamegley na espiritu tan organisasyon to legan ya manggawa na paraan pian makabangon a tampol iray agagi diman.—Salmo 9:9; Isaias 51:12.

Media Contacts:

International: David A. Semonian, Office of Public Information, +1-845-524-3000

Pilipinas: Dean Jacek, +63-2-224-4444