HULYO 31, 2019
RUSSIA
UPDATE—Mansiasiansian Mapekder si Dennis Christensen nen Niyalis ed Penal Colony
Nen Hunyo 6, 2019, duay simba kayari na impakatalo na apela nen Brother Dennis Christensen, sikatoy inyalis na saray autoridad na Russia manlapud samay kulongan ya kawalaan to ed Oryol antis ni na impanlitis ed sikato paonla ed sakey a kampo ya pantratrabahoan na saray priso—diad Penal Colony No. 3 ed syudad na Lgov. Say Lgov et manga 200 kilometro so kaarawi to ed saray kapamilya tan kakaaro nen Dennis ya walad Oryol.
Kasabi nen Dennis ed prisoan, sikatoy ininsulto tan sinali na saray totoo diman ya pakapuyen so integridad to. Balet, nanmatalek ya maong si Dennis ed si Jehova kanian sikatoy binmiskeg tan agnatatakot.—1 Pedro 5:10.
Diad Finland (manlapud kawigi ya pakawanan): Si Mark Sanderson ya membro na Mananguley ya Ulop, si Irina Christensen, tan si Tommi Kauko ya tagad Finland
Manlapu la nen naaresto tan apriso si Dennis, maar-aron susuportaan tan aasikasoen na saray agagi so asawa ton si Irina. Nen Hunyo, akinengneng ed si Irina diad Finland si Brother Mark Sanderson ya membro na Mananguley ya Ulop tan arum nin responsablin brother pian pasesegen da.
Masulok lan sakey bulan ya walad penal colony si Dennis. Agano ni ya naabuloyan si Irina ya mitongtong a maminsan ed sakey agew ed si Dennis diad telepono. Inaprobaan met ya nabisita toy Dennis ed prisoan.
Babasaen lamet nen Irina iray makapaseseg ya sulat nen Dennis
Anggano amayamay so dinalan ya irap nen Dennis tan Irina ed apalabas ya duay taon manlapu la nen naaresto tan nipriso si Dennis, mansiasiansia ran mapekder tan maliket. Imbaga nen Irina ya sikatoy napapabiskeg ed saray sinimban sulat ya ipapawit nen Dennis. Diad sakey ed saray paborito ton sulat ya naawat to, oniay insulat nen Dennis: “Say pansiansian positibo so sekreto pian nasarag tayo iraya tan dakel so rason tayon manliket.” Diad sampot et imbaga nen Dennis: “Say rason no akin ya mabilay tayo et pian suportaan tayo so inkasoberano nen Jehova. Amtak ya andukdukey la yay paniirap tayo balet agti ni analo—andi ni. Balet manalo tayo lanlamang. Segsegurado ak ed satan.”
Nen Hulyo 21, diad internasyonal a kombension ed Denmark, binasa nen Brother Lett ya membro na Mananguley ya Ulop so mensahen nanlapud si Dennis, ya inkuan ton: “Labay ko komon so milimog ed sikayo, balet agni nayari natan ta agko ni asumpal so kaplesan ya asainmin ko. Balet posible itan diad arapen, tan tatalaranan ko la itan.”
Legan ya walad prisoan ed Roma si Pablo, oniay insulat to: “Naynay ak a misasalamat ed Dios ko sano nanononotan ta kayo kapagno masimoon ak a mangipipikasi ed sikayon amin. Legan kon gagawaen iraya et malikeliket ak, . . . wala kayod pusok, sikayo ran sinmuporta ed siak diad impakaprisok tan diad panangidepensa tan pakaala na legal a kanepegan a mangipulong na maong a balita.”—Filipos 1:3, 4, 7.
