WALA KASI NANDESINYO?

Say Abilidad na Saray Selula ya Magmaliw ya Nanduruman Klase

I-PLAY

Nen inginginew ka ni labat ginmapo so bilay mo ed melmelanting ya selula ya tatawagen ya zygote. Melmelag itan ya maong kanian kaukolan so microscope pian nanengneng itan. Balet kayari labat na pigaran bulan, niyanak ka la bilang sakey ya ugaw. Satan ya saksakey ya selula et dinmakel, insan nauman iratan ya selula tan nagmaliw ya masulok ya 200 ya nanduruman klase na selula ya nandurumay kurti, kabaleg, tan usar da.

Nonot mo pa: Say zygote et manggawa na kopya na DNA to insan napaldua so zygote kanian magmaliw itan ya duaran selula. Kayari to, maminpigapiga lamet ya napaldua iyan duaran selula. Diad gapo, pareparehas labat iray balon selula. Walad DNA da so amin ya kaukolan ya instruksion ed pagmaliw ya anggan anton klase na selula.

Sakey simba kagapo na panlukon, saray selula et magmaliw ya duaran klase. Saray arum ya selula et magmaliw ya embryo, pero say arum ya selula et magmaliw ya placenta tan arum ni ran tissue ya ontulong ed ibaleg na embryo.

Diad komatlon simba, saray selula na embryo et naorganisa ed taloran layer. Say layer ed tapew et magmaliw ya nerve, utek, sangi, baog, tan arum ni ran selula. Saray selula na layer ed pegley et magmaliw ya dala, pukel, kidney, muscle, tan arum ni ran tissue. Tan saray selula na layer ed dalem et magmaliw ya saray organ ed dalem na laman, singa say bala, bladder, tan arum ed saray kabiangan na digestive system.

Legan ya nabubuo so agni niyanak ya ugaw, ondakel iray selula tan magmaliw iratan ya masulok ya 200 ya nanduruman klase na selula

Legan na panlulukon, onalis so arum ya selula—ya sansakey odino bilang grupo—manlapud sakey ya parte na embryo paonlad arum ya parte. Saray arum ya selula et mandarasig tan magmaliw ya tirampiak ya tissue, odino ontupi iratan pian magmaliw ya singa ra lubir odino tubo. Pian nagawa iratan, kaukolan ya organisadon maniiba iray selula. Singa bilang, saniiban ontupi iray tirampiak ya selula pian magmaliw ya angkekelag iran tubo. Manbabansag ya nagawa itan diad nanduruman parte na embryo. Insan la ondukey iratan ya tubo tan mansanga-sanga ya anggad nabuo so kompleton pankokonektaan na interon laman.

No duga so klase ya nagmaliwan na saray nilasus bilyon ya selula tan wala la rad dugan pasen diad dugan panaon, iyanak la so normal ya ugaw.

Antoy nibagam? Kasin say abilidad na selula ya magmaliw ya nanduruman klase et resulta na ebolusyon? Odino walay nandesinyo?