Akadepende so kompapey ed petang na agew pian napetangan iray muscle to antis ya ontikyab. Balet no malurem, mas makakaunan ontekkiab iray cabbage white butterfly nen say arum ya kompapey. Akin et sara-sarag da itan?

 Nonot mo pa: Antis ya ontikyab iray kompapey, dakel ed sikara et balanglan ikupit day payak da odino iyunat dan maong pian napetangan na agew. Balet say cabbage white butterfly et ipoposisyon toy payak to ya aka-kurtin “V.” Adiskobre ed impanaral ya pian makaala na dugarugan petang iyan kompapey, kaukolan ton iposisyon so kada payak to pian akalukas itan na manga 17 degrees so anggulo to. Lapud satan ya posisyon na payak na kompapey, say enerhiyan manlapud agew et direktan onkena ed muscle na laman to, kanian napetangan iratan antis ya ontikyab.

 Inaral na saray researcher na University of Exeter diad England, no kasin sarag day manggawa na mas maabig ya solar panel no aligen day kurtin “V” ya posisyon na kompapey. Nen ontan so ginawa ra, adiskobre da ya naaruman na ngalngali 50 porsiento so koryenti ya apawala.

 Naimano met na saray researcher ya ompupuktal so liwawa ed payak na sayan kompapey. Inalig da so kurtin “V” ya posisyon to tan say inkagawa na payak to ya mangipupuktal na liwawa, kanian akagawa ira na saray solar panel ya mas anlemew tan mas epektibo. Lapud sarayan resulta, imbaga nen Professor Richard ffrench-Constant, sakey a membro na research team, ya say cabbage white butterfly et “sakey ya eksperto ed panagkolekta na enerhiyan manlalapud agew.”

 Antoy nibagam? Kasin say kurtin “V” ya posisyon na cabbage white butterfly et produkto na ebolusyon? Odino walay nandesinyo?