Antoy Ibabaga na Biblia Tungkol ed Krismas?

I-PLAY

Say ebat na Biblia

Ag-imbaga na Biblia no antoy petsa na inkiyanak nen Jesus, tan agmet nabasa ditan ya nepeg tayon selebraan so birthday to. Imbaga na McClintock and Strong’s Cyclopedia: “Ag-ingganggan na Dios ya selebraan so Krismas, tan agmet itan nabasa ed [Balon Sipan].”

No aralen a maong so history na Krismas, naamtaan tayo ya nanlapu itan ed saray ritual na saray paganon relihyon. Base ed Biblia, agtayo napaliket so Dios no dayewen tayo ed paraan ya agto labay.—Exodo 32:5-7.

History na saray tradisyon ed Krismas

Panselebra na birthday nen Jesus: “Agsinelebraan na saray inmunan Kristiano so inkiyanak [nen Jesus] ta parad sikara et paganon tradisyon so panselebra na inkiyanak na sakey.”—The World Book Encyclopedia.
Disyembre 25: Anggapoy ebidensya ya inyanak si Jesus ed sayan petsa. Nayarin atan so petsa ya pinili na saray lider na relihyon pian ompetek ed saray paganon piesta ya seselebraan ed panaon na winter solstice (say agew ya sankatikeyan so oras na liwawa tan sankarukeyan so labi).
Paniiteran na regalo, piesta, party: Ibabaga na The Encyclopedia Americana: “Say Saturnalia, a piesta na saray Romano ya seselebraan diad pegley na Disyembre, so angiyaligan na dakel ya kustombre na panliliket legay Krismas. Alimbawa, inalig ed satan ya selebrasyon iray engranden piesta, paniiteran na regalo, tan panselsel na saray kandila.” Imbaga na Encyclopædia Britannica ya “anggapoy trabaho tan negosyo” legan na Saturnalia.
Saray Christmas light: Base ed The Encyclopedia of Religion, dedekorasyonan na saray taga Europe iray abung da na “saray silew tan amin ya klase na kiew ya evergreen” pian selebraan so winter solstice tan pian onarawi iray mauges ya espiritu.
Mistletoe, holly: “Ibabaga na saray Druid ya walay magic na kiew ya mistletoe. Dadayewen day evergreen holly ta irerepresenta na satan so seguradon ibutay lamet na agew.”—The Encyclopedia Americana.
Christmas tree: “Intultuloy na saray paganon taga Europe so panagdayew ed kiew anggano nagmaliw la ran Kristiano.” Say sakey ya pakanengnengan ya nantultuloy itan et say tradisyon ya “pangiyan na Yule tree diad puerta odino diad loob na abung legan na saray selebrasyon da no winter.”—Encyclopædia Britannica.