Say Biblia et napantiwalaan ya giya no mandedesisyon tayo. Makatulong itan pian nawalaan tayoy “karunongan [tan] pakatalos.” (Proverbio 4:5) Wala ray situasyon ya ipapaamta na satan no antoy sankaabigan ya desisyon. Balet no maminsan, ontulong iray bilin ya wadtan pian makapandesisyon tayoy duga.

Diad sayan artikulo

•  Saray tip pian makapandesisyon kay duga

•  No akapandesisyon ak la, sarag ko ni kasin umanen itan?

•  Panon to no aliway desisyon ko tan agko la nauman itan?

•   Agka bengatbengat ya mandedesisyon. Oniay ibabaga na Biblia: “Samay makabat et dadalepdepen toy kada gawaen to.” (Proverbio 14:15) No bengatbengat kan mandesisyon, ompan wala ray agmo nikonsidera. Kanian agka manaapura. Nonot mo nin maong no antoy gawaen mo.—1 Tesalonica 5:21.

•   Agka manggagaway desisyon ya base labat ed no antoy naliliknam. Papasakbayan itayo na Biblia ya agtayo dapat naynay ya mantitiwala ed puso tayo. (Proverbio 28:26; Jeremias 17:9) Singa bilang, ompan agtayo makapandesisyon na duga no mamapasnok tayo, nadi-depress, nadidismaya, maingongot, odino naknaksawan tayo.—Proverbio 24:10; 29:22.

•   Kerew kay karunongan ed Dios. (Santiago 1:5) Labalabay na Dios ya ebatan so ontan ya pikakasi. Bilang maar-aron Ama, labay ton makaiwas tayo ed saray problema. “Si Jehova so mangiiter na karunongan; manlalapud sangi to so kakabatan tan pakatebek.” a (Proverbio 2:6) Say manunan uusaren to pian ikdan to tayoy karunongan et say Salita to, say Biblia.—2 Timoteo 3:16, 17.

•   Man-research ka. Pian makapanggawa kay dugan desisyon, kaukolan moy napantiwalaan ya impormasyon. Oniay ibabaga na Biblia: “Say toon marunong et ondedengel tan mangaawat na kaaruman a bilin.” (Proverbio 1:5) Iner ka makalmo na makatulong tan napantiwalaan iran impormasyon?

   Unona, amtaen moy ibabaga na Biblia nipaakar ed saray tepet mo. Say Dios so amalsa ed sikatayo, kanian amta to no antoy sankaabigan parad sikatayo. Nabasa tayod Salita to iray bilin ya talagan makatulong ed sikatayo. (Salmo 25:12) Diad arum ya situasyon, malinew ya ibabaga na Biblia no antoy nepeg tayon gawaen, nayarin wala ray ganggan nipaakar ed satan. (Isaias 48:17, 18) Pero maslak et ag-ibabaga na Biblia no antoy espisipikon gawaen tayo. Imbes, nabasa tayo ditan iray prinsipyo ya mangigiya ed sikatayo. Makatulong iratan ya prinsipyo pian kada sakey ed sikatayo et makapandesisyon na duga anggano diad mandumaan ya paraan. Pian naromog mo iray bilin tan prinsipyo ya makatulong ed sika, mananap ka na saray artikulo o publikasyon ya base ed Biblia. Wala ray ontan ya artikulo o publikasyon ed sayan website tan librem iratan ya nabasa odino nabantayan. b

   Balet wala ray situasyon ya kaukolan mo nin aralen iray arum ya napantiwalaan ya impormasyon antis kan mandesisyon. Singa bilang, no walay labay mon saliwen, lalo la no mabmabli, mas marakep no amtaen mo nin maong so nipaakar ed samay produkto tan no siopay nanggawad satan. Tan amtaen mo met no antoy patakaran da no bilang ta aderal may produkto tan labay mon ipawil. Tan siempre, seguradoen mo ya saman ya produkto so talagan aanapen mo.

   “Agnasumpal iray plano no anggapoy pantotongtong,” so kuan na Biblia. (Proverbio 15:22) Kanian antis kan mandesisyon, mantepet ka nid saray totoon napantiwalaan. Singa bilang, no kaukolan moy manpatambal, mas marakep no onkonsulta ka ed sakey ya doktor. (Mateo 9:12) Odino diad arum ya situasyon, sarag moy mantepet ed arum ya dinmalan met lad ontan. Tandaan mo balet ya agda ka nepeg ya idesisyonan. Sikan mismo so mandesisyon parad sarilim tan kaukolan mon awaten so antokaman ya resulta na satan.—Galacia 6:4, 5.

•   Nonot mon maong iray detalyin makaapekto ed desisyon mo. Base ed saray naamtaan mon impormasyon, sarag mon ilista iray desisyon ya pampilian mo, pati saray maong tan makapuy ya resulta na saratan. Isip mon maong no antoy epekto na pilien mon desisyon. (Deuteronomio 32:29) Singa bilang, antoy magmaliw ya epekto tod sika, ed pamilyam, tan ed arum? (Proverbio 22:3; Roma 14:19) No ikonsideram iratan ya tepet tan saray prinsipyo na Biblia, makapandesisyon kay duga tan maabig parad amin.

•   Gawam no antoy desisyon mo. No maminsan, manaalangan tayon gawaen so apili tayon desisyon ta agtayo segurado. No ontan, ompan aliwliwa laingen so pansumpalan tayo odino walay nasayang tayon balibali komon ya resulta. Diad antikey ya salita, no agtayo gawaen so desisyon tayo, singa aliwa met lanlamang so desisyon tayo. Inkompara itan na Biblia ed panagdalus. Oniay nabasa tayo: “Samay banbantayan toy siplog na dagem et agmangisibwag na bini, tan samay onnenengneng ed saray lurem et agmanani.”—Eclesiastes 11:4.

 Tandaan met ya anggano sankaabigan lay desisyon mo, agto labay ya ibaga ya anggapo lay onlesan problema. Kada no mandesisyon tayo, walan walay kaukolan tayon isakripisyo. Tan no maminsan, wala ray ag-iilaloan ya nagawa. (Eclesiastes 9:11) Kanian base ed saray impormasyon ya naamtaan mo, pilim so desisyon ya mas dakel so maabig ya resulta to.

 Aliwan amin ya desisyon et agla nayarin umanen. Nayarin manguman so kipapasen mo, odino ompan naamtaan mo ya makapuy manayay resulta to may desisyon mo. Kanian maabig no nonoten mo lamet so situasyon tan manpili kay desisyon ya mas maong so resulta to.

 Pero wala ray desisyon ya agnepeg ya umanen. (Salmo 15:4) Singa bilang, iilaloan na Dios ya tooren na sanasawa so impansipanan da. c (Malaquias 2:16; Mateo 19:6) Kanian no walay problema dan sanasawa, dapat gawaen day anggaay nayarian dan solusyonan itan tan agda nepeg ya isipen so mansian.

 Amin tayo et nalilingo o makakagawa na makapuy ya desisyon. (Santiago 3:2) No maminsan ingen et magbabawi odino nakokonsiensia tayo, tan normal met labat itan. (Salmo 69:5) Diad tua, makakatulong itan ya liknaan pian agti la naulit may lingo tayo. (Proverbio 14:9) Balet, bibilinen itayo na Biblia ya agtayo komon alablabas ya nakokonsiensia ta ompan nadismaya tayon maong tan agtayo laingen makapanisip na duga. (2 Corinto 2:7) d Ibabagay Biblia ya “si Jehova et mapangasi tan maabagey.” (Salmo 103:8-13) Kanian nengneng mo no antoy naaralan mo ed lingom ya agmo la nauman, tan gawam lay anggaay nayarian mo pian ondakep so situasyon mo.