Amin ya too et walay ngaran to. Duga labat sirin ya isipen ya wala met so ngaran na Dios. No labay mon nakaaro so sakey ya too, dapat mon amtaen tan usaren so ngaran to. Agta ontan met so nepeg tayon gawaen no labay tayoy mikaaro ed Dios?

 Oniay nabasa tayod Biblia ya imbaga na Dios: “Siak si Jehova. Saya so ngaran ko.” (Isaias 42:8) Anggano dakel so titulo nen Jehova singa say “Dios a Makapanyarin-amin,” “Soberanon Katawan,” tan “Manamalsa,” labay to ya sikatoy tawagen tayo diad personal ya ngaran to, tan pribilehyo tayo itan.​—Genesis 17:1; Gawa 4:24; 1 Pedro 4:19.

 Diad dakel ya patalos na Biblia, nabasa so personal ya ngaran na Dios diad Exodo 6:3. Oniay nabasa ed satan ya bersikulo: “Nampanengneng ak nensaman ed si Abraham, Isaac, tan Jacob bilang Makapanyarin-amin a Dios, balet nipaakar ed ngaran kon Jehova et agko sigpot ya imparungtal ed sikara.”

 Say Jehovah (Jehova, diad Pangasinan) et patalos na ngaran na Dios ya nilasus taon lan uusaren diad lenguahen English. Anggaman mas labay na dakel ya iskolar so espeling ya “Yahweh,” mas bibidbiren na dakel ya totoo so ngaran ya Jehova. Say unonan parte na Biblia et ag-insulat ed English noagta diad Hebreo, lenguahe ya babasaen manlapud kawanan pakawigi. Diad satan ya lenguahe, say ngaran na Dios et walaan na apatiran letra, יהוה. Saratan ya apatiran letra ed Hebreo—​ya say tranliterasyon to et YHWH​—et tatawagen ya Tetragrammaton.