Nabasa ed Biblia iray nagawa, saray kipapasen, tan saray ugali ya pakapatnagan na “kaunoran a parte na [kaplesan a] sistema na mundo,” odino “anggaan na mundo.” (Mateo 24:3; Say Biblia) Sayan panaon et tatawagen na Biblia ya “kaunoran iran agew” tan “panaon na anggaan.”—2 Timoteo 3:1; Daniel 8:19.

 Dakel so impasakbay na Biblia ya manbabansag ya nagawa tan satan so magmaliw ya “tanda” na kaunoran iran agew. (Lucas 21:7) Nia ray pigaran alimbawa:

 Guerra diad interon mundo. Impasakbay nen Jesus: “Manlalaban iray bansa ontan met ed saray panarian.” (Mateo 24:7) Impasakbay met ed Apocalipsis 6:4 so sakey ya akakabayo ya mangisisimbolo ed guerra ya “mangekal na kareenan ed dalin.”

 Eras. Impasakbay nen Jesus: “Wala ray eras.” (Mateo 24:7) Impasakbay met na libron Apocalipsis so sakey nin akakabayo ya mangisisimbolo ed eras ya nagawa diad nanduruman parte na mundo.—Apocalipsis 6:5, 6.

 Maksil iran yegyeg. Imbaga nen Jesus ya wala ray nagawan “yegyeg ed nanduruman pasen.” (Mateo 24:7; Lucas 21:11) Lapud sarayan maksil ya yegyeg ed interon mundo, grabe so panirap na totoo tan dakdakel so ompatey.

 Sakit. Imbaga nen Jesus ya wala ray onlesan salot, odino epidemya na graben “sakisakit.”—Lucas 21:11, Maung a Balita.

 Krimen. Anggaman nilasus taon lan nagagawa iray krimen, impasakbay nen Jesus ya diad kaunoran iran agew, ‘ondakel ni ray nagawan kaugsan.’—Mateo 24:12.

 Deralen na totoo so dalin. Impasakbay na Apocalipsis 11:18 ya wala ray totoon ‘manderal ed dalin.’ Nanduruman paraan so panggawa rad satan, aliwa labat ya diad maruksa tan mauges ya kagagawa ra noagta pati diad paneral da met ed kalikasan.

 Iyuges na ugali na totoo. Diad 2 Timoteo 3:1-4 impasakbay na Biblia so panaon ya maslak ya totoo et “agda amtay misalamat, aliwa ran matoor, . . . agda labay so mipaknaan, managpauges ira, anggapoy kontrol da ed sarili ra, masesebeg ira, agda aaroen so kamaongan, traidor ira, anawet so ulo ra, makinon ira.” Mas onloor irayan ugali na totoo kanian duga labat ya ideskribe itan ya panaon bilang “mapeligro tan mair-irap a panaon.”

 Anggapoy panangaro ed loob na pamilya. Diad 2 Timoteo 3:2, 3 impasakbay na Biblia so panaon ya dakel a totoo so ‘agmaaro ed kapamilyaan da’ tan saray ananak et “agmatulok ed atateng da.”

 Naandi so panangaro na totoo ed Dios. Impasakbay nen Jesus: “Ombetel so panangaro na karaklan a totoo.” (Mateo 24:12) Say labay ya ibaga nen Jesus et naandi so panangaro na maslak a totoo ed Dios. Ontan met, ibabaga na 2 Timoteo 3:4 ya diad kaunoran iran agew, saratan ya totoo et “maaro ira ed panliliket imbes a maaro ed Dios.”

 Pansimpisimpitan na Relihyon. Diad 2 Timoteo 3:5, impasakbay na Biblia ya wala ray totoon mangibaga ya mandadayew ira ed Dios balet diad tua et agdan talaga tutumboken iray estandarte to.

 Onlinew so pakatalos ed saray propesiya na Biblia. Impasakbay na libron Daniel ya diad “panaon na anggaan,” onlaknab so kakabatan na dakel ya totoo nipaakar ed saray katuaan ya walad Biblia, tan onlinew so pakatalos ed sarayan propesiya.—Daniel 12:4, paimanod leksab.

 Panagpulong diad interon mundo. Impasakbay nen Jesus: “Sayan maong a balita na Panarian et nipulong ed interon dalin.”—Mateo 24:14.

 Ondakel so totoon anggapoy pibabali da tan mabalaw ira. Impasakbay nen Jesus ya ibaliwala na maslak ya totoo iray malinlinew ya ebidensya ya asingsingger lay anggaan na sayan sistema na mundo. (Mateo 24:37-39) Pero mas ni so impasakbay na 2 Pedro 3:3, 4 ta wala ray manbalaw ed saratan ya ebidensya, tan ibaga ran anggapoy papaneknekan na saratan.

 Nagawa so amin ya propesiya. Imbaga nen Jesus ya napatnagan so kaunoran iran agew no manbabansag lan nagawa so amin ya propesiya, aliwan pigara labat ed saratan odino maslak labat ed saratan.—Mateo 24:33.

 On. Ipapanengneng na saray nagagawad mundo natan pati say kronolohiya na Biblia ya ginmapo so kaunoran iran agew nen 1914, atan may taon ya ginmapo so World War I. Pian nanengneng mo no akin ya nibagan saray nagagawa ed mundo natan et ebidensya ya manbibilay tayo lad kaunoran iran agew, bantayan iyan video:

 Nen 1914 ginmapon nanuley so Panarian na Dios diad tawen, tan tampol ton pinataynan ed tawen si Satanas a Diablo tan saray demonyo, kanian nagawaan da labat so labay da dia ed dalin. (Apocalipsis 12:7-12) Sankaimano so impluensya nen Satanas ed mauges iran ugali tan kagagawa na dakel ya totoo natan, kanian say kaunoran iran agew et nagmaliw ya “mapeligro tan mair-irap a panaon.”—2 Timoteo 3:1.

 Dakel so nanairapan lapud sarayan mapeligron panaon. Mapagpaga ira ta anggapo lay pankakasakey na totoo. Say arum ni ingen et natatakot ya ompan manpapateyan la ray totoo.

 Balet wala met iray nanairapan ed saray nagagawa ed mundo ya maniilalon walay maong ya arapen. Kombinsido ira ya asingsingger lan ekalen na Panarian na Dios so amin ya problema ed sayan mundo. (Daniel 2:44; Apocalipsis 21:3, 4) Maan-anos iran manaalagar ed pakasumpal na saray promisa na Dios, tan naliligliwa ira ed sayan imbaga nen Jesus: “Samay akapansungdo anggad anggaan et sikatoy nilaban.”—Mateo 24:13; Miqueas 7:7.