Wala. Nabasad Biblia iray makakombinsin ebidensya ya walay Dios. Ontulong iratan pian nawalaan tayoy pananisia ed Dios, ya aglabat basta-basta manisia ed ibabaga na saray relihyon, imbes usaren tayoy ‘pakayari a mankatunongan’ tan “pakatalos” tayo. (Roma 12:1; 1 Juan 5:20) Isipen pa irayan prueba ya base ed Biblia:

•   Say maayos ya uniberso ya walaan na mabilay iran pinalsa et prueba ya walay Amalsa. Ibabaga na Biblia: “Kada abung et walay nanggawa, balet say nanggawa na amin a bengatla et say Dios.” (Hebreo 3:4) Anggano simpli labat iyan panagrason, dakel ya edukadon totoo so kombinsido ed saya. a

•   Bilang too, natural ed sikatayon amtaen no akin ya manbibilay tayo. No agtayo itan naamtaan, pakalikna tayo et narasan tayo anggan naksel tayod pisikal. Saya may ibabaga na Biblia ya “espiritual a pankaukolan,” kaibad satan so liknaan ya labay tayon kabaten tan dayewen so Dios. (Mateo 5:3; Apocalipsis 4:11) Sayan pankaukolan ed espiritual et aglabat prueba ya walay Dios, noagta ipapanengneng met na saya ya maaro so Amalsa tan labay ton niiter iyan pankaukolan tayo.​—Mateo 4:4.

•   Tinmua tan eksakton agawa iray detalyadon propesiya o hula ed Biblia ya abaybayag lan insulat antis ni iratan ya nagawa. Say inkasusto tan inkadetalyado na saray propesiya et prueba ya ag-iratan nanlapu ed too, noagta diad sakey ya mas makapanyari.—2 Pedro 1:21.

•   Saray nansulat na Biblia et mas duga so pakatalos dad science komparad saray kapanaonan da. Singa bilang, nensaman et manisia iray totoo ya say dalin et aawiten na ayep, singa say elepanti, baboy-ramo, odino baka. Ibabaga balet na Biblia ya say Dios et “ibibitin toy dalin ed anggapo.” (Job 26:7) Ontan met, duga so imbaga na Biblia ed kurti na dalin ya “malimpek,” odino “tibukel.” (Isaias 40:22, footnote) Panisiaan na dakel ya saratan ya dugan impormasyon ya impaamta na saray nansulat na Biblia et nanlapud Dios.

•   Eebatan na Biblia iray mairap ya tepet, ya no agnaebatan na duga et posiblin rason pian say sakey et agmanisia ya walay Dios. Singa bilang: No maaro tan makapanyarin-amin so Dios, akin et maniirap tayo tan mauges so nagagawad mundo? Akin et mabetbet ya say epekto na relihyon et mauges imbes ya maong?​—Tito 1:​16.