“Makapakesaw no ala una la ed palbangon et abangon ka ni ya manggagaway assignment mo. Labalabay mo lay onugip.”​—David.

 “No maminsan et nasasabik ni 4:30 ed palbangon ya manaaral, insan ombangon ak na ala sais ed kabuasan pian onloob ed eskuelaan. Nababanalan ak la!”​—Theresa.

 Kasin pakaliknam et agka la makaingas ed karakel na assignment mo? No ontan, natulongan ka na sayan artikulo pian makainawa ka.

•  Akin ya mangiiter na assignment iray maestra tan maestro?

•  Saray tip ed panagaral

•  No antoy ibabaga na arum ya kabataan

 Makatulong so assignment pian . . .

•   naaruman ni antam

•   magmaliw kan mas responsable

•   naaralan mon usaren ed dugan paraan so panaon mo

•   natalosan tan nausar mod bilay mo iray topic ya imbangat ed eskuelaan a

 “Say pangiter na assignment et paraan na saray maestra tan maestro pian seguroen ya gawaen na saray estudyante no anto ray naaralan da imbes ya nalingwanan dan tampol iratan.”​—Marie.

 Singa bilang, makatulong so subject ya math tan science pian napaaligwas moy abilidad mon solusyonan iray problema. Ibabaga na saray eksperto ya makatulong itan pian niwala iray balon koneksion ed utek mo tan napaelet iratan. Kanian say assignment et singa exercise na utek mo!

 Balanglan nanenengneng mo ray maong ya epekto na panggawa na assignment odino andi, kabiangan itan na bilay ya kaukolan mon arapen. Balet nia ay so makapaliket: Anggano agmo nakontrol so karakel na assignment mo, walay nagawaan mo pian mas maples mon nasumpal iratan. Nengnengen tayo no panon ya gawaen itan.

 Ompan naiirapan kan sumpalen so amin ya assignment mo. No iplanom nin maong antis mon gawaen iratan, mas mainomay tan mas maabig so resulta. Salim ya gawaen iraya:

•   Tip 1 : Manplano. Oniay ibabaga na Biblia: “Saray plano na makuli et seguradon ontalona.” (Proverbio 21:5) Segurom ya wala lad sikay amin ya kaukolan mo antis mon gawaen iray assignment mo pian agmo la anapen iratan no akagapo ka la.

   Ontan met, manpili kay lugar ya makapampokus ka. Labay na arum so manaral ed mareen tan maliwawa ya kuarto diad abung da. Say arum balet et mas makapanaral ed arum ya lugar, a singa diad librarya, nen say diad abung da.

   “No mangusar kay planner, makatulong itan pian makabat so pangiskedyul moy panaon mo. No antam iray assignment mo tan no kapigan iratan kaukolan ya ipasa, agka masyadon na-stress.”​—Richard.

•   Tip 2: Iyuksoy moy gawaen mo. Oniay ibabaga na Biblia: “Amin a bengatla et nagawa komon . . . diad mauksoy a paraan.” (1 Corinto 14:40, paimanod leksab) Mandesisyon ka no anto ran assignment so unaen mon gawaen tan no anto ray isublay mo.

   Say arum et uunaen dan gawaen iray sankairapan. Balet say arum et mas ganado no ginawa da lan unona iray mainomay ya assignment da. Pilim so paraan ya mas epektibo parad sika.

   “Makatulong no manggawa kay listaan pian antam no anto ray dapat mon gawaen tan say pantutumbokan na panggawam ed saratan. No ontan, naliknam ya sarasarag moy assignment mo tan agmo naisip ya mair-irap iratan.”​—Heidi.

•   Tip 3: Kiwas ka la. Oniay ibabaga na Biblia: “Magmaliw kayon makuli, aliwan mangiras.” (Roma 12:11) Ompan natukso kan manggawa na arum ya kimey. Balet agmo gagawaen iratan ed eskedyul mon panggawa na saray assignment mo.

   Saramay mapaleen et kaslakan ya agda nasumpal so assignment da ed dugan oras odino ompan masyadoy panapura da pian nasumpal itan, kanian naapektoan so kalidad na panagaral da tan aliwan tanton marakep so resulta na gawaen da. Naiwasan moy panaburido tan pagbabawi no gapoan mo lan tampol iray assignment mo.

   “No ginawak lan tampol iray assignment ko kasabik ed abung odino ginapoan ko lan tampol so project ko anggano kakkapangiter da ni labat iratan, anggapo lay panaburidoan ko tan agnaapektoan iray arum ya gawaen ko.”​—Serina.

   SUHESTION: Gawam so assignment mo diad parehon oras ed kada agew. Makatulong itan pian napaaligwas moy disiplina ed sarilim tan napasalan mon lanang ya gawaen iray assignment mo ed suston oras.

•   Tip 4: Mansiansia kan akapokus. Oniay ibabaga na Biblia: “Nengneng kad arapan mo.” (Proverbio 4:25) Pian nagawaan mo itan legan kan manaaral, iwasan mo ray mangibalang na pokus mo​—singa saray gadyet.

   Say pan-internet tan pan-text et nayarin mangalay panaon mo kanian nabayagan ka laingen ya sumpalen iray assignment mo. Balet no akapokus ka, agka masyadon na-stress tan wala ni panaon mo parad arum.

   “Mairap so manpokus no walay cellphone, computer, video game, tan TV. Kanian eerepen koy cellphone ko tan eekalen kod saksakan iray asingger ed siak ya posiblin mangibalang na pokus ko.”​—Joel.

•   Tip 5: Magmaliw kan balanse. Oniay ibabaga na Biblia: “Naamtaan komon . . . a makatunongan kayo.” (Filipos 4:5) Agka masyadon na-stress ed saray assignment mo no manpapainawa ka no kaukolan. Sarag moy manakar-akar, manbisikleta, odino man-jogging.

   No pakaliknam et siansia nin abuntonan kay dakdakel ya assignment, mitongtong ka ed maestram odino maestrom. No nanenengneng dan gagawaen moy anggaay nayarian mo pian sumpalen so assignment mo, ompan manggawa ray pananguman.

   “Agmo papaulyanan ya na-stress ka lapud panaaburidom ed saray assignment mo. Gawam so anggaay nayarian mo. Balet wala ray bengatlan agkaukolan ya mangekal na liket mo ed bilay, sakey lad saratan so assignment.”​—Julia.

 Tepetan moy sarilim:

•   Anto ray gamit ya kaukolan ko ed panggawak na assignment ko?

•   Kapigan so sankaabigan ya panaon ya panggawak na assignment ko?

•   Iner so lugar ya makapampokus ak?

•   Panon kon naiwasan so panagpaleen?

•   Anto ray nayarin mangamper ed siak pian maples kon nasumpal so assignment ko?

•   Panon kon napaliisan iray mangibalang na pokus ko​—singa saray gadyet?

•   Panon kon naseguro ya nasumpal ko ray assignment ko ya agak na-stress ya maong odino mapagpaga ed saratan?

 IMPORTANTIN PANONOT: Seguradom ya natatalosan mo no anto ray kaukolan mon gawaen ed assignment mo. No wala ray tepet mo, mantepet ka ni ed maestram odino maestrom antis kan onsempet.