Kasin natatakot kan idedikay sarilim ed si Jehova tan manpabautismo? No on, makatulong ed sika iyan artikulo.

Diad sayan artikulo

•  Panon to no makagawa ak na seryoson kasalanan no abautismoan ak la?

•  Panon to no agko nagawaan iray responsabilidad na sakey ya bautismado?

•  Panon to no pakaliknak et agak makanepegan ya manlingkor ed si Jehova?

•  No antoy ibabaga na arum ya kabataan

 No akin ya sankanonot mo itan: Ompan walay kabat mo ya akagaway seryoson kasalanan kanian nakal ed kongregasyon. (1 Corinto 5:11-13) Ompan aburido ka ya ontan met so nagawad sika.

 “Nen unaan kon naisip ya labay ko lay manpabautismo, natatakot ak ta ompan makagawa ak na seryoson kasalanan kayari to. Seguradon nabaingan iray atateng ko.”—Rebekah.

 Ibabaga na Biblia: “Ibeneg komon na marelmeng a too so kagagawa to . . . Sikatoy ompawil komon ed si Jehova, a mangipatnag na panangasi ed sikato, on, diad Dios tayo, ta baleg so panamerdona to.”—Isaias 55:7.

 Isip mo pa: Anggaman eekalen ed kongregasyon iray agmagbabawin nankasalanan, ipapatnag nen Jehova so panangasi ed saramay mapaabeban magbabawi tan mangawat na panangipetek.—Salmo 103:13, 14; 2 Corinto 7:11.

 Tan diad tua, anggano agka perpekto, sarag mon labanan so tukso diad tulong na Dios. (1 Corinto 10:13) Tandaan, sikan mismo so mandesisyon no anto ray gawaen mo, aliwan say arum. Di ba?

 “Natatakot ak ya ompan makagawa ak na seryoson kasalanan no abautismoan ak la, balet a-realize ko ya baleg a lingo no ipaleen koy manpabautismo. A-realize ko met ya agak dapat manpaapekto ed saray panaaburidoan ko ya nagawad arapen ta atan so manpigil ed siak ya onkiwas la natan.”—Karen.

 Tandaan: No talagan labay mo, sarag mon iwasan so manggaway seryoson kasalanan, singa met gagawaen na dakel ya lingkor nen Jehova natan.—Filipos 2:12.

 Ompan makatulong iya: Nengnengen so “Panon Kon Nalabanan so Tukso?”

 No akin ya sankanonot mo itan: Singa bilang, ompan wala ray kabat mon kabataan ya linmad arum ya lugar ya arawid pamilya ra pian napalaknab day panaglingkor da ed si Jehova. Ompan aburido ka ya ontan met so ilaloan na arum ya gawaen mo.

 “Dakel so pribilehyon sarag ya dampoten na sakey ya bautismado, balet aliwan amin et akaparaan la parad saratan odino ag-iyabuloy na kipapasen da.”—Marie.

 Ibabaga na Biblia: “Usisaen komon na kada sakey so gagawaen to, tan kayari na satan et sikatoy nawalaay rason a manliket nipaakar ed sarili to labat, aliwan diad pangikokompara toy sarili to ed arum.”—Galacia 6:4.

 Isip mo pa: Imbes ya ikomparay sarilim ed arum, manpokus kad samay bilin ya walad Marcos 12:30: “Arom si Jehova a Dios mo ed interon pusom.”

 Abitlad satan ya nepeg mon lingkoran si Jehova ed interon pusom, aliwan puso na arum. No talagan inarom si Jehova ed interon pusom, manggawa kay paraan pian niiter mo ed sikato so sankaabigan mo.

 “Tua ya say bautismo et seryoson desisyon balet aliwa iyan makapabelat. No miulop ka ed saray maong so impluensya ra, natulongan da ka. Tan legan mon aawaten iray responsabilidad mo, mas naaaruman so liket mo. No iiwasan moy manpabautismo, ipepeligrom laingen so bilay mo.”—Julia.

 Tandaan: Kaukolan mon apresyaen iray ipapanengneng nen Jehova ya panangaro ed sika. Atan so mamabiskeg ed sika ya gawaen so sankaabigan mo parad sikato.—1 Juan 4:19.

 Ompan makatulong iya: Nengnengen so “Gaano Ako Karesponsable?”

 No akin ya sankanonot mo itan: Si Jehova so Soberano ed interon uniberso; abebbeba iray totoo no ikompara ed sikato! Ompan manduaruwa ka ni ingen no kasin kabat to ka odino amta to ya wala ka.

 “Lapud Tasi nen Jehova iray atateng ko, aburido ak ta ompan ‘atawir’ ko labat ed sikara so relasyon kod si Jehova tan aliwan siak ya mismo so inyasingger tod sikato.”—Natalie.

 Ibabaga na Biblia: “Anggapoy makaasingger ed siak likud no sikatoy iyasingger na Ama ya angibaki ed siak.”—Juan 6:44.

 Isip mo pa: Natan ta iisipen mo lay manpabautismo, agkasi paraan itan nen Jehova pian mas onapit ka ed sikato? Labay mo kasin awaten so imbitasyon tod sika?

 Tandaan mo met ya si Jehova so mangibaga na estandarte parad saramay iyasingger to ed sikato, aliwan sika odino say arum. Tan ipapaseguro ed sika na Salita to ya no ‘onapit ka ed Dios, sikatoy onapit ed sika.”—Santiago 4:8.

 “Natan ta naaralan moy nipaakar ed si Jehova tan inmapit kad sikato, ebidensya itan ya inaro to ka. Kanian no onsebang lad isip mo ya agka makanepegan ya manlingkor ed sikato, ipanonot mod sarilim ya aliwan ontan so iisipen nen Jehova. Tan lanang ya duga si Jehova.”—Selina.

 Tandaan: No naabot mo la ray kakaukolanen na Biblia parad bautismo, kualipikado ka la sirin ya mandayew ed si Jehova. Tan tandaan mo ya kanepegan ton naawat so panagdayew mo.—Apocalipsis 4:11.

 Ompan makatulong iya: Nengnengen so artikulon “Akin et Dapat ya Manpikasi Ak?”