Walay feelings mo ed sikato tan parad sika et pareho kayoy nalilikna. Kasi, lanang kayon manka-text, mankaiba kayo no walay gathering . . . , tan sweet iray ite-text tod sika.

 Kanian, tinepetan mo no antoy status yo pian naamtaan mo no pareho kayoy nalilikna. Say ebat to? “Kaaro labat so turing kod sika.”

•  No antoy nalikna

•  No akin ya nagagawa

•  No antoy nagawaan mo

 “Naasar ak ya maong​—naasar ak ed sikato tan ed sarilik! Inagew-agew kamin manka-text tan impalikna ton interesado ed siak. Siempre, a-develop ak.”​—Jasmine.

 “Mantsa-tsaperon kamin dua ed sakey ya saninaro. No maminsan, singa kami mando-double date. Lanang kamin maniistoryaan, insan nagmaliw kamin textmate. Kanian, agko natanggap nen imbaga ton sankaaro kami labat tan wala la manayay boyfriend to.”​—Richard.

 “Walay laki ya inagew-agew to ak ya ite-text, tan ‘sweet’ kami no maminsan. Pero nen imbagak ed sikatoy feelings ko, akalek tan imbaga ton, ‘Agko ni labay so mi-girlfriend natan!’ Kanian, grabe impanakis ko.”​—Tamara.

 Say leksion: No feeling mo et labay to kan magmaliw ya inaro, insan naamtaan mon sika labat manayay makakalikna na onman, natural labat ya manpasnok ka, nabaingan, tan pakaliknam et aloko ka. “Nen agawa yad siak, asakitan ak ya maong,” so imbaga na kabataan ya si Steven. “Abayag insan ak nantiwala lamet ed arum.”

 Lapud text tan social media, mainomay ya na-develop so feelings mod sakey ya too ya anggapo met manayay feelings tod sika. Nengnengen no antoy ibabaga na arum ya kabataan.

 “No ite-text to ka ompan isipen mon interesado ed sika, pero manpapalipas labat manaya na oras. Tan no inagew-agew to kan ite-text, ompan na-misinterpret mo ya espisyal kad sikato.”​—Jennifer.

 “Nayarin say sakey et seryoso tan labay ton nawalaay inaro, pero samay sakey et labay to labat ya walay nakatongtong to tan magmaliw ya sikat.”​—James.

 “Say simplin text ya ‘good night’ et nayarin isipen ya sweet, pero ompan singa labat ‘balibalin’ text ya in-send na sakey ya ‘sales agent.’”​—Hailey.

 “Say labay ya ibaga na ‘smiley’ et nayarin ‘mabait ak labat ed sika’ odino ‘walay panggustok ed sika.’ Pero no maminsan, iisipen na makakaawat na message ya walay panggusto tod sikato.”​—Alicia.

 Say leksion: Agmo iisipen ya lapud iikdan to kay atension et wala lay panggusto tod sika.

 Mainomay ya ibaga pero mairap ya gawaen. Ibabaga na Biblia: “Say puso et agnapanmatalkan nen say antokaman a bengatla tan desperado.” (Jeremias 17:9) Lapud satan, ompan isipen mon labay ton magmaliw kayon saninaro, insan na-realize mon diad imahinasyon mo labat manaya itan.

•   Magmaliw ya rasonable. Isip mo nin maong no anton talagay relasyon yo. Tepetan moy sarilim, ‘Wala kasi rason kon isipen ya espisyal so panagtrato tod siak?’ Agmo papaulyanan ya natalo na emosyon mo so ‘pakayarim ya mankatunongan.’​—Roma 12:1.

•   Magmaliw ya malikas. Imbes ya say nonoten mo et saray rason ya mangipapanengneng ya agkayo labat sankaaro, manpokus kad saray rason ya mangipapanengneng ya sankaaro kayo labat. Agmo iisipen ya no walay feelings mo ed sakey a too, ontan met so feelings tod sika.

•   Manalagar. Anggad agto ibabaga ya walay panggusto tod sika, agka onaasa ta ompan nasakitan ka labat no aliwa manayay iisipen mo.

•   Ibagam so tua. Ibabaga na Biblia ya walay “panaon na pansalita.” (Eclesiastes 3:7) No labay mon naamtaan no kasin aliwa labat lan kaaro so turing tod sika, mitongtong kad sikato. “No aliwan parehas so feelings yo,” so imbaga na kabataan ya si Valerie, “mas maong ya nasakitan ka natan nen say ombayag na pigaran bulan insan mo labat na-realize ya anggapo met manayay panggusto tod sika.”

 Say leksion: “Alwaran [o protektaan] moy pusom,” so ibabaga na Proverbio 4:23. No walay panggustom ed sakey, amtaen mo no wala met so panggusto tod sika. No paulyanan moy sarilim ya na-develop ed sikato antis mon naamtaan so feelings to, singa ka labat mantatanem na tanaman ed bato.

 No naamtaan mon walan talagay feelings tod sika—tan wala ka lad edad tan ready ka lan mi-boyfriend o mi-girlfriend—walad sika no kasin ituloy mo. Tandaan, no onloob kad panangasawa, maliket kayo no parehoy espiritual ya goal yo, anggapoy iyaamot yo, tan matua kayo. (1 Corinto 7:39) Ginmapo kayon sankaaro tan seguradon mantultuloy kayon maapit ya sankaaro.​—Proverbio 5:18.