Dakel ya estudyante natan so manaaral ed duman klase ya “classroom”—diad mismon abung da. No ontan so situasyon mo, antoy gawaen mo pian nagunggonaan kan maong? Nia ray pigaran makatulong ed sika. a

•  Limaran tip ya makatulong ed panaral mo

•  No antoy ibabaga na arum ya kabataan

•   Iplanom so inagew-agew ya gawaen mo. Manggawa kay regular ya eskedyul ya singa gagawaen mo no manaaral kad eskuelaan. Walay espisipikon oras no kapigan mo gawaen iray schoolwork mo, kimey ed abung, tan arum nin importantin gagawaen mo. Nayarim met ya i-adjust so eskedyul mo no talagan kaukolan.

   Prinsipyo ed Biblia: “Amin a bengatla et nagawa komon . . . diad mauksoy a paraan.”​—1 Corinto 14:40, paimanod leksab.

   “Isip mo ya singa ka walad eskuelaan. Kaukolan mon sumpalen iray gagawaen mo diad dugan oras.”​—Katie.

   Isip mo pa: Akin et mas maabig no isulat moy eskedyul mo insan mo ipaskil itan ed pasen ya mainomay mon nanengneng?

•   Aral moy nawalaan na disiplina ed sarili. Pian natulongan kan man-mature, gawam iray bengatlan kaukolan mon gawaen anggano singa agmo labay iratan. Agka manpapaleen!

   Prinsipyo ed Biblia: “Magmaliw kayon makuli, aliwan mangiras.”​—Roma 12:11.

   “Mair-irap so nawalaay disiplina ed sarili. Balet main-inomay so manbaraan tan mangibagay, ‘Naanik la gawaen iray schoolwork ko.’ Pero agmo met lan lamang gawaen kanian natambakan kay kimey.”​—Alexandra.

   Isip mo pa: Panon ya makatulong so panggawam na saray schoolwork mo diad parehon lugar tan oras pian nawalaan kay disiplina ed sarili?

•   Mananap kay pasen ya panaralan mo. Nepeg ya sankaalam labat iray amin ya kaukolan mo. Importante ya komportable ka ed lugar ya panaralan mo, balet aleg met ya sobsobra ta ompan makaugip ka laingen. Wadman ka pian manaral, aliwan pian onugip! No anggapoy available ya pasen ya para labat ed panaral mo, nayari kan manaral diad kusina odino diad kuarto no agew.

   Prinsipyo ed Biblia: “Saray plano na makuli et seguradon ontalona.”​—Proverbio 21:5.

   “Iyatol mo ni bola, video games, gitara, tan iyan mod silent mode so cellphone mo. Pian makapanaral ka, agmo iyaabay ed sika iray mangala na pokus mo.”​—Elizabeth.

   Isip mo pa: Anto ray nayarin umanen mo ed pasen ya panaaralan mo pian mas makapampokus ka?

•   Aral moy manpokus. Manpokus ka ed gagawaen mo tan iwasan moy man-multitasking. No sabay-sabay mon gawaen so pigaran kimey, ompan mas dakel so lingom tan nabayagan ka laingen ya sumpalen iratan.

   Prinsipyo ed Biblia: “Usar yod sankaabigan so panaon yo.”—Efeso 5:16.

   “Naiirapan ak ya manpokus no walad abay koy cellphone ko. Nasasayang so panaon ko ed saray aliwan importantin bengatla.”​—Olivia.

   Isip mo pa: Sarag mo kasin sandaraiset ya aruman so panaon mo pian makapampokus ka ed panggawam na sakey ya kimey?

•   Tunda kan magano. Manakar-akar ka, manbisikleta, odino man-exercise ka. Ontulong iratan pian nabawasay kesaw mo. “Pero sumpal mo ni iray kimey mo,” so imbaga na libron School Power. “Mas man-enjoy ka ed free time mo no asumpal mo lan amin iray kaukolan mon gawaen.”

   Prinsipyo ed Biblia: “Mas maong ni daiset a painawa nen say alablabas a panagkimey tan panguusil ed dagem.”​—Eclesiastes 4:6.

   “Diad eskuelaan, maslak et sarag moy makaaral ya mantogtog na musical instrument odino makaaral ed art class. Sanen agko la iratan nagawaan, insan ko labat alikna ya labay ko iratan ya gawaen. Kanian likud ed panaaral mo, mas marakep no walay amtam ya libangan ya makagunggona ed sika.”​—Taylor.

   Isip mo pa: Anto ran klase na libangan so ontulong ed sika pian ganado kan mangituloy ed saray schoolwork mo?