Unonan Samuel 10:1-29
10 Nadngelan na reyna na Sheba so nipaakar ed kinen Solomon, a saya so kirarayewan na ngaran nen Jehova,+ kanian sikatoy linma pian suboken si Solomon diad panamegley na mairap iran tepet.*+
2 Et sinmabid Jerusalem a walay angulop ed sikaton makapadinayew a grupo+ tan wala ray kamelyon de-awit na larak a balsamo,+ dakdakel a balitok, tan saray mablin bato. Sikatoy linmad si Solomon tan imbaga ton amin so walad puso to.
3 Et inebatan nen Solomon so amin a tepet to. Anggapon balot so nanirapan na* ari ya ipaliwawa ed sikato.
4 Sanen anengneng na reyna na Sheba so amin a karunongan nen Solomon,+ say abung ya impaalagey to,+
5 saray naakan diad lamisaan to,+ say akayurongan na saray opisyal to, say panagserbi ed lamisaan na saray serbidor tan say sulong da, saray managserbi na iinumen to, tan saray bagat a popoolan a regular ton iyaapay diad abung nen Jehova, agaylay impandinayew to.*
6 Kanian inkuan tod ari: “Tua may nadngelan kon balita sanen wala ak ed dilin bansak nipaakar ed saray agawaan mo* tan karunongan mo.
7 Balet ta agko anisiaan iray balita anggad sanen linma ak dia tan anengneng kon mismo. Et anggapo ni kapaldua may imbaga rad siak. Apalumbasan mo ni so abalitaan kon karunongan tan inkaaligwas mo.
8 Maliket iray totoom, tan maliket iray lingkor mo a naynay a walad arapan mo, ya ondedengel ed karunongan mo!+
9 Narayew komon si Jehova a Dios mo,+ samay naliliketan ed sika diad impamayurong tod sika ed trono na Israel. Lapud agmanganggan panangaro nen Jehova ed Israel, tinuro to ka bilang ari pian mangipaakseb na hustisya tan inkatunong.”
10 Insan inikdan to so ari na 120 talento* a balitok, dakdakel a larak a balsamo,+ tan saray mablin bato.+ Anggapo lan balot so naawat a mipara ed karakel na larak a balsamo ya inter na reyna na Sheba ed si Arin Solomon.
11 Say grupo na saray barko nen Hiram a mangaawit na saray balitok manlapud Ofir+ et angawit met na dakdakel a troso na kiew ya algum+ tan saray mablin bato manlapud Ofir.+
12 Saray troso na kiew ya algum et inusar na ari diad impanggawa tod saray barandilyas parad abung nen Jehova tan parad abung* na ari, tan ed saray arpa tan saray nandeles ya instrumento na saray managkansion.+ Anggapo lan balot so naawat odino anengneng a singa ontan iran troso na kiew ya algum anggad sayan agew.
13 Inter met nen Arin Solomon so antokaman a pinirawat tan kinerew na reyna na Sheba, nilikud nid saray inter tod sikato diad inkamabunlok na ari.* Kayari na satan, sikatoy sinmempet ed dilin bansa to a kaiba iray lingkor to.+
14 Tan say belat na balitok a nanaawat nen Solomon kada taon et 666 a talenton balitok,+
15 nilikud ed saramay manlalapud saray managlako tan saramay nanaawat to ed saray negosyante tan ed amin ya arari na saray Arabo tan saray gobernador diad dalin.
16 Si Arin Solomon et nanggawa na 200 ya angkakabaleg a panagsamper ya inusaran toy nilaokan a balitok+ (600 a siklon* balitok so inusar ed kada panagsamper)+
17 tan 300 a panagsamben* ya inusaran toy nilaokan a balitok (taloran mina* a balitok so inusar ed kada panagsamben). Insan inyan iraya na ari diad Abung na Kakiewan na Lebanon.+
18 Nanggawa met so ari na marakdakep a tronon garing*+ tan binalkot to itan na puron balitok.+
19 Walay anemiran balitang a paonlad trono, tan walay malimpek a tarong diad benegan na trono, tan wala ray tapewan na lima ed balang diking na yurongan, tan walay duaran estatua na leon+ diad abay na saray tapewan na lima.
20 Tan walay 12 estatua na leon diad anemiran balitang, sakey ed kada sampot na anemiran balitang. Anggapoy arum a panarian ya akapanggawa na singa satan.
21 Amin a panagkargaay iinumen nen Arin Solomon et gawad balitok, tan amin a kagawaan ed Abung na Kakiewan na Lebanon+ et gawad puron balitok. Anggapo so gawad pilak, ta say pilak et ipapasen ya anggapoy kablian diad panaon nen Solomon.+
22 Ta say ari et walaan na grupo na saray barko na Tarsis+ ya ombiabiahe a kaiba so grupo na saray barko nen Hiram. Maminsan ed kada taloy taon et onsasabi so grupo na saray barko na Tarsis a nankarga na saray balitok tan pilak, saray garing,*+ bakes, tan paboreal.*
23 Kanian si Arin Solomon so sankayamanan+ tan sankarunongan+ ed amin ya arari na dalin.
24 Tan saray totoo ed interon dalin et labalabay day makapiarap ed si Solomon pian ondengel ed karunongan to ya inyan na Dios ed puso to.+
25 Saramay ombibisitad sikato et mangaawit na regalo—saray kagawaan a pilak, kagawaan a balitok, kawes, armas, larak a balsamo, kabayo, tan mula*—tan tinaon iyan nagagawa.
26 Tan intultuloy nen Solomon so nantipon na saray karwahe tan saray kabayo;* sikatoy awalaan na 1,400 a karwahe tan 12,000 kabayo,*+ tan inyan to iratan diad saray syudad na saray karwahe tan diad asingger ed kawalaan na ari ed Jerusalem.+
27 Say pilak diad Jerusalem et ginawa na ari a singa karakel na saray bato, tan saray kiew a sedro a singa karakel na saray kiew a sikomoro a walad Sefela.+
28 Saray kabayo nen Solomon et sasaliwen ed Ehipto, tan saray ulop na negosyante na ari so pakyawan a manasaliw ed saratan* diad nigetar a presyo.+
29 Kada karwahen sasaliwen ed Ehipto et manbili na 600 a piraso na pilak, tan say sakey a kabayo et manbili na 150 piraso na pilak; insan da ilalako iratan ed amin ya arari na saray Heteo+ tan arari na Sirya.
Paimanod leksab
^ Odino “na saray pabitla.”
^ Literal, “Anggapoy niyamot ed.”
^ Literal, “anggapo lay espiritu ed sikato.”
^ Odino “saray salitam.”
^ Say sakey a talento et 34.2 kilo. Nengnengen so Apendise B14.
^ Odino “palasyo.”
^ Literal, “unong ed lima nen Arin Solomon.”
^ Say sakey a siklo et 11.4 gramo. Nengnengen so Apendise B14.
^ Melag a panagsamper a kaslakan ya aawiten na saray managpana.
^ Diad Hebreon Kasulatan, say sakey a mina et 570 gramo. Nengnengen so Apendise B14.
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
^ Sakey a masansanting tan makolor ya ayep a singa kabaleg na pabo. Diad Ingles et peacock.
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
^ Say Hebreon salita et manutukoy ed nanlaok a poli na asno tan kabayo.
^ Odino “lalakin de-kabayoan.”
^ Odino “lalakin de-kabayoan.”
^ Odino posiblin, “manlalapud Ehipto tan Kue; sasaliwen iratan na saray negosyante na ari manlapud Kue,” a nayarin manutukoy ed Cilicia.
